मती 19

एरा बगी रआ बबेत रे ईसु रआ सिख

(मरकुस 10:1–12)

1ईसु ता नुवां गानाम गाम मुडू एताय अरो गलील बगी केते जरदन गाड़ा अना परोम जहुदिया पोरदेस रे हेच्‍चेनाय। 2अरो बेचोट भीड़ उनी रआ तयोम एनाकु अरो ईसु ता उनकु के ओन्डो बुगी वेःकुवाय।

3तोब फरीसी ता ईसु ठिनुः हेच केते उनी के परीछा कथिर गामवादेयाकु, “चिलि हरेक कारन एते अपन एरा के बागी उचित हेनाःआं?”

4 # एटे 1:27; 5:2 ईसु ता जबाब एमाःकुवाय, “चिलि अपे कपे पोड़हाव एकाना चि दुनिया बबाय वनीः ता एटेच रे, उनकिन के एरा अरो हेरेल रआ रुप बाय लेःकिनाय, 5#एटे 2:24 नियां चलते हेरेल अपन एंगा-आपु के बागी केते अपन एरा लोः तहिनोःओय अरो उनकिन बनार मीः होड़मो होयुःआकिन? 6इनाते उनकिन नेबरीक दो बार होर बङा मुदा मीः अकिन, इनाते जेके परमेसर जोड़ाव एकाःकिनाय, उनकिन के मनवा ओलोपे अलगकिना।”

7 # नियम 24:1–4; मती 5:31 उनकु ता ईसु के मेताःदेयाकु, “अरो मूसा ता नुवां हुकूम चिलिमेन ठहराव एकाःआय चि एरा बागी रआ चिट्ठी एम केते उनी एरा के बगिकाय?”

8ईसु ता उनकु के गामवाःकुवाय, “मूसा ता अपे रआ मोन रआ ढिठाय रआ चलते अपे के अपन-अपन एरा के बागी कथिर गामवाःपेकेनाय, मुदा पहिल नुंका का तहिकेना। 9#मती 5:32; 1 कुरु 7:10,11अरो इञ अपे के गामवापे कनिञ, चि जहय साप-जोटेत ता बगी केते अरो जहन कारन एते अपन एरा के बागी केते एटाः इनीः एते बपला नोःवोय, उनी साप-जोटेत कुकानाय,”

10चेला ता ईसु के मेताःदेयाकु, “जदि हेरेल अरो एरा रआ नुंकन सोबोंध हेनाः रेदो का बपलाः गी बुगिन्‍ना।”

11ईसु ता चेलाकु के मेताःकुवाय, “सुबिन नुवां गानाम काकु सोमझाः काना, सिरीफ उनकु गी सोमझाः कनाकु जेके नुवां बरदान मिलाव वेकाना, 12चिलिमेनचि आधा मनवा दो ना एरा ना हेरेल रआ रुप हेनाकुवा जे एंगा रआ होड़मो एते गी नुंका जनम एनाकु, अरो आधा ना एरा ना हेरेल रआ रुप रे हेनाकुवा, जेके मनवा ता ना एरा ना हेरेल रआ रुप बाय काःकुवाकु, अरो आधा सोवाराग रआ राइज कथिर काकु बपला केना, जे नुवां गरहन कराव दड़िवाकन रेदोपे, उनकु गरहन केपे।”

ईसु रआ आसरीबाद होपोनकु रे

(मरकुस 10:13–16; लूका 18:15–17)

13इमिन रे होर ईसु ठिनुः होपोनकु के अगुकूकन केनाकु, जेकर रे ईसु ती दोहो केते पराथनायाय। चेलाकु ता होरकु के डपटाव वेःकुवाकु, 14मुदा ईसु ता मेताःकुवाय, “होपोनकु के हेच इरीवाकुपे अरो उनकु के इञ ठिनुः हिजुः एते ओलोपे रोकावकुवा, चिलिमेनचि सोवाराग रआ राइज नेकु होपोनकु लेकानकु कथिर गी हेनाःआं”।

15अरो उनी होपोनकु रे ती दोहो केते ओन्डो एते तोराया।

धनगार धिंगाला अरो का मुडूः जीवन

(मरकुस 10:17–31; लूका 18:18–30)

16मिहोर मनवा ईसु ठिनुः हेच केते गामवादेयाय, “गुरु! का मुडूः जीवन ता ननाम कथिर चिलकान बुगिन कामि कराविञ?”

17ईसु ता जबाब एमाःदेयाय, “बुगिन कामि रआ बबेत रे इञ एते चिलिमेन कुलिञ कनाम? मियाः गी बुगिन हेनाःआं। जदि का मुडूः जीवन रे आम बोलोः चहाःकन रेदोम, सुबिन हुकूम ता पलानेम।”

18 # उठ 20:13; नियम 5:17; उठ 20:14; नियम 5:18; उठ 20:15; नियम 5:19; उठ 20:16; नियम 5:20 धिंगाला ता ईसु के कुलिएदेयाय, “चिलकन हुकूम?”

ईसु ता मेताःदेयाय, “ओलोम गोच कुवा, ओलोम साप-जोटेतकुवा, ओलोम कुमरुया, होसोड़ गोवाही ओलोम एमा, 19#उठ 20:12; नियम 5:16; लेवी 19:18अपन एंगा-आपु के इजात-कदर कुम अरो अपन आसे-पासे रेन होरकु के अपन लेका दुलार कुम।”

20धिंगाला ता ईसु के मेताःदेयाय, “इञ दो नियां सुबिन ता पालन एकाःइञ। इञ रे कारा गानाम रआ कोमी हेनाःआं अरो चिलिकाः कराव होयुःआ?”

21ईसु ता उनी के जबाब एमाःदेयाय, “जदि आम सिध बयुः चहाःकन रेदोम, सिनुःमी, अपन सुबिन सम्पति अखरीञ केते रेंगेच-रबंङकु के एमाकुम तोब आम कथिर सोवाराग रे धन नमुःआं। अरो हेच केते इञ तयोम कोःमी।”

22नुवां ओनाव केते उनी धिंगाला बेचोट उदास केते तोराया, चिलिमेनचि उनी बेचोट धनी तहिकेनाय।

23तोब ईसु ता अपन चेलाकु के मेताःकुवाय, “इञ अपे के सच गामवापे कनिञ चि धनगार के सोवाराग राइज रे बोलोः कथिर मसकिल हेनाःआं। 24इञ नुवां हों गामवापे कनिञ चि परमेसर रआ राइज रे धनगार के बोलोः एते उंट के सुइ रआ भुः रे एते परोम जोन सहज हेनाःआं।”

25नुवां अयुम केते चेलाकु बेचोट चकरीत एनाकु, अरो गाम्‍मेताकु, “दो अरो ओकोय बनचाव दड़िवा:आय?”

26ईसु ता उनकु के नेल केते मेताःकुवाय, “मनवाकु एते का होय सकाःका, मुदा परमेसर एते सुबिन्‍नाः होय सकाःका।”

27जबाब रे पतरस ता ईसु के मेताःदेयाय, “नेलमी, आले सुबिन्‍नाः बागी केते आम रआ तयोम एकानाले। दो आले के चिलिकाः नमुःआं?”

28 # मती 25:31; लूका 22:30 ईसु ता उनकु के मेताःकुवाय, “इञ अपे के सच गामवापे कनिञ चि नवां जुग रे जोब मनवा रिई होपोन तेः हेरेल अपन बारहों महिमामय राइज गदी रे दुरुपाय दो अपे हों, जे इञ रआ तयोम एकानापे बारहों राइज गदी रे दुरुप केते इसराइल रेन बारहों गोतोरकु के नेयाय कुवापे। 29अरो इञ कथिर जे ओड़ाः दुवेर चाहे बोयहा, मिसी, एंगा, आपु, होपोन, खेती-बारी ता इञ रआ लुतूम कथिर बागी एकाःआकु, उनकु साव गुना ढेर नाम्‍माकु अरो का मुडूः जीवन रआ हों हकदार बयुःआकु। 30#मती 20:16; लूका 13:30 बेचोट एते होर जे पहिल रेकुवा, तयोम ओ:ओकु अरो जे सुबिन एते तयोम अकु लहा नोःओकु।”

Currently Selected:

मती 19: BIY

Highlight

Compare

Copy