Nyo-nyoimi 6
6
'Atoranga mangale ngowa'a nazir
6:1-21
1Ma JOU 'o kanau moju ra Musa rema betongo so'o ne: 2<<Siajele toma ngowa'a Israel re no kanau ra ananga so'o ne: Na'o matengo i'a, bae na-nau'u bolo we-were'a, ananga gena-ge 'aḏi si'a'a jaji ma ro-rousu i'a gena-ge jaji sa'olo ngowa'a nazir di'a sipula'a manga diri di'a Ma JOU, 3dadi ananga balasu 'aḏi maki-kiḏanga toma 'anggur bolo ngo-ngo'e ga'a 'i si'a'a 'etolo re awa ka'e 'anggur ma cuka ga'a 'i si'a'a toma 'anggur bolo ngo-ngo'e ga'a 'i si'a'a 'etolo. Re awa ka'e 'oru ḇato ga'a si'a'a toma 'anggur, re awa oromo 'anggur ma sowo'o ma eno'o, bae ma romu'u bolo ma ngonono. 4Ma di'ara ananga 'aḏi sipula'a manga diri di'a Ma JOU sa'olo ngowa'a nazir, awa unanga 'o oromo 'oru ḇato ga'a ma 'asala toma ate 'anggur: ma moi'i singadolo ma sowo'o ma eno'o. 5Ma di'ara ananga 'aḏi si'a'a jaji di'a sipula'a manga diri di'a Ma JOU sa'olo ngowa'a nazir, awa manga sae'e nga'unu golowa pamara, singadolo 'orasa gena-ge 'i togumu ḏua di'a ananga gena-ge 'aḏi sipula'a manga diri di'a Ma JOU, ananga balasu 'aḏi 'ofi-'ofi taunu. Sieanga i'a manga utu konyo ganapu kiḏanga. 6Ma di'ara ananga 'aḏi sipula'a 'ai diri di'a Ma JOU, awa 'aḏi ma co-cori toma mayeti: 7bae 'ai ḇaḇa bolo 'ai ngina 'aḏi sengene, bolo 'ai ioro re biḏanga ioro, bolo 'ai nongoḏu re biḏanga nongoḏu: awa ananga 'aḏi sifaja manga diri rema mayeti gena-ge, sababu ngowa'a nazir manga utu ma kiḏanga tamanga sae'e ma re'u sa'olo ma nana'o ananga gena-ge 'aḏi sipula'a manga diri di'a Ma Jou'ongu Madutu. 8Ma di'ara toma 'orasa ananga 'aḏi sipula'a manga diri di'a Ma JOU, ananga gena-ge 'ofi-'ofi di'a Ma JOU.
9Mada'a na'o ma siwaro ua 'age ngowa'a sengene co-cori unanga singadolo ananga 'aḏi sifaja manga utu ga'a 'i sipula'a ra Ma JOU, ananga balasu 'aḏi ḇukuku manga utu toma wangere sigofi manga diri. Wangere gena-ge wangere ma soi tumudingi ananga gena-ge balasu 'aḏi maḇukuku manga utu. 10Toma wangere ma soi tu'angere, ananga balasu 'aḏi gasa namo darafuru romoḏiḏi bolo namo pombo romoḏiḏi toma 'imam, toma Suyu'u Lo-lomu ma ngalana ma da-daku ma biono. 11Ḏua 'imam 'o sidoa'a namo diwanga rimoi sa'olo jou-jou di'a sigofi ngowa'a ra Ma JOU 'ai momina re ma rimoi ḏi'i 'i dadi jou-jou ga'a tau'u simoini. Jou-jou romoḏiḏi gena-ge 'i siḏagi ananga dadunu 'aḏi marimoi moju ra Ma JOU. Ma sababu kalaha ananga gena-ge 'aḏi sangaja ua ananga raḏi siḏagi ḏosa sababu 'aḏi maco-cori toma mayeti. Re toma wangere gena-ge ḏua, ananga balasu 'o si'ofi manga diri, 12re 'aḏi siḏagi moju 'orasa di'a sipula'a manga diri di'a Ma JOU sa'olo ngowa'a nazir. Dadi ananga balasu 'aḏi gasa doba ma nau'u rimoi ma 'umuru musungu rimoi sa'olo jou-jou ngali rugi. 'Oru ga'a ri palisi'i gena-ge ri siroimi riwara, sababu unanga ro dadi faja toma 'orasa 'aḏi sipula'a manga diri ra Ma JOU. 13Re na'o 'orasa ri totomo di'a ananga 'aḏi sipula'a manga diri di'a Ma JOU sa'olo ngowa'a nazir bae nau'u bolo were'a, ḏua ananga balasu 'aḏi siḏagi 'atoranga nena-ne: ananga ngowa'a balasu ya'u sigasa toma Suyu'u 'Ofi-'Ofi toma ngalana ma da-daku ma biono. 14Gena ḏua, ananga balasu 'aḏi gasa jou-jou ra Ma JOU gena-ge: doba ma ngowa ma nau'u rimoi ma 'umuru musungu rimoi ga'a ma lese lolara sa'olo jou-jou ga'a tau'u simoini, re doba ma ngowa ma were'a ma 'umuru musungu rimoi ga'a ma lese lolara sa'olo jou-jou di'a sigofi ngowa'a ra Ma JOU 'ai momina, re doba ma nau'u rimoi ga'a ma lese lolara sa'olo jou-jou sababu ngini dadunu ni marimoi moju ra Ma JOU, 15re ḏi'i roti-roti kama ragi ua karajanga rimoi, gena-ge roti ḇululu si'a'a reo gulupungu ma rousu i'a, sicapuru reo goroho zaitun, re roti nginara kama ragi ua si'ese reo goroho zaitun, re ḏi'i reo jou-jou ngo-ngoromo re jou-jou 'anggur ma ḇanyo.
16'Imam balasu 'a sigasa mo-moini gena-ge ra Ma JOU re sidoa'a jou-jou di'a sigofi ngowa'a ra Ma JOU 'ai momina re jou-jou ga'a tau'u simoini; 17re unanga balasu 'o sidoa'a doba ma nau'u gena-ge sa'olo jou-jou sababu dadunu marimoi moju ra Ma JOU, reo roti kama ragi ua karajanga rimoi. Re ḏi'i 'imam 'o sidoa'a jou-jou ngo-ngoromo re jou-jou 'anggur ma ḇanyo.
18Dadi ngowa'a nazir gena-ge balasu 'aḏi maḇukuku manga utu toma sae'e ga'a 'i sipula'a ra Ma JOU toma Suyu'u Lo-lomu ma ngalana ma da-daku ma biono, ḏua 'aḏi 'oro manga utu gena-ge kara upa'a toma u'u ma dara ga'a sitau'u di'a jou-jou sababu dadunu marimoi moju ra Ma JOU.
19Togumu i'a ananga 'aḏi ḇukuku manga utu toma sae'e ga'a 'i sipula'a di'a Ma JOU 'Imam balasu 'a 'oro doba ma nau'u ma giama ma bete'olo ga'a ri sa'ai mamete'e reo roti kapiringi rimoi re roti nginara rimoi, gena-ge roti-roti kama ragi ua, kara unanga balasu ya sigare mo-moini gena-ge toma ngowa'a nazir manga giama ma sata. 20Gena ḏua, 'imam balasu 'a sitede ie mo-moini gena-ge ra Ma JOU 'Ai momina sa'olo jou-jou. Mo-moini gena-ge balangu ma 'ofi-'ofi di'a 'imam mamete'e ḏi'i doba ma katere re doba ma nau'u ma giama ma bete'olo ga'a sitantukanga ḏua di'a 'imam. Gena pasala i'a ngowa'a nazir, ananga gena-ge nyengara 'aḏi ka'e 'anggur ma ḇanyo.>>
21'Atoranga mo-moini rema duhu gena-ge di'a ngowa'a ga'a 'aḏi 'a'a jaji di'a 'aḏi dadi ngowa'a nazir. Na'o ananga gena-ge nga'unu 'aḏi lebe dogo jou-jou ḏi'i, ananga nyengara. Mada'a ananga balasu ya sitotomo manga jaji mete'e 'atoranga ga'a 'aḏi si'aturu pasala ḏua.
'Imam 'ai demo barakati
6:22-27
22Ma JOU 'o kanau moju ra Musa: 23<<Siajele ra Harun re 'ai ngowa-ngowa'a nau'u: Ngini ni sibarakati ngowa'a Israel rema duhu so'o ne, no sikanau ra ananga: 24Ma JOU 'o sibarakati ngana re 'O jaga ngana; 25Ma JOU 'o si'erese 'ai biono ma cahaya ra ngana re 'o sijumu 'Ai mura re dadalara ra ngana; 26Ma JOU 'o sitalaḏi 'ai biono ra ngana re 'o siromanga ngana rema dame.
27Rema demo so'o gena-ge, 'a Harun re 'ai ngowa-ngowa'a nau'u, ananga gena-ge balasu 'aḏi terongo 'Ari lomanga sa'olo barakati toma ngowa'a Israel, dadi Ngoi masiretene ḏuanga i'a Ta'u sibarakati ananga.>>
2025 Indonesian Bible Society (LAI)