GEN 15

Deusu Atakisü Atapügü Apagãu ake

1Ülepeneha egea atühügünginhe KUKANETÜGÜ heke Apagãu itaginhinügü isonitügü agage:

"Apagãu", nügüha iheke. "Keinegetũeha atsange!

Euãdelüingo geleha uheke kuã agage.

Aitsükü leha kaküngi hekini tüilüingo uheke einha!", Deusu kilü leha Apagãu heke.

2Ülepeiha Apagãu kilü: "KUKANETÜGÜ tsüha esei, uDeususü! Tütomi tima leha hekini tunalü eheke uinha tumukila tiha uatai?", nügüha iheke. "Eliese tiha leha Damasiku tongo tatute tatinhüingoi uengikogupei uapüngühügü atai", nügü leha iheke Deusu heke. 3Apagãu kilü geleha aitsükü: "Inhalü tinaha umutilü unümi eheke, üle atehe leha aetsingoha ungingokuguko hujalüpe tankginhüpe uünga inhümingo leha uengikogupei tuhugu uapüngote", nügü leha iheke.

4Ülepei leha KUKANETÜGÜ kilü: "Inhalüha ese inhümingoi engikogupei apüngote. Aetsi hekuguha hüle ehitsü tehualüpe emugu tatinhüingoi engikogupei apüngote", nügü leha hüle iheke Apagãu heke. 5Ülepei leha Deusu heke Apagãu igelü etuãdepügü atalüpenginhe unhati, nügüha iheke: "Kahü atiha einhünunkge, kandinhokoha igükike, inhalüha igükitohokotsei. Igia leha ehigükuẽgükope aküngindu inhümingo kaküngi", Deusu kilü Apagãu heke.

6Apagãu heke leha KUKANETÜGÜ akisü ikenikügü, üle atehe leha Deusu heke tüakihekuginhüi ingilü, itüjü leha iheke.

7Deusu kilü gehale: "KUKANETÜGÜHA ugei. Ugeha etinhi ete Uhi tongopenginhe, Babilonha itati, igeha ngongo tundomi uheke einha otoiha eitsomi", ta leha iheke Apagãu heke.

8Ülepeiha Apagãu kilüha: "KUKANETÜGÜ tsüha esei, uDeususü, unguama hüle ige ngongo otoi uinhügüingo uhunümingo uheke?", nügüha iheke.

9Ülepeiha KUKANETÜGÜ hekeha itüjü: "Tapigüha itaõ endzete uinha, aetsiha cabra, aetsi gehale kanegu, tatuteha tilakongo isisũanünkgope, aetsiha tahatagi aetsi gehale ataha.

10Apagãu heke leha ngeneko igelü Deusu inha, ülepei leha tuelüko iheke, itsakenünkgo leha iheke igihükügüte, ülepe tüilü leha iheke tetimünopei, inhalüha hüle tolo epügü tüilüi iheke tetimünopei. 11Üle hata leha kuguagiko üntega ngene ikihügü uguponga, Apagãu heke leha ihuputegako.

12Ahugutilü telü hata leha Deusu heke Apagãu ünkgüngenügü aitsükü hekugu. Ngikodupinhela leha kengeni nhambüa gota atai etuhunügü. 13Ülepeiha KUKANETÜGÜ kilü iheke: "Itsakeha atütüi", nügüha iheke. "Ilainha leha ehigükuẽgükope egitundelü telüingo telo ngongogu itagü huja, tita leha ngingokui kinhakugula inhünkgoingo 400iha isisũanünkgoingo tühükügisila. 14Ngingokuiha kinhakugulalüi küiniko itagüpe egitamitomi leha tüilüingo uheke, egea leha tüigatühügükopenginhe ihekeni, tihipükoinhüpe igelüingo leha tühükügisila tüigatinhükope heke tütealeni. 15Tamitsi leha tingugi einhümingo haindenei hekugu leha, apünguingoha hekite tütehuhesila, ülepe onginümingo leha. 16400i leha kisũandühügü atai, ehigükuẽgükope ogopijüingo leha ina. Agoha Amohe otomo ügühütu inhügü hataha aitsükü hesinhüi egeaha inhümingo, egea leha itsokondeni egitamitokomi leha tüilüingo uheke, ehigükuẽgükope inginümingo leha uheke ina", Deusu kita leha Apagãu heke.

17Giti endühügüpenginhe leha, sinhambüatilü etinenügü leha, ngikodupinhela leha ahukugu ganingo apakilü tugupotsi isatugu sata tügekunale tahetsu kugiti gehale, ito tüipügü gehale imboi. Tahetsale leha ahukugu telü ito tüipügü ake imboi ngeneko imünoketatühügü igihükügüte. 18Üle igotiha KUKANETÜGÜ akisü atalü Apagãu ake: "Ige ngongo tunügüha uheke ehigükuẽgükope inha. Ngongo inhümingoha Ejitu hankgungingagü tongopenginhe aetsingoiha tsekegü hankgunginga Eufagatsina. 19Ige ngongoguhoha tatinhükote tuhugu leha etelüingo gehale: Keneu itagükoha, Kenasi itagükoha, Kajimõ itagükoha, 20Heti itagükoha, Pegesi itagükoha, Hefa itagükoha, 21Amohe itagükoha, Kanahã itagükoha, Jihigasi itagüko Jebuse itagüko gehale. Ago ngongogupe tuhuguha tatinhüingoi ehigükuẽgükope inha", Deusu kilü leha Apagãu heke.

Currently Selected:

GEN 15: KUI-BIBLE

Highlight

Copy

Compare