GEN 34

Jako Limo heke Sikẽi Otomo Epügü

1Jinaha, Jako indisü Lia ake, telüha itua tongopenginhe titalüko itaõko ingadzelüinha. 2Hamoha, Hefe itagü, ege ngongogu anetügüha, aetsiha imugu igatohopeha Sikẽi. Jina ingigote leha iheke, ihenügü leha iheke tetumbungudale isajotitomi iheke. 3Tüakiti leha Jina, Jako indisü ingilü igelü iheke, hekite leha umbege tingukutingeti itaginhitagü iheke, sakitiha umbege itsomi. 4Üle ateheha Sikẽi kilü tũü Hamo heke: "Ikakeha ese daũke otomo inha uhitsüi itsomi", nügüha iheke tũü heke.

5Jako heke leha tindisü Jina ihetühügü uhunügü Sikẽi heke tetumbungudale. Ijimo atai geleha ipingohüngü tahugapingote ngeneko igelü heke tuhugu etinhambagokomi, inhalüha ihanügüi iheke aetsingoiha ogopisokondeni üngati.

6Ülepeiha Sikẽi apa Hamo telü leha Jako ake titaginhu inha. 7Jako limo etimbelütse ingugi leha ipingohüngü tahugapingo tongopenginhe ngeneko ake, egea leha atühügüko uhunügü ihekeni, aitsükü leha ukotühüngüi inhünkgo ingukugundako leha aitsükü, Sikẽi hekeha Isigaeu limo tüipügü atehe hesinhüi, Jako indisü ihetühügü ateheha iheke tüajotutila umbege atai itsangukipügüko ateheha iheke, hesinhü hekuguha egei, inhalütseha uãke egea ipolüi.

8Ülepeiha Hamo kilü ihekeni: "Umuguha Sikẽi heke tüakiti eindisüko ingilü. Luale ataiti tundüe üngele inha ihitsüi itsomi. 9Tepisũnkgisokiha kutsüngi; laha eindisüko ngisotundai tsijimo ake, tisindisüko ngisotundai tsüha gehale elimoko ake. 10Indeha eitsüe tsihuja. Ãde tsüha ngongo eigakahoni; egitundetüeha tinhongoguho. Engihipütegüeha ngongo akitini ingigote ehekeni, ihipütelü tsüha ehekeni, ülepe igatelü gehaleha ehekeni inde", Hamo kita leha ihekeni.

11Ülepeiha Sikẽi kilü Jina apa heke ihisũüdão heke gehale: "Osi kitsüe ataitiha uheke, ngikondi leha atamini tundagüingo uheke. 12Engikatüe tsüha iti eitsohoko, kitsüeha unguama daũke ihipügü tunügüti amago uheke. Tundüe hüle atsange üngele uhitsüi itsomi", nügü leha iheke ihekeni.

13Jako limo hekeha Sikẽi itüjü isũüha Hamo itüjü gehale. Angoloilaha egei tagü ihekeni, Sikẽi hekeha ingadzuko Jina tangukipügü atehe. 14Igiaha nügü ihekeni: "Inhalü hüle ege agage tisinhümi, tisügühütuhüngüha egei tisingadzu tunümi tiheke utoto tühügi ingüpe itsaketinhihüngü inha, tsihüsukijü kenhi iheke. 15Tisagage tsügütse hüle eitsokondeni, tatuteha eitagü utotoko heke tühügiko ingüpe itsaketote, ehẽ titsilüingo. 16Ege agageha eitsokondeni tisindisü unümingo leha tiheke akeni inhotundokomi, tisuge gehaleha eindisüko ngisoi leha tisinhümingo. Ehujani leha tisinhümingo, aetsingo itagüi leha hüle kukitagüko inhümingo. 17Egeala hüle atamini, ehügiko ingüpe itsaketela, titselüingo akatsange leha hüle tisingadzupe igelüingo gehale tiheke", egea leha Jako limo kitagü ihekeni. 18Ülepei leha Hamo heke ikenikünkgo tumugu Sikẽi ake. 19Tamitsila hekugu geleha Sikẽi etunügü leha ihügi ingüpe itsaketomi, Jako indisü anügü ateheha isakiti. Sikẽiha ekisei aitsükü hekuguha isũü ünga tinapatsai tingigatinhüpe.

20Ülepeneha Hamoko telü leha tumugu Sikẽi ake ete kagahukugu ahuluguna, titaha ngiko ingugikügükilüha. Nügüha ihekeni utotoko ete tongoko heke: 21"Ukugeha agoi ukuge hekugu. Laha inde kukakeni egitundetamini, kungongogukoho ngiko igategai ihekeni ngiko ihipütegai gehale ihekeni, aka hekugu naha ãde ngongo kungipini. Indisüko ngisoi leha kunhünkgoingo, ünago gehaleha kukindisüko ngisoi gehale inhünkgoingo. 22Kupujatiniha inhünkgoingo isügühütuko itüsote kupeheni. Nügüha ihekeni tatuteha utotoko heke tühügiko ingüpe itsaketomi, isagageniha kutsokomi. 23Ege agageha kutsokondeni, tatute leha ngeneko inhengükope gehale inhümingo tsüha leha kengükoi, kunhitütsüngiha ünago kungongogukohoha itsokomi", ta leha ihekeni kugeko heke.

24Tatuteha tütenhükope akitsene talü inha ete kagahukugu ahuluguna akiti leha egea Hamo kilü inhügü Sikẽi tumugu ake, ülepei leha tatute utotoko ete tongoko hügi ingüpe itsakenügü.

25Tilako leha isigotisü tepügü atai, aitsükü leha utotoko kae isitungu hata, takikongoha Jako limo, Simeãuha Levi ake, Jina ingütokongoko hekuguha tütahoguko kukotogoho inügü leha ihekeni, enünkgo leha etena tingila, tatute leha utotokope elü ihekeni. 26Hamope elü leha ihekeni imugupe gehaleha Sikẽi espadaki, ülepei leha Jina inügü ihekeni Sikẽi üngalüpenginhe, etelüko leha. 27Ülepene leha Jako limo hisundu enhügü, ikihügüko hujaha uataleni ngiko tihipükoinhüpe ete tongope itale, tetimilükoi leha egea ingadzuko Jina tangukipügü hinhe ihekeni. 28Ovelhakope igelü tuhugu leha ihekeni, cabrakope tuhugu gehale, tapigükope tuhuguha, jumentokope tuhugu gehale tatuteha ngikope tuhugu ete tongope hihitsingoho tongope tuhugu gehale. 29Tatute leha ngiko tihipükoinhüpe inügü ihekeni üngalüpenginhe, itaõkope igelü leha ihekeni tikeni tetubungudaleni kangamukekope gehale.

30Ülepei leha Jako kilü Simeãu heke Levi heke gehale: "Enkgugi hekugu akatsange leha egei uüilü ehekeni. Igepei leha Kanahã otomo enisüi uinhümingo, Pege otomo enisüi gehale, tatute gehale teloko kitagü tuhugu ige ngongoguhongoko enisüi. Ataĩsokondeniha uelüingo leha ihekeni tatute leha ulimope kugiti, kaküngingohüngü naha kukugekoi", Jako kilü leha tülimo heke.

31Ülepeiha Jako limo kilü: "Egea naha Sikẽi heke tisingadzu tüilü, üle opijü leta tiheke, itaõ tigatenhü agage naha egei tisingadzu tüilü iheke", nügü leha ihekeni tũüko heke.

Currently Selected:

GEN 34: KUI-BIBLE

Highlight

Copy

Compare