Nyo-nyoimi 10
10
Torompet-torompet salaka
10:1-10
1Ma JOU 'o kanau moju ra Musa rema betongo so'o ne: 2<<'A'a torompet romoḏiḏi reo salaka tutu'u ngana balasu na 'a'a romoḏiḏi gena-ge di'a si'aro'o ngowa'a Israel ma toropo di'a parenta malomu re ḏi'i di'a parenta ananga gena-ge 'aḏi ruba manga suyu'u kara tagi moju. 3Toma 'orasa torompet romoḏiḏi gena-ge 'i siwusu ngowa'a Israel ma toropo mo-moini balasu 'aḏi malomu ra ngana toma Suyu'u Lo-lomu ma ngalana ma da-daku ma biono. 4Na'o pa'i torompet rimoi ḇato ga'a 'i siwusu, enanga di'a toropo gena-ge manga bi-biri'i, gena-ge ḏi'i ngowa'a Israel manga toropo ma sordado ma sae'e, ananga gena-ge balasu 'aḏi malomu ra ngana. 5Na'o torompet 'i siwusu rema iḏingi di'a pula'a nana'o, ḏua suku-suku ma toropo#10:5 suku Yehuda, Isakhar re Zebulon manga toropo ga'a manga suyu'u papolo wangere ma la'o, ananga gena-ge balasu 'aḏi tagi. 6Na'o torompet 'i siwusu ma soi ḏiḏi rema iḏingi gena-ge ma tero, ḏua suku-suku ma toropo#10:6 suku Ruben, Simeon re Gad manga toro-toropo ga'a manga suyu'u papolo kore sara ananga gena-ge balasu 'aḏi tagi. Dadi nana'o gena-ge balasu 'i siwusu di'a soma'a ananga gena-ge balasu 'aḏi tagi; 7mada'a na'o soma'a ngowa'a Israel manga toro-toropo 'aḏi malomu, torompet balasu 'i siwusu rema iḏingi ma lelegu. 8Torompet romoḏiḏi gena-ge 'imam Harun 'ai ngowa-ngowa'a nau'u ya wusu; gena-ge ga'a hukumu di'a kasingado-ngadolo i'a ra ngini re ninga ju'uda tala. 9Re na'o ngini ni tagi parangi taninga daeraha talaḏi lawana ga'a 'aḏi sito-to'u ngini, ngini balasu pula'a nana'o reo wusu torompet, la ngini sanga 'elingi ra Ma JOU Ma Jou'ongu Madutu ga'a ngini ni silamo'o re siḏubuso re Unanga gena-ge ḏuanga i'a 'O sisalamata ngini taninga lawana. 10Re ḏi'i toma 'orasa ngini ni maroanga: bae taninga laya-laya ga'a 'i sitantukanga ḏua bolo toma ngara-ngara ma su-sungi, ngini balasu na wusu ma torompet toma 'orasa ni gasa ninga jou-jou ga'a tau'u simoini re jou-jou sababu dadunu marimoi moju ra Ma JOU. Enanga gena-ge ma maksudu, la Ngoi Ma Jou'ongu Madutu ḏuanga 'o 'elingi ngini, Ngoi gena-ge ga'a ngini ni silamo'o re siḏubuso: Ngoi nena-ne Ma JOU Ma Jou'ongu Madutu ga'a ngini ni silamo'o re siḏubuso.>>
Ngowa'a Israel 'aḏi tagi sisoi'i tala daeraha baulaco Sinai
10:11-36
11Toma musungu ma soi ḏiḏi, ngara ma soi ḏiḏi, tanggal nyagi romoḏiḏi toma ngara gena-ge, ma kakamo 'i pere toma Suyu'u 'Ofi-'Ofi ma re'u ie, enanga gena-ge Ma Jou'ongu Madutu 'ai hukumu ma ngi'i. 12Ḏua ngowa'a Israel 'aḏi sisoi'i tala daeraha baulaco Sinai mete'e manga ḏo-ḏagi ma 'atoranga re 'aḏi tagi papolo kore mie. Gena ḏua, ma kakamo 'i togumu toma daeraha baulaco Paran.
13Gena-ge ananga manga ḏo-ḏagi ma mulaingi mete'e Ma JOU 'ai parenta ga'a Unanga 'o sipula'a ra Musa. 14Suku Yehuda 'aḏi tagi lebe siḏa, remanga paji-paji, mete'e sordado ma toropo rimoi re rimoi. 'A Nahason unanga gena-ge 'Aminadab 'ai ngowa'a nau'u re suku Yehuda 'ai sordado ma toropo ma sae. 15'A Netaneel, unanga gena-ge Zuar 'ai ngowa'a nau'u re suku Isakhar 'ai sordado ma toropo ma sae'e 16'A Eliab, unanga gena-ge Helon 'ai ngowa'a nau'u re suku Zebulon 'ai sordado ma toropo ma sae'e. 17Ngowa'a suku Gerson manga na-nau'u mamete'e reo ngowa'a suku Merari manga na-nau'u, ananga 'aḏi ruba Suyu'u 'Ofi-'Ofi#10:17 3:25-26, 36-37 ga'a 'age Ma Jou'ongu Madutu 'ai hukumu toma dara. Togumu ḏua, ananga ya tede ie kara 'aḏi tagi. 18Ḏua suku Ruben remanga paji-paji, mete'e sordado ma toropo rimoi re rimoi. 'A Elizur, unanga gena-ge 'a Zyedeur 'ai ngowa'a nau'u re suku Ruben 'ai sordado ma toropo ma sae. 19'A Selumiel, unanga gena-ge Zurisyadai 'ai ngowa'a nau'u re suku Simeon 'ai sordado ma toropo ma sae'e 20'A Elyasaf, unanga gena-ge Reheul 'ai ngowa'a nau'u re 'o suku Gad 'ai sordado ma toropo ma sae'e.
21Gena ḏua ngowa'a Kehat 'aḏi tagi tede pakakasa ga'a 'ofi-'ofi. Re Suyu'u 'Ofi-'Ofi 'i side'oso siḏa wakutu ngowa'a Kehat 'aḏi sapolo nyangu. 22Ḏua suku Efraim remanga paji-paji, mete'e sordado ma toropo rimoi re rimoi. 'A Elisama, unanga gena-ge 'a Amihud 'ai ngowa'a nau'u re 'o suku Efraim 'ai sordado ma toropo ma sae. 23'A Gamaliel, unanga gena-ge Pedazur 'ai ngowa'a nau'u re suku Manasye 'ai sordado ma toropo ma sae'e. 24'A Abidan, unanga gena-ge Gideoni 'ai ngowa'a nau'u re 'o suku Benyamin 'ai sordado ma toropo ma sae'e. 25Ga'a tagi siḏo-ḏogumu toma suku mo-moini gena-ge suku Dan remanga paji-paji, mete'e sordado ma toropo rimoi re rimoi. 'A Ahiezer, unanga gena-ge 'a Amisyadai 'ai ngowa'a nau'u re suku Dan 'ai sordado ma toropo ma sae. 26'A Pagiel, unanga gena-ge Okhran 'ai ngowa'a nau'u re suku Asyer 'ai sordado ma toropo ma sae'e. 27'A Ahira, unanga gena-ge Enan 'ai ngowa'a nau'u re suku Naftali 'ai sordado ma toropo ma sae'e. 28Gena-ge ngowa'a Israel manga 'atoranga tamanga ḏo-ḏagi mete'e manga sordado ma toropo rimoi re rimoi, 'au ngau ḇato ananga 'aḏi tagi moju.
29Gena ḏua 'a Musa 'o kanau moju ra Hobab unanga gena-ge 'a Rehuel 'ai ngowa'a nau'u re Rehuel#10:29 ma tero 'a Yitro (Sup. 3:1) ngowa'a Midian, 'a Musa 'ai dedono: <<Ngomi tagi toma ngi'i mangale Ma JOU 'o kanau: <Ngoi ḏuanga i'a ta pula'a ra ngini.> Sababu gena-ge ino mete'e ra ngomi, ngomi ḏuanga i'a mi 'a'a la-la ra ngini, sababu Ma JOU ro jaji ma la-la toma ngowa'a Israel.>> 30Mada'a Hobab 'o sangoro ra Musa: <<Ngoi to mete'e ua, mada'a ngoi mau to tagi tari daeraha re tari herapongo.>> 31'A Musa 'o kanau: << Awa sisoi'i tala ngomi, sababu ngana ga'a no waro, ma ngi'i sa'olo ngomi mi side'oso minga suyu'u toma daeraha baulaco, pa'i ngana ḇato no sinyanyasele ngomi toma ngo'omo. 32Na'o ngana no tagi mamete'e ra ngomi, Ma JOU ḏuanga i'a 'o si'a'a 'Ai la-la ra ngomi, ngomi ḏuanga i'a ma si'a'a ḏi'i ra ngana.>>
Bangsa Israel 'aḏi tagi
33Dadi ngowa'a Israel 'aḏi tagi sisoi'i tala kie ga'a Ma JOU 'o masijumu 'Ai diri re 'aḏi tagi ma giḏanga ma di'ara wangere ro'ange. Re Ma JOU 'ai burua jaji ananga ya gasa sisiḏa toma biono, manga ḏo-ḏagi ma giḏanga gena-ge di'a 'aḏi disa manga ngi'i di'a side'oso manga suyu'u. 34Toma 'orasa wangere, Ma JOU 'ai kakamo 'age ra ananga manga re'u tau-taunu, le'a ḇato 'aḏi tagi.
35'Au ngau ḇato Ma JOU 'ai burua jaji gena-ge ngowa'a ya sigasa, Musa 'o kanau: <<Ino tagi, Ma JOU, la 'Ani lawana 'aḏi matai are re ngowa-ngowa'a ga'a emono Ma JOU ananga matai wiḏi taninga momina.>> 36Re 'au ngau ḇato ma burua jaji gena-ge 'i sigasa togumu, Musa 'o kanau: <<Maḏibo ino, Ma JOU tani sordado Israel ga'a rema cala latu nena-ne.>>
2025 Indonesian Bible Society (LAI)