Nyo-nyoimi 33
33
Ngowa'a Israel manga ḏo-ḏagi toma daeraha baulaco
33:1-49
1Toma 'orasa 'aḏi supu toma tana'a Mesir mete'e manga sordado ma toropo rimoi re rimoi ga'a Musa rea Harun ya'u sibi-biri'i; nena-ne ngowa'a Israel manga ngi'i-ngi'i ma lomanga ga'a 'aḏi side'oso manga suyu'u. 2'A Musa 'a lefo ananga gena-ge manga ḏo-ḏagi mete'e ma ngi'i rimoi re rimoi ga'a ananga 'aḏi side'oso manga suyu'u ma tero sa'olo Ma JOU 'o parenta. Nena-ne ananga manga ngi'i-ngi'i gena-ge tamanga ḏo-ḏagi:
3ma mulaingi, toma ngara ma mulaingi wangere ma soi nyagi moi re romotoa, gena-ge toma wangere rimoi palisi'i i'a Paskah ma wangere lamo'o togumu i'a,#33:3 Paskah ma wangere lamo'o toma ngara ma mulaingi wangere ma soi nyagi moi re rata ngowa'a Israel 'aḏi tagi sisoi'i tala limau Rameses toma nagara Mesir. Re ananga gena-ge 'aḏi supu kama mojongo ceka'a i'a mai ua re ngowa'a Mesir pa'i 'aḏi tatamo ḇato. 4Toma 'orasa gena-ge ngowa'a Mesir 'aḏi otomo ngowa'a ma jomolo mo-moini ga'a Ma JOU ya'u sisengene ra ananga manga sigolona. Ma JOU ro sihukumu tamanga jou'ongu ma somoara ḏi'i.
5Dadi ngowa'a Israel 'aḏi sisoi'i tala limau Rameses kara 'aḏi side'oso manga suyu'u toma Sukot.
6Ḏua, ananga 'aḏi tagi moju re 'aḏi sisoi'i tala Sukot, kara 'aḏi side'oso manga suyu'u toma Etam toma daeraha baulaco ma 'uḏu.
7Gena ḏua, ananga 'aḏi tagi moju re 'aḏi sisoi'i tala Etam, re 'aḏi maḏibo ḏuḏunu toma limau Pi-Hahirot toma Baal-Zefon ma biono, kara 'aḏi side'oso manga suyu'u talaḏi limau Migdol.
8Ḏua, ananga 'aḏi tagi moju re 'aḏi sisoi'i tala Pi-Hahirot re 'aḏi tagi tola'a Ngoloto Teberau#33:8 Ngoloto Kolili ma golona kara 'aḏi tagi toma daeraha baulaco. Ḏua, ananga 'aḏi tagi ma di'ara wangere ro'ange toma Etam ma daeraha baulaco, kara 'aḏi side'oso manga suyu'u toma ngi'i silomanga Mara.
9Gena ḏua, ananga 'aḏi tagi moju re 'aḏi sisoi'i tala Mara, kara 'aḏi ngadolo toma ngi'i silomanga Elim. 'Age rema ḇanyo ma la'o, enanga ma repe nyagi moi re romoḏiḏi re ate korma ma lese ḏu nyagi tumudingi. Toma ngi'i gena-ge, ananga 'aḏi side'oso manga suyu'u.
10Ḏua, ananga 'aḏi tagi moju, sisoi'i tala Elim, kara 'aḏi side'oso manga suyu'u toma Ngoloto Teberau ma 'uḏu.
11Gena ḏua, ananga 'aḏi tagi moju re 'aḏi sisoi'i tala Ngoloto Teberau re 'aḏi side'oso manga suyu'u toma daeraha baulaco Sin.
12Re ananga 'aḏi tagi moju re 'aḏi sisoi'i tala toma daeraha baulaco Sin, kara 'aḏi side'oso manga suyu'u toma ngi'i ga'a silomanga Dofka.
13Re ananga 'aḏi tagi moju, sisoi'i tala Dofka, kara 'aḏi side'oso manga suyu'u toma ngi'i ga'a silomanga Alus.
14Gena ḏua, ananga 'aḏi tagi moju, 'aḏi sisoi'i tala Alus, kara 'aḏi side'oso manga suyu'u toma ngi'i ga'a silomanga Rafidim. Mada'a toma ngi'i gena-ge kama ḇanyo ua di'a bangsa gena-ge 'aḏi ka'e.
15Re ananga 'aḏi tagi moju re 'aḏi sisoi'i tala Rafidim, kara 'aḏi side'oso manga suyu'u toma daeraha baulaco Sinai.#Sup. 19:2
16Ḏua, ananga 'aḏi tagi moju re 'aḏi sisoi'i tala daeraha baulaco Sinai, kara 'aḏi side'oso manga suyu'u toma ngi'i ga'a silomanga Kibrot-Taawa.#Nyo. 11
17Gena ḏua, ananga 'aḏi tagi moju re 'aḏi sisoi'i tala Kibrot-Taawa, kara 'aḏi side'oso manga suyu'u toma ngi'i ga'a silomanga Hazerot.#Nyo. 11:35
18Re ananga 'aḏi tagi moju re 'aḏi sisoi'i tala Hazerot, kara 'aḏi side'oso manga suyu'u toma ngi'i ga'a silomanga Ritma.
19Ḏua, ananga 'aḏi tagi moju re 'aḏi sisoi'i tala Ritma, kara 'aḏi side'oso manga suyu'u toma ngi'i ga'a silomanga Rimon-Peros.
20Gena ḏua, ananga 'aḏi tagi moju re 'aḏi sisoi'i tala Rimon-Peros, kara 'aḏi side'oso manga suyu'u toma ngi'i ga'a silomanga Libna.
21Re ananga 'aḏi tagi moju re 'aḏi sisoi'i tala Libna, re side'oso manga suyu'u toma ngi'i ga'a silomanga Risa.
22Ḏua, ananga 'aḏi tagi moju re 'aḏi sisoi'i tala Risa, kara 'aḏi side'oso manga suyu'u toma ngi'i ga'a silomanga Kehelata.
23Gena ḏua, ananga 'aḏi tagi moju re 'aḏi sisoi'i tala Kehelata, kara 'aḏi side'oso manga suyu'u toma kie ma silomanga Har-Syafer.
24Re ananga 'aḏi tagi moju re 'aḏi sisoi'i tala Kie Har-Syafer, kara 'aḏi side'oso manga suyu'u toma ngi'i ga'a silomanga Harada.
25Ḏua, ananga 'aḏi tagi moju re 'aḏi sisoi'i tala Harada, kara 'aḏi side'oso manga suyu'u toma ngi'i ga'a silomanga Makhelot.
26Gena ḏua, ananga 'aḏi tagi moju re 'aḏi sisoi'i tala Makhelot, kara 'aḏi side'oso manga suyu'u toma ngi'i ga'a silomanga Tahat.
27Re ananga 'aḏi tagi moju re 'aḏi sisoi'i tala Tahat, kara 'aḏi side'oso manga suyu'u toma ngi'i ga'a silomanga Tarah.
28Ḏua, ananga 'aḏi tagi moju re 'aḏi sisoi'i tala Tarah, kara 'aḏi side'oso manga suyu'u toma ngi'i ga'a silomanga Mitka.
29Gena ḏua, ananga 'aḏi tagi moju re 'aḏi sisoi'i tala Mitka, kara 'aḏi side'oso manga suyu'u toma ngi'i silomanga Hasmona.
30Re ananga 'aḏi tagi moju re 'aḏi sisoi'i re 'aḏi tala Hasmona, kara 'aḏi side'oso manga suyu'u toma ngi'i ga'a silomanga Moserot.
31Ḏua, ananga 'aḏi tagi moju re 'aḏi sisoi'i tala Moserot, kara 'aḏi side'oso manga suyu'u toma ngi'i ga'a silomanga Bene-Yaakan.
32Gena ḏua, ananga 'aḏi tagi moju re 'aḏi sisoi'i tala Bene-Yaakan, kara 'aḏi side'oso manga suyu'u toma ngi'i silomanga ma Hor-Gidgad.
33Re ananga 'aḏi tagi moju re 'aḏi sisoi'i tala Hor-Gidgad, kara 'aḏi side'oso manga suyu'u toma ngi'i ga'a silomanga Yotbata.
34Re ananga 'aḏi tagi moju 'aḏi sisoi'i tala Yotbata, kara 'aḏi side'oso manga suyu'u toma ngi'i silomanga Abrona.
35Gena ḏua, ananga 'aḏi tagi moju re 'aḏi sisoi'i tala Abrona, kara 'aḏi side'oso manga suyu'u toma ngi'i ga'a silomanga Ezion-Geber.
36Ḏua, ananga 'aḏi tagi sisoi'i tala Ezion-Geber, kara 'aḏi side'oso manga suyu'u toma daeraha baulaco Sin, gena-ge Kadesh.
37Gena ḏua, ananga 'aḏi tagi moju re 'aḏi sisoi'i tala Kadesh, kara 'aḏi side'oso manga suyu'u toma Kie Hor, ma'u bati toma Edom ma tana'a.
38Toma 'orasa gena-ge utu gena-ge 'imam Harun 'o pere toma Kie Hor mete'e Ma JOU 'ai parenta, toma ngi'i gena-ge unanga 'o sengene toma wangere ma mulaingi, ngara ma soi romotoa re musungu ma soi nyagi rata ngowa'a Israel raḏi supu toma tana'a Mesir palisi'i i'a. 39Toma 'orasa unanga 'o sengene toma Kie Hor, 'a Harun 'ai 'umuru musungu latu moi nyagi romoḏiḏi ro'ange (123).
40Toma 'orasa gena-ge, daeraha Arad manga 'olana, unanga gena-ge ngowa'a Kanaan ga'a tegoro toma tana'a Negeb toma tana'a Kanaan, unanga 'o 'isene habari mangale ngowa'a Israel 'aḏi sapolo co-cori.#Nyo. 21:1
41Re ananga 'aḏi tagi moju re 'aḏi sisoi'i tala Kie Hor, kara 'aḏi side'oso manga suyu'u toma ngi'i ga'a silomanga Zalmona.
42Ḏua, ananga 'aḏi tagi moju re 'aḏi sisoi'i tala Zalmona, kara 'aḏi side'oso manga suyu'u toma ngi'i silomanga ma Funon.
43Gena ḏua, ananga 'aḏi tagi moju re 'aḏi sisoi'i tala Funon, kara 'aḏi side'oso manga suyu'u toma ngi'i silomanga ma Obot.#Nyo. 21:10
44Re ananga 'aḏi tagi moju re 'aḏi sisoi'i tala Obot, kara 'aḏi side'oso manga suyu'u toma ngi'i co-cori dounu maḏi Abarim #Nyo. 21:11 toma daeraha Moab ma bati.
45Ḏua, ananga 'aḏi tagi moju re 'aḏi sisoi'i tala dounu maḏi gena-ge, kara 'aḏi side'oso manga suyu'u toma limau Dibon-Gad.#Nyo. 32:34
46Gena ḏua, ananga 'aḏi tagi moju re 'aḏi sisoi'i tala limau Dibon-Gad, kara 'aḏi side'oso manga suyu'u toma ngi'i ga'a silomanga Almon-Diblataim.
47Re ananga 'aḏi tagi moju re 'aḏi sisoi'i tala Almon-Diblataim, kara 'aḏi side'oso manga suyu'u toma kie-kie Abarim talaḏi toma Kie Nebo.
48Ḏua, ananga 'aḏi tagi moju re 'aḏi sisoi'i tala kie-kie Abarim, kara 'aḏi side'oso manga suyu'u toma Moab ma tana'a rata toma Ḇanyo Yordan ma kaci moi papolo wangere ma la'o, talaḏi toma Limau Yerikho ga'a toma ḇanyo gena-ge ma kaci moi papolo wangere soḏu.
49Ananga 'aḏi side'oso manga suyu'u toma Ḇanyo Yordan ma 'uḏu, mulai toma Bet-Yesimot singadolo toma Abel-Sitim#33:49 Picaru Sitim toma Moab ma tana'a rata.
Dusu'u ngowa'a Kanaan tamanga daeraha
33:50-56
50Ma JOU 'o kanau ra Musa toma Moab ma tana'a rata, toma ḇanyo Yordan ma 'uḏu, talaḏi toma Limau Yerikho ga'a toma ḇanyo gena-ge ma kaci moi papolo wangere soḏu so'o ne: 51<<Siajele toma ngowa'a Israel re kanau ra ananga rema betongo so'o ne: <Toma 'orasa ngini ni iwanga i'a Ḇanyo Yordan re tagi toma tana'a Kanaan, 52ngini balasu ni dusu'u tana'a ma manusia gena-ge re siwejere manga ngasu'u maḏi 'ukiri mo-moini; re ḏi'i ngini singi-ngiranga manga dulada ga'a si'a'a reo ḇesi re singi-ngiranga manga jou-jou ma ngi'i mo-moini toma sau-sau di'a silamo'o re siḏubuso jou'ongu ma somoara. 53Ngini balasu ni ḏegoro re tegoro toma ngi'i gena-ge, sababu ra ngini ḇato Ngoi to pula'a daeraha gena-ge di'a na ḏegoro. 54Dadi ngini balasu ni sibalangu daeraha gena-ge reo loterei mete'e ninga rera rimoi re rimoi, re daeraha gena-ge 'i dadi ninga warisi. Toma rera ga'a ngowa'a laḏi repe, ngana balasu no pula'a manga tana'a lai lamo'o sa'olo manga warisi. Toma rera ga'a ngowa'a ma repe ua, ngana balasu no pula'a manga tana'a ceka'a ua ḇato sa'olo manga warisi. Mete'e loterei enanga ma eta'a toma rera matengo re matengo, re sibalangu manga warisi mete'e manga ete re dotumu manga suku. 55Mada'a na'o ngini ni dusu'u ua tana'a ma manusia gena-ge, dadi ngowa'a ga'a ngini na'u sieanga i'a tegoro moju, ananga ḏuanga i'a 'aḏi dadi ma tero sa'olo ninga la'o ma pilo'o re ma tero sa'olo jiono taninga lese ma dara. Rema duhu so'o gena-ge, ananga ḏuanga i'a 'aḏi 'a'a rusu toma daeraha ga'a ngini na ḏegoro gena-ge. 56Re Ngoi, Ma JOU ḏuanga i'a ta si'a'a ra ngini ma tero 'oru ga'a Ngoi reta sitantukanga si'a'a ra ananga.> >>
2025 Indonesian Bible Society (LAI)