Nyo-nyoimi 27
27
'A Zelafehad 'ai ngowa'a were'a manga haku
27:1-11
1Gena ḏua 'a Zelafehad 'ai ngowa-ngowa'a were'a 'aḏi ma sebanga i'a tamanga ḇaḇa, 'a Zelafehad unanga 'a Hefer 'ai ngowa'a nau'u, 'a Hefer unanga 'a Gilead 'ai ngowa'a nau'u, 'a Gilead, unanga 'a Makhir 'ai ngowa'a nau'u, Makhir, unanga 'a Manasye 'ai ngowa'a nau'u, 'a Manasye unanga Yusuf 'ai ngowa'a nau'u. Re 'a Zelafehad 'ai ngowa-ngowa'a were'a gena-ge manga loma-lomanga gena-ge, ngo Mahla, Noa, Hogla, Milka re Tirza - 2Ananga gena-ge 'aḏi made-de'oso ra Musa re 'imam Eleazar manga biono, re toma ngowa'a bi-biri'i manga biono re toma ngowa'a Israel manga toropo manga biono co-cori Suyu'u 'Ofi-'Ofi ma ngalana ma da-daku, re ananga 'aḏi kanau: 3<<Minga ḇaḇa ro sengene toma daeraha baulaco. Kalaha unanga 'o osama ua toma nyo-nyoimi ngowa'a Korah 'ai toropo ga'a 'aḏi malomu di'a lawana Ma JOU, mada'a unanga ro sengene sababu 'ai ḏosa masiretene, re unanga kai ngowa'a nau'u ua. 4Awa minga ḇaḇa 'ai lomanga 'i singi-ngiranga tai rera ma sigolona, sababu unanga kai ngowa'a nau'u ua. Sipula'a loasa ngomi ḏi'i sanga tana'a sa'olo minga warisi taminga ḇaḇa 'ai ioronongoḏu manga sigolona.>> 5Ḏua 'a Musa 'a singadolo manga go-golo'o gena-ge ra Ma JOU. 6Re Ma JOU 'o kanau ra Musa rema betongo so'o ne: 7<<Tero mode'e 'a Zelafehad 'ai ngowa-ngowa'a were'a manga go-golo'o. Dadi ngana balasu no pula'a tana'a di'a 'ai ngowa-ngowa'a were'a. Ngana balasu sipula'a manga ḇaḇa 'ai warisi tai ngowa-ngowa'a were'a sa'olo manga warisi tamanga ḇaḇa 'ai ioro re nongoḏu manga na-nau'u manga sigolona. 8Re ngana balasu kanau ḏi'i toma ngowa'a Israel rema betongo so'o ne: <Na'o matengo i'a 'o sengene kai ngowa'a nau'u ua, ngini balasu 'i sipula'a ma baba 'ai warisi tai ngowa'a were'a matengo. 9Na'o unanga kai ngowa'a were'a ua, ngini balasu sipula'a 'ai warisi gena-ge toma baba 'ai ioro re nongoḏu manga na-nau'u. 10Re na'o unanga kai ioro re nongoḏu ma na-nau'u cua, ngini balasu sipula'a 'ai warisi gena-ge toma ḇaḇa 'ai ioro re nongoḏu manga na-nau'u. 11Re na'o 'ai ḇaḇa 'ai ioro re nongoḏu ma na-nau'u matengo i'a mai ua, ngini balasu sipula'a 'ai warisi gena-ge tai ioronongoḏu dodome'e rimoi tai rera ma dara, la tana'a gena-ge 'i dadi unanga 'ai warisi.
Gena-ge ga'a balasu 'i dadi hukumu re putusanga di'a ngowa'a Israel, ma tero Ma JOU ro parenta ra Musa. > >>
'A Yosua unanga 'a Musa 'ai nga-ngali
27:12-23
12Ma JOU 'o kanau ra Musa rema betongo so'o ne: <<Pere ie toma kie-kie Abarim nena-ne, re oḏi'i daeraha ga'a To pula'a ḏua di'a ngowa'a Israel. 13Na'o ngana na oḏi'i togumu ḏua, dadi ngana ḏuanga i'a no sengene kara siotomo ma tero sa'olo 'ani ngimo-ngimono ga'a raḏi sengene lebe siḏa re ḏi'i ma tero sa'olo 'ani ioro 'a Harun nga'ene. 14Sababu toma 'orasa ngowa'a Israel 'aḏi kuḏubungu toma daeraha baulaco Zin, ngini ngamu ḏiḏi reni lawana 'Ari parenta re sijumu ua 'Ari kuasa ma pari cua toma ngowa'a Israel manga momina toma 'orasa ḇanyo 'i supu toma ngi'i gena-ge.>> Gena-ge ḇanyo ma la'o Meriba co-cori Kadesh toma daeraha baulaco Zin.
15Ḏua 'a Musa 'o kanau ra Ma JOU rema betongo so'o ne: 16<<Ya Ma JOU, Ma Jou'ongu Madutu ga'a No sipula'a 'ahu toma ngowa'a mo-moini ga'a 'ahu, ngoi tini golo'o nyengara gari'a No cumutu ngowa'a matengo i'a toma ngowa'a Israel nena-ne manga toropo ma sigolona 17ga'a sibi-biri'i ananga wakutu 'aḏi supu re osama, la awa ngowa'a Israel manga toropo ma tero doba ga'a kama sowohi ua.>>
18Ḏua Ma JOU 'o sangoro ra Musa: <<'Aro'o 'a Yosua 'a Nun 'ai ngowa'a nau'u,#Nyo. 11:28 unanga 'Ari roh 'u ḏegoro, kara no siteru 'ani giama tai sae'e. 19Gasa unanga 'o made-de'oso ra 'imam Eleazar 'ai biono re toma ngowa'a Israel manga toropo mo-moini ma biono. Gena ḏua, no sisolano unanga sa'olo 'ani nga-ngali talaḏi manga biono. 20Re no pula'a 'ani kuasa ma balangu ra unanga, la ngowa'a Israel manga toropo mo-moini 'aḏi 'isene unanga. 21Unanga balasu 'o made-de'oso talaḏi ra 'imam Eleazar 'ai biono re unanga gena-ge ḏuanga i'a 'o pake Urim di'a disa waro ma putusanga ra Ngoi, Ma JOU. Re mete'e 'Ari putusanga gena-ge, 'a Yosua mamete'e ngowa'a Israel mo-moini, gena-ge ngowa'a Israel manga toropo mo-moini, di'a ananga 'aḏi siḏagi 'oru ḇato.>> 22Dadi Musa 'a si'a'a ma tero Ma JOU ro parenta ra unanga. Unanga 'o gasa 'a Yosua re 'o soma'a made-de'oso talaḏi ra 'imam Eleazar re ngowa'a Israel manga toropo, 23kara 'a Musa 'o siteru 'ai giama ra Yosua 'ai sae'e, re 'o sisolano unanga gena-ge ma tero Ma JOU ro parenta ra Musa.
2025 Indonesian Bible Society (LAI)