मती 21

जरुसलेम रे ईसु रआ बोलोः

(मरकुस 11:1–11; लूका 19:28–38; जोहन 12:12–19)

1जोब उनकु जरुसलेम रआ हेनात तेबाःएनाकु अरो जायतून टोंगरी रे बेतफगे हातु हेच्‍चेनाकु, दो ईसु ता बार होर चेला के गाम केते कुलेःकिनाय, 2“सामने रआ हातु सिनुःबेन अरो ओन्डो तेबाः तागी अबेन तोल वनीः मियाः गधी नामेयाबेन अरो उनी लोः मियाः गधा होपोन हों नमेयाबेन, उनी के रड़ा केते इञ ठिनुः अगुइबेन। 3अगर जहय जहन्‍नाः मेताबेनाकु दो गामवाकुबेन परभु के नोंय रआ दरकार मेनाःआं, उनी एनेन गी रुवाड़ वबेनाय।”

4नुवां इनाते होय्येना चि जे बचन परमेसर सोझ एते नधनी वनीः रआ दोवासते गाम एकाना, उना पुराव वोःओ,

5 # जक 9:9 “सियोन रिई होपोन एरा एते गामपे,

नेलेयमी, आम रिई राजा आम ठिनुः हिजुः कनाय,

उनी नमर इचाय अरो गधा होपोन रे दुरुप एकानाय,

हें मियाः कामि वनीः जनावार रिई होपोन चेतान रे।”

6अरो चेला ता सेन केते जे लेका ईसु ता उनकिन के गाम वाःकिनकेनाय, इनका गी करावेताकिन। 7अरो गधी अरो उनी रिई होपोन केहों अगु केते, अरो गधी रिई गधा होपोन चेतान रे अपन-अपन किचरीः अटेत एताकु अरो ईसु के उनी चेतान रे दुरुपोः तहिकेना। 8तोब बेचोट होरकु अपन किचरीः सोवागत कथिर होरा रे अटेत एताकु अरो एटाः होरकु दाड़ु रआ ढेवराः डइर छोरा अगु केते सोवागत कथिर होरा रे अटेत एताकु। 9#सिरिञ 118:25,26 अरो जे लहा-लहा सिनुः केनाकु अरो जे ईसु रआ तयोम-तयोम हिजुः केनाकु, उनकु सुबिन जोड़-जोड़ एते गाम एकेनाकु, “दाऊद रिई बोंस के होसान्‍ना, धेनया हेनाःइचा उनी जे परभु रआ लुतूम एते हिजुःकानाय, अरो सोवाराग रे होसान्‍ना!”

10जोब ईसु जरुसलेम रे बोलो एनाय दो सुबिन चट्टी रे हलचल मचावेना अरो होर गापाम हेलावेनाकु चि “नोंय ओकोय हेकेय?”

11“अरोकु ता गापाम हेलावेनाकु चि नोंय गलील पोरदेस रआ नासरत चट्टी रिई परमेसर सोझ एते नधनी वनीः ईसु हेकेय।”

मरंग बिनती ओड़ाः एते अखरीञ वनकु के उडुङ

(मरकुस 11:15–19; लूका 19:45–48; जोहन 2:13–22)

12ईसु ता परमेसर रआ मरंग बिनती ओड़ाः रे सेन केते जे उनकु सुबिन के जे मरंग बिनती ओड़ाः रे जे किरीञ-अखरीञ एकेनाकु, उनकु सुबिन के खंदड़ाव वेःकुवाय। अरो टका रआ अखरीञ-किरीञ कराव वनकु रआ टिबुल उलटाव कताय अरो पेरवां अखरीञ वनकु रआ चोंवकी उलटाव कताय। 13#जसा 56:7; जिरमि 7:11 आर उनकु के गामवाःकुवाय, चि “ओल एकाना इञ रआ ओड़ाः पराथना रआ ओड़ाः गामुःआं, मुदा अपे नुवां कुमरुकु रआ ठांव बाय एकाःआपे।”

14मरंग बिनती ओड़ाः रे अंधरा अरो लंगड़ा ईसु ठिनुः हेच्‍चेनाकु, उनी ता उनकु के बुगी वेःकुवाय। 15मुदा जोब मुध जाजककु अरो धरम पोथी सिखाविकु ता नुवां जे चकरीत कामि जे ईसु करावेताय, अरो धिंगाला के मरंग बिनती ओड़ाः रे, दाऊद रिई बोंस के होसान्‍ना, गाम वते नेलेःकुवाकु दो उनकु बेचोट कोरोध एनाकु, 16#सिरिञ 8:2 अरो उनकु कुलिएदेयाकु, “आम अयुम कनाम नोंकु चिलिकाः गाम कनाकु?”

ईसु ता उनकु के मेताःकुवाय, “हें, अयुम कनिञ। चिलि अपे परमेसर रआ बचन रे कपे पोड़हावेकाना, ‘चि होपोनकु अरो तोवा नुनू होपोन रआ मोचा ते हों इसतुति कराव इरी वेःकुवाम।’”

17अरो उनकु के ओन्डो गी बगी केते उनी जरुसलेम चट्टी एते बयतनियाह हातु तोराया। अरो मीः निदा तहिएनाय।

अंजीर रआ दाड़ु ता सरफाव एताय

(मरकुस 11:12–14,20–24)

18सेताः जोब उनी चट्टी रुवाड़ केनाय, दो उनी के रेंगेच एदेया। 19दो उनी होरा अतोम रे मियाः अंजीर रआ दाड़ु नेल केते ओन्डो तोराया, मुदा उना रे सेकाम बगी केते जहन्‍नाः काय नामलाःआय। अरो उना दाड़ु एते गाम्‍मेताय “नुवां रे नेबरीक एते केहयो गी का जो नो:ओ!” इनका गाम तागी दाड़ु ता इमिताः गी रोहोड़ेना।

20नुवां नेल केते चेला ता चकरीत एनाकु अरो उनकु ता गापाम हेलावेनाकु चि “नुवां अंजीर दाड़ु ता इमिनुः एनेन गी रोहोड़ेना?”

21 # मती 17:20; 1 कुरु 13:2 ईसु ता उनकु के गामवाःकुवाय, “इञ अपे के सच गी गामवापे कनिञ जदि अपे रे बिसवास हेनाःआं अरो कपे संकाय रेदो अपे उना कराव दड़िवाःआपे, जे इञ अंजीर दाड़ु एते करावितिञ, सिरीफ इनका गी बङा, जदि अपे नुवां टोंगरी एते गाम्‍मापे चि नुवां टोंगरी ओचोः जोनमी आर समुदर रे सेन केते डुबाव जोनमी दो नुवां होय उतर वोःओ। 22अरो अपे जहन्‍नाः बिसवास केते पराथना रे कोयियापे दो उना अपे नम्‍मापे।”

ईसु रआ हक रआ बबेत रे सवाल

(मरकुस 11:27–33; लूका 20:1–8)

23ईसु मरंग बिनती ओड़ाः रे सेन केते सिख एमाकुकन केनाय दो मुध जाजककु अरो होर रेन मुधकु ता उनी ठिनुः हेच केते कुलिएदेयाकु, “आम नुवां ओकोय रआ हक एते कराव कनाम अरो आम के नुवां हक ओकोय ता एम एकावाःमाय?”

24ईसु ता जबाब एमाःकुवाय, “इञ हों अपे के मियाः गानाम कुलि पेकानिञ, जदि अपे उना उदुःइयापे रेदो इञ हों अपे के उदुःवापेयिञ चि नुवां कामि करा हक एते कराव कनिञ। 25जोहन रआ बतिसमा ओकोय सोझ एते तहिकेना, सोवाराग सोझ एते चि मनवा सोझ एते तहिकेना?”

तोब उनकु ता अकु-अकु रे गापाम हेलावेनाकु, “जदि अबु गाम्‍माबुन परमेसर सोझ एते, दो उनी अबु के कुलिबुनाय दो अपे उनी रआ चिलिमेन कपे बिसवास लाःआ? 26जदि अबुन गाम्‍माबुन होरकु सोझ एते दो अबुन के भीड़ एते बोरो हेनाःआं चिलिमेनचि उनकु सुबिन जोहन के परमेसर सोझ एते नधनी वनीः मनावेय कनाकु।” 27इनाते उनकु ता ईसु के जबाब एमाःदेयाकु, “आले हों काले सारीइकाना”,

ईसु हों गामवाःकुवाय, “इञ हों अपे के काइञ उदुःवापेया चि नुवां कामि ओकोय रआ हक एते कराव कनिञ।”

बार होर होपोन हेरेल रआ कहनी

28“अपे चिलिकाः सोंचाः कनापे मिहोर मनवा रेन बार होर होपोन हेरेल तहिकेनाकिन, उनी ता पहिल होपोन तेः हेरेल ठिनुः सेन केते गामवादेयाय, ‘ए होपोन हेरेल तिहिञ अंगुर बारगी रे कामिइमी।’ 29उनी ता जबाब एमाःदेयाय, ‘इञ काइञ सिनुःआं’ मुदा तयोम एते उनी पसतावेनाय, अरो तोराया। 30अरो आपु तेः ता अरो मिहोर होपोन हेरेल तेः ठिनुः सेन केते इनका गी गामवादेयाय, उनी ता जबाब एमाःदेयाय, ‘हें हुजूर,’ सिनुःकानिञ, मुदा काय सेन केनाय। 31नोकिन बनार होर रे एते ओकोय ता आपु तेः रआ हिछा पुराव एताकिन।”

उनकु ता गामवादेयाकु, “पहिल इनीः ता।”

ईसु ता गामवाःकुवाय, “इञ अपे के सच गी गामवापे कनिञ चि मालगुजारी अगुइकु अरो साप-जोटेत वनकु अपे एते पहिल परमेसर रआ राइज रे सिनुः अकु। 32#लूका 3:12; 7:29,30चिलिमेनचि जोहन धरम रआ होरा दिसतार वते अपे ठिनुः हेच एकानाय अरो अपे उनी रआ कपे बिसवास लाःआ मुदा मालगुजारी अगुइकु अरो साप-जोटेत वनकु ता उनी रआ बिसवास एताकु अरो अपे नोकु के नेल केते तयनोम ते हों कपे पसताव केना चि उनी रआ हों बिसवास केयापे।

मिहोर सझेदारी खेतयार रआ कहनी

(मरकुस 12:1–12; लूका 20:9–19)

33 # जसा 5:1,2 “अरो मियाः कहनी ओनावेपे, मिहोर जमिनदार तहिकेनाय उनी अंगुर बारगी रे रोवाएताय अरो घोरना बाय घेराव एताय। अरो अंगुर रास उडुङ कथिर गड़हा उरेताय अरो पहरा एएम कथिर मियाः खुटरो हों बायएताय अरो उना खेतयार के ठिका रे एम केते पोरदेस तोराया। 34जोब अंगुर जो गोगोत रआ समेय हेच्‍चेना दो बारगी रिई जमिनदार ता खेतयार ठिनुः अपन बन्धुवा के कुलेःकुवाय, ताकि उनकु अपन हिस्सा रआ अंगुर जो अगुयाकु। 35मुदा खेतियारकु ता उनी रेन बन्धुवा के सबेःकुवाकु। ओकोय केदो रुवेःदेयाकु, ओकोय केदो दिड़ी एते ठिनढेर वेःकुवाकु अरो ओकोय केदो गोच उतर वेःकुवाकु। 36तोब अरो मिसा उनी ता पहिल एते अरो ढेर बन्धुवा के कुलेःकुवाय। उनकु खेतियारकु ता उनकु लोः हों इनका गी कराव वेःकुवाकु। 37अखरी रे उनी ता नुवां सोंचाव केते अपन होपोन हेरेल के कुलेःदेयाय चि, ‘उनकु ता इञ रिई होपोन हेरेल के माइन इयाकु।’ 38मुदा उनकु खेतयारकु ता जोब उनी रिई होपोन तेः हेरेल के नेलेःदेयाकु दो उनकु अकु-अकु रे गापाम हेलावेनाकु, ‘नोंय दो उनी रिई हकदार हेकेय, हिजुःपे नोय के गोजेयाबुन। अरो उनी रआ हकदार ता हथयाव केयाबुन।’ 39तोब उनकु ता उनी के साप केते अंगुर बारगी एते टांड़ी धका उडुङ केते गोच कदेयाकु।

40“अपे चिलिकाः सोंचाः कनापे जोब ओन्डो अंगुर बारगी रिई मुवार हिजुः रेदोय, उनकु खेतयार के चिलि कुवाय?”

41उनकु ता ईसु के मेताःदेयाकु, “उनी उनकु खेतयार के गोच इरिकुवाय अरो अपन अंगुर बारगी ता एटाः खेतयार के साझा रे एमाकुवाय, जे समेय रे खेती रआ अनाज रआ हिस्सा एमुःचित तहिनाकु।”

42 # सिरिञ 118:22,23 ईसु ता उनकु के मेताःकुवाय, “चिलि अपे परमेसर रआ बचन रे नुवां कपे पोड़हाव एकाना?

“‘जे दिड़ी ता राजमिसतिरिकु बेकामा ठहराव लाःआकु,

इनागी कोना रआ सुबिन एते ढेर दरकार दिड़ी बाय्येना?

नुवां परभु रआ सोझ एते होय एकाना

अरो अबुन रआ नजेर रे असचरज गिया!’

43“इनाते इञ अपे के गामवापे कनिञ परमेसर रआ राइज अपे एते रेच्‍चीयाय अरो उना उनकु जाइत के एमाकुवाय जे उनी रआ राइज रआ मोताबिक चइल-चलन ताकु तहिनोःओ। 44जे नियां दिड़ी रे उयुःवोकु उनकु चकनाचुर वोःओकु, अरो जेकर रे उना दिड़ी उयुःवोः उनकु के रीत कुवाय।”

45जोब मुध जाजक अरो फरीसिकु ता ईसु रआ सुबिन कहनी ओनाव केते सोमझावेनाकु चि उनी अबुन रआ बबेत रे गाम कनाय। 46उनकु ईसु के सासप कथिर वोःकेनाकु, मुदा उनकु भीड़ एते बोरोय केनाकु, चिलिमेनचि उनकु ईसु के परमेसर सोझ एते नधनी वनीः मानाः केनाकु।

Currently Selected:

मती 21: BIY

Highlight

Compare

Copy