Nyo-nyoimi 29
29
Musungu su-sungi ma laya
1<<Tanggal rimoi toma ngara ma soi tumudingi, ngini balasu ni malomu di'a silamo'o re siḏubuso Ma JOU. Awa ngini ni madiga'a munara ga'a biasa. Toma wangere gena-ge, ngini ni wusu terompet-terompet rema iḏingi lai siḏi, 2re ngini balasu ni sidoa'a jou-jou ga'a tau'u simoini sa'olo bounu ga'a 'i sisanangi Ma JOU 'ai 'akala re sinyingara gena-ge: sapi ma ngowa ma nau'u rimoi toma duo-duo, doba ma nau'u rimoi, doba ma nau'u tumudingi ga'a ma 'umuru musungu rimoi tumudingi, haiwani gena-ge mo-moini gena-ge ma lese lolara; 3re ḏi'i sa'olo jou-jou ngo-ngoromo: gena-ge gulupungu ma rousu i'a ga'a sicapuru reo zaitun ma goroho: gena-ge kilo ro'ange di'a sapi ma ngowa ma nau'u gena-ge, gena-ge kilo ḏiḏi di'a doba ma nau'u 4re kilo moi di'a doba tumudingi gena-ge rimoi re rimoi; 5re 'abingi ma nau'u rimoi sa'olo jou-jou di'a sigofi ngowa'a ra Ma JOU 'ai momina di'a si'a'a ngowa'a dadunu 'aḏi dadi marimoi moju ra Ma JOU, 6re 'age ma lelegu ḏi'i toma jou-jou ga'a tau'u simoini di'a ngara su-sungi rema jou-jou ngo-ngoromo, re jou-jou ga'a tau'u simoini di'a wangere rimoi re rimoi, re ḏi'i jou-jou ngo-ngoromo re jou-jou 'anggur ma ḇanyo. Mo-moini gena-ge mete'e enanga ma 'atoranga re jou-jou ga'a tau'u simoini gena-ge ma bounu 'i sisanangi Ma JOU 'ai 'akala re sinyingara.
7Toma wangere ma soi nyagi moi ngara ma soi tumudingi gena-ge, ngini balasu ni malomu di'a silamo'o re siḏubuso Ma JOU, re siholo ninga diri re puasa. Ngini balasu ni 'a'a munara yoḏu'u 'oru ḇato. 8Siḏibo ḏi'i, ngini balasu ni gasa ninga jou-jou ga'a tau'u simoini rema bounu ga'a 'i sisanangi Ma JOU 'ai 'akala re sinyingara: gena-ge sapi ma nau'u ra-ramasa ie rimoi, doba ma nau'u rimoi, doba ma nau'u tumudingi ga'a ma 'umuru musungu rimoi. Haiwani mo-moini gena-ge balasu ma lese lolara; 9re ḏi'i sa'olo ninga jou-jou ngo-ngoromo: gulupungu ma rousu i'a sicapuru reo goroho zaitun: gena-ge kilo ro'ange di'a sapi ma nau'u re kilo romoḏiḏi di'a doba ma nau'u rimoi, 10re kilo moi di'a doba tumudingi enanga rimoi re rimoi; 11re 'abingi ma nau'u rimoi sa'olo jou-jou di'a sigofi ngowa'a ra Ma JOU 'ai momina. Jou-jou gena-ge ma lelegu reo jou-jou di'a sigofi ngowa'a ra Ma JOU 'ai momina, la si'a'a ngowa'a dadunu 'aḏi dadi marimoi moju ra Ma JOU re jou-jou ga'a tau'u simoini toma wangere rimoi re rimoi re ḏi'i jou-jou ngo-ngoromo re jou-jou 'anggur ma ḇanyo.
12Toma wangere ma soi nyagi moi re romotoa, toma ngara ma soi tumudingi ma dara, ngini mo-moini balasu ni malomu di'a silamo'o re siḏubuso Ma JOU. Awa ni madiga'a munara ga'a biasa. Siḏibo ḏi'i, ngini balasu 'a'a laya di'a Wangere lamo'o Da-daḏusu ga'a 'i si'a'a reo ate ma so'a, ma di'ara wangere tumudingi. 13Toma wangere ga'a laya ma mulaingi gena-ge, ngini balasu ni sidoa'a ninga jou-jou sa'olo jou-jou ga'a tau'u simoini ga'a ma bounu 'i sisanangi Ma JOU 'ai 'akala re sinyingara so'o ne: sapi ma nau'u ra-ramasa ie ma repe salao moi re ro'ange, doba ma nau'u romoḏiḏi, doba ma nau'u ma 'umuru musungu rimoi ma repe salao moi re rata. Haiwani mo-moini gena-ge balasu ma lese lolara; 14re ḏi'i simete'e ninga jou-jou ngo-ngoromo, gena-ge gulupungu ma rousu i'a ga'a 'i sicapuru reo goroho zaitun: gena-ge kilo ro'ange di'a sapi ma nau'u rimoi re rimoi ma repe salao moi re ro'ange, kilo ḏiḏi di'a doba ma nau'u romoḏiḏi gena-ge, rimoi re rimoi, 15re kilo rimoi di'a doba rimoi re rimoi, ma repe salao moi re rata gena-ge, 16re 'abingi ma nau'u rimoi sa'olo jou-jou di'a sigofi ngowa'a ra Ma JOU 'ai momina. Enanga mo-moini gena-ge simete'e jou-jou ga'a tau'u simoini re jou-jou ngo-ngoromo re jou-jou 'anggur ma ḇanyo, jou-jou gena-ge di'a wangere rimoi re rimoi.
17Toma wangere ma soi ḏiḏi toma laya gena-ge: sapi ma nau'u ra-ramasa ie ma repe salao moi re romoḏiḏi, re doba ma nau'u romoḏiḏi, doba ma nau'u ma 'umuru musungu rimoi ma repe salao moi re rata. Haiwani mo-moini gena-ge balasu ga'a ma lese lolara, 18re sidogo jou-jou ngo-ngoromo re jou-jou 'anggur ma ḇanyo. Enanga gena-ge ma repe mete'e 'atoranga di'a sapi-sapi ma nau'u ra-ramasa ie, doba-doba ma nau'u re di'a doba-doba ma nau'u ma 'umuru musungu rimoi; 19re 'abingi ma nau'u rimoi sa'olo jou-jou di'a sigofi ngowa'a ra Ma JOU 'ai momina, enanga gena-ge simete'e jou-jou ga'a tau'u simoini re jou-jou ngo-ngoromo re jou-jou 'anggur ma ḇanyo toma wangere moi re wangere moi.
20Toma wangere ma soi ro'ange toma laya gena-ge: sapi ma nau'u ra-ramasa ie ma repe salao moi re rimoi, re doba ma nau'u romoḏiḏi, doba ma nau'u salao moi re rata ga'a ma 'umuru musungu rimoi, haiwani mo-moini gena-ge ga'a ma lese lolara, 21re sidogo jou-jou ngo-ngoromo re jou-jou 'anggur ma ḇanyo. Enanga gena-ge ma repe mete'e 'atoranga di'a sapi-sapi ma nau'u ra-ramasa ie, di'a doba-doba ma nau'u re di'a doba-doba ma nau'u ma 'umuru musungu rimoi; 22re 'abingi ma nau'u rimoi sa'olo jou-jou di'a sigofi ngowa'a ra Ma JOU 'ai momina, enanga gena-ge simete'e jou-jou ga'a tau'u simoini re jou-jou ngo-ngoromo re jou-jou 'anggur ma ḇanyo toma wangere moi re wangere moi.
23Toma wangere ma soi rata toma ma laya gena-ge: sapi ma nau'u ra-ramasa ie ma repe salao moi, re doba ma nau'u romoḏiḏi, doba ma nau'u ma 'umuru musungu rimoi ma repe salao moi re rata. Haiwani mo-moini gena-ge balasu ga'a ma lese lolara, 24re sidogo jou-jou ngo-ngoromo re jou-jou 'anggur ma ḇanyo. Enanga gena-ge ma repe mete'e 'atoranga di'a sapi-sapi ma nau'u ra-ramasa ie, di'a doba-doba ma nau'u re di'a doba-doba ma nau'u ma 'umuru musungu rimoi; 25re 'abingi ma nau'u rimoi sa'olo jou-jou di'a sigofi ngowa'a ra Ma JOU 'ai momina. Enanga gena-ge simete'e jou-jou ga'a tau'u simoini re jou-jou ngo-ngoromo re jou-jou 'anggur ma ḇanyo toma wangere rimoi re rimoi.
26Toma wangere ma soi romotoa toma ma laya gena-ge: sapi ma nau'u ra-ramasa ie siworo, re doba ma nau'u romoḏiḏi, doba ma nau'u ma 'umuru musungu rimoi ma repe salao moi re rata. Haiwani mo-moini gena-ge ga'a ma lese lolara, 27re sidogo jou-jou ngo-ngoromo re jou-jou 'anggur ma ḇanyo. Enanga gena-ge ma repe mete'e 'atoranga di'a sapi-sapi ma nau'u ra-ramasa ie, doba-doba ma nau'u re ḏi'i doba-doba ma nau'u ma 'umuru musungu rimoi; 28re 'abingi ma nau'u rimoi sa'olo jou-jou di'a sigofi ngowa'a ra Ma JOU 'ai momina. Enanga gena-ge simete'e jou-jou ga'a tau'u simoini re jou-jou ngo-ngoromo re jou-jou 'anggur ma ḇanyo toma wangere rimoi re rimoi.
29Toma wangere ma soi rarama toma ma laya gena-ge: sapi ma nau'u ra-ramasa ie tu'angere, re doba ma nau'u romoḏiḏi, doba ma nau'u ma 'umuru musungu rimoi ma repe salao moi re rata ga'a. Haiwani mo-moini gena-ge balasu ga'a ma lese lolara, 30re sidogo jou-jou ngo-ngoromo re jou-jou 'anggur ma ḇanyo. Enanga gena-ge ma repe mete'e 'atoranga di'a sapi-sapi ma nau'u ra-ramasa ie,doba-doba ma nau'u re ḏi'i doba-doba ma nau'u ma 'umuru musungu rimoi; 31re 'abingi ma nau'u rimoi sa'olo jou-jou di'a sigofi ngowa'a ra Ma JOU 'ai momina. Enanga gena-ge simete'e jou-jou ga'a tau'u simoini re jou-jou ngo-ngoromo re jou-jou 'anggur ma ḇanyo toma wangere rimoi re rimoi.
32Toma wangere ma soi tumudingi toma ma laya gena-ge: sapi ma nau'u ra-ramasa ie tumudingi, re doba ma nau'u romoḏiḏi, re doba ma nau'u ma 'umuru musungu rimoi ma repe salao moi re rata. Haiwani mo-moini gena-ge balasu ga'a ma lese lolara, 33re sidogo jou-jou ngo-ngoromo re jou-jou 'anggur ma ḇanyo. Enanga gena-ge ma repe mete'e 'atoranga di'a sapi-sapi ma nau'u ramasa ie, doba-doba ma nau'u re ḏi'i doba-doba ma nau'u ma 'umuru musungu rimoi; 34re 'abingi ma nau'u rimoi sa'olo jou-jou di'a sigofi ngowa'a ra Ma JOU 'ai momina. Enanga gena-ge simete'e jou-jou ga'a tau'u simoini, jou-jou ngo-ngoromo re jou-jou 'anggur ma ḇanyo toma wangere rimoi re rimoi.
35Toma wangere ma soi tu'angere, ngini balasu ni malomu moju di'a silamo'o re siḏubuso Ma JOU. Awa ni madiga'a munara ga'a biasa. 36Mada'a, ngini balasu ni sidoa'a jou-jou ga'a tau'u simoini sa'olo jou-jou 'i sitau'u di'a Ma JOU, jou-jou gena-ge ga'a ma bounu 'i sisanangi Ma JOU 'ai 'akala re sinyingara so'o ne: sapi ma nau'u ra-ramasa ie rimoi, doba ma nau'u rimoi, doba ma nau'u tumudingi ga'a ma 'umuru musungu rimoi. Haiwani gena-ge mo-moini balasu ga'a ma lese lolara, 37simete'e jou-jou ngo-ngoromo re jou-jou 'anggur ma ḇanyo. Enanga gena-ge ma repe mete'e 'atoranga di'a sapi ma nau'u ra-ramasa ie rimoi, doba ma nau'u rimoi re ḏi'i doba-doba ma nau'u tumudingi ga'a ma 'umuru musungu rimoi; 38re ḏi'i 'abingi ma nau'u rimoi sa'olo jou-jou di'a sigofi ngowa'a ra Ma JOU 'ai momina simete'e ḏi'i jou-jou ga'a tau'u simoini jou-jou ngo-ngoromo re jou-jou 'anggur ma ḇanyo toma wangere rimoi re rimoi.
39Ngini ninga jou-jou gena-ge mo-moini: jou-jou ga'a tau'u simoini, jou-jou ngo-ngoromo, jou-jou 'anggur ma ḇanyo re jou-jou sababu ngini dadunu ni marimoi moju ra Ma JOU. Ngini na sidoa'a di'a Ma JOU taninga 'agama ma wange-wangere lamo'o ga'a ma 'orasa Ngoi ta sitantukanga ḏua, enanga gena-ge sidogo reo jou-jou ninga jaji re jou-jou sababu ninga 'akala re sinyingara sa-sanangi.>>
40Dadi 'a Musa 'o kanau toma ngowa'a Israel mete'e mo-moini sa'olo Ma JOU ro parenta ra unanga.
2025 Indonesian Bible Society (LAI)