Nyo-nyoimi 32
32
Ngowa'a suku Ruben re Gad, ananga 'aḏi ḏegoro toma ḇanyo Yordan ma wangere ma la'o
32:1-42
1Ngowa'a suku Ruben re Gad ananga gena-ge manga haiwani piara lai repe madutu. Wakutu ananga 'aḏi oḏi'i daeraha co-cori limau Yaezer re daeraha Gilead, daeraha gena-ge lai rousu di'a manga haiwani piara. 2Ḏua ngowa'a suku Gad re suku Ruben, ananga gena-ge manga bi-biri'i 'aḏi sapolo re 'aḏi kanau ra Musa re 'imam Eleazar re toma ngowa'a Israel manga toropo ma bi-biri'i gena-ge: 3<<Daeraha co-cori toma limau Atarot, Dibon, Yaezer, Nimra, Hesybon, Eleale, Sebam, Nebo re Beon, 4daeraha gena-ge ga'a Ma JOU ro sita'aloko di'a ngowa'a Israel ma toropo, gena-ge daeraha rimoi ga'a lai rousu di'a haiwani piara re 'ani falalomu-falalomu nena-ne remanga haiwani gena-ge lai repe.>> 5Re 'aḏi kanau ḏi'i:<< Na'o ngana no sijumu mura re dadalara ra ngomi, awa no gasa ngomi tagi toma ḇanyo Yordan ma kaci moi, mada'a ma daeraha nena-ne no pula'a tani falalomu, la daeraha gena-ge 'i dadi minga warisi.>> 6Mada'a 'a Musa 'a sangoro toma suku Gad re suku Ruben so'o ne: <<Sanga ua, ngoi to simaha ngini nyengara 'aḏi tego-tegoro rema 'amana 'ane toma 'orasa ninga ioronongoḏu 'aḏi tagi parangi! 7Na'o ngini ni tego-tegoro 'ane, tantu ḏua ngini ni 'a'a ngowa'a Israel manga 'akala re sinyingara wawaḏu di'a 'aḏi si'a toma daeraha ga'a Ma JOU ro pula'a di'a ananga! 8So'o gena ḏi'iwakutu ngoi to 'utusu ninga ete re dotumu, ananga 'aḏi tagi da'a Kadesh-Barnea ino di'a tutumu daeraha gena-ge.#Nyo. 13:1-29 9Ananga gena-ge 'aḏi tagi singadolo toma Picaru Eskol re 'aḏi disa waro ma daeraha gena-ge. Wakutu maḏibo, ananga 'aḏi si'a'a ngowa'a Israel manga 'akala re sinyingara wawaḏu, singadolo ananga 'aḏi oḏu'u tagi osama toma daeraha ga'a Ma JOU ro pula'a di'a ananga. 10Dadi toma wangere ma tero gena-ge, Ma JOU 'Ai duruta ga'a ma tero sa'olo u'u, enanga 'i leja-lejanga singadolo Unanga 'o 'a'a jaji rema sasi rema betongo so'o ne: 11<Mode-mode'e ngowa-ngowa'a ga'a supu da'a Mesir ino, ga'a manga 'umuru musungu nyagi romoḏiḏi re sie, ananga 'aḏi osama ua tana'a ga'a Ngoi ta 'a'a jaji rema sasi ra Abraham, Isak re Yakub, ma sababu ananga 'aḏi 'isene re mete'e Ngoi ua remanga 'akala re sinyingara mode-mode'e,#Nyo. 14:22-23 12pa'i 'a Kaleb, unanga 'a Yefune 'ai ngowa'a nau'u ra Kenas 'ai rera re ḏi'i 'a Yosua, unanga 'a Nun 'ai ngowa'a nau'u. Ma sababu ananga nga muḏiḏi 'aḏi 'isene re mete'e Ma JOU remanga 'akala re sinyingara mode-mode'e.> 13Dadi Ma JOU 'Ai duruta ga'a ma tero sa'olo u'u, enanga 'i leja-lejanga toma ngowa'a Israel lelegu, singadolo Unanga 'o si'a'a ananga 'aḏi malinga-linga toma daeraha baulaco ma di'ara musungu nyagi rata ma dara, singadolo ngowa'a ga'a 'aḏi 'a'a cira ra Ma JOU 'ai momina, ananga manga nani 'i cua ḏua. 14Re nange-ne, ngini ḏi'i ni lawana ma tero ninga ete re dotumu, ngini ḏi'i osama nyo-nyoimi ngowa'a baraḏosa ma toropo su-sungi ga'a 'aḏi si'a'a Ma JOU 'ai duruta ga'a 'i leja-lejanga 'i ganapu siḏi toma ngowa'a Israel gena-ge! 15Na'o ngowa'a Ruben re Gad, ngini ni celolo ḏuḏunu re ni mete'e Unanga riwara, lebe ti'ara i'a moju Unanga 'o sieanga i'a ngowa'a Israel mo-moini toma daeraha baulaco. Re ma sababu ngini, bangsa mo-moini nena-ne ḏuanga i'a 'aḏi sanga singiranga.>> 16Ḏua, suku romoḏiḏi gena-ge manga bi-biri'i, ananga 'aḏi sapolo ra Musa re 'aḏi kanau rema betongo so'o ne: <<Ngomi ḏuanga i'a ni 'a'a minga 'abingi re doba ma karunga toma ngi'i nena-ne re side'oso limau-limau moju rema ge-gelo di'a minga ngitu re ngale, 17mada'a ngomi masiretene remi ḏu-ḏuanga ḏua re mau mi tagi siḏa-siḏa toma ngowa'a Israel manga biono, singadolo ngomi nyengara mi gasa ananga tamanga ngi'i. Toma 'orasa gena-ge, minga ngitu re ngale, ananga 'aḏi tegoro moju toma limau-limau ga'a rema ge-gelo di'a sisaolo ananga gena-ge toma daeraha nena-ne ma manusia. 18Ngomi mi maḏibo ua taminga wala, singadolo ngowa'a Israel matengo re matengo 'aḏi sanga manga warisi; 19Sababu ngomi mi oḏu'u dawongo minga warisi toma Ḇanyo Yordan papolo wangere ma soḏu da'a kaci moi ga'a lebe kiḏanga moju, ma sababu ngomi remi sanga warisi 'ane toma Ḇanyo Yordan papolo wangere ma la'o.>> 20Gena ḏua, 'a Musa 'o kanau ra ananga rema betongo so'o ne: <<Na'o ngini ni 'a'a so'o gena-ge, na'o ngini reni madodahe ninga diri di'a parangi ra Ma JOU 'ai momina, 21re ngini matengo re matengo ni ḏu-ḏuanga ḏua di'a parangi kara iwanga Ḇanyo Yordan mete'e Ma JOU 'ai mau, singadolo Unanga 'o dusu'u ninga lawa-lawana ra Unanga 'ai momina, 22re daeraha nena-ne 'i dadi Ma JOU 'a kuasa. Gena ḏua, ngini nyengara ni madibo 'ane sababu ngini ḏuanga i'a ni sitotomo ninga tugasa ḏua di'a Ma JOU re toma ngowa'a Israel. Ḏua daeraha nena-ne ḏuanga i'a 'i dadi ninga warisi ra Ma JOU 'ai momina. 23Mada'a na'o ngini ni 'a'a so'o gena-ge ua, ngini reni 'a'a ḏosa ra Ma JOU re tantu ḏua ngini ḏuanga i'a ni nga'unu ninga ḏosa gena-ge ma hukumana. 24Dadi, tagi di'a side'oso limau-limau moju rema ge-gelo di'a ninga ngitu re ngale re 'a'a ninga 'abingi re doba ma karunga. Mada'a ngini balasu ni siḏagi mete'e ninga jaji.>>
25Dadi suku Gad re suku Ruben, ngowa'a gena-ge 'aḏi kanau ra Musa: <<Tuanga, ngini 'ani falalomu-falalomu nena-ne 'aḏi si'a'a mete'e minga tuanga 'ai parenta. 26Minga ngowa-ngowa'a re were'a-were'a, minga haiwani piara mo-moini tegoro moju 'ane toma limau-limau toma daeraha Gilead, 27toma 'orasa 'ani falalomu-falalomu 'aḏi iwanga i'a Ḇanyo Yordan di'a mete'e Ma JOU 'ai mau. Matengo re matengo ḏu-ḏuanga ḏua di'a 'aḏi parangi, mete'e minga tuanga 'ani pareta.>>
28Dadi, 'a Musa 'o parenta mangale ananga gena-ge ra 'imam Eleazar re 'a Yosua, unanga 'a Nun 'ai ngowa'a nau'u, re toma ete re dotumu manga ngitu re ngale ma sae'e toma ngowa'a Israel manga suku-suku ma sigolona. 29Re 'a Musa 'o kanau ra ananga gena-ge mo-moini rema betongo so'o ne: <<Na'o ngowa'a suku Gad re Ruben ḏuanga i'a 'aḏi iwanga i'a Ḇanyo Yordan, re mo-moini gena-ge 'aḏi ḏu-ḏuanga ḏua di'a ma'u parangi mamete'e ngini re mete'e Ma JOU 'ai mau, re na'o daeraha gena-ge ngini na kuasa, ḏua ngini ḏuanga i'a ni sipula'a tana'a Gilead ra ananga sa'olo manga warisi. 30Mada'a na'o ananga 'aḏi ḏuanga nyangu di'a parangi re 'aḏi iwanga ua mamete'e ngini, ananga balasu dawongo manga tana'a warisi ra ngini ninga sigolona toma tana'a Kanaan.>> 31Ḏua ngowa'a suku Gad re suku Ruben gena-ge 'aḏi sangoro:<<Tuanga, 'oru ga'a Ma JOU 'o kanau tani falalomu-falalomu nena-ne, ngomi ḏuanga i'a ma siḏagi. 32Tantu ḏua, ngomi masiretene ḏuanga i'a mi iwanga Ḇanyo Yordan re mi ḏu-ḏuanga ḏua di'a parangi mete'e Ma JOU 'ai mau toma tana'a Kanaan. Mada'a ngomi minga warisi ma tana'a 'i tatapu toma ḇanyo Yordan ma kaci moi, papolo wangere ma soḏu.>>
33Gena ḏua, 'a Musa 'o pula'a 'olana Sihon 'ai pareta, ngowa'a Amori manga 'olana, re 'olana Og 'ai pareta, 'olana toma Basan, gena-ge ananga manga daeraha re manga limau-limau toma daeraha gena-ge mo-moini, re limau-limau gena-ge ma daeraha toma ngowa'a suku Gad, ngowa'a suku Ruben re ngowa'a suku Manasye ma jule 'a Yusuf 'ai ngowa'a nau'u. 34Dadi ngowa'a suku Gad 'aḏi simomi'i moju limau-limau Dibon, Atarot, Aroer, 35Atarot-Sofan, Yaezer, Yogbeha, 36Bet-Nimra, Bet-Haran, limau tu'angere gena-ge 'i simomi'i rema ge-gelo re 'aḏi 'a'a ma ngi'i di'a 'abingi re doba duo-duo ma karunga. 37Re ngowa'a suku Ruben, ananga gena-ge 'aḏi simomi'i moju limau-limau Hesybon, Eleale, Kiryataim, 38Sibma, re ḏi'i limau ma lomanga ga'a ma siḏa Nebo re Baal-Meon. Ananga ya singali limau mo-moini gena-ge ma lomanga ga'a ananga ya simomi'i moju.
39Manasye 'ai ngowa'a nau'u, gena-ge 'a Makhir, unanga 'ai rera ma ngowa-ngowa'a nau'u, ananga gena-ge 'aḏi tagi toma daeraha Gilead re 'aḏi dusu'u ngowa'a Amori ga'a 'aḏi tegoro da'a. 40Dadi, 'a Musa 'o pula'a daeraha Gilead sa'olo warisi di'a Makhir 'ai rera, unanga gena-ge 'a Manasye 'ai ngowa'a nau'u re ananga 'aḏi tegoro da'a. 41Ngowa'a Yair, ananga gena-ge rera rimoi toma suku Manasye ino, ananga gena-ge 'aḏi tagi re rabasa gamu muḏuo i'a#32:41 Ḏa gamu toma daeraha Gilead bolo Amori re 'aḏi silomanga gamu mo-moini gena-ge <<Yair 'ai gamu-gamu>>,#32:41 toma demo 'Ibrani: Hawot-Yair 42'a Nobah, unanga ngowa'a nau'u lelegu toma suku Manasye ino, unanga 'o tagi rabasa limau Kenat rema limau-limau ma ngowa ga'a 'i sigoloḏi re 'a singali lomanga Kenat reo Nobah, enanga gena-ge mete'e 'ai lomanga masiretene.
2025 Indonesian Bible Society (LAI)