Nyo-nyoimi 4
4
Ngowa'a Lewi toma rera Kehat manga munara
4:1-20
1Ma JOU 'o kanau moju ra Musa re Harun: 2<<Toma ngowa'a Lewi manga ju'uda ma sigolona roimi ngowa'a Kehat manga na-nau'u ma repe mete'e manga rera-rera re ete re dotumu manga ngitu re ngale 3No roimi ananga gena-ge manga repe ga'a manga 'umuru musungu nyagi ro'ange re sie singadolo manga 'umuru nyagi romotoa. Ananga gena-ge mo-moini nyengara 'aḏi osama nyo-nyoimi di'a siḏagi manga munara toma Suyu'u Lo-lomu. 4Ngowa'a Kehat ma na-nau'u manga munara toma nena-ne: Jaga pakakasa ga'a lai 'ofi-'ofi toma Suyu'u Lo-lomu ma dara.
5Ma jelele i'a ngowa'a Israel mau 'aḏi malage manga ngi'i, ma siḏa Harun re 'ai ngowa-ngowa'a nau'u 'aḏi osama toma Suyu'u 'Ofi-'Ofi ma dara di'a siguci ma da-daku ḇa'a ga'a siwo-wola Kamara 'Ofi-'Ofi reo Kamara Lai 'Ofi-'Ofi, re 'aḏi pake enanga gena-ge di'a sidamunu burua jaji. 6Gena ḏua, ananga balasu 'aḏi sidamunu ma da-daku ḇa'a ma re'u reo haiwani ma eno'o 'alusu, re toma re'u ḏi'i ananga balasu sisela ḇa'a balao ga'i moi, kara ananga ya singosama ma do-doiti ate toma burua jaji ma gagoro ma golongu-golongu. 7Re ḏi'i toma meja ma re'u ga'a 'i sipake ḏua di'a roti ga'a 'i sidoa'a ḏua sa'olo jou-jou di'a Ngoi, ananga ya sela ḇa'a balao madutu ga'i moi, re toma ḇa'a gena-ge ma re'u ananga 'aḏi sigare suḏe di'a roti ma ngi'i, sawo'o di'a dupa ma ngi'i, re ḏi'i piala di'a sidai'i 'anggur re cerek-cerek di'a 'anggur ma ngi'i ga'a 'i sipake di'a jou-jou 'anggur ma ḇanyo. Roti ga'a ri sidoa'a sa'olo jou-jou di'a Ngoi, enanga gena-ge balasu rema enanga tau-taunu toma re'u. 8Toma re'u mo-moini gena-ge, ananga balasu ya sela ḇa'a kolili madutu ga'i moi, kara ya sidamunu reo haiwani ma eno'o 'alusu, gena ḏua ananga balasu 'aḏi singosama do-doiti ate toma meja ma gagoro ma golongu-golongu gena-ge.
9Gena ḏua, 'a Harun re 'ai ngowa-ngowa'a nau'u ananga 'aḏi 'oro ḇa'a balao ga'i moi re ya sidamunu toma lapuru ma ngi'i reo lapuru ngai tumudingi, ma 'a'atama, ma 'omanga ma ngi'i, re goroho zaitun ga'a ananga ya pake di'a sidai'i lapuru ngai tumudingi toma lapuru ma ngi'i gena-ge. 10Re ananga balasu ya sigare lapuru ma ngi'i gena-ge re pakakasa mo-moini toma da-damunu ga'a si'a'a reo haiwani ma eno'o 'alusu re ya sigare toma ate do-doiti ma re'u. 11Ananga balasu 'aḏi sela ḇa'a balao madutu ga'i moi toma jou-jou tau'u dupa ma ngi'i ma re'u ga'a si'a'a reo ate 'akasia re silape reo guraci madutu, kara ya sidamunu reo haiwani ma eno'o 'alusu. Ḏua, ananga balasu 'aḏi singosama ate do-doiti toma jou-jou tau'u dupa ma ngi'i gena-ge ma gagoro ma golongu-golongu.
12Gena ḏua, 'a Harun re 'ai ngowa-ngowa'a nau'u, ananga gena-ge balasu 'aḏi 'oro pakakasa mo-moini ga'a pake di'a siḏagi munara toma Suyu'u 'Ofi-'Ofi, silape reo ḇa'a balao madutu ga'i moi re sidamunu reo haiwani ma eno'o 'alusu, gena ḏua ya sigare toma do-doiti ma re'u. 13Ananga balasu ya sigofi ma korou'u toma jou-jou tau'u dupa ma ngi'i gena-ge, re toma re'u ya sela ḇa'a 'ungu ga'i moi, 14Gena ḏua, jou-jou tau'u ma ngi'i ma pakakasa mo-moini ga'a ananga ya pake di'a siḏagi manga munara 'ane, balasu sigare toma ḇa'a 'ungu gena-ge ma re'u: gena-ge panci-panci ngi'i di'a siupa'a korou'u sa-sau'u, forok-forok ma ngiḏi ro'ange, jou-jou tau'u ma ngi'i ma 'ese-'ese, bokolo di'a siajala ngaunu. Jou-jou tau'u ma pakakasa mo-moini gena-ge ga'a toma ḇa'a 'ungu ma re'u, ananga gena-ge balasu 'aḏi sidamunu reo haiwani ma eno'o 'alusu. Gena ḏua, ananga balasu 'aḏi siosama ate do-doiti toma jou-jou tau'u gena-ge ma gagoro ma golongu-golongu. 15Toma 'orasa ngau ḇato ngowa'a Israel 'aḏi ruba manga Suyu'u di'a 'aḏi tagi moju, 'a Harun re 'ai ngowa-ngowa'a balasu ya damunu baranga ma 'ofi-'ofi re pakakasa mo-moini toma ngi'i 'ofi-'ofi. Gena ḏua kara ngowa'a Kehat manga na-nau'u nyengara 'aḏi sapolo di'a tede mo-moini gena-ge; mada'a awa-awa ananga ya cigi baranga-baranga gena-ge la awa ananga 'aḏi sengene. Ma baranga mo-moini toma Suyu'u Lo-lomu balasu ngowa'a Kehat manga na-nau'u ya doiti. 16'A Eleazar, 'imam Harun 'ai ngowa'a nau'u, unanga balasu 'o sioḏi'i lapuru ma goroho, dupa ma bounu lai sa'i, si'aturu jou-jou gandum, re goroho zaitun di'a siba-ba'ala. Unanga 'ai tugasa di'a sioḏi'i Suyu'u 'Ofi-'ofi re enanga ma dara mo-moini: gena-ge baranga 'ofi-'ofi re ma pakakasa.>> 17Ma JOU 'o kanau moju ra Musa re Harun rema betongo so'o ne: 18<< Totoho la-la ino la ngowa'a Kehat manga rera-rera ma toropo awa 'aḏi iranga toma ngowa-ngowa'a suku Lewi manga sigolona. 19Dadi, la ananga 'aḏi 'ahu re awa 'aḏi sengene, toma 'orasa 'aḏi ma co-cori baranga lai 'ofi-'ofi, ngini ni siḏagi di'a ananga so'o nena-ne: 'a Harun re 'ai ngowa-ngowa'a nau'u, ananga gena-ge balasu 'aḏi osama toma Suyu'u 'Ofi-'Ofi ma dara re 'aḏi siḏe-ḏegoro ananga gena-ge manga munara re baranga ga'a ananga matengo re matengo mau ya tede. 20Mada'a kalaha pa'i 'orasa ceka'a ua ḇato, ngowa'a Kehat gena-ge 'aḏi osama awa di'a ya oḏi'i baranga-baranga lai 'ofi-'ofi gena-ge, awa singadolo 'aḏi sengene.>>
Ngowa'a Lewi toma rera Gerson ino ananga manga munara
4:21-28
21Ma JOU 'o kanau moju ra Musa re Harun rema betongo so'o ne: 22<<Roimi ḏi'i ngowa'a Gerson manga na-nau'u ma repe mete'e ananga manga rera-rera re ete re dotumu ma ngitu re ngale. 23Lefo ananga ga'a manga 'umuru musungu nyagi ro'ange re sie singadolo musungu nyagi romotoa. Ananga gena-ge mo-moini nyengara 'aḏi osama nyo-nyoimi di'a de-de'oso re siḏagi manga munara toma Suyu'u Lo-lomu ma dara. 24Ngowa'a Gerson 'ai rera-rera manga tugasa ga'a ananga gena-ge balasu ya de-de'oso re 'aḏi tede baranga so'o ne: 25Ananga balasu ya tede ma da-daku toma Suyu'u 'Ofi-'Ofi ma dara ga'a 'i si'a'a reo ḇa'a, Suyu'u gena-ge ma da-damunu, mamete'e ma da-damunu ga'a 'i si'a'a reo haiwani ma eno'o 'alusu toma re'u, Suyu'u Lo-lomu ma ngalana ma da-daku, 26re ḏi'i ḇa'a roata soana ma da-daku, soana ma da-daku sa'olo ngalana lamo'o supu osama di'a ngowa-ngowa'a, soana gena-ge ga'a 'i sigoloḏi Suyu'u Lo-lomu re jou-jou tau'u ma ngi'i, Suyu'u ma gumi-gumi, re ma pakakasa mo-moini di'a enanga ma baranga gena-ge. Ngowa'a Gerson, ananga gena-ge balasu 'aḏi siḏagi manga munara mo-moini ga'a 'i ma'u dowanga i'a re ino. 27Ngowa'a Gerson ma na-nau'u manga munara mo-moini, ananga balasu ya siḏagi mete'e Harun re 'ai ngowa-ngowa'a nau'u, ananga gena-ge manga parenta. Harun re 'ai ngowa-ngowa'a ḏuanga i'a ya sitatapu 'oru ga'a ananga ya 'urusu re tede. 28Gena-ge ngowa'a Gerson 'ai rera-rera manga tugasa toma Suyu'u Lo-lomu ma dara. Ananga balasu ya siḏagi mete'e 'a Itamar 'ai putusanga, unanga gena-ge 'imam Harun 'ai ngowa'a nau'u.#4:28 Itamar, 'a Harun 'ai ngowa'a nau'u ma nongoḏu
Ngowa'a Lewi toma Merari 'ai rera-rera ino manga munara
4:1-29-33
29Ma JOU 'o kanau moju ra Musa rema betongo so'o ne: <<Lefo ngowa'a Merari mete'e manga rera-rera re ete re dotumu manga ngitu re ngale. 30Lefo ananga ga'a manga 'umuru musungu nyagi ro'ange re sie singadolo musungu nyagi romotoa, Ananga gena-ge mo-moini nyengara 'aḏi osama nyo-nyoimi di'a de-de'oso re siḏagi manga munara toma Suyu'u Lo-lomu ma dara. 31Ngowa'a Merari 'ai tugasa di'a manga munara toma Suyu'u Lo-lomu ma dara, ananga balasu 'aḏi tede so'o ne: Suyu'u 'Ofi-'Ofi ma koseng, re ma sita giḏanga, ma ngasu-ngasu'u, ma ba-bangini, 32re ḏi'i ma ngasu'u ga'a 'i sigoloḏi ma soana rema bangini, ma ḏi'olo re ma gumi.#Sup. 27:9-18 re manga pakakasa re enanga mo-moini ma munara ga'a 'i ma'u dowanga i'a re ino. 'Imam-'imam ḏuanga i'a 'aḏi lefo 'ori i'a mo-moini ananga balasu ya tede gena-ge. 33Dadi enanga gena-ge ngowa'a Merari 'ai rera-rera manga tugasa mangale munara mo-moini toma Suyu'u Lo-lomu. Ananga balasu ya siḏagi rea Itamar sa'olo manga bi-biri'i, unanga gena-ge 'imam Harun 'ai ngowa'a nau'u.#4:33 Itamar, 'a Harun 'ai ngowa'a nau'u ma nongoḏu>>
Ngowa'a Lewi sanga roimi
4:34-49
34Dadi 'a Musa re Harun re ngowa'a Israel manga toropo ma bi-biri'i, ananga gena-ge 'aḏi lefo ngowa'a Kehat manga ngowa-ngowa'a nau'u mete'e manga rera-rera re manga ete re dotumu manga ngitu re ngale, 35gena-ge ngowa'a nau'u ga'a manga 'umuru musungu nyagi ro'ange re singadolo musungu nyagi romotoa. Ananga gena-ge mo-moini ga'a nyengara 'aḏi osama nyo-nyoimi di'a de-de'oso re siḏagi manga munara toma Suyu'u Lo-lomu ma dara. 36Re ngowa'a ga'a ya silefo mete'e manga rera-rera, ananga manga repe nga cala ḏiḏi latu tumudingi re nga nyagi romotoa (2.750). 37Gena-ge ngowa-ngowa'a ga'a ananga ya'u silefo toma ngowa'a Kehat 'ai rera-rera, ananga mo-moini ga'a siḏagi manga munara toma Suyu'u Lo-lomu ma dara, ananga ga'a Musa re Harun ya'u lefo mete'e Ma JOU 'ai parenta ga'a Unanga 'o sipula'a ra Musa.
38Na-nau'u toma ngowa'a Gerson ga'a 'i silefo mete'e manga rera-rera re ete re dotumu ma ngitu re ngale, 39gena-ge ngowa'a nau'u ga'a manga 'umuru musungu nyagi ro'ange singadolo musungu nyagi romotoa. Ananga gena-ge mo-moini ga'a nyengara 'aḏi osama nyo-nyoimi di'a de-de'oso re siḏagi manga munara toma Suyu'u Lo-lomu ma dara, 40ngowa'a gena-ge ga'a sanga lefo mete'e manga rera-rera re manga ete re dotumu ma ngitu re ngale, ananga manga repe nga cala ḏiḏi re nga latu rarama re nga nyagi ro'ange (2.630). 41Gena-ge ya lefo ngowa'a Gerson 'ai rera-rera, ananga mo-moini ya siḏagi munara toma Suyu'u Lo-lomu, ga'a Musa re Harun ya'u lefo mete'e Ma JOU 'ai parenta.
42Na-nau'u toma ngowa'a Merari ga'a silefo mete'e manga rea-rera re manga ete re dotumu ma ngitu re ngale, 43gena-ge ngowa'a nau'u ga'a manga 'umuru musungu nyagi ro'ange singadolo musungu nyagi romotoa. Ananga gena-ge mo-moini ga'a nyengara 'aḏi osama nyo-nyoimi di'a de-de'oso re siḏagi manga munara toma Suyu'u Lo-lomu ma dara. 44Ngowa'a gena-ge ga'a sanga lefo mete'e manga rera-rera, ananga manga repe nga cala ro'ange latu ḏiḏi (3.200) 45Gena-ge ga'a ya lefo rera-rera toma ngowa'a Merari, ananga ga'a Musa re Harun ya lefo mete'e Ma JOU 'ai parenta sipula'a ra Musa. 46Na-nau'u toma ngowa'a Lewi ga'a 'a Musa re Harun mamete'e ngowa'a Israel manga bi-biri'i ya silefo mete'e manga rera-rera re ete re dotumu ma ngitu re ngale, 47gena-ge ngowa'a nau'u ga'a manga 'umuru musungu nyagi ro'ange singadolo musungu nyagi romotoa. Ananga gena-ge mo-moini ga'a nyengara 'aḏi osama nyo-nyoimi di'a de-de'oso re siḏagi munara di'a tede-tede baranga-baranga toma Suyu'u Lo-lomu ma dara. 48Dadi ananga ga'a sanga lefo, manga repe nga cala tu'angere re nga latu romotoa re nga nyagi tu'angere (8.580). 49Mete'e Ma JOU 'ai parenta ga'a 'i sipula'a ra Musa, ngowa'a mo-moini sanga lefo, matengo re matengo sanga watasa toma munara ga'a ananga ya siḏagi bolo tede. Dadi so'o gena-ge ananga sanga lefo, ma tero sa'olo Ma JOU 'o parenta ra Musa.
2025 Indonesian Bible Society (LAI)