Luka 4
4
Pa ga zabulu asada kuti Yesu
(Matayo 4:1-11; Malako 1:12-13)
1Fuä hä, Yesu náhĩ na Ziazia Toló kiyägä Yolodani yò. Ziazia Toló kinungusi ko ku ngbäkungbä yò. 2Yò nga ha le, zabulu ǎsädi Yesu vulu äulu biama bawe (40). Vulu ägu aulu le, ka Yesu ali nga hẽ wasã ya. Fuä nyasa ägu aulu le, gomolõ kimängi ko. 3Wele zabulu kinyã fu ko: «Ka si ngɨa Wili Mbäli nga mo, mʉ nyã fu gi mbɨa le si sá tihe ni liahẽ.» 4Yesu kikalaga ha fu ko kinyã: «Si ni kẽkẽ he ya: ‹Bolo abata nga kina kango liahẽ te.›#2 Andikä 8:3.»
5Zabulu kindʉ na ko ku ali gbẽ, kiyugu angbiĩ dundukä nga ga zägino nibasã fu ko. 6Kʉ kinyã fu Yesu: «Mi afʉ gu tändu le dundukä na taälimä ägu angbiĩ le folo. Bämbikä i azogo ho ku sa bele. Mi lengbe kafʉ he fu gu bolo mi aida na ni. 7Ka mʉ kuku tie bala bängile tɨpa kailisä le, si adá dundukä ni gamʉ.» 8Yesu kikalaga ha fu ko kinyã: «Si ni kẽkẽ he ya: ‹Mʉ akukä tɨpa kailisä kina Baɨla nga gǎ Mbäli kinimängi kina pako sã.›#2 Andikä 6:13.»
9Zabulu kindʉ na Yesu ku Yelusalema yò, kimäĩ ko bebele lii Bakele Bämbu Mbäli yò kinyã fu ko: «Ka mʉ ngɨa Wili Mbäli, mʉ gu elẽ kati ku sende yò. 10Bämbikä si ni kẽkẽ he ya: ‹Mbäli anyakasa pai lii pa lo fu gako amalaika tɨpa í banda lo.› 11Si ni kẽkẽ â ya: ‹I aáká lo ngba beyo tɨpa ka ndʉlo koto nga ti mbɨa ya.›#Abia Tambwahẽ 91:11-12.» 12Yesu kikalaga ha fu ko kinyã: «Si ni kẽkẽ hẽ ya: ‹Ka mʉ äsädi ngä Baɨla nga gǎ Mbäli ya.›#2 Andikä 6:16.» 13Fuä asada ko Yesu logo apai yò dundukä, zabulu kiguali pati ko ku sayo tɨpa bete legbo.
Pa tona Yesu gako sunge Galilaya yò
(Matayo 4:12-17; Malako 1:14-15)
14Yesu kikalaga tiko ku Galilaya yò kʉ nahĩ na ga Ziazia Toló tändu. Pandeko kindʉ logo gu lingálá le dundukä. 15Kʉ kiniyugu pai logo gäyo abämbutɨlia, abolo dundukä kinitääsi limäko.
Ká pa Yesu Nazaleta yò
(Matayo 13:54-58; Malako 6:1-6)
16Yesu kindʉ ku Nazaleta yò kʉ asonó ni. Kʉ kilimi ku logo ga Ayuda abämbutɨlia lago sabatu#4:16 sabatu: Bisuẽ bäti uwe ulu vulu poso aningia ga Ayuda ulu ongoda. Mʉ gedi â Gate 20:8-11; Uwe Andikä 5:12-15; Aebele 4:4; Akolosai 2:16-17. â wa kʉ anamanga ha. Kʉ kitumba tiko kageda sangba Mbäli. 17I kifʉ buku nga ga näbi Isaya fu ko. Kʉ kizäki he, kigbiã hõ kẽ yo pai ni ya:
18«Ga Baɨla Toló wasã na mi
bämbikä kʉ kulu le ni kpaĩ #4:18 kʉ kulu le ni kpaĩ Si naida kanyã kʉ mbedi le ni nzeme tɨpa mi dʉ ni sɨasɨa le, ni kpalakpala le â sa gu sʉnge kʉ asia le tɨpa ha.
tɨpa tʉngusa Wene Pangbanga fu lungä lungä abolo.
Kʉ kedi le kagʉmba ha fu zizi abolo ya i azoga bete yo azoga,
kagʉmba ha fu abolo vuläli ya i angela angela belewe.
Kʉ kedi le mi bätäsi lungäsi lungäsi abolo
19tɨpa mi gʉmba ha ya galã ga Baɨla wenelingise ima dá.»
20Fuä hä, Yesu kikäĩ buku, kigäsi he fu gu bolosʉnge nǎundä abämbutɨlia yò, kisungu. Abolo dundukä abämbutɨlia yò kidʉa bängiliyo tiko. 21Kʉ kitona pe he fu yo tie ninyã: «Aleme le, gi Kẽkẽ apai le da ni lengo fu ägu loni nagiã hã.» 22Abolo dundukä kinitäki pandeko ni wene he. Ngbäyo kinizele be ägu afula wenenyämuse nǎkula ngbako. I kininyã: «Anga wili Yozefu du te le?» 23Wele kʉ kinyã fu yo: «Ni lengo, oni nikape gu fula sanza fele nanyã: ‹Munganga, mʉ bätäsi tilo ni tilo.› Oni anyã fele â: ‹Ani aima giã ägu apai dundukä mʉ amängi he Kafalanauma yò. Mʉ mängi he kina wo elẽ, logo gǎ gbata.›» 24Kʉ kinyã fu yo belewe: «Mi nagʉmba ha fu loni ni lengo ya näbi hõ sã te i adi ni ku gʉme wenengaĩ logo gäni ndikili gbata. 25Mi nagʉmba ha fu loni ni lengo ya ti legbo näbi Elia#1 Abäkindä 17., dʉngu adäkulugbä adʉ́ logo ngbĩi Isalaele hõ maĩ ǎna nga ni ya vulu agalã biata (3) na adiwi bisuẽ bäti sã (6). Bakele gomolõ kiti lii ngbiĩ dundukä. 26Ono Mbäli ǎkeda nga Elia fuä guni sã te dagba ägu adäkulugbä le. Kʉ akedi ko tie kina fuä däkulugbä sã nǎlaka Salepeta yò logo ngbiĩ Sidona. 27Dʉngu abolo kʉngú adʉ́ â logo ngbĩi Isalaele ti legbo näbi Elisa#2 Abäkindä 5:1-14.. Ono gu ni sã te dagba yo Mbäli ahʉsi kigilisi ni be kʉngú, kina Namane nangɨa mbe Silia.
28Fuä giã gi pai le, abolo dundukä vulu abämbutɨlia kigbama kuti ko. 29I kitumba tiyo, kikusi Yesu kusa vulu gbata, kitutulã ko kuti ngbädu gu gangala i adua gäyo gbata lii he tɨpa kade bee tiko ku sende yò. 30Ono kʉ kisʉsi dagba yo kindʉ gako.
Pa batasa bolo agilisä Galilaya yò
(Matayo 7:28-29; Malako 1:21-28)
31Fuä hä, kʉ kindʉ ku Kafalanauma yò nangɨa gbata sã Galilaya yò. Kʉ kiniyugu pai fu yo lago sabatu. 32Kina ngbäyo kinizele bämbikä gako yugä pai adʉ́ na tändu. 33Kʉmba sã adʉ abämbutɨlia yò na kele gbegbelẽ tolo daimuna logo ko yò. Kʉ kita wäwä nyänyäki kinyã: 34Akaaa! Yesu mbe Nazaleta, gini pai dʉ dagba lani na mo? Yée mo kanyasa palani anyasa? Mi ini he ya da nga mo. Ga Mbäli zɨazɨa kedikedi bolo nga mo.» 35Yesu kizɨna hẽ fu gu daimuna le kinyã: «Mʉ kisi ngbalo kikʉlu kusa logo gu kʉmba le!» Daimuna kimelẽ gu kʉmba le ku sende dagba abolo, kikʉlu logo ko zanga manga ko gbegbelẽ. 36Kíki apai kizi abolo dundukä. I kitapeka ha dagba yo ninyã: «Nailiwä gi pai le! Kʉ nazɨna hẽ na pa gbiã wasã na tändu fu agilisä, i kinikʉlu!» 37Pande Yesu kilengbe na alago dundukä logo gu lingalá le.
Pa husa nägbiä Simo gbiã kuti kula abolo kaza
(Matayo 8:14-17; Malako 1:29-39)
38Fuä hä, Yesu kiguali bämbutɨlia yò kindʉ ku Simo yò. Nagbiä Simo ǎwaka waka be nyänyäki faa kpoto. I kihõ pai be Yesu lii päli. 39Yesu kinugä koyo du li ni, kizɨna hẽ fu faa kpoto, si kimbʉ li. Li kitumba tili nibasã kitona manga sʉnge fu yo.
40Hõ ulu ǎti ni, ägu abolo dundukä nadʉ na abolo kaza likä na likä kiyee na yo fu ko. Kʉ kitamaã beko lii yo ni ba sã sã kinihusi yo. 41Adaimuna â ǎkʉla logo dʉngu abolo na tatangba ninyã: «Mo, Wili Mbäli nga mo!» Wele, Yesu kinizɨna hẽ fu adaimuna nisogo i fula bämbikä i aini he ya Masiya#4:41 Masiya Masiya â wa Kilisito naida kanyã gu bolo i akulu ni ni kpaĩ. nga ko.
Ga Yesu tʉngusa pai logo abämbutɨlia
(Matayo 4:23; Malako 1:35-39)
42Lago kitagilä, Yesu kikʉlu logo gu gbata le kindʉ ku ngbäkungbä yò. Limbasa abolo kitona gbatá ko. I kiyǎbi ko, i kiidi kadɨka ko tɨpa ka kʉ guali nga pati yo ya. 43Ono kʉ kinyã fu yo: «Si naida mi ndʉ â katʉngusa Wene Pangbanga ga Mbäli kindä logo kula agbata bämbikä si Mbäli akedí le tɨpa ha.» 44Wele, kʉ kinitʉngusi Wene Pangbanga logo abämbutɨlia nga ga Yudaya.
Currently Selected:
Luka 4: ZNE
Highlight
Copy
Compare
Share
Want to have your highlights saved across all your devices? Sign up or sign in
2025 Centre Interconfessionnel de la Traduction de la Bible et d'Alphabétisation
