GEN 4
4
Kaimi heke Abeu Epügü
1Adão heke leha tühitsü Eva ihijü, inhohanügü leha, aetsi leha imukugu inhügü ititüha Kaimi. Ülepeiha Eva kilü: "KUKANETÜGÜ heke leha uahetinhombalü, üle atehe umukugu inhügü". 2Ami gehale imukugu otohongo inhügü ititüha Abeu, Abeuha ekisei Kaimi hisü.
Abeuha ekisei ovelha inkgukinipe, Kaimiha hüle ekisei ngata itenipe. 3Tamitsi leha atai, Kaimi heke leha kutundinhügü inginügü tutuhinhaho tongopenginhe KUKANETÜGÜ inhaha ihatomi iheke. 4Abeu hekeha hüle kanegu inginügü, hotugui tankginhüpe, ülepei leha tuelü iheke, hekinipe ihungupe inginügü leha iheke Deusu inha ihatomi iheke. KUKANETÜGÜ inhügü leha tügeküili Abeu inha, nhigepügü kutundinhügü kaeha. 5Inhalü hüle Kaimi itüjüi iheke, inhalü muke gehale kutundinhügüi inhingepügü itüjüi iheke. Üle atehe leha Kaimi ingukugijü iheke, timühijaki leha inhügü.
6Ülepei leha KUKANETÜGÜ kilü Kaimi heke: "Tütomima eingukugundagü, etimütelü gehale igia agage? 7Titagengo tüigoteha eheke eitüjüingoha, titagengo tüitela hüle atai, üle goteha, inkeha atsange eimbata hesinhütene einde leha hakila eheke ehesinhügijüinha, egeha hüle atakanügü" Deusu kilü leha hüle iheke.
8Ülepeiha Kaimi kilü tühisü Abeu heke: "Kige tuhinhahona", nügüha iheke. Ülepei leha etelüko. Etimbegokondeni leha tigati, Kaimi heke leha tühisü Abeupe apilü, tuelü leha iheke.
9Ülepene leha KUKANETÜGÜ heke Kaimi leginügü: "Undema ehisü Abeu?", nügüha iheke.
"Inhalü uhunümi uheke. Uhisũügü küginhi niküle ugei?", Kaimi kilü leha Deusu heke.
10Ülepeiha Deusu kilü: "Tütomi egea hesinhü tüilü eheke? Itsakeha!", nügüha iheke. "Ehisũügüpe leha tue eheke, inhungugu atsapijü leha ngongohonga, inhungugu ikatsu leha uinha ukuge agage gele, tetimitoho ikatagüha iheke. 11Ehesinhügijüingo leha hüle igei uheke akügikügükiha eitsoho tongopenginhe, ehisũügü ungugu hapipügüpe hinheha eheke, ungu heke leha ngongo kaundühügü. 12Angatagote leha ngongohonga, inhalü leha ngata atilüingoi, inhalü leha ngongo inhahetungu inhümingoi atingenügü heke ahatingenügü heke gehale. Tipaki geleha eihilü heke einhümingo tatute ngongo ahi", ta leha iheke Kaimi heke.
13Ülepeiha Kaimi kilü KUKANETÜGÜ heke: "Aitsüküha uitamitagü, ungingudoho uate hekugu. 14Andeha uakügitagü eheke indongopenginhe, uhitseke leha uhüluingo tatute ngikomunde, tipaki geleha utonginümingo ehinhe. Tatuteha kugeko heke uhogisote, uelüti leha inhünkgoingo", Kaimi kita leha Deusu heke.
15Ülepeiha KUKANETÜGÜ heke itüjü: "Inhalü ege agage einhümingoi. Angini hekeha egote aitsükü leha üngelepe egitaminümingo, takiko leha inkgugetoho opijüingo itsaenga", nügü leha iheke. Üle ateheha KUKANETÜGÜ heke uhutohondetoho tüilü Kaimi kaenga kugeko heke tuetüingi. 16Ülepei leha Kaimi telü KUKANETÜGÜ imbatalüpenginhe, etelü leha Noji#4.16 "Tatute leha uhitseke ngikomunde ihülundagü" nügü hunguha egei Noji Isigaeu itagü itaginhui. ngongoguhonga tegitundelüinha, giti ihatigoho inhe Edẽi heke.
Kaimi Higükuẽgüko
17Kaimi hekeha tühitsü ihijü, inhohanügü leha, imukugu ankgilü leha, ititü inhügü leha Enoki. Kaimi heke leha aetsi ete tüilü tehuki tükagahukute, ete ititü tüilü leha iheke Enoki, imugu ititüi geleha. 18Enoki inhügütse ingugi leha haingoi aetsi leha imugu inhügü igatohoha Ilaji. Ilaji inhügü leha haingoi aetsi leha imugu inhügü igatohoha Meujaeu. Meujaeu inhügü leha haingoi aetsi leha imugu inhügü igatohoha Metusageui. Metusageu inhügü leha haingoi aetsi leha imugu inhügü igatohoha Lameki.
19Lameki hitsüha uãke takiko, aetsingo igatohoha Ada, otohongo igatohoha Sila. 20Tühitsü Ada akeha, aetsiha Lameki mugu inhügü igatohoha Jabau. Üngeleha uãke hotugui kuã tiluĩtsinhü ata tegitundenhüi, hotugui gehale ukugei tapigüko inkgukilü inetinhi tuhugu. 21Jabau hisũügüpeha ihisüpe ekisei Jubaui. Jubauha ekisei hotuguiha ukuge tanga ĩhuntenimbüngü tikisinhü gehale titükinhü. 22Ihitsü otohongo Sila akeha, Lameki mugu inhügüha, ititü inhügü leha Tubaukaimi. Tubaukaimiha ekisei ukuge kunkgasitoho kagame hatatinhibüngüpe igatohoha bronze otohongo igatohoha ferroi. Aetsiha Tubaukaimi ingadzu, igatohoha Nagamai.
23Ülepeiha Lameki kilüha takikongo tühitsão heke:
"Ada kutake, Sila kutake gehale, kutagüe ekuatsange hekite.
Uhitsão, itsatüeha atütüi ukilü,
Aetsi uãke utoto elü uheke, kotsila umbege uapilü hinhe iheke.
Aetsiha künga elü uheke, ugekutuĩjütse hinhe iheke.
24Kaimi egote naha angini heke, takiko leha inkgugetoho ihisũüdãope apünguingo,
Angini heke naha hüle uegote, aitsükü leha egitamikümingo, 77 leha ihisũüdãope apünguingo", ta leha iheke tühitsão heke.
Seti Ankgipügü
25Adão hekeha tühitsü ihijü gehale, otohongoi leha imukuguko inhügü. Imukugu ankgigote leha Eva kilü: "Deusu hekeha igei umukugu tunügü Abeu itakongo Kaimi nopügü. Ititü tüilü leha iheke Seti#4.25 "Tunügü" nügü hunguha egei Seti Isigaeu itagü itaginhui.. 26Seti itsote leha haingoi imugu inhügü leha, ititü tüilü leha iheke Enüsu.
Egetaha uãke kugeko etinenügü leha Deusu aitügijü heke igia agage: "Ailikügüha tiheke KUKANETÜGÜ", nügükilüha ihekeni.
Currently Selected:
GEN 4: KUI-BIBLE
Highlight
Copy
Compare
Share
Want to have your highlights saved across all your devices? Sign up or sign in
© Associação Linguistica Evangélica Missionária
