Nyo-nyoimi 31
31
Ngowa'a Midian sanga hukumu sababu manga ga'a ma jira
31:1-24
1Ma JOU 'o kanau ra Musa rema betongo so'o ne: 2<<Ngana balasu no sihukumu ngowa'a Midian sababu manga ga'a ma jira toma ngowa'a Israel. Gena ḏua, ngana ḏuanga i'a no sengene re siotomo ma tero sa'olo 'ani ngimo-ngimono ga'a raḏi sengene siḏa.>> 3Dadi, 'a Musa 'o kanau toma ngowa'a Israel so'o ne: << Cumutu ngowa-ngowa'a muḏuo i'a taninga sigolona di'a madodahe manga diri di'a tagi parangi talaḏi ngowa'a Midian, la ananga gena-ge 'aḏi siḏagi Ma JOU 'ai hukumu ra ananga. 4Toma Israel manga suku rimoi re rimoi balasu 'utusu ngowa'a nga cala moi di'a tagi parangi.>> 5Dadi ngowa'a nga cala moi toma suku rimoi re rimoi 'aḏi sanga cumutu toma ngowa'a Israel remanga cala-cala tamanga sigolona. Mo-moini gena-ge ma repe ngowa'a nga cala nyagi moi re romoḏiḏi (12.000), ananga gena-ge 'aḏi ḏu-ḏuanga ḏua di'a tagi parangi. 6Ḏua ngowa'a nga cala moi toma suku rimoi re rimoi, 'a Musa ya'u 'utusu ananga 'aḏi tagi parangi. Ananga gena-ge 'aḏi tagi mamete'e ra Pinehas, unanga gena-ge 'imam Eleazar 'ai ngowa'a nau'u. Unanga gena-ge 'ai tugas di'a ma pakakasa toma ngi'i 'ofi-'ofi re terompet-terompet di'a pula'a nana'o ma parangi. 7Ḏua ananga 'aḏi parangi lawana ngowa'a Midian, ma tero Ma JOU ro parenta ra Musa, re ananga 'aḏi sisengene sordado Midian manga na-nau'u mo-moini. 8Re 'age 'ola-'olana Midian, nga mutoara toma ngowa-ngowa'a ga'a raḏi sisengene manga sigolona, ananga gena-ge: 'a Ewi, Rekem, Zur, Hur re Reba. Re ananga 'aḏi sisengene ḏi'i 'a Bileam, unanga 'a Beor 'ai ngowa'a nau'u. 9Gena ḏua, sordado Israel 'aḏi tawana ngowa'a Midian manga we-were'a re manga ngowa-ngowa 'olo ce-ceka'a. Re ḏi'i manga haiwani piara mo-moini, re manga 'ori i'a rana mo-moini ananga ya 'oro simoini. 10Mada'a ngowa'a Midian manga limau mo-moini re ḏi'i manga suyu-suyu'u, sordado Israel ya tau'u. 11Gena ḏua, ananga 'aḏi 'oro 'ori i'a mo-moini ya rabasa toma ngowa'a Midian: bae manusia bolo haiwani gena-ge. 12Gena ḏua, ngowa-ngowa'a dawana, re manga 'ori i'a rana ga'a ya rabasa, mo-moini gena-ge sordado Israel ya gasa ra Musa re 'imam Eleazar re toma ngowa'a Israel manga toropo mo-moini, tamanga suyu'u ma ngi'i toma Moab ma tana'a rata. Ananga gena-ge 'age toma ḇanyo Yordan ma kaci moi papolo wangere ma la'o, talaḏi toma Limau Yerikho ga'a toma ḇanyo gena-ge ma kaci moi papolo wangere soḏu.
13Ḏua, 'a Musa re 'imam Eleazar re ngowa'a Israel manga toropo ma bi-biri'i mo-moini 'aḏi tagi supu toma suyu'u ma ḏuḏunu di'a ma'u sanga ananga. 14Re 'a Musa 'o ruta toma sordado ma bi-biri'i mo-moini: gena-ge sordado ma sae'e mo-moini ga'a sibi-biri'i sordado nga cala moi, sordado ma sae'e mo-moini ga'a sibi-biri'i sordado nga latu moi, ananga manga sae'e, ananga gena-ge ga'a 'aro ḏibo toma parangi, 15re 'a Musa 'o ḇangata ananga so'o ne: <<Sanga ua, ngini ni simaha manga we-were'a mo-moini 'aḏi 'ahu!>> 16'Elingi, we-were'a mo-moini nena-ne ga'a mete'e duga re domolo ra Bileam, re 'aḏi baja ngowa'a Israel, la 'aḏi soloto Ma JOU sababu 'oru 'i dadi toma Peor, singadolo ma bahala 'i 'uci tala ra Ma JOU 'ai 'umata manga sigolona. #31:16 Nyo. 25:1-9 17Sababu gena-ge, nange-ne ni sisengene manga ngowa 'olo ce-ceka'a ma nau'u mo-moini, re ḏi'i we-were'a ga'a 'aḏi waro nau'u ḏua, ngini balasu na'u sisengene. 18Mada'a mosolese ga'a 'aḏi waro nau'u nyangu, ngini balasu simaha 'aḏi 'ahu di'a ta ngini. 19Mada'a ngini nena-ne ni tegoro moju toma suyu'u ma daeraha ma ḏuḏunu ma di'ara wangere tumudingi. 'A guna ḇato ga'a ro sisengene ngowa'a bolo 'a guna ḇato ga'a ro cigi mayeti, ananga gena-ge balasu 'aḏi sigofi manga diri toma wangere ma soi ro'ange re toma wangere ma soi tumudingi, re ngowa-ngowa'a were'a ga'a 'aḏi dadi ninga dawana ḏi'i. 20Re ḏi'i ninga pakeanga re ninga 'ori i'a rana ga'a si'a'a reo haiwani ma eno'o re si'a'a reo 'abingi ma gogo bolo ga'a si'a'a reo ate, ngini balasu na sigofi.>>
21Gena ḏua, 'imam Eleazar 'o kanau toma sordado mo-moini, ananga gena-ge ga'a raḏi tagi parangi rema betongo so'o ne: << 'Atoranga ga'a Ma JOU ro parenta ra Musa, gena-ge: 22pa'i guraci re salaka, tamḇaga, ḇesi, tima buḏo, re tima kotu'u: 23'oru ḇato ga'a nyengara tahana u'u, ngini balasu na sigofi toma u'u ma dara kara mo-moini gena-ge ḏi'i balasu 'i sigofi reo ḇanyo ga'a 'i sipake di'a sigofi diri,#Nyo. 19:9, 13, 20, 21 la 'i dadi 'ofi ra Ma JOU 'ai momina. Mada'a mo-moini ga'a tahana u'u ua, ngini balasu na sigofi reo ḇanyo gena-ge, la 'i dadi 'ofi ra Ma JOU 'ai momina. 24Re toma wangere ma soi tumudingi ngini balasu ni 'uju ninga baju, la ngini ni dadi 'ofi ra Ma JOU 'ai momina. Re gena ḏua, ngini nyengara ni osama toma suyu'u ma daeraha.>>
Mangale 'ori i'a ra-rabasa
31:25-54
25Ma JOU 'o kanau ra Musa rema betongo so'o ne: 26<<Ngana nena-ne mamete'e 'imam Eleazar re ete re dotumu manga ngitu re ngale ma sae'e toma ngowa'a Israel manga toropo, ngini balasu ni roimi 'ori i'a rana ga'a ngini 'oro taninga lawana re gasa ino: bae ngowa'a Midian manga mosolese bolo haiwani. 27Gena ḏua, ngini gena-ge balasu ni 'a'a balangu ḏiḏi te-tero 'ori i'a rana gena-ge: balangu moi di'a sordado ga'a tagi parangi, re balangu moi di'a ngowa'a Israel manga toropo mo-moini ga'a 'aḏi tagi parangi ua. 28Ngana balasu no 'oro bu-bula'a toma sordado ga'a 'aḏi tagi parangi, di'a Ngoi Ma JOU. Bu-bula'a gena-ge: rimoi toma latu romotoa ma dara, bae toma ngowa'a bae toma sapi ma nau'u, keledai bolo toma 'abingi re doba. 29Ngana balasu ni 'oro bu-bula'a gena-ge toma sordado manga balangu ma jule toma 'ori rana mo-moini ga'a ananga ya sanga. Gena ḏua, ngana na pula'a gena-ge ra 'imam Eleazar, sa'olo jou-jou ga'a 'i siwola i'a di'a Ma JOU. 30Mada'a toma ngowa'a Israel manga balangu ma jule, ngana balasu na 'oro ḏi'i rimoi toma nyagi romotoa ma dara: bae toma ngowa'a Midian, bae toma sapi ma nau'u, toma keledai re toma 'abingi re doba re toma haiwani ma lelegu mo-moini ḏi'i. Gena ḏua unanga 'a sipula'a mo-moini toma ngowa'a Lewi ga'a 'aḏi siḏagi munara di'a Ma JOU 'ai Suyu'u 'Ofi-'Ofi.>> 31Gena ḏua, 'a Musa re 'imam Eleazar 'aḏi siḏagi ma tero Ma JOU ro parenta ra Musa.
32Manga 'ori i'a ra-rabasa ga'a sordado ya 'oro 'age ma repe so'o ne: 'abingi re doba ma repe cala latu rarama re cala nyagi tumudingi romotoa (675.000) 33re sapi ma repe: cala nyagi tumudingi romoḏiḏi (72.000), 34re keledai: cala nyagi rarama rimoi (61.000), 35re we-were'a mosolese, ananga gena-ge ga'a waro nau'u nyangu, mo-moini ma repe nga cala nyagi ro'ange romoḏiḏi (32.000). 36Balangu ma jule di'a sordado ga'a tagi parangi, enanga gena-ge 'abingi re doba ma repe cala latu ro'ange nyagi ro'ange tumudingi re latu romotoa (337.500), 37'abingi re doba gena-ge ga'a 'i dadi bu-bula'a di'a Ma JOU, enanga ma repe: latu rarama nyagi tumudingi romotoa (675), 38sapi ma repe: cala nyagi ro'ange rarama (36.000) re bu-bula'a di'a Ma JOU, enanga ma repe: nyagi tumudingi romoḏiḏi (72) 39Keledai enanga ma repe: cala nyagi ro'ange re latu romotoa, (30.500) re bu-bula'a di'a Ma JOU, enanga ma repe: nyagi rarama rimoi (61). 40re dawana ga'a mosolese ananga ma repe: nga cala nyagi moi rarama (16.000) re bu-bula'a di'a Ma JOU, ananga gena-ge: nga nyagi ro'ange muḏiḏi (32). 41Dadi bu-bula'a sa'olo jou-jou ga'a 'i siwola i'a di'a Ma JOU 'a Musa ya gasa toma 'imam Eleazar, ma tero Ma JOU ro parenta ra Musa.
42Ngowa'a Israel manga balangu ma kaci moi ma lelegu, manga balangu gena-ge 'a Musa ra siwola i'a toma sordado manga balangu ma kaci moi, ananga gena-ge ga'a 'aḏi tagi parangi gena-ge. 43Ngowa'a Israel manga toropo ma balangu gena-ge: doba enanga ma repe cala latu ro'ange nyagi ro'ange tumudingi re latu romotoa (337. 500), 44sapi enanga ma repe: cala nyagi ro'ange rarama (36.000). 45Keledai enanga ma repe: cala nyagi ro'ange re latu romotoa, (30.500) 46re dawana ga'a mosolese ananga ma repe: nga cala nyagi moi rarama (16.000). 47Gena ḏua, 'a Musa 'o 'oro toma balangu ma kaci moi ga'a 'i dadi ngowa'a Israel manga balangu ma kaci moi gena-ge, rimoi toma nyagi romotoa ma dara: bae dawana ga'a mosolese bolo haiwani. Ḏua unanga 'a sipula'a mo-moini toma ngowa'a Lewi ga'a 'aḏi siḏagi munara di'a Ma JOU 'ai Suyu'u 'Ofi-'Ofi, mo-moini gena-ge ma tero Ma JOU ro parenta ra Musa.
48Gena ḏua toma sordado ma bi-biri'i ga'a sibi-biri'i sordado rema cala-cala gena-ge sordado ma sae'e mo-moini ga'a sibi-biri'i sordado nga cala moi, sordado ma sae'e mo-moini ga'a sibi-biri'i sordado nga latu moi ananga gena-ge 'aḏi talaḏi ra Musa, 49re 'aḏi kanau ra unanga so'o ne:<<Ngomi, 'ani falalomu-falalomu nena-ne rewo roimi sordado mo-moini ga'a mi sibi-biri'i re tamanga sigolona matengo i'a mai ua 'o iranga. 50Sababu gena-ge, ngomi mi gasa 'ori i'a 'i si'a'a reo guraci ga'a matengo re matengo 'o 'oro toma ngowa'a Midian minga jou-jou ra Ma JOU: gena-ge rou ma golongu, giama ma golongu, giama ma rarag̱a ma 'a'ali tai rarag̱a ga'a ma capu rema cap, ngau'u ma nga-nganti di'a si'a'a ngowa'a dadunu 'aḏi dadi marimoi moju ra Ma JOU 'ai momina.>> 51Ḏua 'a Musa re 'imam Eleazar 'aḏi dawongo manga guraci gena-ge, mo-moini gena-ge ga'a tutu'u. 52Re guraci mo-moini ga'a manga jou-jou 'i siwola i'a ya sidoa'a ra Ma JOU, gena-ge ga'a sordado ma sae'e mo-moini ga'a sibi-biri'i sordado nga cala moi re sordado ma sae'e mo-moini ga'a sibi-biri'i sordado nga latu moi, gena-ge guraci ma ḏubuso syikal cala nyagi moi rarama re latu tumudingi nyagi romotoa (16.750)#31:52 ḏa kilo latu moi nyagi siworo (190) 53Mada'a sordado-sordado gena-ge, ananga matengo re matengo raḏi matai 'oro di'a ananga masiretene. 54Wakutu Musa re 'imam Eleazar 'aḏi dawongo guraci gena-ge toma sordado ma sae'e mo-moini ga'a sibi-biri'i sordado nga cala moi re sordado ma sae'e mo-moini ga'a sibi-biri'i sordado nga latu moi, kara ananga nga muḏiḏi ya gasa toma Suyu'u Lo-lomu ma dara talaḏi ra Ma JOU sa'olo si'elingi di'a ngowa'a Israel.
2025 Indonesian Bible Society (LAI)