GEN 1

Ketinetühügü

1Ketinetühügüha Deusu heke kahü tüipügü ngongo ake.

2Deusu etinetoteha ngongo tüilü heke, inhalüha uãke ngiko gani gele anügütsei, inhalü muke gehale uãke tingugingokotsei. Tatute leha ngongo uãdepügü itsagü tuã ijotagü heke. Nhambüai geleha uãke tuã tupinhe tatute. Deusu Itsekegü tetagü geleha uãke tuã tupinhe.

3Ülepei leha Deusu kilü: "Eitseha imbo", nügüha iheke. Ületsei geleha imbo inhügü, tüakisüki leha tüilü iheke egea. 4Deusu heke leha imbo ingilü, hekite leha anügü ingilü iheke. Deusu heke leha imbo kimbani tüilü, nhambüa tüilü gehale leha iheke telotsei. 5Deusu hekeha imbo ititü tüilü igotingoi, nhambüa ititü tüilüha iheke kokongoi. Ahugutilü etinenügü leha, kokongo telü leha, kogetsingo mitondene enhügü leha. Hotugu igotisüha egei tütenhüi.

6Ülepeiha Deusu kilü: "Eitseha ngongo ugupetoho tuãko aketohoiha itsomi", egea leha tüilü iheke tüakisüki. 7Ülepeiha Deusu heke ngongo ugupetoho tüilü, tuã akenügü leha iheke, aetsingo itsomiha itsae kae, otohongo itsomiha itsae ngongoho. Egea leha inhügü. 8Deusu hekeha ngongo ugupetoho ititü tüilü kahüi. Ülepeiha gehale ahugutilü etinenügü leha, kokongo telü leha, kogetsingo mitondene enhügü leha. Otohongo igotisüha egei tütenhüi.

9Ülepenginheha Deusu kilü: "Tuã ngongo ugupongaha etuhutegüe aetsingoi tuãpingohüngü kitu apakitomi". Egea leha inhügü Deusu kipügüa. 10Deusu hekeha tuãpingohüngü ititü tüilü ngongoi. Tuã ititü tüilü hüle iheke tetuhutenhüpe ipa kuẽgüi tuhugu. Deusu heke leha hekite tüngüipügü ingilü.

11Ülepeiha Deusu kilü: "Ngongo hekeha tatute tetsua tuhugu ngata tagükinhü atingetai, tatute tetsua tuhugu gehale i tühindinhü". Egea leha inhügü Deusu kipügüa. 12Ngongo heke leha ngata atingenügü tuhugu, ngataha tagükinhü i gehale tühindinhü. Deusu heke leha hekite tüngüipügü ingilü. 13Ahugutilü etinenügü leha, kokongo telü leha, kogetsingo mitondene enhügü leha. Setilangogu igotisüha egei tütenhüi.

14Ülepeiha Deusu kilü: "Eitsüeha kimbani tuhugu ngongo ugupetoho kahü kaenga igoti uhutohoi kokongo uhutohoi gehale. Tuãkunadene uhutohoi tuhuguha itsamini, igoti uhutohoi tuhuguha, kisũanügü uhutuhoi tuhugu gehale. 15Egeaha imbo inhümingo tuhugu ngongo ugupetoho kaenga kahüa ngongo imbani tuhuguha". Egea leha inhügü Deusu kipügüa. 16Deusu heke gehale takiko tsekegüi imbo tüilü. Aetsiha tsekegüi igotingoi kimbani tüilü iheke, otohongoiha ĩhunkgu kokongoi kimbani tüilü iheke. Deusu heke gehale kandinhoko tüilü tuhugu. 17Deusu heke leha tüilü tuhugu ngongo ugupetoho kahü kaenga ngongo imbatomiha ihekeni. 18Aetsingo hekeha igotindene imbatomi, otohongo hekeha kokongotene imbatomi, telotseiha imbo itsomi telotsei gehale nhambüa itsomi. Üle ateheha igotindene ínhalü igoti, ülepene kokongotene ínhalüha nhambüai. Deusu heke leha hekite tüngüipügü ingilü. 19Ahugutilü etinenügü leha, kokongo telü leha, kogetsingo mitondene enhügü leha. Satakegeningogu igotisüha egei tütenhüi.

20Ülepenginheha Deusu kilü: "Eitsüeha tatute tuhugu tühülinhüko tijetinhüko tuã kua. Ngongohoha tatute tetsua tuhugu toloko itsomi tali ngongo ugupetoho kahü ohinhati". 21Egea leha inhügü Deusu kipügüa. Deusu heke leha tsekegüko tingugingoko tüilü tuã kuati, tatute gehale tegitundenhüko tuã kuati tuhugu. Tatute leha tetsua tuhugu toloko tüilü iheke. Deusu heke leha hekite tüngüipügü ingilü. 22Ülepei leha hekite tüilüko Deusu heke, nügüha iheke: "Tetijiha eitsüe. Epünetüeha, eitsüeha kaküngi tuã kuati. Kaküngi gehale ngongohonga epünetüeha toloko", nügü leha iheke. 23Ahugutilü etinenügü leha, kokongo telü leha, kogetsingo mitondene enhügü leha. Sinhatüingogu igotisüha egei tütenhüi.

24Ülepenginheha Deusu kilü: "Ngongo, tüikeha tatute tetsua tuhugu ngeneko. Ngeneko tinkgukinhüko tuhuguha, ngeneko gehujalükoha, ngeneko gehale talahitsinhüko tuhugu ngongoho". Egea leha inhünkgo Deusu kipügüa. 25Deusu hekeha tatute ngeneko tüilü tetsua tuhugu ngongohonga: Ngenekoha tinkgukinhüko tuhugu, ngenekoha gehujalüko, ngeneko gehale talahitsinhüko tuhugu ngongoho. Deusu heke leha hekite tüngüipügü ingilü.

26Ülepenginheha Deusu kilü: "Kengüitüngiha kuge kukagageni, kukagageniha itsokomi. Kangako aneteniha itsai, toloko aneteniha, ngeneko tinkgukinhüko aneteniha, ngeneko gehujalüko aneteniha, ngeneko aneteni gehale talahitsinhükoha ngongoho", nügü leha iheke.

27Deusu heke leha kuge tüilü tüagage,

tüagage leha Deusu heke tüilü.

Utoto tüilü leha Deusu heke itaõ ake.

28Hekite leha tüilüko Deusu heke, nügüha iheke: "Tetijiha eitsüe. Kaküngiha etijitüe. Tatuteha ngongo otondeni eitsüe imütü ahiha. Tatuteha kangako aneteni eitsüe, toloko aneteniha, ngeneko aneteni tuhugu gehale tühülinhüko ngongohongo", nügü leha iheke.

29Aitsükü geleha Deusu kilü: "Tatuteha ngata tundagü uheke einhani, i tagükinhü tühindinhü gehale inhambatomiha ehekeni. 30Tatute ngata tundagü tuhugu uheke toloko inhangoi, ngenekoha gehujalüko inha, ngeneko tuhugu tinkgukinhüko inhaha ngeneko ngongoho talahitsinhüko inha gehale". Egea leha inhügü Deusu kipügüa.

31Ülepei leha Deusu heke tatute tüngüipügü ingilü, aitsükü leha hekite hekugu atühügü ingilü iheke. Ülepei leha ahugutilü etinenügü, kokongo telü leha, kogetsingo mitondene enhügü leha. Aitsingo inkgugetoho igotisüha egei tütenhüi.

Currently Selected:

GEN 1: KUI-BIBLE

Highlight

Copy

Compare