GEN 29

Hotugui Jakoko Opogipügü Hakeu ake

1Jako tetagü geleha giti ihatigoho inhe, ülepei leha etimbelü Mesopotamiana. 2Ngikodupinhelaha inhünu ipingohüngü tahugapingo inhe, tita tuã ngagü ingilü iheke, igüĩjüiha tilako ovelha igikasitinhiko atai, aetsiniha tüovelhasüko inhipini tuhugu cabrako tuhugu gehale. Titalüpeha tuãi ngeneko ngilijükilüi, tigapetinhüpeha egei tehu tsekegüki. 3Ovelhako gepagü tuhugu etuhutegote tsügütseha, ovelha igikasitinhiko heke leha tuã ngagü tükinhüpe üngapetohope tehupe gekegingalü tuã aũtsitomiha ihekeni ngeneko heke ilitsomi. Ülepene leha tehu tüingalü ihekeni ititsüpüati.

4Jako hekeha ovelhako igikasitinhi leginügü: "Uã eitsako?", nügüha iheke. "Undongo nile amagoi?".

"Hagã tongo tisugei", nügü leha ihekeni.

5Jako hekeha aitsükü ijeginünkgo: "Angi Nao higü Labãu tuhuti ehekeni?", nügüha iheke.

"Ẽ, tuhuti tiheke", nügü leha ihekeni.

6Ülepeiha Jako heke leha ijeginügü: "Hekite gele kaha?", nügüha iheke.

Ülepeiha nügü ihekeni: "Ẽ, alatsü, indisüha ekisei Hakeui tüovelhasü ingitatinhi tuhugu", nügü leha ihekeni Jako heke.

7Ülepeiha Jako kilü geleha aitsükü: "Tütomima jaheji ovelhasüko tuhutegagü ehekeni? Opü benaha gele giti kapohondu. Tuãha engundüke engenegüko inha ülepene tsahüle igelükoingo ehekeni tahuga ekulüinha".

8Ülepeiha nügü ihekeni: "Inhalütse kuakatsange! Titeninhü igei tehui. Teloko ovelhako igikasitinhi etimbelü uẽnümingo geleha tiheke tüngenegüko ake, tisahetinhombatomiha ihekeni tuã ngagü tükinhüpe üngapetohope gekegilüki. Üle gote tsügütse tuã tunümingo tiheke ovelhako inha tuhugu cabrako inha tuhugu gehale".

9Jako itaginhu hata geleha ikeni, Hakeu etimbelü leha tũü ovelhasüko ake tuhugu, ovelha inkgukinipeha ekisei. 10Jako heke leha Hakeu ingigote, Labãu indisüha, isi hisũügüha, tũü ovelhasü ake tuhugu. Etelü leha tuã ngagü kipügü geponga, tehupe gekegilü leha iheke tuã ngagü üngapetohopenginhe, tuã tunügü leha iheke tijogu Labãu ovelhasüko inha tuhugu. 11Hakeu itagimbakilü leha iheke imütü kaenga ikuilijüki. Itsikununügü leha ingilü heke inilu leha ige helüi. 12Ülepei leha Jako kilü iheke: "Oũü episunkgitsohoha ugei; Hebeka mukuguha ugei", nügü leha iheke Hakeu heke. Egea leha itsagote iheke, etelü leha kaküho ihatigi tũü inha.

13Labãu heke leha tühatũü etsühügü uhunügütse ingugi, atsakulü leha inha, aũtsilü leha iheke, imütü kaenga muke leha ikuilijü iheke. Ülepene leha igelü iheke tüngati, Jako heke leha tatute titsatühügüpe ihanügü tuhugu. 14Ülepeiha Labãu kilü iheke: "Telo hüngü ekuguha kukugei, ungungu geleha eungungui, uipügü geleha eipügüi", nügüha iheke Jako heke.

Jako Itandühügü

Aetsiha inhunegü Jako inhügü tijogu ünga. 15Ülepeiha Labãu kilü iheke: "Inhalü akatsange atütüi akatsui tihipüila uinha episunkgitsohoiha uanügü pile. Unguama ekenguti ege?", nügüha iheke tühatũü heke.

16Takekoha uãke Labãu indisü itsagü. Ihasü igatohopeha Lia, ikene igatohope alehüle Hakeui. 17Katoholaha Lia hekundu, Hakeu eku hüle aitsükü hekundui. 18Jako heke leha Hakeu ingilü tüakiti, üle ateheha nügü iheke: "Ukatsuingoha takiko inkgugetoho isũa einha, eindisü ikene Hakeu itsomiha uhitsüi", nügüha iheke tijogu heke.

19Ülepeiha Labãu heke itüjü: "Atütü ekuguha egei einhaha tunümingoi telo utoto inhala. Indeha eitse akatsundomi uinha", nügü leha iheke Jako heke. 20Ülepei leha Jako katsu takiko inkgugetoho isũa Hakeu itsomiha ihitsüi. Aitsükü leha isakiti itsagü, üle ateheha takiko inkgugetoho isũanügüpe etsimbükilü leha jaheji inha.

21Ülepeiha Jako kilü Labãu heke: "Osi tiha eindisü tunkge uinha uhitsüi tiha itsomi. Katakisü atapügü ati leha igei atühügü", nügü leha iheke tijogu heke.

22Ülepei leha Labãu heke tatute ukugeko titalüko ingenügü, ailene tüilü leha iheke sitanduko ailitomi. 23Koko leha hüle inhügütse ingugi, Labãu heke leha tindisü Lia tunügü Jako inha, isünkgülü leha ike, Hakeu agage leha ihangamitagü iheke. 24(Labãu heke gehale tüngingokugu Siupa tunügü Lia ngingokugui).

25Jako hakilütse ingugi leha mitote Lia ake leha tünkgüpügü uhunügü iheke. Ülepei leha etelü Labãu heke tigi. Nügüha iheke: "Unguagagema igei nügü hungu? Tütomima uinkgügikügü eheke? Ukatsu tinaha Hakeu itsomi uhitsüi!", ta leha iheke Labãu heke.

26Ülepeiha Labãu heke itüjü: "Indeha tinhongoguho, tisügühütuhüngüha tsihindisü ikene ngisotu anümi ihasü igakaho. 27Uẽke hõhõ kitandu ailikügü takiko inkgugetoho igotisüpe etsimbükilü, ülepene leha hüle Hakeu tunümingo gehale tiheke einha, aitsükü geleha takiko inkgugetoho sisũanügü akatsu ihatote eheke uinha", ta leha iheke Jako heke.

28Jako akiti leha inhügü. Takeko leha inkgugetoho kitandu ailikügü igotisü telü Lia ake, Labãu heke leha tindisü Hakeu tunügü Jako hitsüi gehale itsomi. 29(Labãu heke gehale tüngingokugu Bila tunügü Hakeu ngingokugui). 30Jako heke gehaleha Hakeu ingambalü. Aitsüküha uãke Hakeu isakiti Lia uate. Aitsükü geleha itsatsu Labãu inha takiko inkgugetoho sisũanügü.

Jako Etijipügü

31KUKANETÜGÜ hekeha Jako heke tüakitila Lia ingilütse ingugi, ahetinhombalü leha iheke etijitomi, Hakeu hüle ekisei tünohandimbüngüpe. 32Lia nohanügü leha, imukugu inhügü leha, nügüha iheke: "KUKANETÜGÜ heke ukotühündu ingilü. Igepei leha hüle unho heke igei tüakiti uingilüingo", üle atehe leha ititü tüilü iheke Hubẽi#29.32 "Ingitüe aetsi imukugu" nügü hunguha egei Hubẽi Isigaeu itagü itaginhui, "ukotühündu ingilü iheke" nügü hungu gehale egei Hubẽi..

33Lia nohanügü gehale aitsükü, tumukugu otohongo ankgigoteha iheke, nügüha iheke: "KUKANETÜGÜ hekeha utalü tüõnhüi, üle atehe leha aitsükü umukugu tunügü iheke". Ülepei leha ititü tüilü iheke Simeãui#29.33 "Itsalü" nügü hunguha egei Simeãui Isigaeu itagü itaginhui..

34Inhohanügü gehale aitsükü, aitsükü gehale tumukugu ankgigote iheke, nügüha iheke: "Unho inhümingo leha hüle igei aitsükü ukae leha, tilako naha leha igei imutegagü uheke". Üle ateheha ititü tüilü iheke Levi#29.34 "Itsuhutelü" nügü hunguha egei Levi Isigaeu itagü itaginhui..

35Lia nohanügü gehale aitsükü, tumukugu ankgigote leha iheke, nügüha iheke: "Igepei ekugu leha hüle hekite ukilüingo KUKANETÜGÜ heke ailikügüi". Üle ateheha ititü tüilü iheke Judai#29.35 "Hekite nügü Deusu heke ailikügüi" nügü hunguha egei Judai Isigaeu itagü itaginhui.. Ülepei leha inhohanügükinügü.

Currently Selected:

GEN 29: KUI-BIBLE

Highlight

Copy

Compare