GEN 7
7
1Ülepene KUKANETÜGÜ kilü Noe heke: "Enkgeha ehu kuẽgü atati, egeha ehitsü ake, elimo gehale tühitsão ake. Ege tsügütse naha uãke eügühütu titagengoi ungigingalüi kugeko andongokope huja. 2Engigekeha ake takiko inkgugetoho ngeneko tepitsükoi tengenhü ihunguko. Engigeke gehale ake takiko ngeneko tepitsükoi taĩpane ihunguko. 3Engigeke gehale ake takiko inkgugetoho toloko tepitsükoi, tatuteha ngenekope kugiti etsimbükitüinginiha ngongoho. 4Ilainheha takiko inkgugetoho sigotisü atai, kongoho ngingilü tüilüingo leha uheke 40i sigotisü igotindenea kokongotenea muke gehale takitila. Egea leha tatute tetsua tuhugu ngiko tingugingo ungüipügü ngongoho imbükilüingoha uheke".
5Noe heke leha tatute KUKANETÜGÜ heke inhakongondühügüa tüilü.
Kahujü Kuẽgü
6600iha Noe isũandühügü itsagü tatute ngongoho kahujü kuẽgü inhügü hata. 7Ihigokomiha kahujü kuẽgü hinhe, Noeha tühitsü ake ijimo gehale tühitsão ake enünkgo leha ehu kuẽgü atati. 8-9Ngenekoha tengenhü ihunguko, taĩpane gehale ihungu tengelüko Noe kaenga leha etelüko ehu kuẽgü atati, talahitsinhükoha akagoi ngongoho, toloko tuhugu gehale. Takekoni leha etelüko, aetsiha ngene utoto aetsi gehale ngene itaõ, Deusu heke Noe inhakongondühügüa. 10Ülepeiha takiko inkgugetoho sigotisü tepügü atai, kahujü kuẽgü etinenügü leha ngongo itakuĩjü heke.
11600iha Noe isũandühügü atai, aetsi leha inhunegü tepügü atai, 17 gehale leha sigotisü atai, tatute leha ngongo gotalüpenginhe tuã enhügü, tuã ategü atahumitsilü gehale leha kahü alüpenginhe. 12Kongoho ngingitagü leha tütemi ngongohonga 40iha sigotisü koko gehale.
13Ege igoti uãke kahujü kuẽgü igakaho, Noe endühügü itsagü leha tühitsü ake ehu kuẽgü atati, ijimo gehale, Sẽiha, Kamüha Jafe gehale ihitsãoko gehale. 14-15Tatute leha tepitsükoi tuhugu ngeneko tinkgukinhüko, ngeneko gehale gehujalüko, tsekegükoha indzonhoko gehale, tatuteha toloko tuhugu tahekinhüko gehale talinhüko enügü leha Noe ake ehu kuẽgü atati. 16Ngene utotoguha, ngene itaũguko enügü leha aetsini tetsua tuhugu Deusu heke Noe inhakongondühügüa. Ülepene leha KUKANETÜGÜ heke ehu kuẽgü ahulugu ahunügü.
1740i leha kahujü kuẽgü igotisü telü tütemi ngongo ahi. Tuã ahujü leha ehu kuẽgü ipenunenügü igelü leha iheke ngongo tupinhe. 18Tuã ahutsagü leha aitsükü, ehu kuẽgü ipenundagü gehale leha aitsükü. 19Tuã ahujü leha aitsükü, tatute leha andüponhogu kapohongope imünenügü iheke. 20Tuã ahujü geleha aitsükü takiko inkgugetoho metroi itsapohondu andüponhogu heke tuhugu. 21Tatute leha ngongohongokope tingugingokope apüngu, tolokopeha, ngenekoha tinkgukinhükope ngenekoha gehujalükope gehale, ngenekoha talahitsinhükope ngongoho kugekope tuhugu gehale. 22Tatute leha ngongoho tingugingokope apüngu. 23Noe tsügütse leha hüle titsatinhükope gehale ehu kuẽgü ata tatinhükoi tingugi. Tatute leha hüle ngongohongokope apüngu, kugekopeha akagoi, ngeneko tuhugu tinkgukinhüko ngeneko gehujalüko gehale, ngeneko tuhugu talahitsinhüko ngongoho toloko gehale.
24Kahujü kuẽgü heke leha ngongope imünenügü 150i sigotisüi.
Currently Selected:
GEN 7: KUI-BIBLE
Highlight
Copy
Compare
Share
Want to have your highlights saved across all your devices? Sign up or sign in
© Associação Linguistica Evangélica Missionária
