GEN 18
18
Deusu heke Apagahãu Mugu Inhügüingo Ihatühügü Tühügüpea Iheke
1KUKANETÜGÜ apakilü gehale aitsükü Apagahãu inha hakilaha i heke Mãhe engü heke. Apagahãu akandühügü atai tetuandepügü üngataho, aitsükü hekugu isini giti atungu telü hata. 2Ngikodupinhela leha tilako utotoko apagatepügü ingilü iheke ihaki tsetse iheke. Ingigokondeni leha iheke tetuãdepügü üngatahongopenginhe leha atsakulü ingilükoinha, etipondelü leha ngongohonga, tühinitü akanenügü leha iheke itsangiha egei ingilüko hakitomi iheke.
3Ülepeiha Apagahãu kilüha: "Ege, ojo ataiti atsange uüngü uanügü ehekeni tetsüntela", nügüha iheke. 4"Tuãkito nihõho kembumitai atapügüko konkgitohoi ehekeni, ülepeneha inde epegenkgitamini i ohinhati. 5Kuminhango inginümingo gehaleha egei uheke, kotsi belaha tinhaheni ila etetamini", nügüha iheke ihekeni. "Aitsüküha ugekuitügitsagü uüngatiha uingilü inha etsühügüko heke, ugeha keminhambatamini", Apagahãu kilü leha ihekeni.
"Aingotsaha egei, isagage tsapa eitse", nügü leha ihekeni Apagahãu heke.
6Apagahãu telü leha tüheinhi tetuandepügü atati Saga heke tigi: "Ijaheji! Tilakoha ihisundu trigo tiginhugu angaũtsike, engunkguhitseha tüitomi eheke pãoi", nügü leha iheke tühitsü heke.
7Ülepei leha atsakulü ngeneko tünginkgukilüna, tapigü tükahukinhüpe ijotsetsepe inügü leha iheke, tunügü leha iheke tüngingokugu inha ilandetomi iheke jaheji. 8Tapigü angatügü ikukipügü inginügü leha iheke umahitingetühügü gehale, tapigü hungupe ilandepügü gehale, inhambalüko leha iheke. Etinhambalüko hata leha, iseponi leha itsagü tapagate i ohinhe.
9Ülepei leha ijeginügü ihekeni: "Undema hüle ehitsü Saga anügü?", nügü leha ihekeni.
"Angi ketuãdepügü ata", nügü leha iheke ihekeni.
10Ülepeiha aetsingo kilüha: "Ege isũaha uenhümingo eingadzelüinha aitsükü gehale, üle hata leha, ehitsü Saga mukugu inhümingo", nügü leha iheke.
Saga heke leha itsatagü Apagahãu nkgaho ketuãdepügü inkgua. 11Haindenekope hekugu leha akagoi Apagahãui Saga ake. Saga heke leha kunohanügüpe uatühügü atai. 12Üle atehe leha itigundagü tüonha, nügü leha iheke tütehua: "Haindene tinaha leha ugei unho tiha gehale, ege hunguti nika geleha uipolü?", nügü leha iheke.
13Üleipeiha KUKANETÜGÜ kilüha Apagahãu heke: "Tütomima Saga heke egea ukilü undikügü?", nügüha iheke. "Tütomima Saga itigu, tumukugu inhügü ikenipungu gehale iheke hanindeneiha anügüpile? 14Inhalütseha enkgugi KUKANETÜGÜ inha egehungu tüilü anümi. Igepeiha, aetsi leha sisũandühügü atai ige hunda gehale ugopijüingo, Saga mukugu inhümingo leha", nügü leha iheke.
15Egeaha Saga heke itsalütse ingugi, inegetu leha. "Inhalü tinaha uitigui!", nügü leha iheke.
"Ojoha epügakilü, angoloiha egei eitigu", nügü leha iheke Saga heke.
Sodoma Otomo Inhankgilü Ikatühügü Apagahãu heke Deusu inha
16Ülepene leha tilakongoko etikaĩjü, etelüko leha titalüpe nginheha ete Sodoma ingitohona. Apagahãu telü leha ikeni tigati ama ihatigiha inhani. 17Ülepei leha KUKANETÜGÜ kilüha tütehua: "Inhalü ekuguha Sodomate tüilüti uitsoho onginügüti uanümi Apagahãu inha", nügüha iheke. 18"Apagahãu Inhümingoha aetsingo kitagü aitsüküngo tinhaheninhü ngaũpügü kuẽgüi, anügü ateheha tatute kitagü ngongohongoko tüilüingoha uheke hekite. 19Aküngipügüha uheke elimoko inguhetomi iheke ehigükuẽgükope heke gehale unginguhetoho ikenitomi, hekiniha kukakihekundu tüitomiha ihekeni, hekite gehale uüini. Ikenitoteha ihekeni, tatute leha Apagahãu inha ungihatatühügüpe tüilüingo uheke", ta leha iheke tütehua.
20Ülepeiha KUKANETÜGÜ kilü Apagahãu heke: "Aitsüküha hesinhü tangalü uheke Sodoma kae Gomoha kae gehale, aitsüküha hesinhütene tüitagüha titalüko heke. 21Uüntelüingoha igei tigati egea undagatühügü ingukeĩtsilüinhaha itsaeni, egealaha atai uhunümingo leha uheke", nügüha iheke.
22Ülepei leha takikongoko utotoko telü leha takiko Sodomana, KUKANETÜGÜ inhügü geleha hüle Apagahãu imünhige. 23Apagahãu telü leha hakila iheke, nügüha iheke: "Kugekoha titagengo isügühütukope imbükilüingo nikaha gehale eheke tüakihesinhükope kugiti? 24Ẽ muke engapoha 50 titagengo isügühütuko kugeko aküngindu etete. Egeaha itsote, etepe õgonkgenümingo gele nikaha eheke? Inhalü niküle akagoha 50ha titagengo isügühütuko kugeko aküngindu ingilüti anümi jatsitsüi? 25Angoloiha inhalü titagengo sügühütuko elüingoi tüakihesinhüko huja, tatuteha hesinhü tüinibüngüpea. Inhalüha egea tüilüingoi eheke! Deusu Tatuteha Ngongoho kukügühütuki Kukingugitinhiha egei, üle ateheha ingugikümingo eheke hekite", nügü leha iheke Deusu heke.
26Ülepeiha KUKANETÜGÜ hekeha itüjü: "50iha titagengo isügühütuko aküngindu hogisoteha uheke Sodomate, egeaha itsote inhalüha etepe õgonkgenümingoi uheke", nügü leha iheke.
27Ülepeiha Apagahãu kilüha aitsükü: "Aitsükü ataiti hõhõ ukitomi eheke, tetsujetinhü tinaha hüle ugei, Kukanetügü hüle egei, 28aitsükü ataiti hõhõ ukitomi: 45iha titagengo isügühütuko aküngindu atai, etepe õgonkgenümingo nika gele eheke inhatüingoko apüngu pile?
Ülepeiha Deusu heke itüjü: "45iha tüakihekuginhüko hogisote uheke, inhalüha etepe õgonkgemümingoi uheke", nügü gehale iheke.
29Ülepeiha Apagahãu kilü gehale: "40iha atamini?", nügüha iheke.
Ülepeiha Deusu heke itüjü: "Inhalüha etepe õgonkgemümingoi uheke 40iha sakünginduko atai", nügü leha iheke.
30Ülepeiha Apagahãu kilüha: "Ojo atsange eingukugijü uheke Kukanetügü, ukitomi nihõho 30i tsügütseha isakünginduko atamini?", nügüha iheke.
"30iha ihogisokondeni, inhalüha etepe ogonkgenümingoi uheke", Deusu kilü leha.
31Apagahãu heke geleha ijeginügü aitsükü: "Kukanetügü otünkgitsomi ataiti aitsükü gehale egea ukilü heke. 20ha atamini?", nügüha iheke.
"20ha isakünginduko anügü atehe inhalüha etepe ogonkgenümingoi uheke", Deusu kilü gehale.
32Upügüi ekugu leha Apagahãu kilü: "Ojo atsange eingukugijü uheke Kukanetügü, upügüi ekugu leha hüle igei ukilü. 10ha atamini?", nügüha iheke upügüi leha.
Itüjüha iheke: "Inhalüha 10 anünkgo pile etepe õgonkgenümingoi uheke", Deusu kilü leha hüle iheke.
33KUKANETÜGÜ itaginhukinügütse ingugiha Apagahãu ake etelü leha, ülepei leha Apagahãu ogopijü tüngati.
Currently Selected:
GEN 18: KUI-BIBLE
Highlight
Copy
Compare
Share
Want to have your highlights saved across all your devices? Sign up or sign in
© Associação Linguistica Evangélica Missionária
