मती 17

ईसु रआ रुप बदलाः

(मरकुस 9:2–13; लूका 9:28–36)

1छो हिलोः तयोम ईसु, पतरस, जाकूब अरो उनी रिई बोयहा तेः जोहन के संघे इदिकेते सनसुन उसुल टोंगरी रे तोराकुवा। 2ओन्डो उनकु रआ सामने ईसु रआ रुप बदलावेना। उनी रआ मेत-मोचा सिंगी बोंगा लेका चमकावेना अरो उनी रआ किचरीः नुंका झिलमिलाः हेलावेना जे लेका मसकल किचरीः। 3अरो अचाका मूसा अरो एलियाह उनकु रआ सामने दिसतार एनाकिन अरो ईसु लोः नाधनी हेलावेनाकिन। 4नेलकेते पतरस ता ईसु के गामवादेयाय, “परभु, बुगिना चि अबुन ओन्डो हेनाबुना। जदि आम चहाः रेदोम इञ नोन्डो पेया तम्बु बायिञ, मियाः आम कथिर, मियाः मूसा कथिर, मियाः एलियाह कथिर।”

5 # एटे 22:2; सिरिञ 2:7; जसा 42:1; मती 3:17; 12:18; मर 1:11; लूका 3:22; नियम 18:15 # 2 पत 1:17,18 पतरस नाधनी केनाय रिगी पुंडी रिम्बील हेच केते हरुप काःकुवाय अरो रिम्बील एते मियाः सबद ओनावेना चि “नोय इञ रिई दुलारा होपोन हेरेल हेकेय जेकर एते इञ बेचोट खुसिञ। इनी रआ गी ओनावेपे!”

6जोब चेलाकु ता नुवां ओनावेताकु अरो मोचा होरा एते उयुःएनाकु आर बेचोट बोरो वनाकु। 7तोब ईसु उनकु ठिनुः तोराया अरो उनकु के जोटेत वते गामवाःकुवाय, “ओलोपे बोरोया, तिंगुःपे।” 8जोब उनकु ता संगिल एताकु दो ईसु के बागी केते आच लोः अरो जहय के काकु नेलेःकुवा।

9जोब उनकु टोंगरी एते अरगुः केनाकु दो ईसु ता उनकु के हुकूम एमाःकुवाय चि “जहन्‍नाः नेल एकाःआपे, जहय के ओलोपे उदुःवाकुवा, जोब तक मनवा रिई होपोन तेः हेरेल के गोच वनकु रे एते अरो काय जुवेत बिरीत कोःओय।”

10 # मला 4:5 अरो ईसु रेन चेला ता कुलिएदेयाकु, “धरम पोथी सिखाविकु चिलिमेन गामकानाकु, पहिल एलियाह रआ हिजुः दरकार हेनाःआं?”

11जबाब एम वते ईसु ता उनकु के मेताःकुवाय, “एलियाह हिजुः कनाय, उनी सुबिन्‍नाः सुधरावियाय। 12#मती 11:14मुदा इञ अपे के गामवापे कनिञ चि एलियाह दो हेच चुकावेनाय। मुदा उनकु ता उनी के काकु चिनहाव लेदेया। अरो उनी लोः जे लेका चहावेनाकु इनका गी कराव एदेयाकु। इनका गी उनी रआ दोवासते मनवा रिई होपोन तेः हेरेल केहों इनका गी सतावियाकु।”

13तोब उनी रेन चेलाकु सोमझावेनाकु एनाकु चि उनी ता उनी एते बतिसमा एएम वनीः जोहन रआ बबेत रे गाम एकाःआकु।

मुवां रावा कइल वनीः होपोन के बुगी कराव

(मरकुस 9:14–29; लूका 9:37–43)

14जोब उनकु भीड़ ठिनुः रुवाड़ हेच्‍चेनाकु दो मिहोर मनवा उनकु ठिनुः हेच्‍चेनाय अरो ईसु के डोंडोत केते जोहार केते मेताःदेयाय, 15“परभु, इञ रिई होपोन हेरेल रे दयायमी। उनी मिरगी रोगी हेकेय। उनी बेचोट तड़पाः कनाय। उनी सेंगेल रे चहे दाः रे घरी-घरी उयुः वोःकानाय। 16इञ उनी के आमरेन चेलाकु ठिनुः अगु लेदेयिञ, मुदा उनकु उनी के काकु बुगी दड़िवादेया।”

17ईसु ता जबाब एमाःदेयाय, “भटकाव होरकु अरो अबिसवासी! इञ अपे लोः चिमिन समेय तक अरो तहिनो:वोञ? अरो चिमिन समेय तक निंकागी अपे रआ सहाव चित तहिनो:वोञ? उनी के इञ ठिनुः अगुइपे।” 18अरो ईसु मुवां रावा के डपटाव एदेयाय अरो मुवां रावा ता उनी रे एते टांड़ी उडुङ एनाय। अरो उनी धिंगाला एनेनगी बुगी एनाय।

19अरो उनी रेन चेलाकु ता एकला रे ईसु ठिनुः सेनकेते कुलिएदेयाकु, “आले नोंय मुवां रावा के चिलिमेन काले उडुङ दड़िवादेया?”

20 # मती 21:21; मर 11:23; 1 कुरु 13:2 ईसु ता उनकु के उदुःवाःकुवाय, “चिलिमेनचि अपे रे बिसवास रआ कोमी हेनाःआं। इञ अपे के सच गामवापे कनिञ जदि अपे रे, राय रआ दाना बराबोइर हों बिसवास हेनाः रेदो अपे नुवां टोंगरी एते गाम दड़िवाःआपे ‘नोन्डो एते वोचोः केते ओन्डो सेनजोनका’ अरो उना सेन जोना। अपे कथिर जहन्‍नाः हों असम्भाव बनुःआं।” 21मुदा नुवां पराथना अरो उपास बिना काय उडुङ वोःओय।#17:21 नुवां मरी वनाः पोथी रे का ओल एकाना, 21 पद जोड़ाव एकाना।

ईसु अपन गोनोच रआ बबेत अरो आगमजानिइ कनाय

(मरकुस 9:30–32; लूका 9:43–45)

22जोब ईसु रेन चेलाकु हेच्‍चेनाकु अरो उनी लोः गलील रे नपाम्मेनाकु दो ईसु ता उनकु के मेताःकुवाय, “मनवा रिई होपोन तेः हेरेल के, मनवाकु रआ ती रे सापइरियाकु, 23उनकु, उनी के गोजेयाकु। मुदा उनी पेय हिलोः रे जुवेत बिरितताय।” नियां रे ईसु रेन चेला बेचोट बेयाकुल एनाकु।

मरंग बिनती ओड़ाः रे मालगुजारी एएम

24 # उठ 30:13; 38:26 जोब ईसु अरो उनी रेन चेलाकु कफरनहूम रे हेच्‍चेनाकु दो मरंग बिनती ओड़ाः रआ मालगुजारी अगुवान ता पतरस ठिनुः हेच केते कुलिएदेयाकु, “चिलि अपे रिई गुरु मरंग बिनती ओड़ाः रआ मालगुजारी काय एम कनाय?”

25पतरस ता जबाब एमाःकुवाय, “हें, उनी एम कनाय।” अरो ओड़ाः रे हेच्‍चेनाय। पतरस रआ गागाम एते पहिल गी ईसु गामवादेयाय, “सिमोन, आम रआ चिलि बिचार हेनाःआं? दुनिया रिई राजा ओकोय एते मालगुजारी अगुइ कनाय? आचरेन होपोन एते चहे एटाः होर एते।”

26पतरस ता जबाब एमाःदेयाय, “एटाः होर एते” तोब ईसु ता पतरस के मेताःदेयाय,

“दो उनी रेन अपन होपोनकु के छुट तहीःकाना। 27मुदा अलांङ उनकु के कलांङ ठोकोरा एमाकुवा, इनाते समुदर रे सिनुःमी अरो अपन बंसी लेबदा कम अरो जे पहिल दगुःआय, उनी हाकु रआ मोचा रड़ायाम रे, आम के मियाः चांदी रआ टाहला नामुःआं, इनागी लेयकेते इञ कथिर अरो आम कथिर मालगुजारी एम्‍मी।”

Currently Selected:

मती 17: BIY

Highlight

Compare

Copy