GEN 30

1Hakeu heke leha tünohambungu ingilütse ingugi, igikunukijü leha ihasü heke, üle ateheha tünho heke nügü iheke: "Umukuguha engüike! Inhalütse ekuguha tumukila uinhügü ingunümitse uheke, uapünguti leha igei uitsagü üle hinhe!", ta leha iheke tünho heke.

2Jako ingukugijü leha iheke, nügüha iheke: "Deusu agage niküle egei uhangamitagü eheke? Üngele hüle esei emukugu inhügütila titsatinhüi", nügü leha iheke Hakeu heke.

3Ülepeiha Hakeu kilü iheke: "Andeha ungingokugu Bila. Ingambakeha üngele. Imukugu itsoteha, umukugui hekugu leha tüilüingo uheke, egea leha kangamuke amai uinhümingo sulegüi", nügü leha iheke.

4Egea leha Hakeu heke Jako inha tüngingokugupe Bila tunügü ihitsüi leha itsomi. Ülepeiha ingambalü leha iheke. 5Bila nohanügü leha, Jako mutelü leha iheke. 6Ülepeiha Hakeu kilü: "Deusu hekeha hekite titage uanügü ingilü, ukilü talü leha iheke, umukugu tunügü leha iheke". Üle ateheha ititü tüilü iheke Dãi#30.6 "Hekite titage ngiko tüilü" nügü hunguha egei Dãi Isigaeu itagü itaginhui..

7Hakeu ngingokugu Bila nohanügü gehale, aitsükü gehale Jako mutelü iheke. 8Ülepeiha Hakeu kilü: "Aitsüküha tisatakatagü uhasü ake ukengu bele", nügüha iheke. Üle ateheha tumukugu ititü tüilü iheke Nafitali#30.8 "Kikindu" nügü hunguha egei Nafitali Isigaeu itagü itaginhui..

9Lia nohanügükinügü uhunügütse ingugi leha iheke, tüngingokugu Siupa tunügü leha iheke Jako inha, ihitsüiha itsomi. 10Lia ngingokugu Siupa heke leha Jako mutelü. 11Ülepei leha Lia kilü: "Ata! Uinhamilüha igei! Üle ateheha kangamuke ititü tüilü iheke Gaji#30.11 "Kinhamilü" nügü hunguha egei Gaji Isigaeu itagü itaginhui..

12Lia ngingokuguha Siupa heke gehale aitsükü Jako mutelü. 13Ülepeiha Lia kilü: "Tügekuili hekuguha uge! 'Tügekuilinhüha egei', itaõko kilüingo leha uheke". Üle ateheha ititü tüilü iheke Asei#30.13 "Tügekuili" nügü hunguha egei Asei Isigaeu itagü itaginhui..

14Ngata trigo inügü igotisü etimbelütse ingugi leha hüle, Hubẽi telü leha ngatagühena. Tita leha madagakula#30.14 Tsũhügüiha egei itaõ nohanetinhi ukugeko ngikenitatühügü madagakula ungui, unkge ganingoha. hogijü iheke, tüti Lia inha leha igelü iheke. Hakeu kilüha Lia heke: "Uinha ataiti madagakula angakeke emukugu ngingitühügü", nügü leha iheke tühasü heke.

15Ülepeiha Lia heke itüjü: "Hotugui tinaha uãke uihenkgulü eheke unhopeki, ãde gehale uihenkgulüti eitsagü madagakulapeki umukugu ngingitühügüpeki!", nügü leha iheke. Ülepeiha Hakeu kilü: "Tatakongoiha kunhuni. Madagakula tunügüha eheke uinha, ige koko leha Jako inga eünkgütomi eunümingo uheke", nügü leha iheke Lia heke.

16Kohotsiha, Jako etimbelütse ingugiha ngatagühe tongopenginhe, Lia telü leha ijopenümi, nügüha iheke: "Ãde akatsange ige koko eünkgülüingo uinga, tihipüte leha ege uheke madagakulaki umukugu ngingitühügüki". Ülepe koko leha Jako inhügü ingati.

17Deusu heke leha Lia kilü talü, inhohanügü leha, sinhatüingogui leha egei Jako mutelü iheke. 18Ülepeiha Lia kilü: "Deusu heke leha topisi uinha, ungingokugu tundühügü ateheha uheke unho inha, üle ateheha kangamuke ititü inhügü Isakai#30.18 "Opitsoho" nügü gakitsongo geleha egei Isakai Isigaeu itagü itaginhui..

19Lia nohanügü gehale aitsükü, aetsi leha inkgugetohoi Jako mutelü iheke. 20Lia kilüha: "Deusu hekeha uengikombalü hekiniki. Unho heke leha hüle igei hekite uigelüingo, aetsi naha leha inkgugetoho ijipügü uheke. Üle ateheha kangamuke ititü tüilü iheke Sebulõi#30.20 "Inhügü" nügü gakitsongo geleha egei Sebulõi Isigaeu itagü itaginhui "kengikombalü" nügü gakitsongo gehale..

21Ilainha leha upügüi itaõ kusügüi Lia etijilü, Jinaiha ititü tüilü iheke.

22Inhalüha Deusu hangakgikümi Hakeu heke. Deusu heke leha itaginhu talü, tünohandi leha tüilü iheke. 23Inhohanügü leha, aetsi leha imukugu inhügü. Ülepeiha nügü iheke: "Inhalüha umukuhungu heke uhüsukijüti Deusu anümi". 24Jusei#30.24 "Aitsükü tunügü" nügü gakitsongo geleha egei Jusei Isigaeu itagü itaginhui. leha ititü tüilü iheke, nügüha iheke: "KUKANETÜGÜ hekeha aitsükü gehale umukugu tundai".

Jako Engikobekundu

25Juse ankgipügü nginheha, Jako kilüha Labãu heke: "Unkgeha ugopitsomi uankgipüati. 26Uinhaha tunkge ulimo uhitsão gehale umbogipügü tiha ukatsuki einha. Utelüti takatsige uitsagü leha. Tuhuti naha eheke aitsükü tiha ukatsundatühügü einha", ta leha iheke Labãu heke.

27Ülepeiha Labãu heke itüjü: "Indeha ukae eitse luale. KUKANETÜGÜ heke hekite uüilü uhunügü leha uheke anügü ateheha. 28"Unguama eihipütelüti ege uheke?", nügü gehale iheke.

29Ülepeiha Jako kilü: "Tuhuti naha eheke aitsükü ukatsundatühügü einha, engenegü epünenügü leha igikasikügü hata tiha uheke. 30Tetimbela geleha uãke uatai, kaküngilaha uãke ngiko tuhugu, utimbelütse ingugi leha tatute epünenügü telü. KUKANETÜGÜ hekeha hekite tüipügü ukatsu atehe. Ãde leha hüle ulimo igikasikügüti uitsagü", ta leha iheke tijogu heke.

31Ülepeiha Labãu heke ijeginügü: "Tüti tsüma ege eihipügüi?", nügüha iheke. Ülepeiha Jako heke itüjü: "Inhalü hüle uihipütelüi eheke. Aetsi tsügütse hüle, akitiha uakisü tagote eheke, engenegü tuhugu igikasitinhi gele uinhügü. 32Andeha tatute ngene tinkgukinhü ingilüingo uheke, utinhaha tügekuhitinhüpe tügepatsaünkgüinhükope gehale hatankgilüingo uheke, tatute gehale ovelha mukuguko tuhugu tuhuseũkinhükope, tatuteha cabrako tuhugu tügepatsaünkgüinhükope tügekuhitinhükope gehale. Ünagoha tatinhüingoi uihipügüi. 33Ilainha leha angoloi egea ukipügü ingilüingoha eheke. Uihipütepügü ingukeĩtsigote eheke, ungenegü hujaha sikusüko ganingohüngü itsote, egea leha imbipügü uhunümingo heke uheke", Jako kilü leha hüle Labãu heke.

34Ülepeiha Labãu kilü iheke: "Aingo tsaha egei. Akisü itüjü leta uheke", nügü leha iheke. 35Ülepe igoti geleha Labãu telü bodeko tuhugu cabrako tuhugu katoholaha talakinhü isikusükope hatankgilüinha, tatuteha ovelha mukugu tuhugu tuhuseũkinhükope gehale isikusükope. Ülepei leha tunügü iheke tülimo inha igikasitokomi ihekeni. 36Ülepei leha etimokilü haki, tilakoha sigotisü kutelü tigati, Jako inhügü leha telo gehale Labãu ngenegü igikasikügüko heke.

37Ülepei leha Jako heke i ĩkungu ipigi kuhenügü, alamuha, afelegaha palatanu gehale, talaki leha i agimbitsilü iheke tügekuhehisi itsomi. 38Ülepene leha i ĩkungu tüilü iheke ngeneko heke tuã ilitsohona. Tigatiha tüilü iheke egea leha i imünhigenga itsokomi tuã ilijü hataha ihekeni. Ngeneko ajotu uhunügü ateheha iheke tuã ilijüinha etegokondeni. 39Tita leha etikungalüko i ĩkungu imünhige. Ovelhako mukugu ankgilükilü tuhugu leha tügekuhehisi, tügepatsaünkgüi, tüikutsinhüko tuhugu gehale. 40Jako heke leha telo Labãu ngenegüko mukugupe hatankgilükilü. Ülepei leha tüilükokilü iheke tügekuhehisinhüko tuhuseũkinhüko hujati, tügekuhehisiha tügepatsaünkgüi etijigokomi. Egea leha tüilükilü iheke, üle ateheha kaküngi leha inhenegü inhügükilü, haki leha Labãu ngenegüko heke tüilükokilü iheke. 41Ngeneko tükahukinhüko atai tsügütseha matsoi etikugokomi, Jako heke leha i ĩkungu tüingalü isatsagatini, hakilaha etimbatohoko heke. Egea leha etikulükokilü i ĩkungu heke hakila. 42Inhalü hüle tükahukimbüngüko ngeneko igakahonga Jako heke i ĩkungu tüilükilüi. Üle ateheha tükahukimbüngükope ngenekope inhalü leha Labãu inha, tükahukinhükope leha hüle tinhalü heke Jako inha. 43Egea leha inhügü tüengikonkgoi hekugu. Kaküngi leha ngeneko otoi inhügü, ngingokuha kinhakugulalüko utotoko itaõko gehale, cameloko tuhugu jumentoko tuhugu gehale.

Currently Selected:

GEN 30: KUI-BIBLE

Highlight

Copy

Compare