GEN 33

Jakoko Opogipügü Esau ake

1Jako heke leha 400i utotoko enhügü ingilütse ingugi Esau ake, kangamukeko ikumenügü leha iheke isiko ẽgikini. Lia inhaha Hakeu inha gehale, takikongoko gehale inhingokuguko itaõko inha. 2Inhingokuguko itaõko inhügü leha igakahongani ijimo ake, ülepe nginheha Liaha tülimo ake, upügükoiha Hakeu Juse ake. 3Ülepene leha Jako inhügü igakahongani. Hakila leha inhügü hata tühisũügü heke, tetipondeale leha etetagü tühinitü akanetale ngongohonga, itsangiha ingilü hakitomiha iheke. Takekoha inkgugetoho isaküngindu egea inhügü hisundu.

4Esau atsakulü leha hüle Jako aũtsilüinha, itsikuõĩjü leha iheke ülepe imütü kaenga leha ikuilijü iheke. Itsikununünkgo leha opogijüko heke tügekuitügüko huja leha inilundako. 5Esau inhünuha tigüĩjüi, itaõko ingilü leha iheke kangamukeko gehale, ijeginügü leha iheke: "Tüma agoi ake?", nügüha iheke.

"Ulimoha agoi Deusu ngundühügüha uinha sakihekundu ateheha", nügü leha iheke tühinhano heke.

6Ülepei leha ihitsão takikongoko inhingokuguko telü tülimo ake, hakila leha inhünkgo Esau heke tühinitüko akanenügü leha ihekeni ngongohonga isatsagati, itsangiha ingilü hakitomi ihekeni. 7Ülepeneha Lia telü tülimo ake, tühinitüko akanenügü gehaleha ihekeni ngongohonga. Upügüiha Juse enhügü Hakeu ake, tühinitüko akanenügü leha ihekeni ngongohonga.

8Esau hekeha ijeginügü: "Tütomima ngeneko humilü tuhugu eheke uinha?", nügüha iheke.

Ülepeiha Jako kilü iheke: "Ngeneko tuhuguha agoi engikombatohoha uheke tügekuili eitsomi ukae uanetügü", nügü leha iheke.

9Ülepeiha Esau kilü: "Uhisũügü, akaha ungipi kaküngi. Ege gele tsüha engüi itsomi", nügü leha hüle iheke tühisü heke.

10Jako heke leha aitsükü ihutsitsagü: "Inhalü! Hekite naha igei uigetagü eheke, itütse ataitiha engikombatoho uheke. Timükuiliha eingigote uheke eimütü ingilü leha uheke Deusu imütü agage, hekite muke gehaleha uitaginhikügü eheke. 11Itütse ataitiha engikombatoho uheke ungingitühügüha einha. Deusu akihekugühügüha igei uheke. Tatuteha ngiko tetuhisinhü uheke tundühügüha iheke uinha". Jako heke leha aitsükü ihutsitsagü, Esau heke leha inhengikombatoho itüjü.

12Ülepeiha Esau kilü: "Kigekeba. Akeni tiha utetai", nügü leha iheke ihekeni.

13Jako kilü leha hüle: "Uanetügü, tuhuti naha eheke kangamuke kotsimbungu, ainde naha gehale ovelhako tuhugu tapigüko tuhugu gehaleha tumukuguko imbanügü hokongoko. Tüheinhi leha igegokondeni uheke, aetsingo igotiha umbege apüngukoingo leha. 14Üle ateheha uanetügü, etekeha uigakaho. Eingiha utetai tütükingoki, ngeneko tuhugu hülu kangamukeko hülu ake geleha, utimbetomiha Seihina, eituna uanetügü", nügü leha hüle iheke tühinhano heke.

15Ülepeiha Esau kilü iheke: "Osi, anginiapa utotoko uakongoko komonditomi akeni etegokomi", nügüha iheke.

Ülepeiha Jako kilü iheke: "Inhalü hüle uanetügü. Hekite tsügütse hüle uüilüti eheke uge", nügü leha iheke.

16"Osi", Esau kilü leha. Üle igotiha Esau ogopijü leha Seihina. 17Jako telüha hüle Sukotina. Tita leha ngüne hanügü iheke tetinha ngeneko inha gehaleha. Üle ateheha igatoho inhügü leha Sukoti#33.17 "Kuã" nügü hunguha egei Sukoti Isigaeu itagü itaginhui..

18Egea leha Jako ogopijü Mesopotamia tongopenginhe Kanahã ngongoguhonga, hekite gele etimbelü leha ete Sikẽina. Tita leha egituatelü hakilaha ete heke. 19Egituatepüa leha ngongo ihipütelü iheke. 100ha isaküngindu prata tüipügüki ihipütelü iheke Hamo limo inha, Sikẽi apa inhaha egeha ngongo ihipügüi. 20Tita leha tehu undagitsepügü tüilü iheke Deusu akatsohoi. Itanügüha iheke Eu-Elohe-Isigaeui#33.20 "Deusuha Isigaeu Deususü", nügü hunguha egei Eu-Elohe-Isigaeui, Isigaeu itagü itaginhui..

Currently Selected:

GEN 33: KUI-BIBLE

Highlight

Copy

Compare