GEN 22
22
Deusu heke Apagahãu Ingukutühügü
1Tamitsi tsetse leha atai, Deusu heke Apagahãu ingukunügü angoloiha kikeninügü ingitomi iheke. Deusu hekeha iganügü: "Apagahãu!", nügüha iheke.
"Kitseha, ãde uge", Apagahãu kilü leha.
2Ülepeiha Deusu kilü: "Osiha itse ajoguha emugu Isaki ebüngüngüha aitsükü, Mogia ngongogunaha eteke ike. Titaha andüponhogu ihanümingoha uheke emugupe etomi leha eheke, ülepe hotegomi gehaleha eheke kutundinhügüi uinha.
3Ülepe okogetsiha, Apagahãu etikaĩjü leha mitote hekugu gele, jumento humbonga leha ngiko ongitegagü iheke, ito keĩgü agugijü leha iheke tumugupe hotegohoingoha iheke kutundinhügüi Deusu inha, etelü leha Isaki ake Deusu ngihatühügüpena, takikoha inhingokugu ikeni. 4Tilako leha isigotisüi etelüko hata, Apagahãu heke leha andüponhogu ingilü hakingopenginhe. 5Ülepeiha nügü iheke tüngingokuguko heke: "Indeha eitsüe jumento ake. Ugeha kangamuke ake titsetai hekite nügü inha Deusu heke aitügijüi tigati. Tamitsilaha egei tisogopijüingo", nügü leha iheke.
6Apagahãu hekeha ito keĩgü inügü tumugu hotegoho ipopügüha iheke ihatomi kutundinhügüi Deusu inha, Isaki antahonga leha tüilü iheke ipoĩtsomiha iheke. Üngele geleha ito igeni taho gehaleha, tühülaleni leha etetako aetsingoi. 7Isima leha Isaki kilü: "Apa!", nügüha iheke.
"Kitseha umugu", Apagahãu hekeha itüjü.
Isaki hekeha ijeginügü: "Ãde naha ito kungipi itseĩgü ake, unde büle ovelha mukugu anügü kunolüingo ülepe hotegomi kupehe kutundinhügüi Deusu inha?", Isaki kilüha tũü heke.
8Apagahãu hekeha itüjü: "Umugu, Deusu geleha ovelha mukugu ingitinhingoi tuetomi kupehe ülepe hotegomiha kutundinhügüi Deusu inha", nügü leha hüle iheke tumugu heke. Tühülaleni leha etetako aetsingoi.
9Deusu heke leha ihatühügüpena etimbegokondeni, Apagahãu heke leha tehu undagitsepügü tüilü Deusu akatsohoi, ito keĩgü tüilü leha iheke uguponga. Ülepene leha Isaki kamijü iheke, ülepe tüilü leha iheke tehu undagitsepügü uguponga, ito keĩgü uguponga. 10Ülepei leha taho inügü iheke tumugupe etomi iheke. 11Üle hata leha kahü alüpenginhe, KUKANETÜGÜ Ngingokugu heke itanügü: "Apagahãu! Apagahãu!", nügüha iheke.
"Kitseha, ãde taka uge", Apagahãu kilü leha.
12Deusu Ngingokugu Kahüalü kilüha: "Kangamuke ketihinhe. Ngikona ketüinge üngele. Epüngüngijü uhunügü akahüle igei uheke Deusu inha, inhalü naha emuguki uitungikügüi eheke, ajoguiha umbege atai", ta leha iheke Apagahãu heke.
13Apagahãu inhünu leha tigüĩjüi, kanegu ihetühügü ingigote leha iheke sikügü kae i kusügü kaenga akünetühügü atai. Apagahãu telü leha, ihenügü leha iheke, tumugu itakongoiha tuetomi, ülepe hotegomiha ihatomiha iheke kutundinhügüi Deusu inha. 14Apagahãu heke leha ege ititü tüilü: "KUKANETÜGÜ hekeha kukijatsitegohoingoi". Üle ateheha ãde geleha nalü: "KUKANETÜGÜ hekeha kukijatsitegohoingo tehugu ondühügüte", natohoi.
15Aitsükü gehaleha KUKANETÜGÜ Ngingokugu kahüalü heke kahü alüpenginhe Apagahãu iganügü. 16Ülepeiha KUKANETÜGÜ kilü: "Egeaha tüipügü atehe eheke, inhalüha emuguki uitunginümi eheke, ajoguha emugu, ukilüha upehe gele, hekite hekugu leha uinhümingo einha, 17hekiteha eüilüingo uheke, kaküngi gehale ehigükuẽgükope itsomi tüilüingo uheke. Kahü alü kandinhoko aküngidua leha isakünginduko inhümingo, nhetune ipa kuẽgü itümbokongo unagü agage gehale. Timütongoko igelüingo leha ihekeni tüituko ihenügüki, 18hekite leha tatute kitagü tuhugu ngongohongo tüilüingo uheke ehigükuẽgükope anügü atehe, uikenitühügü ateheha eheke.
19Apagahãu ogopijü leha titsatüati tüngingokuguko inha, tatute leha etelüko Besebana. Tita leha Apagahãu egitundelü.
Nao Higü Kuẽgüpe
20Tamitsi leha atai, akinha etimbelü Apagahãu inha, tilakoha inkgugetoho ihisundu ihisũügü Nao etijipügü kae tühitsü Miuka ake.
21Usiha hotugui tankginhüi, ülepe nginheha ihisũügü Busi,
Agã apaha Kemueu,
22ülepeneha Kesejiko ankgilü, Hasoha, Piudasiha, Jilafeha Betueu gehale. 23Betueuha tatinhüi uãke ekisei Hebeka apai.
Tilako inkgugetohokoha akagoi Miuka heke Nao ijipügü, Apagahãu hisũügüha.
24Nao hitsü otohongo igatohoha Heumai, aitsükü gehale ijimo inhügü ike:
Hotuguiha Tebaha, ülepe nginheha Gahãha, ülepe nginheha Tagasi upügükoiha Magaka.
Currently Selected:
GEN 22: KUI-BIBLE
Highlight
Copy
Compare
Share
Want to have your highlights saved across all your devices? Sign up or sign in
© Associação Linguistica Evangélica Missionária
