GEN 28

1Ülepeiha Jako ingenügü Isaki heke, itagimbakilü leha iheke, inhakongonügü gehale iheke: "Keitandũe atsange Kanahã itãugu indongoko ake. 2Etekeha Mesopotamiana, angaũpügü Betugeu üngati atsange eitse, ata apaha. Osoguha Labãu ata hisũügü limoha engüilüingoi aetsi ehitsüi. 3Deusuha Aitsüküngo Tinhaheninhü hekeha hekite eüitai, kaküngiha elimo itsomi, kaküngi gehale ehigükuẽgükope epünetomi, kaküngi leha kukitagüi itsokomi. 4Deusu hekeha ige ngongogu tundai einha ehigükuẽgükope inha gehale inhihatühügüpeha angaũpügü Apagahãu inha, egea leha ige ngongogu otoi einhümingo telo agageha ugupo eitsoho otoi", nügü leha iheke tumugu heke. 5Ülepei leha Jako egikanügü leha Isaki inha, etelü leha Mesopotamiana. Etelü leha tijogu Labãu inha, Betugeu muguha ekisei, Agã itagüpeha, Hebeka hisũügüha ekisei, Jakoko amaha Esau ake.

6Esau heke leha egea hekite Isaki kipügü uhunügü Jako heke, Jako humipügü atai leha iheke Mesopotamiana tüitandu inha. Isũü heke gehale hekite tüipügü uhunügü iheke, inhakongodühügü gehale iheke sitadundüingi Kanahã itãugu ake. 7Jako heke leha tũü ikenitühügü uhunügü Esau heke isi ikenitühügü uhunügü gehale, etepügü atai leha Mesopotamiana. 8Esau heke gehale isũü akitila Kanahã itãugu anügü uhunügütse ingugi, 9aitsükü leha aetsi tühitsü tüilü gehale iheke, einde gehale uãke telo ihitsão. Etelüha uãke Isimaeu üngati, Apagahãu mugupeha ekisei, isitanduha uãke Magalate ake, Isimaeu indisüha, Nebaiote ingadzuha. Egea leha tilako ihitsü inhügü.

Jako Onitühügü Beteute

10Jako telü leha Beseba tongopenginhe Hagãna. 11Gitipe enügü leha ngikomunde gele etelü hata ama. Tita geleha isünkgülü. Tehu etekutsipügü inügü leha iheke tügikehoi, tita geleha alahandelü isünkgütomi. 12Ülepei leha isonitu. Ngongohongopenginhe leha kukaengoho tepügü ingilü iheke kahüati, Deusu ngingokuguko kahüalüko kaengundagü tuhuguha ugupo nhüntegako gehale. 13KUKANETÜGÜ itsagüha kukaengoho ũpüküga, nügüha iheke: "KUKANETÜGÜHA ugei, angaũpügüha Apagahãu Deususü oũü Isaki Deususü gehale. Einhaha egeha ngongo tügaho eitsoho tunümingo uheke ehigükuẽgükope inha tuhugu gehale. 14Kaküngi leha ehigükuẽgükope inhümingo. Ngongo unagü aküngindu agage leha inhünkgoingo. Agakutelükoingoha tatute ngikomunde tuhuguha, giti ihatigoho inhe giti endoho inhe la tuhuguha. Anügü ateheha kukitagüko tuhugu tatute ngongohongoko üilüingo uheke hekite ehigükuẽgükope anügü atehe gehaleha. 15Akeha igei uatühügü, uimbataha egei einhümingo tatuteha ngikomuna etegote; ópijüingo leha uheke ige ngongoguhonga. Inhalüha ongondilüingoi uheke, tatute leha ungihatühügüpe tüilüingo uheke einha".

16Jako hakilütse ingugi leha, nügüha iheke: "KUKANETÜGÜ beki ãde inde, inhalüha uhutohotsei uheke!", nügü leha iheke. 17Inegetunda leha, ülepeiha nügü iheke: "Kengeni ekubele ige kitu, Deusu üngü naha igei Kahü üngatagüha", ta leha iheke.

18Ülepe okogetsi leha mitote hekugu gele, Jako heke leha tehu tügikehoi tüngüipügü inügü, tikanhi leha tüilü iheke, ülepe gepisautelü leha iheke oliva ngukauguki Deusu inhaha ketepunkgitohoi itsomi. 19Jako heke leha ege ititü tüilü Beteui#28.19 "Deusu Üngü" nügü hunguha egei Beteui Isigaeu itagü itaginhui.. Egetaha uãke ete hakingohüngü iheke itanügükilü Lusi.

20Tita leha Jako kilü tüngüilüingo heke Deusu hekeha tüigote inha. Igiaha nügü iheke: "Deusu ataiha uake, eimbataha utegote leha utelü hata, uinhango tundoteha eheke uingü gehale, 21apaju üngatiha ugopisote hekite gele, ülegoteha KUKANETÜGÜ einhümingo leha uDeususüi. 22Ina leha uhutohondetohoiha tehu ungüipügüpe inhümingo ukugeko etsohoi áitügijü inha; tatute leha ngiko kae ukengote timühoni leha akenümingo uheke, ülepeiha aetsingo gepagüpe tunümingoha uheke einha kutundinhügüi".

Currently Selected:

GEN 28: KUI-BIBLE

Highlight

Copy

Compare