मती 20
20
अंगुर बारगी रेन बेनहियार
1“सोवाराग रआ राइज मिहोर जमिनदार रआ लेका हेनाःआं जे अपन अंगुर बारगी रे बेनहियार के लगाव कथिर बेचोट सेताः ओड़ाः एते उडुङ एनाय। 2उनी ता मीः हिलोः रे, मियाः चांदी रआ टका एते बेनहियार के दोहो केते उनकु के अपन अंगुर बारगी रे कामि कथिर कुल काःकुवाय। 3लगेभगे नो बजे रआ बेरा जमिनदार ता अरो ओड़ाः एते उडुङ एनाय आर जमिनदार ता नेलेःकुवाय चि एटाः होर के चौक रे बेगारी तिंगु नेल केते 4मेताःकुवाय, ‘अपे हों इञ रआ अंगुर बारगी सिनुःपे, इञ अपे के उचित बोनी एमापिञ।’ 5अरो उनकु ओन्डो तोराकुवा। अरो, बारो बजे अरो मिसा तीन बजे रआ लगेभगे, उनी इनका गी करावेताय। 6पांच बजे अरो उनी अपन ओड़ाः एते तोराया अरो होर के बाजार रे अनते-नोनतो तिंगु नेलेःकुवाय। उनी ता उनकु के कुलिवेःकुवाय, ‘अपे चिलिमेन नोन्डो दिन भोइर बेकामि रे तिंगु एकानोःकानापे?’ 7उनकु ता उनी के गामवादेयाकु, ‘चिलिमेनचि जहय आले के बेनहियार रे काकु लगाव एकाःलेया’, उनी ता गामवाःकुवाय, ‘अपे हों इञ रआ अंगुर बारगी रे सिनुःपे।’
8 #
लेवी 19:13; नियम 24:15 “आर अयुप वोः रआ बेरा रे अंगुर बारगी रिई मुवार ता अपन भंडारी एते गामवादेयाय, तयोम लगाव केनाकु उनकु एते एटेच केते जे पहिल लगाव केनाकु, उनकु तक सुबिन के बोनी एमाकुम। 9अयुप बेरा पांच बजे जे बेनहियार के कामि रे हेलाव लेःकुवाय, हेच्चेनाकु अरो उनकु रे एते हरेक होर के चांदी रआ मिमीः टका एमाःकुवाय। 10जोब पहिल लगाव लेःकुवाय, उनकु बेनहियार हेच्चेनाकु। अरो उनकु ता सोमझावेनाकु चि अबु के जादे चांदी रआ टका नामुःआं, मुदा उनकु केहों चांदी रआ मिमीः टका गी एमाःकुवाय। 11टका दो उनकु ता अतांग एताकु, मुदा जमिनदार के सिकायत कराव वते 12उनकु ता मेताःदेयाकु, ‘जे तयोम एते हेलाव केनाकु, उनकु ता सिरीफ मीः घंटा गी कामि लाःआकु अरो आम आले केहों इमिनुः गी एमाःलेयाम जेतना उनकु के एमाःकुवाम। जोबकि आले दिन भोइर कड़काड़ाउवा सितोंग रे मेहनेत एताले।’ 13उनकु रे एते मिहोर के जमिनदार ता जबाब एमाःदेयाय, ‘गाति, इञ अपे लोः जहन अनेयाय काइञ कराव एकाःआ। चिलि इञ काइञ ताय लाःआ इञ अपे के चांदी रआ मिमीः टका एमापिञ? 14आम रआ जे बयुः काना इदी केम आर सेनजोनमी। इञ सुबिन एते तयोम दोहो लेःकुञ उनकु केहों इमिनुः गी बोनी एएम चहाः कनिञ, जेतना अपे के एमाःपिञ। 15चिलि इञ अपन धन ता जे चहाःइञ उना कराव उचित काइञ दोहोय काना? इञ बुगिनिञ चिलि आम इना रे कठिक नजेर ते नेल कनाम?’
16 #
मती 19:30; मर 10:31; लूका 13:30 “नियां लेका एते जे तयोम रेकुवा, उनकु लहा नोःओकु अरो जे लहा रेकुवा, उनकु तयोम ओ:ओकु।”
अपन गोनोच रआ बबेत रे ईसु ता तिसरा धांव आगमजानी एताय
(मरकुस 10:32–34; लूका 18:31–34)
17जोब ईसु बारहों चेलाकु लोः जरुसलेम सिनुः केनाय दो उनी उनकु के होरा एते मीः अतोम इदी वेःकुवाय अरो उनकु के मेताःकुवाय, 18“अयुमपे, अबुन जरुसलेम तेबाः ओःकानाबुन। ओन्डो मनवा रिई होपोन तेः हेरेल के मुध जाजककु अरो धरम पोथी सिखाविकु रआ ती रे सोंपावियाकु। उनकु उनी के गोच उतर लेकन दंड एमायाकु। 19अरो उनकु गइर-जहुदिकु रआ ती रे सोंपावियाकु जे उनी के लेचेड़-लेचेड़ वयाकु आर कोड़रा एते सोड़ेच्चीयाकु अरो उनी के कुरुस रे रकापियाकु। मुदा पेय हिलोः रे अरो जुवेत बिरितताय।”
मिहोर माय रआ अरजी
(मरकुस 10:35–45)
20जोब जबदी रिई एरा अपन होपोन तेः हेरेल लोः ईसु ठिनुः हेच केते जोहार एदेयाय अरो उनी के जहन्नाः कोकोय हेलावेनाय।
21ईसु ता उनी के गामवादेयाय, “आम चिलिकाः चहाः कनाम?”
उनी ता ईसु के गामवादेयाय, “नुवां बचन एमुःमी चि इञ रेन बार होर कोरा होपोन के आम रआ राइज रे मिहोर के आम रआ जोम ती सोझ अरो मिहोर के आम रआ लेंगा ती सोझ दुरुप ककिन।”
22ईसु ता जबाब एमाःकिनाय, “अबेन कबेन सारीइकाना चि चिलिकाः कोय कनाबेन। चिलि अबेन दुख रआ उना डुभनी रआ नुनू वनाः नु दड़िवाःअबेन, जे इञ नुनू वनीः हेनाञा?”
उनकिन ता ईसु के मेताःदेयाकिन, “हें, अलिञ नु दड़िवाःलिञ!”
23ईसु ता उनकिन के गामवाःकिनाय, “अबेन इञ रआ डुभनी एते जरुर नुयाबेन मगर इञ रआ लेंगा ती अरो जोमती सोझ जहय के दुरुप कथिर इञ रआ कामि बङ कानाः, मगर जेकर कथिर इञ रिई आपु सोझ एते तेयार एकाना, उनी कथिर हेके।”
24नुवां अयुम केते दसो चेलाकु ता उनकिन बनार बोयहा एते खिसावेनाकु। 25#लूका 22:25,26 तोब ईसु ता चेलाकु के होहो केते गामवाःकुवाय, “अपे सारीइ कनापे चि गइर-जहुदिकु रेन हाकिमकु, मनवाकु रे अपन बोल एते सासन कनाकु अरो जे मरंग मेनाकुवा, उनकु हों होर चेतान रे हक दोहोय कनाकु। 26#मती 23:11; मर 9:35; लूका 22:26 मुदा अपे रे नुंका बनुःआं, जहय गी अपे रे मरंग बयुः चहाः कनापे अपे रिई धंगोर बयुःकाय। 27अरो जे अपे रे एते मुध बयुः चहाः कनाय, उनी अपे रिई बन्धुवा बयुःकाय। 28जे लेका मनवा रिई होपोन तेः हों सेवा-सुसार इरीः काय हेच्चेकानाय, मुदा इनाते हेच्चेकानाय चि आच सेवा-सुसार कुवाय अरो बेचोट होर रआ छोड़ाव कथिर गोनोंग एम केते आच रआ जीव एएम हेच्चेकानाय।”
बार होर अंधरा नेनेल एनाकिन
(मरकुस 10:46–52; लूका 18:35–43)
29जोब उनकु जरीहो चट्टी एते उडुङ वोःकेनाकु दो मरंग भीड़ ईसु रआ तयोम एनाकु। 30इमिताः गी बार होर अंधरा जे सड़क रआ अतोम रे दुरुप केनाकिन, उनकिन अयुम एताकिन चि ईसु सिनुः कनाय, जोड़-जोड़ एते होहो केते गामवादेयाकिन, “परभु दाऊद रिई होपोन हेरेल अलिञ रे दयायमी।”
31भीड़ रेन होर ता उनकिन के डपटाव केते गामवाःकिनाकु चि हपे तहीःबेन मगर उनकिन अरोगी जोड़ते कुर्री हेलावेनाकिन, “परभु दाऊद रिई होपोन हेरेल अलिञ रे दयायमी।”
32तोब ईसु ता थिराव केते उनकिन के होहो केते कुलिवेःकिनाय, “अबेन चिलिकाः चहाः कनाबेन चि इञ अबेन कथिर कराविञ?”
33उनकिन ता ईसु के मेताःदेयाकिन, “परभु अलिञ चहाः कनालिञ चि नेनेलालिञ।”
34ईसु ता सोगाव केते उनकिन रआ मेत जोटेतेताय अरो उनकिन एनेन गी नेनेल हेलावेनाकिन। अरो ईसु रआ तयोम एनाकिन।
Currently Selected:
मती 20: BIY
Highlight
Share
Compare
Copy
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
