Nyo-nyoimi 9
9
Sitatapu Paskah ma laya ma 'orasa
9:1-14
1Ma JOU 'o kanau ra Musa toma kie Sinai ma daeraha baulaco, toma ngara ma mulaingi musungu ma soi ḏiḏi wakutu ananga raḏi supu toma tana'a Mesir palisi'i i'a: 2<<Ngowa'a Israel balasu 'aḏi 'a'a Paskah ma laya mete'e enanga ma 'orasa ga'a sitantukanga ḏua. 3Toma wangere ma soi nyagi moi re rata toma ngara nena-ne, toma 'orasa wangere so'o ne'o moju mada'a hafu nyangu, ngini balasu ni 'a'a Paskah ma laya mete'e enanga ma hukumu re putusanga mo-moini, ngini balasu na siḏagi.>> 4Dadi Musa 'o soma'a ngowa'a Israel 'aḏi si'a'a Paskah ma laya. 5Dadi ananga 'aḏi 'a'a laya Paskah toma ngara ma mulaingi toma wangere ma soi nyagi moi re rata toma 'orasa wangere so'o ne'o mada'a hafu nyangu. Mete'e mo-moini ga'a Ma JOU ro parenta ra Musa, so'o gena-ge ngowa'a Israel ya siḏagi. 6Mada'a rema ngowa'a Israel nga muḏuo i'a ga'a 'aḏi dadi najis sababu 'aḏi cigi manusia ma mayeti singadolo 'aḏi mete'e Paskah ma laya yoḏu'u toma wangere gena-ge. Dadi ananga gena-ge balasu 'aḏi sapolo talaḏi ra Musa re 'a Harun toma wangere gena-ge. 7Ḏua ananga 'aḏi kanau ra Musa: <<Tero mode'e ngomi nena-ne mi dadi najis sababu mi cigi manusia ma mayeti. Mada'a, sa'olo singadolo ngomi sanga simaha ua di'a mi gasa jou-jou mamete'e ngowa'a Israel ma lelegu toma enanga ma 'orasa ga'a 'i sitantukanga ḏua?>>
8'A Musa 'o sangoro ra ananga: << Ni totoma si, ngoi mau to 'isene Ma JOU 'ai parenta 'oru di'a ngini.>>
9Ḏua Ma JOU 'o kanau ra Musa: 10<< Siajele hali nena-ne toma ngowa'a Israel re 'o kanau so'o ne: Si'ade-'ade matengo i'a bae na-nau'u bolo we-were'a ra ngini ninga sigolona bolo ninga ju'uda, rema ngowa'a ga'a najis sababu 'o cigi mayeti, bolo toma ḏo-ḏagi ma dara 'o tagi toma giḏanga. Ananga 'aḏi nyanyaḏi moju si'a'a Paskah ma laya di'a silamo'o Ma JOU, 11ananga gena-ge balasu si'a'a Paskah ma laya toma ngara ma soi ḏiḏi, tanggal nyagi moi re rata, toma 'orasa wangere so'o ne'o moju mada'a hafu nyangu. Ananga gena-ge balasu 'aḏi 'a'a laya Paskah, reo roti-roti kama ragi ua reo uge mamaḏi ananga balasu ya oromo.#Sup. 12:8 12Awa enanga ma jingianga ya gogono singadolo da-daini i'a, re doba ma 'obongo na poti ngai moi i'a mai awa. Gena-ge mete'e Paskah ma hukumu ga'a ananga balasu ya si'a'a. 13Siḏibo ḏi'i, mada'a na'o matengo i'a bae na-nau'u bolo we-were'a ga'a najis ua, re toma ḏo-ḏagi ma dara ua, mada'a matengo i'a gena-ge 'o si'a'a ua Paskah ma laya, unanga gena-ge balasu sisupu tai ngowa-ngowa'a manga sigolona, sababu ananga 'aḏi gasa jou-jou ua ra Ma JOU toma enanga ma 'orasa ri sitantukanga; ananga gena-ge balasu 'aḏi doiti enanga ma hukumana sababu manga ḏosa. 14Na'o ngowa'a tagi-tagi ino ro tegoro taninga sigolona mau 'o 'a'a Paskah ma laya di'a Ma JOU, ḏua unanga balasu siḏagi Paskah ma hukumu re putusanga. Ngini balasu ni siḏagi ma hukumu rimoi, bae di'a ngowa'a tagi-tagi ino bolo ngowa'a Israel madutu.>>
Ngasu'u ma tero kakamo 'i sinyanyasele ngowa'a Israel manga ḏo-ḏagi
1 9:15-23
15Toma wangere simomi'i Suyu'u 'Ofi-'Ofi ḏua, kakamo gena-ge 'i damunu ma Suyu'u 'Ofi-'Ofi, enanga gena-ge Ma Jou'ongu Madutu 'ai hukumu ma ngi'i. Toma 'orasa lobi'i singadolo da-daini i'a, ma kakamo gena-ge toma Suyu'u 'Ofi-'Ofi ma re'u, rema duhu ma tero sa'olo u'u.#Sup. 40:17 16Enanga 'i dadi so'o gena-ge tau-taunu: kakamo gena-ge 'i damunu Suyu'u 'Ofi-'Ofi re toma 'orasa lobi'i rema duhu ma tero sa'olo u'u. 17'Au ngau ḇato ma kakamo 'i pere toma Suyu'u ma re'u ie, togumu i'a ngowa'a Israel 'aḏi tagi sisoi'i tala ma ngi'i gena-ge. Re le'a ḇato kakamo 'i togumu, toma ngi'i gena-ge ngowa'a Israel 'aḏi matogumu re 'aḏi side'oso manga Suyu'u 'Ofi-'Ofi. 18Ngowa'a Israel 'aḏi tagi sisoi'i tala ma ngi'i mete'e Ma JOU 'ai parenta re ḏi'i ananga gena-ge 'aḏi side'oso manga Suyu'u 'Ofi-'Ofi mete'e Ma JOU 'ai parenta. Ma di'ara ma kakamo gena-ge rema enanga moju toma Suyu'u 'Ofi-'Ofi ma re'u, ananga ḏi'i 'aḏi tegoro moju tamanga suyu'u. 19Na'o ma kakamo gena-ge lai ti'ara toma Suyu'u 'Ofi-'Ofi ma re'u, ngowa'a Israel ananga ya mete'e manga 'atoranga ra Ma JOU, re 'aḏi tagi yoḏu'u moju. 20Soi rai o'o i'a wange muḏuo i'a ma kakamo toma Suyu'u 'Ofi-'Ofi ma re'u wange. Dadi wange muḏuo i'a ḏi'i ananga 'aḏi tegoro moju tamanga suyu'u toma ngi'i gena-ge mete'e Ma JOU 'ai parenta; kara ananga nyengara 'aḏi tagi moju mete'e Ma JOU 'ai parenta ḏi'i. 21Soi rai o'o i'a ma kakamo gena-ge 'i togumu pa'i mulaingi lobi'i tala singadolo da-daini i'a ḇato. Na'o ma kakamo gena-ge 'i pere toma 'orasa da-daini i'a, ananga nyengara 'aḏi tagi moju. Toma 'orasa ma kakamo gena-ge 'i pere: bae toma 'orasa wangere bolo toma 'orasa lobi'i, ananga ḏi'i nyengara 'aḏi tagi moju. 22Ma di'ara sa'olo ḇato ma kakamo gena-ge 'i togumu toma Suyu'u 'Ofi-'Ofi ma re'u, bae wangere ḏiḏi, bae ngara moi bolo lebe ti'ara i'a, ngowa'a Israel ananga tatapu 'aḏi tegoro tamanga suyu'u ma dara re 'aḏi tagi yoḏu'u moju. Mada'a na'o ma kakamo 'i pere, ananga nyengara 'aḏi tagi moju. 23Mete'e Ma JOU 'ai parenta, ananga side'oso manga suyu'u; re mete'e ḏi'i Ma JOU 'ai parenta, ananga nyengara 'aḏi tagi moju. Ananga 'aḏi siḏagi Ma JOU 'ai parenta, mete'e Ma JOU 'ai parenta gena-ge ga'a 'i sipula'a ra Musa.
2025 Indonesian Bible Society (LAI)