Nyo-nyoimi 28
28
Jou-jou di'a wangere ma jelele i'a
28:1-8
1Ma JOU 'o kanau ra Musa rema betongo so'o ne: 2<<Pula'a parenta nena-ne toma ngowa'a Israel so'o ne: Ngini balasu ni 'elingi gasa ninga jou-jou ra Ngoi mete'e ma 'orasa ga'a 'i sitantukanga ḏua. Jou-jou gena-ge: 'Ari ngo-ngoromo ma fara muḏuo, enanga gena-ge jou-jou tau'u ga'a ma bounu 'i sisanangi 'Ari 'akala re sinyingara. 3Siajele ra ananga: Nena-ne jou-jou tau'u ga'a ngini balasu ni gasa ra Ma JOU: doba ma nau'u romoḏiḏi ga'a ma 'umuru musungu rimoi rema lese lolara toma wangere ma jelele i'a sa'olo jou-jou ga'a tau'u simoini ga'a 'i tatapu. 4Doba ma nau'u ma rimoi ngini balasu na sidoa'a toma 'orasa ma daini i'a, re doba ma nau'u ma lelegu ngini balasu na sidoa'a toma 'orasa wangere 'alo-'alo. 5Re ḏi'i simete'e gulupungu ma rousu i'a kilo moi di'a jou-jou ngo-ngoromo ga'a sicapuru reo goroho zaitun lai rousu i'a litere rimoi. #28:5 goroho zaitun ga'a si'a'a reo tutu'u zaitun ma sowo'o, la ma hasili goroho zaitun kama moi'i ma balangu ua 6Gena-ge jou-jou ga'a tau'u simoini ga'a tatapu. Enanga 'i sidoa'a ma mulaingi wakutu ni tegoro toma kie Sinai ma cimi sa'olo jou-jou ngo-ngoromo ga'a ma bounu 'i sisanangi Ma JOU 'ai 'akala re sinyingara. 7Re doba rimoi ga'a 'i sidoa'a toma 'orasa ma daini i'a, enanga gena-ge 'i simete'e reo jou-jou 'anggur ma ḇanyo ga'a 'eto-'etolo. Re 'anggur ma ḇanyo gena-ge 'i sidai'i sa'olo jou-jou di'a Ma JOU toma jou-jou ma ngi'i ma re'u ga'a toma Suyu'u 'Ofi-'Ofi ma dara. 8Re ma doba ma lelegu, ngana na sidoa'a toma 'orasa wangere 'alo-'alo. Enanga gena-ge ma tero sa'olo jou-jou ngo-ngoromo toma 'orasa ma daini i'a re ma tero jou-jou 'anggur ma ḇanyo 'eto-'etolo, ngana balasu na 'a'a sa'olo jou-jou ga'a tau'u simoini ga'a ma bounu 'i sisanangi Ma JOU 'ai 'akala re sinyingara.>>
Jou-jou toma Sabata ma wangere re jou-jou toma ngara su-sungi
28:9-15
9<<Toma Sabata ma wangere, ngini ni balasu sidoa'a doba ma nau'u romoḏiḏi ga'a ma 'umuru musungu rimoi re ma lese lolara, re gulupungu ma rousu i'a kilo ḏiḏi sa'olo jou-jou ngo-ngoromo sicapuru reo goroho, re ḏi'i reo jou-jou 'anggur ma ḇanyo. 10Gena-ge jou-jou ga'a tau'u simoini toma Sabata ma wangere ma jelele i'a ga'a 'i sidogo simete'e ḏi'i jou-jou ga'a tau'u simoini re jou-jou 'anggur ma ḇanyo toma wangere ma jelele i'a.
11Toma ngara su-sungi, ngini balasu ni sidoa'a ninga jou-jou sa'olo jou-jou ga'a tau'u simoini ra Ma JOU gena-ge: sapi ma ngowa ma nau'u romoḏiḏi, doba ma nau'u rimoi, doba tumudingi ma 'umuru musungu rimoi ga'a ma lese lolara, 12re ḏi'i gulupungu ma rousu i'a kilo ro'ange sa'olo jou-jou ngo-ngoromo, sicapuru reo goroho zaitun di'a sapi ma ngowa ma nau'u rimoi re rimoi, re gulupungu ma rousu i'a kilo ḏiḏi sa'olo jou-jou ngo-ngoromo, sicapuru reo goroho zaitun di'a doba ma nau'u rimoi gena-ge, 13re ḏi'i gulupungu ma rousu i'a kilo rimoi ga'a 'i sicapuru reo goroho zaitun sa'olo jou-jou ngo-ngoromo di'a doba ma ngowa rimoi re rimoi. Enanga gena-ge 'i dadi jou-jou ga'a tau'u simoini rema bounu ga'a 'i sisanangi Ma JOU 'ai 'akala re sinyingara. 14Re ninga jou-jou 'anggur ma ḇanyo litere romoḏiḏi di'a sapi ma ngowa ma nau'u rimoi, di'a doba ma nau'u rimoi, ma 'anggur ma ḇanyo litere rimoi re ma jule re di'a doba ma ngowa rimoi, ma 'anggur ma ḇanyo litere rimoi. Gena-ge mo-moini jou-jou ga'a tau'u simoini toma ngara su-sungi ma jelele i'a toma musungu ma jelele i'a ma dara. 15Re 'abingi ma nau'u rimoi 'i sidoa'a sa'olo jou-jou di'a sigofi ngowa'a ra Ma JOU 'ai momina. Enanga gena-ge 'i sidogo ḏi'i jou-jou 'anggur ma ḇanyo rema jou-jou ga'a tau'u simoini toma wangere ma jelele i'a.>>
Jou-jou toma Paskah ma wangere lamo'o
28:16-29:40
16<<Toma wangere ma soi nyagi moi re rata toma ngara ma mulaingi, gena-ge Paskah ma wangere lamo'o di'a silamo'o re siḏubuso Ma JOU. 17Toma wangere ma soi nyagi moi re romotoa toma ngara sitero, ma laya 'i mulaingi: ma di'ara wangere tumudingi ngini balasu ni oromo roti kama ragi ua. 18Toma wangere ma mulaingi ngini balasu ni malomu di'a ni silamo'o re siḏubuso Ma JOU. Awa ni madiga'a munara ga'a biasa, 19mada'a ngini balasu ni sidoa'a jou-jou ngo-ngoromo sa'olo jou-jou ga'a tau'u simoini di'a Ma JOU so'o ne: sapi ma ngowa ma nau'u romoḏiḏi, doba ma nau'u rimoi re doba ma ngowa tumudingi ma 'umuru musungu rimoi. Ngini balasu ni sidoa'a haiwani mo-moini gena-ge ga'a ma lese lolara. 20Ḏi'i ninga jou-jou ngo-ngoromo ga'a na si'a'a reo 'oro gulupungu ma rousu i'a sicapuru reo goroho zaitun so'o ne: gena-ge kilo ro'ange di'a sapi ma ngowa ma nau'u rimoi re kilo ḏiḏi di'a doba ma nau'u rimoi; 21sidoa'a ḏi'i gulupungu gena-ge kilo rimoi di'a doba rimoi re rimoi toma doba ma ngowa tumudingi gena-ge, 22re ḏi'i 'abingi ma nau'u rimoi ngini na sidoa'a sa'olo jou-jou di'a sigofi ngowa'a ra Ma JOU 'ai momina, la si'a'a ngowa'a dadunu dadi marimoi moju ra Ma JOU. 23Jou-jou mo-moini gena-ge, ngini balasu na sidoa'a. Enanga gena-ge 'i sidogo ḏi'i simete'e jou-jou ga'a tau'u simoini toma 'orasa ma daini i'a ma jelele i'a. 24Rema duhu gena-ge toma wangere ma jelele i'a ma di'ara wangere tumudingi ngini ni sidoa'a jou-jou ngo-ngoromo sa'olo jou-jou ga'a tau'u simoini ga'a ma bounu 'i sisanangi Ma JOU 'ai 'akala re sinyingara. Re jou-jou gena-ge 'i sidogo simete'e jou-jou ga'a tau'u simoini re ḏi'i jou-jou 'anggur ma ḇanyo wangere ma jelele i'a. 25Re toma wangere ma soi tumudingi, ngini balasu ni malomu di'a ni silamo'o re siḏubuso Ma JOU. Awa ni madiga'a munara ga'a biasa.
Migu Tumudingi ma laya
28:26-31
26Palisi'i i'a migu tumudingi, toma hasili ma mulaingi ma wangere, gena-ge Gandum ma Hasili ma laya, wakutu ngini ni sidoa'a gandum su-sungi sa'olo ninga jou-jou ngo-ngoromo ra Ma JOU, ngini balasu ni malomu di'a silamo'o re siḏubuso Unanga gena-ge. Dadi awa ni madiga'a munara ga'a biasa. 27Toma 'orasa gena-ge ngini balasu gasa ninga jou-jou ga'a tau'u simoini ga'a ma bounu ga'a 'i sisanangi Ma JOU 'ai 'akala re sinyingara so'o ne: sapi ma ngowa ma nau'u romoḏiḏi, doba ma nau'u rimoi, doba tumudingi ma 'umuru musungu rimoi; 28ḏi'i sa'olo jou-jou ngo-ngoromo: gulupungu ma rousu i'a ga'a sicapuru reo goroho zaitun so'o ne: kilo ro'ange di'a sapi ma nau'u rimoi re rimoi, re kilo romoḏiḏi di'a doba ma nau'u rimoi gena-ge, 29re kilo rimoi di'a doba rimoi re rimoi toma doba tumudingi gena-ge; 30simete'e 'abingi ma nau'u rimoi sa'olo jou-jou di'a si'a'a ngini dadunu ni dadi marimoi moju ra Ma JOU. 31Sidogo ḏi'i toma jou-jou ga'a tau'u simoini re jou-jou ngo-ngoromo, mo-moini gena-ge toma wangere ma jelele i'a, ngini balasu ni sidoa'a haiwani mo-moini gena-ge ga'a lese ma lolara sa'olo ninga jou-jou, simete'e jou-jou 'anggur ma ḇanyo di'a Gandum ma Hasili ma laya gena-ge.
2025 Indonesian Bible Society (LAI)