GEN 20

Apagahãu Jegate

1Apagahãu telüha Mãhe tongopenginhe, Negebi ngongoguhonga leha etelü, tita leha itsagü Kajisi londa Suhi ake. Ilainha leha, Jegate atai, 2tingadzuiha Saga tühitsü ihanügükilü iheke ukugeko inha. Üle ateheha Jega anetügüha igatohoha Abimeleki heke Saga ingetinhi humilü tütajühegü atati.

3Telo kokoha Deusu apakilü Abimeleki onitümi, nügüha iheke: "Tünhokinhü ekisei itãoi itiginho embumilüi, üle ateheha apünguingo akatsange leha igei!", nügü leha iheke Abimeleki heke sonitümi.

4Abimeleki heke geleha tihisila atai üle ateheha nügü iheke: "Kukanetügü, inhalü tinaha ngikona hesinhüi uinhügüi. Uelüingo nika leha eheke uitagü unganetelüpe kugiti, angi?", nügüha iheke. 5"Apagahãu benaha 'uingadzu ekisei' tangoi, 'uhisũügü ekisei' ihitsü kilü gehale leha, atütüi leha egea uinhügü hangamitagü uheke", nügü leha iheke.

6Ülepeiha Deusu hekeha itüjü isonitümi: "Tuhutiha uheke hekini agage egea einhügü hangamikügü eheke, üle ateheha ihitsomi eheke eũbungu uheke. Ege agage naha tüiholü eheke sini leha hesinhüi ipolü uinha. 7Osiha opitseha itaõpe inho inha. Uakisüpe ihatinhiha ekisei, uinha leha hekite einhügü ikanümingo iheke ápüngudüingiha. Opitselaha atai, angoloi hekugu leha apünguingo tatute andagükope kugiti", Deusu kilüha Abimeleki heke sonitümi.

8Ülepe okogetsi leha, mitote ekugu geleha Abimeleki hakilü, tatute leha ukugeko ike tükatsinhüko ingenügü iheke, ülepei leha inhani tüonitügüpe ihanügü iheke. Itsagote leha ihekeni aitsükü leha inegetuko. 9Ülepene leha Abimeleki heke Apagahãu ingenügü, nügüha iheke: "Inkeha egea tisüilü eheke! Inhalü uãke egea tsihüiholüi eheke. Angi hüle hesinhüi muke eüilü uãke uheke? Egea leha tisüipügü ateheha eheke hesinhü tüini hekugu leha uatühügü uitagüpe kugiti gehale. Egea uãke egei einhügü inhalütse hekuguha sagage uãke eipolüi", nügü leha iheke Apagahãu heke. 10Ülepeiha Abimeleki heke Apagahãu leginügü: "Ungua nile eingukgingu uãke egei?", nügüha iheke.

11Ülepeiha Apagahãu hekeha itüjü: "Upehe geleha ukilü: Inhalütseha inde itsangi Deusu inginitsei, üle atehe leha uelüingo ihekeni uhitsüpei itsokomi", ukilüha upehe gele. 12"Uingadzu hekugu hüle ekisei apa inheha, ahütüha ama inhela, uitandühügüha ike üle hata geleha. 13Deusu heke leha uhumigote apa üngalüpenginhe, utelü leha teloko ngongogu ahi, ukilüha Saga heke: 'Telo itatiha kutegote, ehisũügüiha uihanümingo eheke' ekilüingoha', ukilüha uãke iheke".

14Ülepei leha Abimeleki heke Saga opijü Apagahãu inha. Ovelha tunügü tuhugu gehaleha iheke inha, tapigü tuhuguha, ngingoku kinhakugulalü tuhuguha utotoko itaõko gehale. 15Abimeleki kilüha: "Ãde tsüha ngongo. Angaküngitse tsüha eitu akiti", nügüha iheke.

16Saga hekeha nügü iheke: "1.000iha prata tüipügü aküngindu tundagü uheke ehisũügü inha ukugeko imbataha hesinhü tüitela atühügü ihipügüi. Egea leha hesinhü tüitela eingilüingo tatute ukugeko heke.

17-18Ege agageha Apagahãu hitsüha Saga atühügüpenginhe, KUKANETÜGÜ hekeha Abimeleki üngü tajühe atalüko itaõko tüipügü atai tumukukila. Apagahãu itaginhu leha Deusu ake Abimeleki hekutegomi iheke, ülepei leha Deusu heke ihekutelü. Ihitsü hekutelü gehaleha iheke inhingokuguko ake, egea leha aitsükü gehale etijilüko.

Currently Selected:

GEN 20: KUI-BIBLE

Highlight

Copy

Compare