GEN 35

Jako Ogopipügü Beteuna

1Deusu kilüha Jako heke: "Etekeha Beteuna tigatiha egitundeta. Engüikeha aetsi tehu undagitsepügü uakatsohoi. Deusuha ugei tapakinhüpe einha eihilü hata ehisũügü Esau hinhe", nügü leha iheke Jako heke.

2Ülepeiha Jako kilü leha tülimo heke tatuteha ikongokope heke gehale: "Angagitüeha itseke hutohope tuhugu engipingokope teloko itagü ngikeninügüha. Õtontüeha tatute ngiko hesinhü engüigatühügükope kae, egeaha tüipügü ehekeni ihakitüe otsonkgilükoki kingüha tükonkginhüpe tüilüki akaengani. 3Otongitegüeha! Kigekeba Beteuna. Titaha tehu undagitsepügü tüilüingo uheke Deusu akatsohoi uahetinhombanimbüngüha aitsükü hekuguha utinhegekilü telü hata. Uake geleha etengalü tipaki tatuteha ngikomunde utelü hata", Jako kita leha ihekeni. 4Ülepeiha tatute leha itseke hutohope tuhugu inhingitühügükope teloko itagü ngikenitatühügü tunügü leha ihekeni Jako inha, ihangagüko hokongope gehaleha tükaeni nhigegatühügükope. Tatute leha Jako heke nhatelü i tsekegü ohinhati, hakilaha titsatinhüpe Sikẽi heke. 5Egiküigokondeni leha, Deusu heke leha kugotahügelü tüilü titalüko hakingohüngü ete tongoko kaenga, üle atehe leha Jako tüilü ihekeni tuhukehisila tuetomiha umbege ihekeni.

6Jakoha tatuteha ikongokope etimbelü leha Lusina, Beteui gehale tuhutatinhüpe ititü kae, Kanahã ngongoguhongo. 7Tita leha tehu undagitsepügü tüilü iheke Deusu akatsohoi, ititü tüilü leha iheke "Beteu Deususüi", titaha Deusu apakipügü atehe inha, ihilü hataha tühisũügü hinhe.

8Titaha Hebeka#35.8 Hebekaha ekisei Jako amape. itinhündegatinhimbüngüpeha Deboga apüngu. Inhatelü leha i tsekegü ohinhati hakingohüngüha Beteu heke. Ititü inhügü leha Alõ-Bakutei#35.8 "I kiniloho", nügü hunguha egei Alõ-Bakutei Isigaeu itagü itaginhui..

9Jako ogopisoteha Mesopotamia tongopenginhe, Deusu apakilü gehaleha inha, hekite leha tüilü iheke, 10nügüha iheke: "Jakoha eititüi, inhalü leha Jakoi eitanümingoi; Isigaeui lehüle eititü inhümingo", Deusu kilü leha Jako heke.

11Deusu kilü gehaleha iheke aitsükü: "Deusuha ugei Aitsüküngo Tinhaheninhü. Elimo itsataiha kaküngi ehigükuẽgükope muke gehale. Ehigükuẽgükope inhümingo leha kaküngi kitagüi tuhugu leha inhünkgoingo, telo itagüi gehale, ehigükuẽgükope huja leha anetüko inhümingo. 12Ngongoha ungundühügüpe Apagahãu inha Isaki inha gehale, einha leha tunümingo uheke; ülepe tunümingo gehaleha uheke ehigükuẽgükope inha", Deusu kita leha Jako heke. 13Deusu itaginhukitühügüpenginhe leha Jako ake, itükaĩjü leha, etelü leha ege tongopenginhe.

14Ülepei leha Jako heke aetsi tehu inügü, tapagate leha tüilü iheke, titaha itsomi Deusu heke itaginhitühügüna. Ülepei leha vinho hapijü iheke oliveira ngukaugu gehale tehu kaenga kutundinhügüi Deusu kaeha ketepunkgitohoi. 15Jako heke leha ititü tüilü Beteui#35.15 "Deusu Üngü" nügü hunguha egei Beteui Isigaeu itagü itaginhui., titaha Deusu heke itaginhitühügü atehe.

Isaki Apüngühügüha Hakeu Apüngühügü gehale

16Jako telü leha tülimo ake Beteu tongopenginhe. Hakila leha etimbelüko hata ete Efagata heke, Hakeu itundilü leha. Aitsükü leha isitundilü heke itamitagü. 17Aitsükü hekugu leha isitundilü hata, kimagunetinhi kilüha: "Ojoha einegetu, utoto kusügü gehaleha esei tankgigatinhüi". 18Latsi hekugu leha apüngu hata, aetsi leha elehunkgilü hata upügüi kangamuke itanügü leha iheke Benoni#35.18 "Ugitamikügü mukugu" nügü hunguha egei Benoni Isigaeu itagü itaginhui.. Ülepene leha hüle uãke isũü heke ititü tüilü Benjami#35.18 "Umugu aitsüküngoingo" nügü hunguha egei Benjami Isigaeu itagü itaginhui..

19Egea leha Hakeupe apüngu, onginügü leha ete Efagata imagü hutati, ãde leha hüle igatohoha Belẽi. 20Imütü ugupongaha Jako heke aetsi tapagate tehu tüilü. Ãde geleha tita tehu atühügü Hakeu imütü uhutohoi.

21Ülepene leha Jako telü ege tongopenginhe, Migidau-Edehi uatühügünginhe leha iheke egituatelü. 22Isigaeu egitundepügü ataiha tita, imuguha Hubẽi heke Bila ingambalü, isũü hitsü hisunduha. Ülepei leha Isigaeu heke uhunügü.

12 leha Jako limo inhügü:

23Lia akeha etijipügüpe ekisei Hubẽi, Jako muguha ihinhanokoha,

ülepe nginheha Simeãuha, ülepe nginheha Leviha,

ülepe nginheha Judaha, ülepe nginheha Isakaha upügükoiha Sebulõ.

24Hakeu ake hüle etijipügü

Jusei Benjami ake.

25Hakeu ngingokugupe Bila akeha etijipügü

Dãi Nafitali ake.

26Lia ngingokugupe Siupa ake etijipügü

Gaji Ase akeha.

Jako limopeha akagoi tankginhükopeha uãke Mesopotamiate.

27Jako telüha tũü Isaki ingadzelüinha Mãhena, Kigiati-Ahibai gehaleha ete igatohope hakingohüngüha Hebogõ heke. Titaha uãke Apagahãu itu itsagü tsũhügüi Isakiko itu itsagü. 28180iha uãke Isaki isũanügü. 29Haindenei leha atai Isakipe apüngu. Igakaho leha tankginhükope apüngühügü agage, isagageni leha apüngu. Ijimo heke leha inhatelü, Esau heke leha Jako ake.

Currently Selected:

GEN 35: KUI-BIBLE

Highlight

Copy

Compare