मती 22
22
बपलाः भोज रआ कहनी
(लूका 14:15–24)
1ईसु, उनकु के अरो कहनी रे गागाम हेलावेनाय, 2“सोवाराग राइज उनी राजा लेका हेनाःआं, जे ता अपन होपोन हेरेल रआ बपलाः रे भोज एमाःकुवाय। 3राजा ता अपन नेवतेहेर होरकु के होहो अगु कथिर अपन बन्धुवा के कुलेःकुवाय, मुदा उनकु काकु हेच्चेना। 4राजा ता अपन बन्धुवा के अरो कुलेःकुवाय, आर गामवाःकुवाय, चि जे-जे मनवा के बपलाः भोज रे होहो एकानाकु उनकु के गामवाकुपे, ‘इञ ठिनुः भोज तेयारेना, इञ रेन उरीच अरो असुल वन मोटा-मोटा जनावार गेत एनाकु। अरो सुबिन्नाः तेयार एना, बपलाः भोज रे हिजुःपे।’ 5मुदा उनकु ता जहय काकु धेयान लाःआ अरो अपन-अपन कामि रेकु धेयान एता अरो ओकोय खेत रे कामि अरो ओकोय अपन बेवपार रे तोराकुवा। 6एटाः नेवतेहेर ता राजा रेन बन्धुवा के साप केते उनकु के धका-मुका केते रु गोजेः कुवाकु। 7राजा ता बेचोट कोरोध एनाय अरो अपन पलटानकु के कुलेःकुवाय। अरो उनकु ता हतयाराकु के नास वेःकुवाकु अरो उनकु रआ चट्टी रे सेंगेल लगाव कताकु। 8तोब राजा ता अपन बन्धुवा के गामवाःकुवाय, ‘बपलाः रआ भोज तेयार एकाना, मुदा नेवतेहेर नुवां रे लाइख काकु ठहरावकेना। 9इनाते चौराहा रे सिनुःपे अरो जे होर के नाम कुवापे, उनकु सुबिन के बपलाः रआ भोज रे अगुकुपे’ 10इनाते उनकु बन्धुवा खोइर-खोइर रे तोराकुवा अरो जेके गी उनकु नामेःकुवाकु, सुबिन के होहो अगुवेःकुवाकु, बुगिन मेनाकुवा चहे कठिक मेनाकुवा। सुबिन के लेयकेते हें अरो बपलाः रआ मड़वा रे मेहमानकु पेड़ेच्चेनाकु।
11“मुदा जोब राजा ता नेवतेहेर के नेनेल हेच्चेनाय, दो उनी ता ओन्डो मिहोर होर के नेलेःदेयाय, जे बपलाः किचरीः काय होरोः केनाय। 12राजा ता उनी के मेताःदेयाय, ‘ए गाति, बपलाः रआ किचरीः बे होरोः एते आम नोन्डो चिलका ते हेच्चेनाम?’ मुदा उनी हपे गी तहिएनाय। 13#मती 8:12; 25:30; लूका 13:28 तोब राजा ता धंगोर के गामवाःकुवाय, ‘नोंय रआ ती बका तोल केते नोंय के टांड़ी लुबाः रे गिड़ी कायपे ओन्डो इयाम अरो डाटा तोगोच होयुःआ।’
14“चिलिमेनचि बेचोट होरकु केदो होहो एकानाकु, मुदा सला इकु हुडिञ गियाकु।”
मालगुजारी एएम बबेत रे सवाल
(मरकुस 12:13–17; लूका 20:20–26)
15तोब फरीसिकु ता तोराकुवा अरो अकु-अकु रे बिचार एताकु चि उनी के अपन गानाम तिगी करा लेका, एते दगेयाबुन। 16फरीसिकु ता अपन चेलाकु के हेरोदेस राजा के गाति एएम जहुदिकु लोः कुलेःकुवाकु। उनकु ता ईसु के मेताःदेयाकु, “गुरु, आले सारीइ कनाले चि आम सत गाम कनाम अरो परमेसर रआ होरा रआ सच गी सिख एमाकुकानाम। अरो जहय रआ कम परवाह काना, चिलिमेनचि आम होर रआ मोचा नेलकेते कम गापाम काना। 17इनाते आले के उदुःवालेम चि आम रआ चिलि बिचार हेनाःआं, कयसर#22:17 कयसर महाराजा के मालगुजारी एएम उचित हेनाःआं चि बङा?”
18ईसु ता उनकु रआ कुचाड़ सारी केते गामवाःकुवाय, “ए कपटाहाकु अपे इञ रआ चिलिमेन परीछा अगुइ कनापे? 19इञ के मियाः चांदी रआ टका देखावाञपे जेके अपे मालगुजारी एमाय कनापे।”
तोब उनकु ता, उनी ठिनुः मियाः चांदी रआ टका अगुवेताकु। 20तोब ईसु ता उनकु के कुलिवेःकुवाय, “नुवां रे ओकोय रआ छापा अरो लुतूम ओल्लेकाना?”
21उनकु ता उनी के गामवादेयाकु, “रोम रिई महाराजा कयसर रआ हेके।”
तोब ईसु ता उनकु के मेताःकुवाय, “जे रोमी राजा रआ हेके उना रोमी राजा के अरो जे परमेसर रआ हेके, उना परमेसर के एमायपे।”
22नुवां अयुम केते उनकु चकरीत एनाकु अरो ईसु के बागी केते तोराकुवा।
जुवेत बिरीतोः रआ सवाल
(मरकुस 12:18–27; लूका 20:27–40)
23 #
कु.कामि 23:8
इना हिलोः सदुकी जे जुवेत बिरीतोः वनाः काकु मनाः केना, ईसु ठिनुः हेच्चेनाकु। अरो उनी के कुलिएदेयाकु, 24#नियम 25:5“गुरु, मूसा ता गाम लाःआय चि अगर जहय हेरेल बिन होपोन जनमव केते गोजुःआय दो उनी रिई बोयहा तेः उनी रिई एरा तेः के बपला केते अपन बोयहा तेः कथिर बोंस जनमव कुवाय। 25निमीः आले रआ ताला रे सात बोयहा ताहिकेनाकु पेहलोट ता बपला लेदेयाय आर बिन होपोन जनमाव रिगी गोच्चेनाय, अपन एरा तेः के बोयहा तेः कथिर बागी वदेयाय। 26इना लेका मेझला बोयहा तेः अरो सेंझला बोयहा तेः अरो इना लेका गी, सातो बोयहा हों गोच एनाकु। 27अरो अखरी रे उनी एरा हों गोच एनाय। 28अरो उनी जुवेत बिरीतोः रे उनकु सातो बोयहा रे एते ओकोय रिई एरा होयुःआय? चिलिमेनचि उनी सुबिन बोयहा रिई एरा होय चुकाव केनाय।”
29मुदा ईसु ता जबाब एमाःकुवाय, “अपे गलत बिचार दोहोय कनापे, चिलिमेनचि परमेसर रआ बचन आर परमेसर रआ सोमोर्थ ता कपे सारीइकाना। 30चिलिमेनचि जुवेत बिरीतोः तयोम ना हेरेल बपलाः अकु अरो ना एरा बपला कुवाकु, मुदा उनकु सोवारागदूतकु लेका होयुःआकु। 31मुदा गोच इकु रे एते जुवेत बिरीतोः रआ बबेत रे चिलि अपे ता नुवां बचन ता कपे पोड़हाव एकाना, जे परमेसर ता अपे के गामवाःपे केनाय। 32#उठ 3:6इञ अबराहम रिई परमेसर अरो इसहाक रिई परमेसर अरो जाकूब रिई परमेसर हेकेञ? उनी गोच इकु रिई बङा, मुदा जुवेत इकु रिई परमेसर हेकेय।”
33नुवां ओनाव केते होरकु उनी रआ उपदेस एते चकित एनाकु।
सुबिन एते मरंग हुकूम
(मरकुस 12:28–34; लूका 10:25–28)
34जोब फरीसिकु ता अयुम एताकु चि ईसु ता सदुकिकु रआ मोचा बोन्द कताय, दो उनकु मीः ठिनुः जमा एनाकु। 35अरो उनकु रे एते मिहोर परमेसर रआ धरम पोथी सिखाव वनीः ता ईसु के परीछा कथिर कुलिएदेयाय, 36“गुरु! मूसा रआ नियम रे एते सुबिन एते मरंग हुकूम करा ता हेके?”
37 #
नियम 6:5
ईसु ता उनी एते मेताःदेयाय, “अपन परभु परमेसर के अपन पुरा मोन अरो अपन पुरा जीव अरो अपन पुरा हिरदय एते दुलार कुम।” 38नियागी सुबिन एते मरंग अरो पहिल हुकूम हेके। 39#लेवी 19:18अरो इना लेका गी दुसरा हुकूम हों हेनाःआं, चि अपन आसे-पासे रेन एते अपन लेका दुलार कुम। 40#लूका 10:25–28नियागी बारया हुकूम हेके। मूसा रआ नियम अरो परमेसर सोझ एते नधनी वनकु रआ पोथी रे जे गी ओल एकाना उना सुबिन बनार हुकूम रे टेकाव एकाना।
मसी ओकोय रिई होपोन हेरेल हेकेय?
(मरकुस 12:35–37; लूका 20:41–44)
41जोब फरीसिकु जामा केनाकु, दो ईसु ता उनकु के कुलिवेःकुवाय, 42“मसी रआ बबेत रे अपे चिलिकाः सोंचाः कनापे चि उनी ओकोय रिई होपोन हेरेल हेकेय?”
उनकु ता मेताःदेयाकु, “दाऊद रिई।”
43नियां रे ईसु ता उनकु के अरो गामवाःकुवाय, “दो दाऊद ता रावा रे होय केते ‘परभु’ चिलिमेन गाम कनाय?
44 #
सिरिञ 110:1
“‘परभु ता इञ रिई परभु एते गाम कनाय,
इञ रआ जोम ती सोझ दुरुपमी,
जोब तक चि इञ आमरेन बइरिकु के आम रआ कबजा रे कइञ कुवा।’
45जदि दाऊद उनी के परभु मेताय कनाय, दो उनी, उनी रिई होपोन हेरेल चिलका एते होय सकाव वोःकाय?”
46नुवां रआ जबाब रे जहय ईसु एते मीः सबद हों काकु गापाम दड़िवाता अरो उना हिलोः एते जहय के, उनी लोः अरो उनी के कुली रआ ढिड़ का होय्येना।
Currently Selected:
मती 22: BIY
Highlight
Share
Compare
Copy
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
