Nyo-nyoimi 34
34
Tana'a Kana'an ma bati-bati
34:1-15
1Ma JOU 'o kanau ra Musa rema betongo so'o ne: 2<<Pula'a parenta nena-ne toma ngowa'a Israel so'o ne: Toma 'orasa ngini ni osama toma tana'a Kanaan, daeraha gena-ge ga'a 'i dadi ngini ninga warisi, tana'a ngowa'a Kanaan manga tana'a mete'e enanga ma bati-bati so'o ne: 3bati toma kore sara#34:3 bati gena-ge suku Yuda ma bati ma papolo kore sara gena-ge 'i mulaingi toma daeraha baulaco Zin#34:3 daeraha baulaco Zin gena-ge toma daeraha Negeb mete'e daeraha Edom ma bati papolo wangere ma soḏu. Re bati gena-ge papolo wangere ma la'o 'i mulaingi toma Ngoloto G̱asi#34:3 ma tero Ngoloto Sengene ma 'uḏu papolo kore sara. 4Ḏua ma bati enanga 'i seko toma papolo kore sara re palisi'i Kie Abiram ma ngo'omo papolo kore sara re ngadolo daeraha baulaco Zin re ma bati gena-ge 'i togumu toma Limau Kadesh-Barnea papolo kore sara. Gena ḏua enanga 'i ngadolo toma Limau Hazar-Adar, kara ngadolo toma Limau Azmon. 5Gena ḏua, bati gena-ge 'i seko toma Limau Azmon ino, kara toma ngaru toma Mesir ma bati re 'i togumu toma Ngoloto Golona.
6Ma bati papolo wangere ma soḏu gena-ge Ngoloto Golona ma 'uḏu.
7Nena-ne ninga bati toma papolo kore mie: mulaingi toma Ngoloto Golona, ngini balasu ni 'a'a bati ma nana'o taji toma Kie Hor.#34:7 Kie Hor ma lelegu reo Kie Hor toma Nyo. 33:37 8Toma Kie Hor gena-ge, ngini balasu ni 'a'a bati ma nana'o toma ngo'omo taji Limau Hamat, kara bati gena-ge ngadolo toma ngi'i ga'a silomanga Zedad. 9Gena ḏua, ma bati gena-ge ngadolo toma ngi'i ga'a silomanga Zifron re 'i togumu toma ngi'i ga'a silomanga Hazar-Enan. Enanga gena-ge ninga bati toma kore mie.
10Ninga bati papolo wangere ma la'o, ngini balasu ni 'a'a bati ma nana'o toma Hazar-Enan kara taji ma ngi'i ga'a silomanga Sefam. 11Toma Sefam, bati gena-ge 'i 'uci papolo kore sara toma ngi'i ga'a silomanga Ribla ga'a toma Ain papolo wangere ma la'o. Gena ḏua, ma bati gena-ge 'i 'uci moju singadolo Talaga Kineret#34:11 Toma 'orasa 'a Yesus 'o 'ahu gena-ge 'i silomanga Talaga Galilea ma bawata papolo wangere ma la'o. 12Ḏua bati gena-ge 'i 'uci moju mete'e Ḇanyo Yordan re 'i togumu toma Ngoloto G̱asi. Gena-ge ngini ninga daeraha mete'e bati-bati ma sigoloḏi.>>
13Ḏua, 'a Musa 'o parenta ngowa'a Israel so'o ne:<<Gena-ge daeraha ga'a ḏuanga i'a ngini na sibalangu reo loterei sa'olo ninga warisi. Ma JOU 'o parenta daeraha gena-ge 'i sipula'a toma suku siworo rema jule. 14Gena-ge 'i dadi sababu suku Ruben mete'e ananga manga ete re dotumu ma ngitu re ngale re suku Gad mete'e ananga manga ete re dotumu ma ngitu re ngale, ananga raḏi sanga manga warisi; re ḏi'i suku Manasye ma jule raḏi sanga manga balangu. 15Suku romoḏiḏi rema jule gena-ge raḏi sanga manga tana'a ma balangu sa'olo manga warisi toma ḇanyo Yordan kaci moi papolo wangere ma la'o talaḏi toma Limau Yerikho ga'a toma ḇanyo gena-ge ma kaci moi papolo wangere soḏu.>>
Suku rimoi re rimoi ma bi-biri'i ma tugasa di'a sibalangu tana'a Kanaan
34:16-29
16Ma JOU 'o kanau ra Musa rema betongo so'o ne: 17<<Nena-ne lomanga ngowa-ngowa'a ga'a balasu ni sibalangu tana'a gena-ge ra ngini di'a ninga warisi: 'Imam Eleazar re 'a Yosua, unanga gena-ge 'a Nun 'ai ngowa'a nau'u. 18Re ḏi'i ngini balasu ni cumutu ma bi-biri'i toma suku rimoi re rimoi di'a 'aḏi riono 'Imam Eleazar re 'a Yosua, ananga nga muḏiḏi 'aḏi sibalangu tana'a gena-ge di'a ninga warisi.
19Ma bi-biri'i gena-ge manga lomanga nena-ne:
toma suku Yehuda ino, 'a Kaleb, unanga gena-ge 'a Yefune 'ai ngowa'a nau'u;
20re ma bi-biri'i matengo toma suku Simeon ino: 'a Samuel,#34:20 Samuel ma ngale: << Unanga Ma Jou'ongu Madutu 'u 'isene>> unanga gena-ge 'a Amihud 'ai ngowa'a nau'u;
21re ma bi-biri'i matengo toma suku Benyamin ino: 'a Elidad,#34:21 'a Elidad ma ngale: <<Ma Jou'ongu Madutu 'o dadalara>> unanga gena-ge 'a Kislon 'ai ngowa'a nau'u;
22re ma bi-biri'i matengo toma suku Dan ino: 'a Bukki, unanga gena-ge 'a Yogli 'ai ngowa'a nau'u;
23ra Yusuf 'ai ngowa-ngowa'a nau'u, ma bi-biri'i matengo gena-ge toma suku Manasye ino: 'a Haniel,#34:23 'a Haniel ma ngale: <<Ma Jou'ongu Madutu 'ai mura re dadalara>> unanga gena-ge 'a Efod 'ai ngowa'a nau'u;
24re ma bi-biri'i matengo toma suku Efraim ino: 'a Kemuel,#34:24 'a Kemuel ma ngale: <<Unanga Ma Jou'ongu Madutu 'u sitede>> unanga gena-ge 'a Siftan 'ai ngowa'a nau'u;
25re ma bi-biri'i matengo toma suku Zebulon ino: 'a Elisafan,#34:25 'a Elisafan ma ngale: <<Ma Jou'ongu Madutu 'o sisaolo>> unanga gena-ge 'a Parna 'ai ngowa'a nau'u;
26re ma bi-biri'i matengo toma suku Isakhar ino: 'a Paltiel,#34:26 'a Paltiel ma ngale:<<Ma Jou'ongu Madutu 'o sibebasa>> unanga gena-ge 'a Azan 'ai ngowa'a nau'u;
27re ma bi-biri'i matengo toma suku Asyer ino: 'a Ahihud, unanga gena-ge 'a Selomi 'ai ngowa'a nau'u;
28re ma bi-biri'i matengo toma suku Naftali ino: 'a Pedael,#34:28 'a Pedael ma ngale: <<Ma Jou'ongu Madutu 'o tuusu>> unanga gena-ge 'a Amihud 'ai ngowa'a nau'u.>>
29Gena-ge ngowa-ngowa'a ga'a Ma JOU 'o parenta di'a sibalangu tana'a warisi toma Kanaan di'a ngowa'a Israel.>>
2025 Indonesian Bible Society (LAI)