GEN 19

Sodoma Õgonkgetühügü Gomoha ake

1Takekongokoha Deusu ngingokuguko kahüalü etimbelü Sodomana koko leha inhümbata, Lo ataiha tüakandi etena ketimbetoho huta. Deusu ngingokuguko kahüalü ingilütse ingugiha iheke, itsikaĩjü leha ingilükoinha. Etipondelü leha, tühinitü akanenügü leha iheke ngongohonga itsangitagükoha egei iheke, 2nügüha iheke: "Amago uüngatiha egetüete. Tigatiha atapügüko konkgitomi ehekeni eitsokomi tsüha koko tita. Ülepene tsüha ihingila etikaĩsokomi etegokomi leha.

"Inhalü, hugombonga titsetai", nügü leha hüle ihekeni.

3Aitsükü gehaleha Lo kilü ihekeni etegokomi inhüngati. Ülepei leha "ehẽ", nügü ihekeni, enünkgo leha inhüngati. Lo kilü leha tüngingokugudão heke inhangoko hekini tüitomi ihekeni, pão tüitomi leha uambutsitsohopila, ülepe inhambalü leha ihekeni.

4Tünkgülükoinhaha etelüko igakaho, tatuteha Sodoma utotogu, küngako, haindeneko heke muke leha ngüne igüĩjü. 5Lo iganügüha ihekeni, nügüha ihekeni: "Undema akago utotoko tetinhükope eüngati ige koko? Inkgeteha ünago ina unhati isajotitokomi tiheke", ta leha ihekeni.

6Ülepei leha Lo telü unhati utotoko itaginhitigi, ngüne ahunügü leha iheke, 7nügüha iheke: "Kangamukeko! Inhalü hüle egea hesinhüi einhünkgoi! 8Kutagüeha!", nügüha iheke ihekeni. "Uindisüha ãde takiko, inhalü geleha utoto ingati inhünkgoi. Inkgatilükoingoha uheke ngikonaha tüigokomi tsüha ehekeni. Inhalü hüle ago utotoko tüilüi ngikona ehekeni, ukugegü hüle agoi uimbatalü", nügü leha iheke ihekeni.

9Ige helüi leha nügü ihekeni: "Atahaĩke ataiha haki egetela!" Igia leha tagü ihekeni tepeheni: "Utotoha kukitagüko hüngü itsagüha kukinguhelükoti kukügühütuki kukingugitinhi agage!", ta leha ihekeni. Ülepeneha etimükeĩlüko Lo inha, nügü leha ihekeni: "Aitsükü ekugu hüle hesinhüi eüilüingo tiheke akagoha eukugegüko tüihopügü uate ekuguha". Kotsi leha Lo agilü ihekeni, etelüko leha ahulupe kuhenügütiha umbege itsako. 10Ülepei leha kotsi Lo ihenügü isukugegüko heke, isahitsilü leha ihekeni üngati, ahunügü leha ihekeni. 11Ülepeiha isukugegüko heke leha tatute utotoko unhalükope tüilü tingugila itsokomi küngakopeha haindenekope kugiti muke gehale, egea leha inhalü üngata hogijüi ihekeni.

12Takekongoko utotoko hekeha Lo leginügü: "Angi aitsükü gele episunkgitsoho inde etete? Engingekeha elimo, eindisü ngisoingoha, teloko gehale episunkgitsoho, indongope nginheha engibingeke ünago, 13igeha kitupe õgonkgenümingo leha igei tiheke. KUKANETÜGÜ hekeha ige otomo heke hesinhü tüilü tangalü, üle ateheha tsihumipügü iheke etepe õgonkgetigi", ta leha ihekeni Lo heke.

14Ülepei leha Lo telü tindisüko ngisoingo ipopügüko heke tigi: "Ijahejiha indongopenginhe egetüe, KUKANETÜGÜ hekeha igei etepe õgonkgenümingo!", ta leha iheke. Taloki leha isentigotu agage ihangamikügü ihekeni.

15Mitote hekugu geleha, Deusu ngingokuguko kahüalü heke leha aitsükü Lo ikukinetagü igia: "Otongitekeha tüheinhi, igekeha ehitsü takongoko gehale eindisü etekeha indongopenginhe, apüngundüinginiha etepe õgonkgetote".

16Tamitsi leha inhügü hinhe, utotoko heke leha inhutakehenünkgo, ihitsü gehale, takikoha indisü, titalüpenginhe leha isahitsilüko ihekeni ete hogekela, KUKANETÜGÜ otünkgijü ateheha ihekeni. 17Igelükotse ingugiha ihekeni ete tongopenginhe, aetsingo kilüha Lo heke: "Atsakukeha, etinhankgikeha! Kegetimükeinge atsange, inhalü mukeha etsütelüingoi ige lombo! Eihikeha andüponhogu tuhugu uguponga, apüngu akenhi", nügü leha iheke Lo heke.

18Lo hekeha itüjü: "Ege! Ojo ataitiha egea uinhakongonügü eheke! 19Hekite hekuguha uinha eitsagü uinhankgitagü eheke. Ihaki hekuguha ige heke andüponhogu, tetimbela geleha uatai uhogijüingo iheke, uelüingo leha iheke. 20Ãde inde ete ihunkgu. Hakila hekuguha utsakulü ingugi tigati. Luale gele tigati utetai! Ihunkguiha umbege atai tita leha hüle utinhankgilüingo", nügü leha iheke ihekeni.

21"Aingotsaha egei", nügü leha iheke. "Tigatiha etelü unügü uheke, inhalüha egea ete engihatühügü õgonkgenümingoi uheke. 22Eihikeha ijaheji, aetsingoiha tigati etimbegote inhogonkgenümingo uheke", ta leha iheke Lo heke. Ülepeiha ete ititü inhügü leha Soai#19.22 'Ihunkgu' nügü hunguha igei Soa Isigaeu itagü itaginhui., ihunkgu egei Lo kilü ateheha.

23Lo etimbelü leha ete Soana giti ihatipügü atai leha. 24Ngikodupinhela leha, KUKANETÜGÜ heke leha, ito ngingingenügü kahüalüpenginhe tehu gehale tahetsale igatohoha "enxofre" eteha Sodoma uguponga Gomoha ake. 25Ege agageha ege etepe takikongope õgonkgenügü iheke, tatute leha inhongogu ugupongope tuhugu igüĩjüi. Tatute leha ukugekope apüngu ngatape apüngu tuhugu gehale. 26Lo hitsü tinhüni tünkgahinhe, sal hatühügüi leha itsagutilü.

27Ülepe okogetsiha, Apagahãu etikaĩjü leha iminügü inha, ogopijüha egei KUKANETÜGÜ ake itaginhundüati. 28Apagahãu heke leha Sodoma ingilü Gomoha ake, tatute gehale igüĩjüi titsatinhüpe, gititse gekunu itükaĩjü tsügütse leha nhingitagüi ngongohongopenginhe, unatsüma aitsüküngo ito igititsegüa.

29Egeaha Deusu heke etepe õgonkgetote tuhugu ege akatalüpe, Apagahãu inhügü leha ingujati, Lo inhankgilü leha iheke itu itsatühügü õgonkgenügü igakaho iheke.

Moabi Otomo Etihũtepügü Amõ Otomo ake

30Lo inegetu leha tinhügü heke ete Soate, üle ateheha etelü leha tegitundelüinha andüponhogu tuhuguna takikongoko tindisü ake. Tita leha itsako tehu atatagükipügü ata.

31Ülepeiha ihasü kilü tikene heke: "Apa leha haindenei, inhalütseha utotoi ige ngongoguho kunhoiha itsokomi. Inhalüha kunhotuingoi igia kutsote kuketijilüingoi muke gehale, kukügühütu agage tatuteha ngongoho. 32Üle ateheha vinho kenguni apa inha isijigüiha itsomi. Ingambalüingo leha kupehe ijitomiha kupehe, egea geleha tetsimbükila kutsokomi", nügü leha iheke tikene heke.

33Ülepe koko geleha vinho tunügü leha ihekeni tũüko inha, aitsükü leha isijigüi atühügü itsagü inhalüha etuhunügütsei, üle hata leha ihasü heke ingambalü.

34Ülepe okogetsiha ihasü kilüha tikene heke: "Konige apa ingambalü uheke. Vinho gehale atsange kenguni inha ige koko, ege akatsange leha ingambaningoi. Egeaha, kukuge takiko kulimotegai iheke, egeaha tepisũügüi geleha kutsamini", nügü leha iheke. 35Aitsükü gehaleha koko vinho tunügü ihekeni tũüko inha, ikene heke leha ingambalü. Aitsükü leha isijigüi atühügü itsagü inhalüha etuhunügütsei.

36Egea leha, Lo indisü takikongoko nohanügü, isũüko heke geleha ijilüko. 37Ihasü mukugu inhügü leha, ititü ihanügüha iheke Moabi. Ihigükuẽgükope itagü igatoho inhügü leha Moabi. 38Ikene mukugu inhügü gehaleha, ititü ihanügüha iheke Bẽ-Ami. Ihigükuẽgükope itagü igatoho inhügü leha Amõiha.

Currently Selected:

GEN 19: KUI-BIBLE

Highlight

Copy

Compare