Nyo-nyoimi 8
8
Lapuru ma ngi'i rimoi rema lapuru ngai tumudingi toma re'u
8:1-4
1Ma JOU 'o kanau moju ra Musa rema betongo so'o ne: 2<<Siajele ra Harun re kanau so'o ne: <Wangere ma jelele i'a, ngana no sidowanga lapuru tumudingi ga'a toma lapuru ma ngi'i rimoi ma re'u, la 'i sitarangi toma lapuru ma ngi'i gena-ge ma biono.>> 3Dadi 'a Harun 'a si'a'a so'o gena-ge: unanga 'a sidowanga ma lapuru-lapuru sitalaḏi toma biono, ma tero Ma JOU ro parenta ra Musa. 4Lapuru ma ngi'i balasu 'a'a so'o ne: toma rou singadolo ma bunga; reo guraci ga'a tutu'u mete'e ma tero sa'olo Ma JOU 'a sijumu ra Musa, dadi ma lapuru ma ngi'i, unanga 'o 'a'a so'o gena-ge.#Sup. 25:31, 33–34, 37:17, 19–20
Sigofi ngowa'a Lewi ra Ma JOU 'ai momina
8:5-22
5Ma JOU 'o kanau ra Musa: 6<<Siwola i'a ngowa'a Lewi toma ngowa'a Israel ma lelegu re sigofi ananga ra Ma JOU 'ai momina mete'e 'agama ma 'atoranga. 7Rema duhu so'o gena-ge ngana si'a'a ra ananga so'o ne: Siji-jiri ḇanyo ra ananga di'a sigofi ananga mete'e 'agama ma 'atoranga. Ḏua soma'a ananga 'aḏi ḇukuku manga gogo tamanga lese reo golowa pamara re uju manga baju. Gena ḏua ananga 'aḏi dadi 'ofi mete'e 'agama ma 'atoranga. ra Ma JOU 'ai momina. 8Gena ḏua ngowa'a Lewi balasu 'aḏi 'oro sapi ma ngowa ma nau'u rimoi rema jou-jou ngo-ngoromo 'i si'a'a toma gulupungu ma rousu i'a, sicapuru reo zaitun ma goroho, re Musa no 'oro ḏi'i sapi ma ngowa ma nau'u ma lelegu rimoi ḏi'i, ngana na 'oro gena-ge sa'olo jou-jou di'a sigofi ngowa'a ra Ma JOU 'ai momina. 9Gena ḏua ngana no soma'a ngowa'a Lewi maco-cori toma Suyu'u Lo-lomu ma biono, re no 'aro'o ngowa'a Israel mo-moini malomu. 10Na'o ngana reno soma'a ngowa'a Lewi ma co-cori talaḏi ra Ngoi, Ma JOU toma Suyu'u Lo-lomu gena-ge ma biono, ngowa'a Israel balasu 'aḏi siteru manga giama toma ngowa'a Lewi matengo re matengo manga sae'e ma re'u. 11Ḏua 'a Harun balasu sidoa'a ngowa-ngowa'a Lewi gena-ge sa'olo ngowa'a Israel manga jou-jou ga'a sitede ie talaḏi ra Ngoi, Ma JOU. Rema duhu so'o gena-ge ananga nyengara 'aḏi si'a'a munara di'a Ngoi, Ma JOU Tari Suyu'u 'Ofi-'Ofi. 12Ḏua ngowa'a Lewi 'aḏi siteru manga giama toma sapi-sapi ma ngowa ma nau'u ma sae'e ma re'u, ḏua ngana balasu no sidoa'a sapi ma nau'u rimoi gena-ge sa'olo jou-jou ga'a tau'u simoini di'a sigofi ngowa'a Lewi ra Ngoi, Ma JOU Tari momina, re sapi rimoi ma lelegu sa'olo jou-jou ga'a tau'u simoini di'a si'a'a ngowa'a Lewi dadunu 'aḏi marimoi moju ra Ngoi Ma JOU. 13Gena ḏua ngowa'a Lewi gena-ge ngana balasu nu'u sitalaḏi ra Harun re manga ngowa'a nau'u re sidoa'a ananga sa'olo jou-jou ga'a sitede ie di'a Ngoi Ma JOU 14Rema duhu so'o gena-ge ngana ḏuanga i'a na'u siwola i'a ngowa'a Lewi toma ngowa'a Israel manga sigolona, la ananga gena-ge 'aḏi dadi ta Ngoi, Ma JOU. 15Togumu i'a ngowa'a Lewi nyengara 'aḏi siḏagi manga munara toma Suyu'u Lo-lomu, wakutu ananga gena-ge ngana na'u sigofi ḏua kara re no sidoa'a ananga sa'olo jou-jou ga'a 'i sitede ie di'a Ngoi, Ma JOU. 16Sababu ananga 'aḏi sidoa'a mode-mode'e ra Ngoi, Ma JOU toma ngowa'a Israel manga sigolona. Ananga Ngoi Ta'u cumutu ḏua sa'olo Ta Ngoi, Ma JOU 'O singali ngowa'a Israel manga ngowa'a nau'u ma jomolo, gena-ge ngowa'a nau'u ga'a supu ma mulaingi toma ngina ma po'olo. 17Ma sababu, ngowa'a Israel manga ngowa'a nau'u ma jomolo mo-moini re manga haiwani ma ngowa ma nau'u ma jomolo gena-ge Ta Ngoi, Ma JOU. Toma 'orasa Ngoi, to sisengene ngowa'a ma nau'u ma jomolo mo-moini toma tana'a Mesir, Ngoi ta'u siwola i'a ngowa'a Israel manga ma ngowa'a ma nau'u ma jomolo mo-moini di'a Ngoi, Ma JOU. 18Dadi Ngoi to 'oro ngowa'a Lewi sa'olo ngowa'a Israel manga ngowa'a ma jomolo ma nga-ngali. 19Re ḏi'i Ngoi, Ma JOU to sidoa'a ḏua ngowa'a Lewi toma ngowa'a Israel manga sigolona sa'olo bu-bula'a ra Harun re 'ai ngowa-ngowa'a nau'u la ananga siḏagi munara di'a ngowa'a Israel toma Suyu'u Lo-lomu ma dara, re si'a'a ngowa'a Israel dadunu 'aḏi marimoi moju ra Ngoi, Ma JOU. Gena ḏua, ngowa'a Israel ḏuanga i'a sanga bahala awa, na'o ananga 'aḏi maco-cori toma Suyu'u 'Ofi-'Ofi.>>
20Ḏua Musa re 'a Harun re ngowa'a Israel mo-moini, ananga gena-ge ya si'a'a so'o gena toma ngowa'a Lewi mete'e mo-moini ga'a Ma JOU ro parenta ra Musa mangale ngowa'a Lewi, so'o gena ngowa'a Israel ya si'a'a toma ngowa'a Lewi. 21Ngowa'a Lewi gena-ge 'aḏi sigofi tamanga diri masiretene re ya 'uju manga baju masiretene. Gena ḏua 'a Harun 'o sidoa'a ananga sa'olo jou-jou ga'a 'i sitede ie talaḏi ra Ma JOU re 'o si'a'a ananga gena-ge dadunu marimoi moju ra Ma JOU di'a sigofi ngowa'a Lewi. 22Gena ḏua, ngowa'a Lewi 'aḏi osama toma Suyu'u Lo-lomu di'a siḏagi manga munara; re 'a Harun re 'ai ngowa-ngowa'a nau'u ya'u sibi-biri'i ananga ma tero Ma JOU ro parenta ra Musa mangale ngowa'a Lewi, so'o gena ngowa'a Israel ya si'a'a toma ngowa'a Lewi.
Ngowa'a Lewi manga munara ma mulaingi re ma ḏo-ḏogumu
8:23-6
23Ma JOU 'o kanau moju ra Musa rema betongo so'o ne: 24<< Nena-ne 'atoranga ga'a ngowa'a Lewi balasu ya mete'e: ananga ga'a manga 'umuru musungu nyagi romoḏiḏi re romotoa, re sie ananga matengo-matengo balasu 'aḏi sapolo di'a siḏagi 'ai munara toma Suyu'u Lo-lomu. 25Mada'a na'o 'ai 'umuru musungu nyagi romotoa ḏua, unanga ro bebasa tai munara re unanga 'o de-de'oso riwara. 26Unanga nyengara 'o riono ngowa'a Lewi ma lelegu di'a 'aḏi siḏagi manga munara toma Suyu'u Lo-lomu, mada'a awa unanga 'o siḏagi 'ai munara masiretene. Dadi so'o gena-ge, ngana balasu na siḏagi toma ngowa'a Lewi mangale ananga manga munara.>>
2025 Indonesian Bible Society (LAI)