GEN 3

Tikenitilaha Hotugui Kuge heke Deusu Tüipügü

1KUKANETÜGÜ Deusu hekeha tatute ngeneko gehujalüko tüigote, ekeha, aitsüküha tetinhokisimbüngü kinkguginügü heke tatuteha ngeneko Deusu ngüipügüko uate. Eke heke leha itaõ leginügü: "Angolo nikaha egei Deusu kilü ehekeni tatute tĩsinhü i ihisü ĩtsüingi muke ehekeni inde ngata itu hekinite?", nügüha iheke itaõ heke.

2Ülepei itaõ kilüha: "Inhalü. Deusu kilüha tiheke tatute tsüha ngata itu hekini tongo i ihisü ĩtsomi letsa tiheke, 3aetsingo hüle i ihisü ĩtsüingi tiheke Deusu hekeha tisapenügü, ngata kitu hekini igihükügüte tatinhü, ihitsüingi muke gehale tiheke. Egea leha tüigote tiheke tisapünguingo leha hüle", itaõ kilü leha eke heke.

4"Inhalü benaha ápüngukoingotsei", eke kilü leha itaõ heke. 5"Deusu hekeha tuhuti egeha i ihisü ĩsote ehekeni, enguhupungukope uhunümingo leha ehekeni, hekini uhunümingo muke leha ehekeni hesinhü gehale Deusu hekeha kuhunügü agage", nügü leha iheke.

6Itão heke leha ingilütse ingugi, hekite leha i ihisü ingilü iheke, hekini agage gehale, kuhute gehale tüilüingo hangamitagü iheke. Üle atehe leha ihisü inakenügü iheke, ülepei leha ĩjü iheke, ületsei geleha tünho inha tunügü iheke, ülepei ĩjü leha iheke. 7Ületsei geleha tunguhupungukope uhunügü leha ihekeni, tingükila leha tanünkgo uhunügü ihekeni. Ülepei leha figo agü agükenügü ihekeni, itsuhutelü leha ihekeni aheĩtsomi ihekeni tuĩpulugukoi.

8Üle igotiha uãke kohotsi, hite hekeha katohola kugijü hata, utoto hekeha tühitsü ake KUKANETÜGÜ Deusu hülu talü ngata itu hekinite. Ületsei geleha KUKANETÜGÜ Deusu inha otonginünkgo i akungati. 9KUKANETÜGÜ Deusu heke leha hüle utoto ingenügü, ijeginügü leha iheke: "Tütomima otongindagü uinha?", nügüha iheke.

10Ülepeiha utoto kilüha: "Ehülu talüha uheke ngata hekini kitute, uinegetu leha tingükilaha uanügü atehe, üle ateheha utonginügü", nügü leha iheke.

11"Tüma 'tingükila ege', tangoi eheke?", Deusu kilüha iheke. "I ihisü ĩpügü nika egei eheke ketinhe atsange ukipügü eheke?", nügü leha iheke utoto heke.

12Ülepeiha utoto kilü Deusu heke: "Itaõ engundühügü uinha uakongoi itsomi, üngeleha tĩsinhü tundinhi uinha ĩtsomiha uheke, ülepei leha ĩjü uheke", nügü leha iheke Deusu heke.

13Ülepei leha KUKANETÜGÜ Deusu heke itaõ leginügü: "Tütomi ege agage tüilü eheke?", nügüha iheke.

Ülepeiha itaõ heke itüjü: "Eke hekeha uinkgugikügü, ülepei leha ĩjü uheke", nügü leha iheke.

14Ülepei leha KUKANETÜGÜ Deusu kilü eke heke:

"Itaõ inkgugitühügü ateheha eheke", nügüha iheke,

"ehesinhügijüingo leha uheke.

Tatuteha ngene tinkgukinhüko huja,

tatute ngene gehujalüko huja gehale,

ege tsügütse hüle tühesinhügisinhüingoi.

Igepei leha, ehüluingo alahitsiale ngongoho,

ngongo etunakipügü engeale leha tingugiha einhügü ahi.

15Eüilüingoha uheke itaõ ake tetimütongoi,

ehigükuẽgükope inhümingo leha itaõ higükuẽgükope imütongoi.

Aetsingoha itaõ higükuẽgüpe utoto heke leha egitügü kae atsugijüingo,

hotugui umbege itsamütisü itsilüingo eheke", ta leha iheke eke heke.

16Ülepeiha Deusu kilü itaõ heke:

"Egitamikügü hünenümingo leha uheke tütehuandi atai,

aitsükü leha isini eimaguingo,

üle hata geleha onho ake einhügüti einhümingo,

anetügüiha inhümingo", ta leha iheke itaõ heke.

17Ülepeiha Deusu kilü utoto heke:

"Ehitsü talü ateheha eheke", nügüha iheke,

"i ihisü ĩjükiha,

egeha ungubungupe ĩtsomiha eheke,

ahatahigisüi leha ngongo hesinhügijüingo,

aitsükü leha akatsuingo tingugi einhügü ahi

einhango hogitsomiha eheke.

18Tatute leha tetsua tuhugu tahuga atilüingo,

tinguküinhü gehale ngongohonga.

Angataguingo leha enginhambalüi.

19Aitsükü leha akatsuingo,

Tühingankgutimiha etelüingo

einhango hogitsomi eheke

apünguingo geleha.

Ülepei leha ngongo unagüi ogopijüingo,

ngongo unagüpe tüipügüiha anügü atehe", Deusu kita leha utoto heke.

20Ülepeiha utoto heke leha tühitsü ititü tüilü Evai, Eva inhügüingo ateheha tatuteha kugeko tankginhükoingo amai. 21KUKANETÜGÜ Deusu hekeha ngene hijope tüilü kingüi, üleki leha Adão ingündelü iheke ihitsü Eva ake.

22Ülepeiha KUKANETÜGÜ Deusu kilü: "Ãde leha hüle utoto heke tuhuti hesinhüha hekini muke gehale kuhunügü agage kupeheni. Inhalü hüle utoto unümi kupeheni hakila etetomi i ihisü tipaki gele tingugi kutsoho heke, ĩsote leha iheke tipaki leha tingugi inhümingo". 23Üle atehe leha KUKANETÜGÜ Deusu heke utoto aküginügü itaõ ake ngata itu hekini tongopenginhe, Edẽi ngongogu tongope nginheha, itsatsundomiha tüngatagu heke ngongoho, ngongo hatühügüpeiha anügü atehe. 24Deusu heke leha kugepe aküginügütse ingugi, igatitseniko tüilü leha iheke igatohokoha Keufĩ#3.24 Keufĩha akagoi ahütüha ukugeko ganingo hüngü, Deusu ngingokugu kahüalü ganingoko hüle. giti ihatigoho inhe ngata itu hekinina Edẽi ngongogu tongona. Deusu heke gehale aetsi espada itopingo tüilü tigati, etuãkeĩtagü leha tatute ngiko inhe inene, inene la. Egeaha tüilü iheke angini heke i tipaki gele tingugi kutsoho imbokitsüingi.

Currently Selected:

GEN 3: KUI-BIBLE

Highlight

Copy

Compare