Nyo-nyoimi 3
3
'A Harun 'ai ngowa-ngowa'a nau'u
3:1–4:49
1Nena-ne 'a Harun re 'a Musa manga ju'uda toma 'orasa Ma JOU 'o kanau ra Musa toma Kie Sinai. 2Harun 'ai ngowa'a nau'u manga loma-lomanga, nena-ne: ma jomolo 'ai lomanga Nadab, gena ḏua 'a Abihu, Eleazar re Itamar. 3Gena-ge Harun 'ai ngowa'a nau'u manga loma-lomanga, 'imam-'imam ga'a ' a Musa ya'u siba-ba'ala goroho zaitun tamanga sae'e di'a sanga solano,#Sup. 28:41 la ananga nyengara 'aḏi siḏagi manga munara sa'olo 'imam. 4Mada'a 'a Nadab re Abihu, ananga gena-ge raḏi sengene toma Suyu'u Lo-lomu ma ngalana ma da-daku ma biono,#'Im. 10:4 wakutu ananga mau 'aḏi gasa u'u ga'a Ma JOU 'o simaha ua toma Suyu'u Lo-lomu ma dara toma Sinai ma daeraha baulaco. #'Im. 10:1-7ananga nga muḏiḏi 'aḏi sengene kamanga ngowa'a ua. Ḏua 'a Eleazar re Itamar , ananga gena-ge 'aḏi siḏagi manga munara sa'olo 'imam mamete'e manga ḇaḇa 'a Harun.
Ngowa'a Lewi manga munara di'a riono 'a Harun sa'olo 'Imam 'Agung
5Ma JOU 'o kanau ra Musa rema betongo so'o ne: 6<<Soma'a ngowa'a suku Lewi 'aḏi ma co-cori re talaḏi ra Harun,'Imam 'Agung, la ananga 'aḏi de-de'oso unanga. 7Suku gena-ge balasu ya siḏagi manga munara di'a Harun re di'a ngowa'a Israel ma toropo mo-moini ḏi'i toma Suyu'u Lo-lomu ma biono. Suku gena-ge 'aḏi siḏagi munara di'a 'Ari Suyu'u gena-ge: 8Ananga balasu ya jaga la-la 'ori i'a rana toma Suyu'u Lo-lomu, re siḏagi ngowa'a Israel manga munara di'a Suyu'u Lo-lomu. Rema duhu gena-ge suku Lewi 'aḏi de-de'oso ngowa'a Israel. 9Ngowa'a suku Lewi ngana Musa balasu na'u sipula'a munara di'a de-de'oso Harun re 'ai ngowa-ngowa'a nau'u. Toma ngowa'a Israel manga sigolona, pa'i ananga gena-ge ḇato balasu de-de'oso Harun re 'ai ngowa-ngowa'a nau'u. 10Mada'a pa'i Harun re 'ai ngowa-ngowa'a nau'u ḇato ngana na'u sitede ananga di'a siḏagi munara sa'olo 'Ari 'imam-'imam. Mada'a ngowa'a ma lelegu ga'a ma co-cori Suyu'u Lo-lomu gena-ge, ananga gena-ge balasu sanga hukumu sengene.>>
11Ḏua Ma JOU 'o kanau moju ra Musa rema betongo so'o ne: 12<<'Isene, Ngoi to 'oro ngowa'a suku Lewi manga na-nau'u toma ngowa'a Israel ma sigolona sa'olo ngowa'a Israel manga ngowa'a nau'u ma jomolo, ananga gena-ge ma nga-ngali di'a ngowa'a Israel manga ngowa'a nau'u ga'a ḏuanga i'a 'o supu toma ngina ma po'olo. Dadi ngowa'a suku Lewi 'aḏi dadi ta Ngoi, 13sababu ngowa'a nau'u ma jomolo mo-moini gena-ge ta Ngoi. Toma 'orasa Ngoi ta'u sisengene ngowa'a nau'u ma jomolo mo-moini toma Mesir, gena-ge Ngoi Ta'u siwola i'a ngowa'a Israel manga ngowa'a nau'u ma jomolo mo-moini di'a Ngoi masiretene, bae toma manusia bae toma haiwani: mo-moini gena-ge ta Ngoi: Ngoi nena-ne Ma JOU.>>
Siroimi ngowa'a Lewi
14Ma JOU 'o kanau moju ra Musa toma daeraha baulaco Sinai rema betongo so'o ne: 15<<Lefo ngowa'a suku Lewi ma na-nau'u manga loma-lomanga, mete'e ananga manga rera-rera re ete re dotumu manga ngitu re ngale; na-nau'u mo-moini ga'a manga 'umuru ngara moi re sie balasu silefo manga lomanga.>> 16Ḏua 'a Musa 'o lefo manga lomanga mete'e Ma JOU 'ai demo, ma tero Unanga gena-ge ro parenta ra Musa. 17Nena-ne 'a Lewi 'ai ngowa-ngowa'a nau'u mete'e manga lomanga: 'a Gerson, Kehat re Merari. 18Nena-ne 'a Gerson 'ai ngowa-ngowa'a nau'u mete'e manga rera-rera: 'a Libni re Simei. 19'A Kehat 'ai ngowa-ngowa'a nau'u mete'e manga rera-rera: 'a Amram, Yishar, Hebron, re Uziel. 20'A Merari 'ai ngowa-ngowa'a nau'u mete'e manga rera-rera: 'a Mahli re Musi.
Nena-ne ngowa'a Lewi manga rera-rera mete'e ananga manga ete re dotumu manga ngitu re ngale.
21Ngowa'a Gerson 'ai rera romoḏiḏi, gena-ge rera 'a Libni re rera 'a Simei; gena-ge ngowa'a Gerson 'ai rera-rera.
22Wakutu ngowa'a nau'u mo-moini 'i silefo ga'a manga 'umuru ngara moi re sie, ananga gena-ge manga repe nga cala tumudingi re nga latu romotoa (7.500).
23Ngowa'a Gerson 'ai rera-rera manga suyu'u 'i side'oso sebanga toma Suyu'u 'Ofi-'Ofi ma ḏuḏunu papolo wangere ma soḏu.
24Ngowa'a Gerson 'ai rera manga bi-biri'i, unanga gena-ge 'a Elyasaf, 'a Lael 'ai ngowa'a nau'u.
25Ngowa'a Gerson 'ai ngowa'a nau'u manga tugasa di'a Suyu'u Lo-lomu, gena-ge Suyu'u 'Ofi-'Ofi so'o ne: ananga gena-ge balasu 'aḏi jaga mode-mode'e suyu'u gena-ge, enanga ma da-damunu, re suyu'u gena-ge ma ngalana ma da-daku,
26ḇa'a roata toma soana ga'a 'i sigoloḏi Suyu'u 'Ofi-'Ofi, ma ngalana ma da-daku di'a soana gena-ge re jou-jou tau'u ma ngi'i toma Suyu'u 'Ofi-'Ofi ma ngalana ma da-daku ma biono, re suyu'u gena-ge ma gumi, re ḏi'i enanga ma munara mo-moini ga'a 'i ma'u dowanga i'a re ino.
27Ngowa'a Kehat 'ai rera ananga gena-ge Amram 'ai rera, re 'a Yishar 'ai rera, Hebron 'ai rera re Uziel 'ai rera.
28Ngowa'a nau'u mo-moini ga'a 'i silefo ga'a manga 'umuru ngara moi re sie, ananga gena-ge manga repe nga cala tu'angere re latu rarama (8.600), ananga gena-ge ga'a balasu 'aḏi jaga pakakasa toma Suyu'u 'Ofi-'Ofi.
29Ngowa'a Kehat manga rera-rera manga suyu'u 'i side'oso toma Suyu'u 'Ofi-'Ofi ma ḏuḏunu papolo kore sara.
30Ngowa'a Kehat 'ai rera-rera ma ma bi-biri'i, unanga gena-ge 'a Elisafan, unanga Uziel 'ai ngowa'a nau'u.
31Ngowa'a Kehat 'ai ngowa'a nau'u manga munara di'a Suyu'u 'Ofi-'Ofi ma dara so'o ne: ananga gena-ge balasu 'aḏi jaga burua jaji, meja di'a roti 'ofi-'ofi, lapuru ma ngi'i reo lapuru ma ngai tumudingi,#Sup. 25:37 jou-jou ma ngi'i bae tau'u haiwani bolo dupa, pakakasa mo-moini toma Suyu'u 'Ofi-'Ofi ga'a 'imam-'imam ya pake toma 'orasa 'aḏi siḏagi manga munara, re ḏi'i da-daku di'a siwo-wola i'a Kamara 'Ofi-'Ofi toma Kamara Lai 'Ofi-'Ofi#Sup. 26:31 re ḏi'i enanga ma munara mo-moini ga'a ma'u dowanga i'a re ino.
32Toma ngowa'a Lewi 'ai rera-rera manga bi-biri'i ma sigolona 'age bi-biri'i ma lamo'o gena-ge 'a Eleazar, unanga gena-ge 'imam Harun 'ai ngowa'a nau'u. 'A Eleazar unanga balasu sioḏi'i ananga ga'a 'aḏi de'oso toma suyu'u 'ofi-'ofi.
33'A Merari 'ai rera-rera re Mahli 'ai rera re Musi 'ai rera; ananga gena-ge rera-rera ra Merari ino. 34Ananga mo-moini ga'a silefo na-nau'u ga'a manga 'umuru ngara moi re sie, gena-ge manga repe nga cala rarama re nga latu ḏiḏi (6.200). 35Ngowa'a Merari 'ai rera-rera ma bi-biri'i, 'a Zuriel, unanga gena-ge 'a Abihail 'ai ngowa'a nau'u. Ananga gena-ge 'aḏi side'oso manga suyu'u sebanga Suyu'u 'Ofi-'Ofi papolo kore mie. 36Ngowa'a Merari 'ai ngowa'a nau'u, ananga sanga tugasa di'a 'aḏi so'o ne: ananga balasu jaga Suyu'u 'Ofi-'Ofi ma koseng,#Sup. 26:15-25 re ma sita giḏanga,#Sup. 26:26-29 ma ngasu-ngasu'u,#Sup. 26:32 ma ba-bangini,#Sup. 26:19 re ma pakakasa mo-moini; re ḏi'i enanga mo-moini ma munara ga'a 'i ma'u dowanga i'a re ino, 37re ḏi'i ma ngasu'u ga'a 'i sigoloḏi ma soana rema bangini, ma ḏi'olo re ma gumi.#Sup. 27:9-18
38Ngowa'a manga suyu'u, toma Suyu'u 'Ofi-'Ofi papolo wangere ma la'o, toma Suyu'u Lo-lomu ma biono, gena-ge Musa, re 'a Harun re 'ai ngowa-ngowa'a nau'u. Ananga gena-ge 'aḏi jaga Suyu'u 'Ofi-'Ofi sa'olo munara di'a ngowa'a Israel. Mada'a ngowa'a ma lelegu ga'a ma co-cori Suyu'u Lo-lomu gena-ge, ananga gena-ge balasu sanga hukumu sengene. 39'A Musa re Harun, ananga gena-ge 'aḏi mete'e Ma JOU 'ai parenta re 'aḏi lefo ngowa'a suku Lewi manga lomanga mete'e manga rera. Ngowa'a na-nau'u gena-ge ga'a manga 'umuru ngara moi re sie, gena-ge manga repe nga cala nyagi romoḏiḏi re romoḏiḏi (22.000).
40Gena ḏua Ma JOU 'o kanau ra Musa rema betongo so'o ne: <<Na lefo Israel manga ngowa'a nau'u ma jomolo manga loma-lomanga matengo re matengo ga'a ma 'umuru ngara moi re sie, 41Ḏua no 'oro ngowa'a nau'u ma jomolo gena-ge sa'olo ta-Ngoi; Ngoi nena-ne Ma JOU. ananga gena-ge sa'olo ngowa'a Israel mo-moini manga ngowa'a nau'u ma jomolo ma nga-ngali. Ḏi'i no 'oro ngowa'a Lewi manga haiwani sa'olo ngowa'a Israel manga haiwani piara mo-moini ma ngowa ma jomolo ma nga-ngali.>> 42Dadi Musa 'a lefo ngowa'a Israel manga ngowa'a nau'u ma jomolo ma loma-lomanga mo-moini, ma tero Ma JOU ro parenta unanga. 43Ngowa'a nau'u ma jomolo mo-moini manga lomanga ga'a ya silefo toma boku gena-ge, ga'a manga 'umuru ngara moi re sie gena-ge, ma repe nga cala nyagi romoḏiḏi re romoḏiḏi re latu ḏiḏi re na nyagi tumudingi re nga ḏu'ange (22.273).
44Ḏua Ma JOU 'o kanau moju ra Musa rema betongo so'o ne: 45<<'Oro ngowa'a Lewi sa'olo ngowa'a Israel manga ngowa'a ma jomolo mo-moini ma nga-ngali, re ḏi'i ngowa'a Lewi manga haiwani piara sa'olo ngowa'a Israel manga haiwani piara ma nga-ngali. Ngowa'a Lewi gena-ge balasu 'aḏi dadi ta Ngoi. Ngoi nena-ne Ma JOU. 46Sa'olo du-duusu ma ijana di'a ngowa'a Israel manga ngowa'a nau'u ma jomolo nga latu ḏiḏi nyagi tumudingi re nga ḏu'ange (273). Ananga gena-ge lebe pai'i reo ngowa'a Lewi manga ngowa'a na-nau'u ma jomolo gena-ge ma repe. 47Dadi ngana balasu na sitatapu ma ijana di'a ngowa'a Israel manga ngowa'a nau'u ma jomolo matengo sa'olo syikal romotoa; mete'e syikal ga'a 'i sipake toma Suyu'u 'Ofi-'Ofi, Syikal rimoi gena-ge ma ḏubuso ḏa salaka gram nyagi moi (10 gram salaka) 48Sipula'a ma syikal gena-ge ra Harun re 'ai ngowa-ngowa'a nau'u sa'olo du-duusu ma ijana di'a ngowa'a ma nga-ngali ga'a remanga bai'i gena-ge.>> 49Ḏua Musa 'a 'oro ma du-duusu ma ijana di'a situusu ngowa'a Israel manga ngowa'a nau'u ma jomolo ga'a 'i pai'i reo ngowa'a Lewi manga ngowa'a nau'u ma jomolo ma nga-ngali. 50Toma ngowa'a Israel manga ngowa'a nau'u ma jomolo, unanga ya'u 'oro syikal ma repe cala moi latu ro'ange nyagi rarama re romotoa, (1.365 syikal) mete'e syikal ga'a 'i sipake toma Suyu'u 'Ofi-'Ofi. 51Dadi Musa 'o sipula'a du-duusu ma ijana gena-ge ra Harun re 'ai ngowa-ngowa'a mete'e Ma JOU 'ai parenta, ma tero Ma JOU ro parenta ra Musa.
2025 Indonesian Bible Society (LAI)