Luka 5
5
Pa bambata abawiliki
(Matayo 4:18-22; Malako 1:16-25; Yoane 21:1-11)
1Ulu sã, Yesu alʉ pangba gu bäime nga Genezaleta#5:1 Genezaleta I ayamba ha â bäime nga ga Galilaya.. Limbasa abolo kilʉndu pati ko kilikili kinisäĩ ko tɨpa kagiã sangba Mbäli. 2Kʉ kibi akʉlʉngba uwe pangba bäime. Aziatiä akʉlʉ logo ho nizʉndu gäyo apiä. 3Yesu kibiti ku logo kʉlungba sã nangɨa ga Simo kinyã fu ko kʉ gbisi he tǒni ti pangba ime. Kʉ kisungu kʉlungba yò, kitona yugä pai fu limbasa abolo.
4Hõ nyäsi ko fula ni, kʉ kinyã fu Simo: «Mʉ gbisi ku dudungulä ime yò, oni kiba gǒni apiä tɨpa kaziä atiä.» 5Simo kikalaga ha fu ko kinyã: «Bäyugu, ani mängi sʉnge nyänyäki yulu sasasa ani aziä ngä hẽ sã te. Ono, mbikä fulalo, mi nikaba apiä.» 6I kiba apiä kizi zäginä atiä. Gäyo apiä kidʉ wa ka si sipi asipä. 7Wele, i kibaya agu akʉläyo nadʉ logo kʉla kʉlungba tɨpa i yée kaundä yo. I kiyee, kihĩkisi agu akʉlʉngba le uwe na atiä wa ka gäyo akʉlʉngba lindä alindä. 8Simo Petelo kiyǎbi gi pai le, kʉ kikuku pati ndʉ Yesu kinyã: «Mʉ gbisi ku sa yò pati le Baɨla, bämbikä mi ni bolo ingapai.» 9Wele, kíki äzi Simo wasã na agu akʉlako dundukä nadʉ na ko käbi iliwä agu atiä i äzi la. 10Kíki äzi Yakobo na Yoane â nangɨa awili Zebedeyo, ni abakʉle ku Simo. Yesu kinyã fu Simo: «Ka mʉ gunde nga ya, tona awele kandʉ, abolo du mʉ nikǎziä yo.» 11Fuä gbisä yo akʉlʉngba ku pangba ime yò na kimbʉ gäyo ahẽ dundukä, i kitona peka Yesu.
Pa husa bolo kʉngú
(Matayo 8:1-4; Malako 1:40-45)
12Gu kula ulu, hõ Yesu adʉ ni logo gbata sã, kʉmba sã kpotoko alengbe dundukä na kʉngú kiyee. Gi kʉmba le yǎbi Yesu, kʉ kikuku bala bängiliko kidʉa kpäkpuko ku sende, kikpäli fu Yesu ninyã: «Baɨla, ka mʉ idi he, mʉ lengbe alengba kagilisä le be kʉngú.» 13Yesu kitäĩ beko kizädi ko kinyã: «Mi idi na ni, mʉ gili agilä!» Nibasã, kʉngú kinyäsi ti ko. 14Yesu kinyäkäsi pai fu ko kinyã: «Ka mʉ gʉmba nga ha fu bolo sã ya. Ono mʉ ndʉ käyugä tilo fu bazomutumä, mʉ kifʉ mutumä kagilisä tilo wa gu Mose anyäkäsi he. Si àdʉ ni dezilee fu abolo dundukä ya mʉ ima gilä.» 15Zavula wo, pande Yesu kinigbandaka agbandaka kindi dagba abolo. Dʉngu limbasa abolo kinitɨlia tɨpa kagiã ko na tɨpa kʉ husi yo â be gäyo akaza. 16Ono Yesu ti gako, kʉ ǎdɨa tiko kusa dagba yo ku ngbäkungbä yò kinikpäli fu Mbäli.
Pa husa bolo ngbälämäni
(Matayo 9:1-8; Malako 2:1-12)
17Ulu sã, Yesu ǎyugä pai, Afalusi wasã na abäyugu andikä asungu hõ â. I ayee guali logo akpolo dundukä nga ga lingala Galilaya na ga Yudaya na guali logo gbata nga ga Yelusalema â. Ga Baɨla tändu adʉ wasã na ko tɨpa kʉ nihʉsi abolo kaza. 18I ngele, akʉmba kida naaka kʉmba sã ni bolo ngbälämäni lii ɨla. I ǎgbata kalimisä ko ku dimä yò tɨpa kamaa ko bala bängili Yesu. 19Wa i ǎlengba nga kalimisä ko ya be limbasa abolo, i kidakpa ku lii bämbu yò kizäki he, kizogo ko na gako ɨla dagba abolo, kimäĩ ko bala bängili Yesu. 20Hõ Yesu äbi gäyo idapase ni, kʉ kinyã fu bolo kaza: «Kʉmba! I vu lo ti gamʉ aingapai.» 21Abäyugu andikä wasã na Afalusi kitona säkinä hä ninyã: «Da nga gi kʉmba nasenga Mbäli le? Da lengbe kavu bolo ti gäni aingapai, kina Mbäli sã lengbe na ni!» 22Ono wa Yesu aɨma inä agu apai i ǎbelã ha, kʉ kinyã fu yo: «Tɨpa gine oni abelã pai tini wa gule ku ngbäduloni yò? 23Gini gu kpakala, nyã ‹I ima vu lo ti gǎ ingapai› watadʉ kanyã ‹Mʉ guali kindʉ!› 24Wele, oni nikäinä hä tie ya Wili bolo na tändu lii kpoto sende tɨpa kavu abolo ti gäyo aingapai.» Yesu kinyã tie fu gu bolo ngbälämäni le: «Mi nanyã folo, mʉ guali, mʉ di gǎ ɨla kiga ku kpʉlo yò.» 25Nibasã, kʉ kiguali ku bängili abolo dundukä, kidi gako ila kʉ api lii he, kitatambwa Mbäli atambwa, niga ku kpʉko yò. 26Wele, ngbäyo dundukä kizele. I kinitääsi limä Mbäli na bakele gʉnde ninyã: «Ani bi iliwä iliwä apai aleme!»
Pa yamba Levi
(Matayo 9:9-13; Malako 2:13-17)
27Fuä hä, Yesu kikʉlu, kibi babägi pákʉ sã limäko angɨa Levi#5:27 Levi: I ayamba ko â Matayo (Mat 9:9) nasungu hõ i ǎbaga pakʉ ni. Yesu kinyã fu ko: «Mʉ peke le!» 28Levi kiguali, kimbʉ apai dundukä, kitona peka ko. 29Kʉ kimängi bakele pumbä kpʉko yò fu Yesu. Dʉngu abägi pákʉ na gu kʉla abolo kiyee kali liahẽ wasã na yo. 30Afalusi wasã na gäyo Abäyugu andikä kinikpakana ko. I kinyã fu gako abawiliki: «Tɨpa gine oni ali liahẽ tini kinimbili hẽ wasã na abägi pákʉ gbiã kuti abolo ingapai?» 31Yesu kikalaga ha fu yo kinyã: «Anga ägu abolo dʉ na wasawasa kpoto yo nakpi nyämu munganga te, ono kina agu yo dʉ na kaza. 32Anga lʉlʉ abolo mi ayee tɨpa kayamba yo te, ono abolo ingapai mi ayee kayamba yo tɨpa i sa gäyo bata.»
Sana hẽ lii pa ginä hẽ
(Matayo 9:14-17; Malako 2:18-22)
33Afalusi kisana Yesu kinyã: «Ga Yoane abawiliki gbiã kuti gǎni yo naginä hẽ dedede kinikpäli fu Mbäli, ono gamʉ yo tigä yo tɨpa gine i ali liahẽ kinimbili hẽ?» 34Yesu kikalaga ha fu yo kinyã: «Waĩ waĩ ägu abolo i yämbu sa pumbä logatise alengba kaginä hẽ ti gu legbo dʉ badidee wasã na yo? 35Ono legbo áyee i kadia badidee ni beyo. Wele, ti gu alegbo le i kaginä hẽ.»
36Yesu kifʉla fu yo belewe logo gii fula yò kinyã: «I nasilä ngä ngba vovo lokoo kalungä kʉlu lokoo na ni te. Ka i mängi he wo i agbelesa vovo lokoo agbelesa ka ngba vovo ho alengba nga kakoda ti he na kʉlu he ya. 37Kina wo, ka bolo mäi ngä vovo vino ku logo kʉlu amängu i amängi he logo kpoto anya#5:37 amängu i amängi he logo kpoto anya: Ayuda anambakada mängu logo kpoto anya tipa ime watadu vino. te. Ka i mängi he wo, vovo vino ásala ha kifʉ ku sende, agu amängu le kigbelẽ. 38Ono si naɨda i mäi vovo vino kina ku logo vovo mängu he. 39Gu bolo mbili kʉlu vino, ni akpi ngä nyämu vovo ho te. Bämbikä ni nanyã: ‹Kʉlu vino kangba gbẽ.›»
Currently Selected:
Luka 5: ZNE
Highlight
Copy
Compare
Share
Want to have your highlights saved across all your devices? Sign up or sign in
2025 Centre Interconfessionnel de la Traduction de la Bible et d'Alphabétisation
