GEN 21

Isaki Ankgipügü

1Hekite leha Saga itsomi KUKANETÜGÜ heke tüilü tühügüa hekuguha iheke. 2Inhohanügü leha, aetsi leha Apagahãu ijilü iheke haindenei leha atai. Kangamuke ankgilüha Deusu kipügü ati atai. 3Apagahãu heke leha tumugu ititü tüilü Isaki. 4Tilako leha inkgugetoho Isaki ankgipügü igotisü tepügü atai, Apagahãu heke leha ihügi ingüpe itsakenügü, Deusu kipügü agageha. 5100ha Apagahãu isũandühügü ataiha egei imuguha Isaki ankgilü.

6Saga kilüha: "Deusu heke leha uhosihanenügü#21.6 "Hosigu" nügü hunguha egei Isaki Isigaeu itagü itaginhui.; tatute leha ukugeko heke uakinhagü tagote ihosigukoingo leha tügekuitügükoi uake", nügü leha iheke.

7Nügü gehale iheke: "Inhalüha umukugu inha uangatügü tunügü ingukgingikügütsei uãke uheke, ãdeha Apagahãu haindui leha hüle ijitagü uheke", Saga kita leha tepehe.

Apagahãu heke Haga Akügitühügü Isimaeu ake

8Kangamuke etükilü leha, tüti angatügü ilijükinügü leha iheke, üle igoti leha Apagahãu heke aitsükü ailene tüilü. 9Saga heke leha hüle Isimaeu heke Isaki undikügü ingilü, Ejitu itagüha Haga mukuguha, Apagahãu akeha etijipügü heke. 10Ülepei leha nügü iheke Apagahãu heke: "Akügikeha ngingoku kinhakugulalü tumukugu ake, inhalü naha leha apüngote engikogupe akenümingoi imukugu heke umukugu Isaki ake", nügü leha iheke.

11Aitsükü leha kotühüngüi Apagahãu inhügü egeaha Saga kigote, imuguiha Isimaeu anügü atehe gehale. 12Deusu kilü leha hüle iheke: "Ketehuhesũeha atsange kangamuke kae, ngingoku kinhakugulalü kae gehale. Saga kipügüaha eheke tatute tüike, ehigükuẽgükope hekuguha hüle angoloi tatinhüingoi Isaki kaengopenginhe. 13Ngingoku kinhakugulalü mukuguha emugu gehaleha ekisei, üle ateheha ihigükuẽgükope itsomi kaküngi tüilüingo uheke, kaküngi leha aetsi isitagü itsomi.

14Ülepe okogetsi leha mitote, Apagahãu hekeha kuminhango inügü, ngene hijope tüipügü utukui üle ataha tugupotsi tuã, tunügü leha iheke Haga inha, ingonetühügükopenginhe leha Apagahãu heke, ihumilü leha iheke kangamuke ake. Haga telü leha Beseba ngongogu kugepingo hüngüte#21.14 Ngongo kugepingo hüngü, katohola unkguha i tita gehale, anginita ekugu hüle nhetune tsügütse inhügü. Versículo 20, 21te gehale einde apakipügü. tühülale uhitseke gele.

15Tuãpe etsimbükilütse ingugi leha, kangamukepe ngondilü leha iheke i kusügü ohinhe, 16etelü leha tüakandigi hügeki katagipügü ihakindu agage, ingunkgingu leha igia: "Inhalü ekuguha kangamuke apüngu ingilü ingunümi uheke", nügü leha iheke. Tita leha hakila tüakandi atai, inilu etinenügü leha.

17Deusu heke leha hüle kangamuke inilu talü kahü alüpenginhe, Deusu ngingokugu kahüalü heke leha Haga itanügü, nügü leha iheke kahü alüpenginhe: "Haga, tütomima etehuhesundagü? Keinegetũeha! Deusu heke leha egei kangamuke inilu talü inhondipüa eheke. 18Ogopitseha inhondipüati eheke, itsikanhekeha kangamuke inhatügü kae, itsaeha egei aetsi tsekegüi kitagü tüilüingo uheke", nügü leha iheke Haga heke.

19Ülepei leha Deusu heke ingugu agühelü tuã ngagü kipügü ingitomiha iheke. Etelü leha tigati, tuã ingü alenenügü leha iheke tuãki, kangamuke inha leha tunügü iheke ilitsomi iheke.

20Deusu imbata geleha kangamuke itsagü etükilü hata. Ngongo kugepingo hüngüte leha itu itsagü tahaku otoi leha inhügü. 21Üle hataha Pagãte, ngongo kugepingo hüngüte itu itsagü, isi heke leha Ejitu itãugu uhijü ihitsüi itsomi.

Apagahãu Atakisü Atapügü Abimeleki ake

22Egetaha Abimeleki telü Apagahãu heke tigi. Fikou akeha etelü, isatatuguko hoguteniha. Igiaha nügü iheke: "Deusuha ekisei akeha tütengalü heke ungingitagüi tatuteha ngiko tüilü hata eheke. 23Üle ateheha, inde kitseha Deusu imbata inhalü mukeha uinkgugikümingoi eheke, ulimo inkgugikümingoi, uhigükuẽgükope inkgugikümingoi gehale. Hekiteha igeke uitagü hekiteha eigegatühügüa uheke telo itagüiha umbege atai", nügü leha iheke Apagahãu heke.

24Apagahãu hekeha itüjü: "Osi, ukilüha Deusu imbata!", nügü leha iheke.

25Apagahãu heke leha Abimeleki gipagakijü inhingokugu heke tuã ngagü dzipügüpeki inhingokugu ihenkgupügü hinhe. 26Abimeleki hekeha itüjü: "Inhalü tatsange egea tüinimbüngü uhunümi uheke. Inhalü tiha egea uãke ekilütsei uheke. Itsata gele hüle igei uheke ãde", nügü leha iheke.

27Ülepeiha Apagahãu heke leha ovelhako inginügü tapigü tuhugu gehale, tunügü leha iheke Abimeleki inha, atakisüko atalü leha hekite. 28Apagahãu hekeha takiko inkgugetoho tüngigikasikügü ovelha hatankgilü, 29Abimeleki hekeha ijeginügü: "Tütomima takiko inkgugetoho ovelha mukugu hatankgilü eheke?".

30Itüjüha iheke: "Takekoha inkgugetoho isaküngindu ovelha hatankgilü uheke einha, itüsoteha eheke uengüiha egei tuã ngagü tükinhüpe anügü engingukgingikümingoi", Apagahãu kilü leha iheke.

31Üle atehe leha ege kitu inhügü Besebai, titaha takikongoko kipügü atehe tepeheni Deusu imbata.

32Egea leha atakisüko atapügünginhe Besebate, Abimeleki ogopijü leha Filisia itagü ngongoguna isatatuguko hoguteni Fikou ake. 33Apagahãu heke leha Besebate aetsi i tamargueira itelü, tita leha hekite nügü iheke KUKANETÜGÜ heke aitügijüi, Deusuha Tetsimbükimbüngü hekeha. 34Apagahãu egitundepügü itsagü leha Filisia itagü ngongogute tamitsi.

Currently Selected:

GEN 21: KUI-BIBLE

Highlight

Copy

Compare