Nyo-nyoimi 5
5
'Atoranga mangale ngowa-ngowa'a najis
1Ma JOU 'o kanau moju ra Musa rema betongo so'o ne: 2<<Soma'a ngowa'a Israel na'o 'age ngowa'a ga'a sanga si-siḏi eno'o bolo ngowa'a ga'a manga dalaḏi 'i supu ḇo-ḇoanga re ngowa'a ga'a 'aḏi dadi najis sababu 'aḏi cigi mayeti, ngowa'a gena-ge mo-moini ananga balasu ya'u sisupu toma suyu'u ma daeraha ma ḏuḏunu. 3Ngini balasu ni sisupu ananga gena-ge toma suyu'u ma dara ma ḏuḏunu: bae na-nau'u bae we-were'a, la awa ananga gena-ge 'aḏi sinajis manga suyu'u ma daeraha ga'a Ngoi to tegoro ra ananga manga sigolona, Ngoi Ma JOU.>> 4Dadi ngowa'a Israel 'aḏi siḏagi so'o gena-ge: ananga 'aḏi soma'a ngowa'a gena-ge 'aḏi tagi sisoi'i tala suyu'u ma daeraha; ma tero sa'olo Ma JOU 'o kanau ra Musa, dadi ngowa'a Israel 'aḏi siḏagi so'o gena-ge.
nga-ngali ma du-duusu ma 'atoranga
(5:5–10)
5Ma JOU 'o kanau moju ra Musa: 6<<Siajele toma ngowa'a Israel so'o ne: Na'o matengo i'a, bae na-nau'u bolo we-were'a, 'aḏi 'a'a ḏosa toma ngowa'a lelegu,#'Im. 6:1-7 re sababu gena-ge 'aḏi setia riwara ra Ma JOU, singadolo unanga 'o dadi sala, 7dadi balasu unanga 'o mangaku 'ai ḏosa ga'a unanga ra 'a'a gena-ge. Gena ḏua, unanga 'a tuusu mo-moini re 'a dogo persen nyagi romoḏiḏi ḏi'i, re 'a sipula'a toma ngowa'a ga'a unanga 'o 'a'a sala gena-ge. 8Mada'a na'o ngowa'a gena-ge 'o sengene re 'ai rera moi cua, unanga ga'a 'o 'a'a ḏosa nyengara 'a tuusu mo-moini yoḏu'u! Ḏua 'ai sala ma du-duusu gena-ge 'i dadi di'a ta Ma JOU. Gena-ge 'i dadi 'imam manga balangu, siroimi nyangu doba ma nau'u ga'a sipake, la unanga dadunu 'o dadi marimoi moju ra Ma JOU. 9Ngowa'a Israel manga bu-bula'a 'ofi-'ofi mo-moini ga'a 'i sigasa toma 'imam, ḏua 'i dadi ta unanga. 10Wakutu ngowa'a Israel 'aḏi sidoa'a jou-jou 'oru ḇato ra Ma JOU, ananga 'aḏi sipula'a gena-ge toma 'imam. Re 'oru ḇato ga'a sipula'a toma 'imam, enanga gena-ge 'i dadi 'imam ma balangu. >>#5:10 Bolo: Mada'a jou-jou 'ofi-'ofi ga'a ngowa'a Israel matengo i'a 'o gasa gena-ge di'a ngowa'a gena-ge masiretene; pa'i 'oru ga'a sipula'a toma 'imam matengo i'a, gena-ge di'a 'imam gena-ge masiretene.
'Atoranga mangale hali hamu
11Ma JOU 'o kanau moju ra Musa rema betongo so'o ne: 12<<Siajele toma ngowa'a Israel re kanau ra ananga so'o ne: Si'ade-'ade i'a were'a matengo i'a 'ami de'oso re ḏegoro ma rapu singadolo mo setia riwara tami nau'u. 13'Age na-nau'u ma lelegu 'o otu ma lomu reo munanga mada'a 'ami nau'u 'o waro ua, sababu 'ami ga'a gena-ge 'i si'a'a go-gogono. Kalaha matengo i'a mai ua 'o dadi sakisi ra munanga bolo sanga cako'o ua, munanga mo si'a'a 'ami diri najis. 14re na'o togumu i'a 'ami nau'u 'o basono hamu tai were'a sababu unanga 'o ta'ajiri 'ai were'a mangale munanga gena-ge remo otu ma lomu reo na-nau'u ma lelegu singadolo sifaja 'ami diri; bolo nyengara ḇato 'ami nau'u 'o basono hamu tai were'a sababu unanga 'o ta'ajiri 'ai were'a, munanga gena-ge remo otu ma lomu reo na-nau'u ma lelegu singadolo sifaja 'ami diri; momongolo ua 'ai were'a, munanga gena-ge mo otu ma lomu ua reo na-nau'u lelegu. 15Dadi unanga gena-ge balasu 'o gasa 'ai were'a gena-ge toma 'imam. Re ḏi'i unanga balasu 'o gasa ma jou-jou di'a 'ai were'a, enanga gena-ge 'o gulupungu jelai ma ḏubuso efa balangu moi toma balangu nyagi moi. Sababu jou-jou gena-ge jou-jou ngo-ngoromo toma nau'u ga'a 'o basono hamu, unanga 'o sidai'i goroho zaitun yoḏu'u bolo 'o sigare manyanyi ua toma jou-jou gena-ge ma re'u. Jou-jou ngo-ngoromo gena-ge di'a sitarangi ga'a ma sala bolo ua.
16'Imam balasu 'o gasa we-were'a gena-ge talaḏi ra Ma JOU. 17Gena ḏua, 'imam balasu gasa ḇanyo 'ofi-'ofi toma giu'u tana'a. Gena ḏua, 'imam balasu 'oro korou'u toma Suyu'u 'Ofi-'Ofi ma dara re siare toma ḇanyo gena-ge. 18Ḏua we-were'a gena-ge 'imam mi sitalaḏi ra Ma JOU, unanga balasu 'a pasala we-were'a gena-ge 'ami utu, kara sigare tala jou-jou ngo-ngoromo tami giama ma sata, jou-jou gena-ge di'a sitarangi ga'a ma sala bolo ua. Toma 'orasa gena-ge 'age ḇanyo gena-ge toma 'imam masiretene 'ai giama. Ḇanyo gena-ge ga'a mamaḏi#5:18 ḇanyo gena-ge ga'a mamaḏi ḏa mangale: ḇanyo ga'a sigasa sangisara 'i sisapolo kutuki toma ngowa'a ga'a rema sala. 19Dadi ma we-were'a gena-ge 'imam balasu mi soma'a mo ma sisasi re 'o kanau ra munanga so'o ne: <Na'o toma 'orasa ngana reno molo'ara rani nau'u, na-nau'u lelegu 'o otu ma lomu ua reo ngana re ḏi'i na'o 'ani de'oso re ḏegoro ma rapu ua singadolo 'ani diri ri najis, ḏua ngana no kama sala ua re no bebasa toma kutuki ga'a 'i sisapolo toma ḇanyo mamaḏi. #5:19 ḇanyo mamaḏi ḏa mangale: ḇanyo ga'a sigasa sangisara 20Mada'a kalaha ngana reno molo'ara rami nau'u ngana 'ani de'oso re ḏegoro ma rapu singadolo no otu ma lomu reo na-nau'u lelegu ga'a 'ami nau'u ua re ngana no sifaja 'ani diri, 21toma 'orasa nange-ne, ma we-were'a 'imam balasu mi sikutuki reo sasi re 'o kanau ra munanga so'o ne: <Nyengara gari'a Ma JOU 'o si'a'a 'ani bangsa 'aḏi pake ma lomanga na'o mau 'aḏi sikutuki reo sasi wakutu Ma JOU 'o si'a'a 'ani busuu'u 'i dadi pekete #5:21 'ani busu'u 'i dadi pekete mangale: 'ani ngowa'a tani po'olo ma dara 'i eta'a re si'a'a 'ani po'olo 'i roboso. 22Nyengara gari'a ḇanyo mamaḏi gena-ge ga'a sisapolo kutuki, enanga ḏuanga i'a 'i osama tani lese re si'a'a 'ani polo'o 'i dadi roboso re 'ani busu'u 'i dadi pekete.#5:22 'ani busu'u 'i dadi pekete mangale: 'ani ngowa'a tani po'olo ma dara 'i eta'a Re were'a gena-ge ḏuanga i'a mo kanau: << 'Amin, 'amin>>#5:22 'Amin, 'amin mangale: Nyengara gari'a 'i dadi so'o gena, sieanga i'a 'i dadi so'o gena.
23'Imam ḏuanga i'a 'o lefo kutuki ma demo gena-ge toma kartasi bela moi re 'a siiranga reo ḇanyo mamaḏi gena-ge, 24re unanga ḏuanga i'a 'o soma'a we-were'a gena-ge mo ka'e ḇanyo mamaḏi ga'a sisapolo kutuki gena-ge. Re ma ḇanyo gena-ge 'i osama tami lese ma dara singadolo munanga mo basono lai siḏi madutu. 25Gena ḏua 'imam ḏuanga i'a 'o 'oro jou-jou ngo-ngoromo gulupungu jelai ra munanga 'ami giama ma sata, 'a sitede ie talaḏi ra Ma JOU, re 'a gasa toma jou-jou tau'u ma ngi'i. 26Gena ḏua 'imam balasu 'oro bo'umu moi toma jou-jou ngo-ngoromo gena-ge sa'olo nana'o rimoi mangale mo-moini ri siwola i'a di'a Ma JOU kara unanga gena-ge 'o tau'u toma jou-jou tau'u ma ngi'i ma re'u. Gena ḏua we-were'a balasu mo ka'e ḇanyo mamaḏi gena-ge. 27Wakutu we-were'a gena-ge mo ka'e ḇanyo togumu ḏua, na'o were'a gena-ge mo sifaja 'ami diri re mo setia riwara tami nau'u, ḇanyo gena-ge ga'a sisapolo kutuki enanga gena-ge 'i osama tami lese ma dara re 'i si'a'a 'ami lese sa'ara lai siḏi, singadolo 'ami po'olo ḏuanga i'a 'i roboso re 'ami busuu'u ḏuanga 'i dadi pekete. Rema duhu so'o gena-ge ngowa'a tami bangsa Israel ma sigolona ngowa'a ḏuanga i'a 'aḏi pake 'ami lomanga na'o mau 'aḏi sikutuki reo sasi. 28Mada'a na'o were'a gena-ge mo sifaja ua 'ami diri ua, re mode-mode'e munanga mo 'ofi, dadi munanga ḏuanga i'a mo bebasa toma kutuki re nga'unu mo sanga ngowa'a.>>
29Gena-ge 'Atoranga mangale hamu, we-were'a matengo munanga 'ami de'oso re ḏegoro ma rapu singadolo mo sifaja 'ami diri, momongolo ua were'a gena-ge remo molo'ara moju rami nau'u, 30bolo 'ami nau'u 'o basono hamu tai were'a sababu unanga 'o ta'ajiri 'ai were'a remo otu ma lomu reo na-nau'u ma lelegu; 'ai were'a gena-ge unanga balasu mi sitalaḏi ra Ma JOU re 'imam balasu 'o siḏagi 'Atoranga mo-moini gena-ge toma we-were'a gena-ge. 31Na-nau'u gena-ge unanga ḏuanga i'a 'o kama sala ua tai ga'a ma rapu, mada'a we-were'a gena-ge na'o munanga mo sala, balasu mo doiti ma hukumana.
2025 Indonesian Bible Society (LAI)