GEN 31

Jako Ihipügü Labãu hinhe

1Jako heke leha hüle Labãu limo kilü talü igia: "Jako heke leha egei apa engüpe itühügü tatute, üle atehe leha aitsükü tüengikonkgoi itsagü". 2Jako heke leha tsũhügüpeala teloi Labãu inhügü uhunügü.

3Ülepeiha KUKANETÜGÜ kilü Jako heke: "Ogopitseha ongongoguhonga ankgipüati, ehisũüdão itsohona, ake geleha egei uinhümingo", Deusu kilüha Jako heke.

4Ülepei leha Jako heke Hakeu ingetinhi humilü Lia ake etegokomi inha ipingohüngü tahugapingona, tüngenegü itsohoteha atai. 5Jako kilüha tühitsão heke: "Oũüko ingitagüha uheke teloi leha hotuguiha ingigatühügü agagela, apaju Deususü geleha ãde inde uake, 6tuhuti naha ehekeni oũüko inha aitsükü hekugu tiha ukatsundatühügü. 7Uinkguginalü leha hüle iheke. Timüho leha isaküngindu uihipügü imokipügü iheke. Inhalüha Deusu heke ngikonaha uüitomi iheke unümi. 8Nügükilüha uãke iheke: "Ngene mukuguha tügepatsaünkgüinhüpe inhümingo leha eihipügüi", ülepei leha ngene mukuguko ankgilü tügepatsaünkgüi tuhugu. Igia gehale nügükilü iheke gitse: "Ngene mukugu gehale tügekuhehisinhükope inhümingo leha eihipügüi", tatute leha ngene mukuguko ankgilü tügekuhehisi. 9Egeaha uãke Deusu heke oũüko ngenegüpe tüilü tuhugu leha uinha.

10Ngeneko etikulü ngunegüi leha atai uonitu. Bodeko ingilü tuhuguha uheke cabrako ugupo tuhugu, bodeko tuhugu tügekuhehisinhükoha akagoi, tügepatsaünkgüinhüko tügekuhitinhüko gehale. 11Deusu Ngingokugu kahüalü kilüha uheke uonitümi: 'Jako!', nügüha iheke: "Ãde uge, kitseha!", ukilüha. 12Ülepeiha nügü iheke: 'Inkeha! Tatuteha bodeko tuhugu tetikugatinhükoi, tügekuhehisinhükoha, tügepatsaünkgüinhükoha tügekuhitinhüko gehale. Egeaha ankgigokomi tüitagü uheke, Labãu hekeha ngiko tüilü hesinhüi einha ingilütse ingugiha uheke. 13Deusuha ugei tapakinhüpe einha Beteute. Tita leha oliveira ngukaugu hapijü eheke tehu kaenga ketepunkgitohoi itsomi uinha, engüilüingo tüilü ihanügüha uãke eheke uinha tüigoteha eheke. Osiha otongitekeha, etekeha ngongo eitsoho tongopenginhe ankgipüati' ", egea leha Jako kitagü tühitsão heke.

14Ülepei leha Hakeu hekeha Jako itüjü Lia ake: "Inhalütseha apa anümi tüengikogupe ngondilüti apüngote tisinha. 15Telo itagü agage leha tisigengalü iheke. Tisihipütelüha uãke eheke tinhoi eitsomi, ülepene leha tinhegupe imbükilü iheke, tatuteha tisihipütepügüpe eheke. 16Üle ateheha tatute ngiko tuhugu apa engüpe, Deusu heke leha tüipügü kengükoi itsomi, kengükoi leha inhümingo kulimoko engüi gehale. Egeaha tüike Deusu kipügüpea eheke", ta leha ihekeni Jako heke.

17-18Ülepei leha Jako otongitelü ogopitsomi leha Kanahã ngongoguna, isũüha Isaki ituna, tülimo ahetinhombalü leha iheke tühitsão gehale camelo humbonga inhünkgoki, tatute leha tüngenegüpe igelü iheke ngiko tuhugu gehale imbogisatühügüpe Mesopotamiate.

19Hakeu apaha Labãu tepügü atai telote ovelha ipugu uketigi tuhugu, tita leha atai, indisü Hakeu heke leha itseke hutohope imbilü tuhugu isũü ngikenitatühügüha. 20Labãu inha leha tatsatila Jako telü tülimo ake. Ege agageha Jako heke Labãu inkgugikügü, Hagã itagüpeha. 21Ihilü leha tatuteha tüengüpe kugiti, hankgunginga Eufagatsi inkgugenügü leha iheke, etelüko leha andüponhogu tuhugu Jileaji inhe.

Labãu Tepügü Jako Hukehijüinha

22Tilako leha isigotisü atai, Labãu heke leha Jako ihipügü uhunügü. 23Üle atehe leha tatute tühisũüdão ingenügü iheke tülimo gehale, etelü leha Jako hukehijüinha. Takeko leha inkgugetoho isigotisü telü hata Jako ingilü ihekeni hakingine Jileaji tehugu ondühügüte tuhugu. 24Ülepe koko leha Deusu enhügü Labãu onitümi, Hagã itagüha ekisei, nügüha iheke: "Tingugiti! Ngikona ketüinge atsange Jako", Deusu kilü leha iheke.

25Labãu etimbelü leha Jakoko itsohona, Jileaji tehugu ondühügüte tuhugu egituãdepügüko atai. Labãu egituatelü gehale leha tühisũüdão ake tülimo ake tita. 26Ülepeiha Labãu kilü Jako heke: "Tütomima uinkgugikügü eheke? Ulimo igetagü leha eheke unatsüma otonge itsote timbinhükope agage. 27Tütomima uinkgugikügü eheke, egea leha eihilü tatsatila? Atsatoteha uãke uinha, ailene tüiholüha uheke egi kugitiha, tambor apilü kugiti tuhuguha harpa ihijü kugiti tuhugu gehale#31.27 Tambor egei tapinhü ambuludomi, harpaha egei violão ganingo titükinhü itsumdomi.. 28Inhalüha uhinhão ikuilijüi uheke imütüko kaenga egikatokomi uinha ulimo gehale. Hijigü ingukgingui ekugu akatsegei eingunkgingu. 29Aitsüküha uãke hesinhüi eüiholü uheke, konigeha oũü Deususü heke leha uakihalü: 'Tingugiti! Ngikona ketüinge atsange Jako', nügü leha iheke uheke. 30Tuhutiha uheke otonu pile naha egei oũü hüneke ege agage enhügü, tütomima hüle itsekeko hutohope tsinhikenikügü imbilü tuhugu eheke?", nügü leha iheke Jako heke.

31Ülepeiha Jako kilü Labãu heke: "Uinegetu leha, üle ateheha tatsatila uenhügü egetongopenginhe, eindisükoki leha uinhakügünkgilü hangamitagü eheke uheke. 32Itsekeko hutoho tuhugu engikenikügü hogisoteha eheke angini ngipi, üngelepe elüingo tsüha leha eheke. Tatute naha kupisũüdão heke ãde ingitagü, ngikoha engü hogisote eheke, igeke atsange leha". Inhalüha hüle Hakeu heke itsekeko hutoho imbipügü uhunümi tuhugu Jako heke.

33Ülepeiha Labãu heke uhijü Jako etuãdepügü ata, ülepeneha Lia etuãdepügü atati uhijü iheke, ülepene gehaleha takikongo itaõ inhingokuguko engü atati, inhalüha itsekeko hutoho hogijüi tuhugu iheke. Lia etuãdepügü atalüpenginhe leha etepügünginhe etelü Hakeu etuãdepügü atati. 34Uhijü umbege iheke tatute inhalüha ihogijüi iheke. Hakeu heke leha itsekeko hutoho ongidühügü itsagü tuhugu camelo uguponga kakandoho iküa, tüakandi leha itsagü ugupo.

35Nügüha iheke tũü heke: "Apa, ojo atsange eingukugijü utikainhu heke, matso akatsange ugei". Ege agageha Labãu heke umbege itsekeko hutoho uhijü tuhugu, inhalüha ihogijüi iheke.

36Üle gote leha aitsükü Jako ingukugu, aitsükü leha tüikügi Labãu heke nügü iheke: "Tü nile hesinhüi ungüilüi? Unde nile hesinhü tüilü uheke egea uhukehisatohoi eheke eingukugui?", Jako kilü leha tijogu heke. 37"Tatute leha uengikogu ijenkgilü eheke. Angi engikogu hogijü eheke? Inaha inkgete engikogupe ungibipügü uhisũüdão atsagati ehisũüdão atsagati gehale, hesinhüiha tinhümbokongo ingugitomiha ihekeni.

3820ha uisũanügü ukatsu heke einha, tipaki geleha ovelhasü imagukilü tuhugu hekite acabrasü tuhugu gehale, inhalüha aetsi muke akanegusü engelütsei uheke. 39Ngene kengeni tükotinhü hekeha engenegü egote, inhalüha igelükilüi uheke einha ingitomi eheke, ulegüpeilaha umbege atai. Ungenegü inügükilü leha uheke engenegüha tapünginhüpe itakongoi. Tipaki geleha engenegü imbigote, igotiha koko muke gehale uitamikügükilü leha eheke ungenegükiha ihipütegomi uheke. 40Ege agageha ukatsukilü: igotiha aitsükü giti atungu heke uelükilü, koko gehale keünti heke uelükilü. Kaküngiha tünkgüla uinhügükilü igikasikügüko heke. 41Ege agageha uinhügü 20ha uisũanügü eünga. 14ha uisũanügü ukatsu heke einha uhitsüi takikongoko eindisü itsomi, aetsi naha inkgugetoho uisũanügü ungenegü ihipütelü heke, timüho leha isaküngindu uihipügü imokilü eheke. 42Apa#31.42 Isaki hekeha egei "apa" tatohoi iheke, Jako ũüha. Deususüha, Apagahãu Deususüha, Deusuha Isaki epüngüngitsoho akela naha uatai, uhumihopügü leha eheke tinhakugulandila, Deusu heke leha hüle ugitamikügü ingilü, uinhatügü katsu ingilüha, üle ateheha koko apakilü einha, apenügü leha iheke", egea leha Jako kitagü Labãu heke.

Jako Atakisü Atapügü Labãu ake

43Labãu hekeha Jako itüjü: "Uindisüha agoi itaõkoi, uhigüha agoi, ngeneha akagoi ungenegü. Uengüha egei tatute engingitagüi. Inhalü leha ami ngikona ukitohotsei ulimo itsomiha uake uhinhão gehale. 44Katakisü ataniha. Inaha kenduhuteni tehu katakisü atapügü uhutohoi kupehe", nügü leha iheke Jako heke.

45Jako heke leha itsalü tüakiti. Ülepei leha tehu inügü iheke aetsi tapagate leha tüilü iheke gahagu agage. 46Ülepene leha Jako kilü tühisũüdão heke: "Tehuha enduhutegüe". Tehu tuhutelü leha ihekeni temegipugati. Ülepene leha etinhambalüko tehu tutuhutenhüpe geponga. 47Labãu heke leha titsatühügüko ititü tüilü Jega-Sagadutai#31.47 "Tehu tuhutepügü ingukginitohoi" nügü hunguha egei Jega-Sagadutai Hagã itagü itaginhui., Jako heke hüle ititü tüilü Galegeji#31.47 "Tehu tuhutepügü ingukginitohoi" nügü hunguha egei Galegeji Isigaeu itagü itaginhui..

48Ülepeiha Labãu kilü iheke: "Tehu tuhutepügüha igei katakisü atapügü uhutohoi kupehe". Üle ateheha ititü atühügü Galegeji. 49Ititü tüilü gehale ihekeni Misipai#31.49 "Igatitsegoho" nügü hunguha egei Misipai Isigaeu itagü itaginhui., igia agageha Labãu kilü atehe: "KUKANETÜGÜ hekeha katakisü atapügü tüilü kupehe ingitai hakiha topogekela umbege kutelü hata. 50Takekongoha ulimo üihesundote eheke, õgokondeni gehaleha eheke telokoha itaõ ake muke eitandundote, Deusu imbataha kukanügü katakisü atapügü gehale ingukgingikümingoha eheke", ta leha iheke Jako heke.

51Labãu kilü gehaleha Jako heke: "Andeha tehu tuhutepügü tüipügü, tapagate gehale tehu tüipügü uheke kulondati. 52Tehu tuhutepügü tüipügüha egei tehu tapagate gehale katakisü atapügü ingukgingitohoiha kupehe. Inhalüha uanümingoi enene uheke eimütonkgijüinha, ege gehaleha inhalü tehu tuhutepügü, tehu tüipügü gehale tapagate uanümingoi eheke inene uimütonkgijüinha. 53Apagahãu Deususüha uãke, Nao Deususüi gele, isũüko Deususüi gehale üngeleha hüle kingugitinhingoi hekite kukanügü inginingoi", ta leha iheke Jako heke.

Ülepei leha Jako kilü Deusu imbata isũü Isaki epüngüngitsoho heke. 54Jako heke leha ngene elü tita ülepe hotegomi ngongo ondühügüte kutundinhügüi Deusu inha. Tepisũnkgitsohoko ingenügü leha iheke titalükope etinhambagokomi ikeni. Etinhambalüko leha, ülepei leha isünkgülüko tita andüponhogute.

55Ülepe okogetsi leha, Labãu etikaĩjü mitote ekugu geleha, tühinhão ikuilijü leha iheke imütüko kaenga tülimo gehale takikongoko, egikanünkgo leha inhani. Ülepei leha ogopijü tüituna.

Currently Selected:

GEN 31: KUI-BIBLE

Highlight

Copy

Compare