Luka 8
8
Pa ägu adee nǎpeka fuä Yesu
1Fuä bete alegbo, Yesu ǎta logo agbata na logo akpolo, kʉ kinitʉngusi Wene Pangbanga ga Mbäli Kindä. Abawiliki bawe na uwe (12) ǎta wasã na ko, 2gbiã kuti gu kula adee kʉ adändi agilisä logo yo yò na ägu yo kʉ ahʉsi yo be akaza. Agu adee le nangɨa: Malia mbe Magadala nga gu li agilisä akʉlʉ logo li yò bisuẽ bäti uwe (7), 3Yoana dia Kuza nangɨa kapita nga ga gu gbiã nangia Elode, Suzana na gu kʉla dʉngu adee anafʉ gäyo ahũ kumukä tɨpa kaundä Yesu gbiã kuti gako abawiliki.
Gii fʉla yò lii pa bamiitʉnga
(Matayo 13:1-9; Malako 4:1-9)
4Abolo kitaguali logo agbata ni basã sã kiniyee koyò dʉ Yesu ni. Wa bakele limbasa abolo ǎdʉngulã tiyo ku pati ko, kʉ kipe gi gii fula yò le fu yo kinyã: 5«Kʉmba sã andʉ kami tʉnga ahẽ logo gako äti. Hõ kʉ ǎmi he ni, bete he kitiwi ku pangba gine, abolo kisimbi he, azile kiyee ali yò kiliti he. 6Gu kʉla bete he kitiwi ku lii mbɨa sende ǎnaga nga lii he ya. Si kikʉlu ono si kiɨma ʉga bämbikä sende ǎdʉ nga tomotomo te. 7Kʉla bete he kitiwi ku dagba akewe, si kisono wasã na akɨwe, sidu akɨwe kiimi he. 8Ono, gu kʉla bete tʉnga kitiwi ku logo wene sende. Si kisono kizũku wa bala kama (100).» Kʉ kita ngbako kinyã: «Gu bolo dʉ na tú giã pai, ni gĩ he.»
Ndʉ gii fula yò
(Matayo 13:10-13; Malako 4:10-12)
9Ga Yesu abawiliki kisana ko tɨpa kainä sangba gu gii fula yò le. 10Kʉ kikalaga ha fu yo kinyã: «Tɨpa loni, oni agbiã mämu tɨpa kainä gu gbugbu apai näbi pa ga Mbäli Kindä, ono tɨpa gu kʉla abolo tigäyo, i apé agi apai le fu yo kinifʉla kɨna logo gii fula yò.
‹Wele, i zavula kangela ono ka i bi ngä hẽ ya,
I zavula kagiã pai ono ka i luga nga tiyo na ni ya.›#Isaya 6:9.»
Sangba gii fula yò lii pa bämiitʉnga
(Matayo 13:18-23; Malako 4:13-20)
11Fuä hä, Yesu kinyã: «Sangba gu gii fula yò le gi dʉ le: Gu tʉnga ahẽ le nga fʉla Mbäli. 12Gu tʉnga natiwi pangba gene nga ägu abolo nagiã sangba Mbäli, ono zabulu kiyee kidi he kusa ngbäduyo yò tɨpa kaká na gene idapase be yo tɨpa ka i bäti ngä ya. 13Gu akʉla ha natiwi ku lii gu mbɨa sende ǎnaga nga lii he ya nga ägu abolo nagiã sangba Mbäli, kidi he ku gʉme na ngbalago. Ono ka talã hã alimä ngä ku ngbäduyo yò ya. I naɨda ha tɨpa kina bete legbo, ti legbo asada i kimbʉ he. 14Gu tʉnga natiwi ku dagba akɨwe nga agu abolo nagiã sangba Mbäli, ono bakabänglise, kumukä na nyämu zäginò kidi be he. Si kidigi gene, ka si asona nga ya. 15Gu tʉnga natiwi ku logo wene sende nga ägu yo nagiã sangba Mbäli na wene lulu ngbäduse. I nabanda ha, niká kuti sangba Mbäli, wele kinifʉ wene zũzũ he.»
Gii fula yò lii pa tálá
(Malako 4:21-25)
16«Anga bolo hõ sã te katigi tálá kivägädi he na akolo watadʉ kamaa ha ku tii bá yò, ono i nimäi he lii hẽ ku ali tɨpa agu abolo nalimä i nibi tima lago. 17Bämbikä ägu apai dundukä dʉ ni gbugbu he si akʉla gbayaga, ägu apai â dʉ ni hõko hõko hõ i ainä hä ainä. 18Oni banda tiloni ti ägu apai oni agiã ha. Bämbikä gu bolo dʉ na hẽ beni, i afʉ kʉla ha fu ni; ono gu ni adʉ nga na hẽ beni ya i adia gu tǒni he kusa ni abelã ya si beni.»
Nà Yesu na awilinäko
(Matayo 12:46-50; Malako 3:31-35)
19Nà Yesu wasã na awilinäko kiyee koyò du ko ni, ono ka i alengba nga kambeda na ko ya be limbasa abolo. 20Abolo kinyã fu ko: «Nàmʉ gbiã kuti awilinamʉ dʉ zägi yo le, i naida käbi lo.» 21Ono Yesu kikalaga ha fu yo kinyã: «Nämi gbiã kuti awilinämi nga ägu abolo nagiã sangba Mbäli kinimängi gu pai si gʉmba ha.»
Pa zã bakele yuge
(Matayo 8:18; 23:27; Malako 4:35-41)
22Ulu sã, Yesu kilimi ku logo kulʉngba wasã na gako abawiliki, kinyã fu yo: «Ani si ku mbiti bäime yò.» Wele, i kindʉ. 23Hõ i ǎsi ni ku mbiti yò, Yesu kila. Nibasã, bakele yuge kitona yá lii bäime; ime kiniʉka ku logo kʉlungba, i kidʉ ngba kpio yò. 24Abawiliki kigbisi ku pati Yesu kizingisi ko ninyã: «Baɨla, Baɨla! Ani nikäkpi!» Kʉ kizingi lame yò, kizɨna hẽ ku lii bakele yuge wasã na gu ime natʉmba ti he be yuge, si kisungu kiĩ, zeleda kiyägä. 25Fuä hä, kʉ kinyã fu gako abawiliki: «Wäli dʉ gǒni idapase ni?» Ono, bakele gunde kizi yo, si kihiliwä ahiliwä tiyo. I kinipeke he dagba yo ninyã: «Da nga gi kʉmba le? Kʉ nazina hẽ fu yuge wasã na gu ime natʉmba tihe be yuge si kinigĩ ko agiã!»
Pa batasa kʉmba sã be ägilisä
(Matayo 8:28-34; Malako 5:1-20)
26Fuä hä, Yesu na gako abawiliki kisi ku mbiti yò kida logo lingala Agelasa ningele ku Galilaya yò. 27Hõ Yesu akʉlʉ ni logo kʉlungba ku pia yò, kʉmba sã ni mbe gu gbata le nadʉ na ägilisä logo ko yò kiyee sa Yesu. Gu kʉmba le ǎta ni kina kundili ko tɨpa dʉngu alegbo ka kʉ alaka nga logo kpolo ya ono kina lii amulä yò. 28Hõ kʉ äbi Yesu ni, kʉ kizo wäwä, kiti sende bala bängili Yesu nita ngbako ninyã: «Yesu nga Wili gu Mbäli susi apai dundukä, gini pai dagba le na mo? Akoo, ka mʉ mängi ngä le gbegbelẽ ya!» 29Kʉ ǎgʉmba ha wele bämbikä Yesu adändi gilisä kusa tiko nǎfʉda ko. Dedede, gu gilisä le anâlimä ku logo gu kʉmba le. Sidu abolo anâvo ko na amaniyolo kinimäĩ angbika ku ndʉko yò tɨpa dika ko ku bako, ono kʉ kinikuä ägu hẽ le dundukä, daimuna kininungusi ko ku nvuä yò. 30Yesu kisana ko kinyã: «Limälõ nga da?» Kʉ kikalaga ha ninyã: «Limäle nga ‹Limbasa›» bämbikä badʉngu agilisä adʉ logo ko yò. 31Agilisä kizungädi Yesu ya ka kʉ dändi ngä yo ku logo bambʉsa#8:31 bambʉsa Fu Ayuda, si anidʉ ni kamba, ni bambʉsa â tɨpa gbegbelẽ atolo. yò ya.
32Mbembedi hõ nga ha le, bakele limbasa zogozogo azumbulu ǎli lii bagangala yò. Agilisä kizungädi Yesu ya ku idi he fu yo i limi ku logo la yò. Kʉ kiidi he fu yo. 33Wele, agilisä kikʉlu logo gi kʉmba le, kilimi kʉ logo azumbulu yò. Limbasa azumbulu kikilimä ni oto ti ngbädu bagangala kidatiwi ku logo bäime, kilindä ku ime yò. 34Hõ abábanda anya äbi gu pai ni násʉsi le, i kiolo, kinitäki pande agu apai namängi fu abolo gbata yò na logo gu kula agbalia. 35Abolo kindʉ tɨpa käbi gu pai násʉsi. I kida yò Yesu adʉ ni, i kigbiã gu kʉmba agilisä akʉlʉ logo ko kʉ nasungu pati ndʉ Yesu, kivo lokoo, belãko nada ni wene he. Wele gunde kizi yo. 36Agu abolo näbi gu pai násʉsi le kitäki pande he fu yo waĩ gu kʉmba agilisä adʉ logo ko yò abäti. 37Fuä hä, ambe lingala Gelasa dundukä kihõ pai be Yesu ya kʉ́ kulu kusa logo gäyo lago, bämbikä bakele gunde äzi yo. Kʉ kilimi ku logo bakulʉngba tɨpa kakalaga ti ko. 38Gu kʉmba agilisä akʉlʉ logo ko yò kizungädi Yesu tɨpa i ndʉ wasã na ko. Ono Yesu kikalaga ko ninyã: 39«Mʉ kalaga tilo ku kpʉlo yò kitäki pande ägu apai dundukä Mbäli namängi he folo.» Kʉ kindʉ logo agbata dundukä, kinitäki pande gu pai dundukä Yesu amängi he fu ko.
Pa gu dee nazädi ga Yesu lokoo na pa batasa wili Yailo
(Matayo 9:18-26; Malako 5:21-43)
40Hõ kalaga Yesu tiko ni kisi ku mbiti bäime yò, limbasa abolo kidi ko ku gʉme bämbikä i dundukä ǎsungudä ko. 41Ti gu legbo le, kʉmba sã kida limä ko angɨa Yailo, ni baɨla abämbutɨlia. Kʉ kiti ku pati ndʉ Yesu kizungädi ko tɨpa Yesu ndʉ ku kpʉko yò, 42bämbikä bangɨsã wiliko ni degudee nadʉ na agalã bawe na uwe (12) ǎmbeda na kpio. Hõ Yesu ǎndʉ ni ku Yailo yò, limbasa abolo kinisäĩ ko asaã.
43Dee sã adʉ yò dagba yo kʉle anaga ti li ku vulu agalã bawe na uwe (12). Li anyäsi gäli afalanga dundukä fuä amunganga, ono bolo hõ sã te nalengbe kahusa li. 44Li kigbisi sa Yesu giiko kizädi ngba gako lokoo. Nibasã, kʉle kimbʉ gá ti li. 45Yesu kisana hẽ kinyã: «Da zädi le?» Wa abolo dundukä ǎtikango, Petelo kinyã fu ko: «Bäyugu, limbasa abolo kee pati lo kilikili kinisäĩ lo ku bäni na kubäni!» 46Ono Yesu kikalaga ha kinyã: «Bolo zädi le, bämbikä mi ini he ya tändu sã guali logo le yò.» 47Gu dee le kiyǎbi he ya i ima inä gu pai li amängi he, li kiti ku pati ndʉ Yesu nikiäkiä#8:47 nikiäkiä Si anidʉ ni zãzã pai logo sinä Ayuda nga gu dee näbi gu legbo nga ga adee ni ta dagba abolo bämbikä ni anadʉ nga ni gigili ni te.. Ku bängili abolo dundukä, li kipe ndʉ gu pai li azädi ko tini na waĩ li ahʉ nibasã. 48Yesu kinyã fu li: «Dee, gǎ idapase bätäsi lo. Mʉ gá na zeleda.»
49Yesu kitadʉ kina kuti pe gu pai le, bolo sã kilʉ ku baɨla abämbutɨlia yò kiyee, kinyã fu ko: «Wilo ɨmakpi, ka mʉ mbusi nga bäyugu niwia ya.» 50Ono Yesu kigĩ gu pai le, kinyã fu Yailo: «Ka mʉ gunde nga ya, ono mʉ dʉ na kina idapase, wele wilo abata abata.» 51Hõ Yesu ada ni ku Yailo yò, ka kʉ aɨda nga abolo limi ku dimä yò wasã na ko ya, kpala ti kɨna Petelo, Yoane na Yakobo gbiã kuti bagudee na návʉnguli. 52Abolo dundukä kitakpala nisalawa tiyo asalawa tɨpa gudee. Yesu kinyã fu yo: «Ka oni kpäli ngä ya. Li akpi ngä te, ono li nala ala.» 53Abolo kinimämu ko amama, bämbikä i aini he ya li ima kpi. 54Ono Yesu kizi li ti beli kifʉla nyänyäki kinyã: «Degudee, mʉ guali ku ali!» 55Li kizingi be kpio, kiguali ku ali nibasã. Yesu kinyã i fʉ liahẽ fu li. 56Si kihiliwä ahiliwä sã ti avʉngu li. Ono Yesu kinyäkäsi he fu yo ya ka i pe nga gu pai sʉsi fu bolo sã ya.
Currently Selected:
Luka 8: ZNE
Highlight
Copy
Compare
Share
Want to have your highlights saved across all your devices? Sign up or sign in
2025 Centre Interconfessionnel de la Traduction de la Bible et d'Alphabétisation
