Luka 6
6
Pa ulu sabatu
(Matayo 12:1-8; Malako 2:23-28)
1Lago sabatu sã, wa Yesu ǎsʉsa logo aäti zende ahẽ nadʉ wa vʉnde, gako abawiliki ǎzula zũzũ he, nitikimä hä beyo yò kinili he. 2Gu kula Afalusi kinyã: «Tɨpa gine oni amanga gu pai tini alengba nga manga ha ulu sabatu ya?» 3Yesu kikalaga ha fu yo kinyã: «Oni ageda nga gu pai Davidi amängi he te hõ gomolõ äzi ko ni wasã na ägu abolo nadʉ na ko? 4Kʉ alimi ku bämbu Mbäli yò, kidi ägu amapa i amäi he bala bängili Mbäli, kili he, kifʉ he â fu ägu abolo nadʉ wasã na ko. Kina abazomutumä sã nálengbe kali ägu amapa le.» 5Kʉ kinyã belewe fu yo: «Wili bolo nga Gbiã lii sabatu.»
Pa husa otolaotola be kʉmba
(Matayo 12:9-14; Malako 3:1-6)
6Gu kula ulu sabatu, Yesu kilimi ku abämbutɨlia yò kitona yugä pai. Kʉmba sã adʉ yò na otolaotola kʉmbabeko. 7Abäyugu andikä na Afalusi ǎkpalia Yesu käbi he singɨa kʉ nikahusa bolo ti ulu sabatu bämbikä i ǎbelã kagbiã ndʉ kita ngbângako. 8Ono Yesu aini gäyo abelã. Kʉ kinyã fu gu kʉmba nadʉ na otolaotola beko: «Mʉ tʉmba tilo, kilʉ hõ lẽ bebele abolo.» Gu kʉmba le kitʉmba tiko, kilʉ kuali. 9Yesu kinyã fu yo: «Mi nasana loni: Gini gu si alengba manga ha lago sabatu? Manga wenepai watadu manga gbegbelẽpai, batasa bolo watadu mbu ni ni kpi?» 10Kʉ kisanga na bängiliko tiyo ni basã sã dundukä, fuä kʉ kinyã fu gu kʉmba le: «Mʉ täĩ belo.» Kʉ kimängi he kina wo, beko kihu. 11Abäyugu andikä wasã na Afalusi kigbama kuti Yesu, kitona säkinä hä dagba yo nigbata gini pai ka i mängi ko na ni.
Pa sɨa amokedi bawe na uwe
(Matayo 5:1; 10:1-4; Malako 3:13-19)
12Ti gu ulu le, Yesu kindʉ ku lii bagangala yò tɨpa kakpala fu Mbäli. Kʉ kimängi yʉlu sasasa nikpäli fu Mbäli. 13Ngba wiso, kʉ kiyämbu gako abawiliki kisia äguyo dagba yo bawe na uwe (12) kiyämbu limäyo nga amokedi. 14Simo, kʉ afʉ limä fu ko â nga Petelo, Andele nangɨa gʉme Petelo, Yakobo, Yoane, Filipo, Baletelemi, 15Matayo, Toma, Yakobo wili Alafayo, Simo nangia Zelote#6:15 Zelote: Azelote angɨa ägu Ayuda nánaso vʉla kuti Aloma tɨpa kusa ngbiĩ Ayuda tii ga Aloma zogo., 16Yuda wili Yakobo na Yuda Isikaliote nga gu ko nikabaga Yesu.
Yesu na limbasa abolo
(Matayo 4:24-25; Malako 3:7-11)
17Kʉ kizõlõ lii gangala yò wasã na yo. Kʉ kilu logo kpasakpasa lago yò, yò limbasa gako abawiliki adʉ ni wasã na bakele limbasa abolo nayee Yudaya yò na baha, Yelusalema yò, na logo ägu agbata nga Tile na Sidona nadʉku pangba bakele bäime. 18Gi bakele limbasa abolo le ayee tɨpa kagiã ko na tɨpa kahu be gäyo akaza. Äguyo nǎmbu be agilisä kinihu. 19Abolo dundukä ǎgbata kazada ko bämbikä tändu adʉ tiko nǎhusa abolo kaza dundukä.
Ngbalago na lungä
(Matayo 5:1-12)
20Wele, Yesu kitangela koyò dʉ gako abawiliki ni, kininyã:
«Ngbalago fu loni nga aɨla lungä,
bämbikä ga Mbäli Kindä ni gǒni!
21Ngbalago fu loni nga ägu loni du na gomolõ awele,
bämbikä oni ambi ambi!
Ngbalago fu loni nga ägu loni nakpala awele,
bämbikä oni amama amama!
22Ngbalago fu loni ka abolo asoga loni, ka i adanda loni dagba yo,
ka i asenga loni kinigbelesi limäloni tɨpa Wili bolo.
23Hõ si kadʉ ni wo, oni ngi angi kiniguku na ngbalago bämbikä gǒni mutumä ni bakele he ngbängbätulũ yò. Kina wo du atitäyo alungäsi anäbi.
24Ono lungä fu loni nga abolo kumukä!
Bämbikä oni ima gbiã gǒni ngbalago nga gu ka oni asungudi he!
25Lungä fu ägu loni dʉ na mbele awele!
Bämbikä oni adʉ na gomolõ!
Lungä fu ägu loni namama awele!
Bämbikä oni atakpala ni salawa tiloni kidʉ logo aume.
26Lungä fu loni, hõ abolo dundukä kagumba kina wene pai ni tɨpa loni! Atitäyo ǎmanga kina wo fu anäbi zilee.
Nyämuse fu asogolani
(Matayo 5:38-48)
27Ono mi nápe he fu loni nga ägu loni nagiã le: Oni kpi nyämu asogoloni, oni mängi wene pai fu äguyo nasoga loni. 28Oni hõ ga Mbäli makʉ fu äguyo natiwa loni, oni kpäli fu Mbäli tɨpa äguyo namanga loni gbegbelẽ. 29Ka bolo yawa pangbalo, mʉ alia gu kula ha â fʉ ni. Ka bolo di gǎ koti ngba ʉme, ka mʉ ka nga na gǎ simisi be ni ya. 30Gu bolo dundukä hõ hẽ belo, mʉ fʉ he fu ni, ka bolo di gǎ hẽ ngba ʉme, ka mʉ sana nga ni tɨpa ha ya. 31Gu pai oni aida abolo mängi he fu loni, oni mängi kina ha fu yo. 32Ka oni ǎkpi nyämu kina ägu abolo nakpi nyämu loni, gini mutumä oni kagbiã hã tini? Abolo ingapai â nakpi nyämu ägu abolo nakpi nyämu yo. 33Ka oni amanga wene pai fu kina ägu abolo namanga wene pai fu loni, gini mutumä oni kagbiã hã tini? Abolo ingapai nâmanga ha â kina wo. 34Ka oni ǎfʉ banza fu kina ägu abolo oni abelã hã ya i agasa ha agasa fu loni, gini mutumä oni kagbiã hã tini? Abolo ingapai â nǎfʉ banza dagba yo tɨpa abolo gäsi he fu yo kina wo. 35Ono oni ti gǒni, oni kpi nyämu asogoloni. Oni mängi wene pai fu yo. Oni fʉ banza fu yo zanga sungudä i gäsi he fu loni. Wele, gǒni mutumä adʉ ni bakele he, oni adʉ ni äwili gu Mbäli du Lii Apai Dundukä. Bämbikä ko ti gako, kʉ ni wene ko fu ägu abolo ninâgasa nga tambwahẽ fu ko ya na fu kele abolo. 36Bäloni ni ɨla wenelingise, oni dʉ â ni abolo wenelingise wa ko.
Pa sala ngbanga abolo
(Matayo 7:1-5)
37Ka oni säli ngä ngbanga bolo ya wele i asala nga ngbangaloni â te. Ka oni gbelesi ngä ngbanga fu bolo ya, wele i agbelesa nga ngbangaloni â te. Oni vu akualoni ti gäyo ingapai, i avu loni â ti gǒni ingapai. 38Oni nigämu hẽ, wele i agama ha â fu loni. I aʉka ha ni bakele he gbẽ ku logo gǒni baga, kizigizä hä, kisukädi he, si kihĩ kiniuka auka ngbaha. Bämbikä gu bäkiä hẽ oni kagama hẽ logo ho fu akualoni, i agama hẽ kina logo ho â fu loni.»
39Yesu kigʉmba ha fu yo belewe logo gii fula yò ninyã: «Nyã mo ɨlavuläli lengbe ka nungusa kula ɨlavuläli? I ati nga ti bala yo uwe dundukä ku due yò te? 40Bawiliki asʉsa nga gäni bäyugu te. Ono gu bawiliki wiliki pai wenengaĩ, ni adʉ wa kina gäni bäyugu. 41Tɨpa gine mʉ äbi gu tǒni nvuä dʉ bängili wilinamʉ yò, ono ka mʉ äbi ngä gu mbada palangi du bängilo yò ya. 42Waĩ lengbe mo kanyã fu wilinamʉ: ‹Wilinämi, mʉ sa ha mi di gu tǒni nvuä dʉ bängilo yò›, ono ka mʉ äbi ngä gu mbada palangi dʉ bängilo yò ti gamʉ ya? Mo! Ɨla biliki, mʉ kʉsi gu mbada palangi du bängilo yò mbata! Wele, mʉ angela ni bedi he tɨpa kadia gu tǒni nvuä du bängili wilinamʉ yò.
Ngwa na zũzũhe
(Matayo 7:16-20; 12:33-35)
43Ka wene ngwa zũ ngä gbegbelẽ lindihe te, ka gbegbelẽ ngwa zũ ngä wene lindihe â te. 44I nainä ngwa ni ba sã sã ti lindihe. Ka i käti ngä gu zũzũ ngwa nga figi ti bakiwe te, kä i käti ngä zũzũ vino â ti ngwa bakiwe te. 45Wene bolo, mbikä gu wene wene apai hĩ ngbäduni yò, ni nakusa kina wene apai. Kele bolo, mbikä gu gbegbelẽ apai hĩ ngbäduni yò, ni nakusa kina gbegbelẽ apai. Bämbikä gu pai hĩ ngbädu bolo yò, kina ha nakʉla ngbäni.
Pa abämbu uwe
(Matayo 7:24-27)
46Tɨpa gine oni ayamba le tini ‹Baɨla, Baɨla!› Zanga manga ägu apai mi agʉmba ha? 47Gu bolo nayee fuä le, kinigĩ sangbale, nimängi he, ni wili gini bolo? Si mi nikayugä hä fu loni. 48Ni wili gu bolo nadua bämbu: ni age due dudungulä da ti mbɨa, ni amá mbuluhe lii gu mbɨa le. Bangbondo ahĩ, ʉme ime azigizä gu bämbu le, ka si awo nga tini ya, bämbikä i adua ha nyänyäkĩ. 49Ono gu ni nagiã sangbale zanga manga ha, ni wili gu bolo nadua bämbu lii sende, zanga maa mbuluhe. Hõ ʉme ime azigizä hä ni, nibasã si kibuluwä, si abuluwä na baha.»
Currently Selected:
Luka 6: ZNE
Highlight
Copy
Compare
Share
Want to have your highlights saved across all your devices? Sign up or sign in
2025 Centre Interconfessionnel de la Traduction de la Bible et d'Alphabétisation
