Nyo-nyoimi 25
25
Ngowa'a Israel 'aḏi silamo'o re siḏubuso jou'ongu ma somoara Baal toma Peor
1Wakutu ngowa'a Israel 'aḏi tegoro moju toma Picaru Sitim,#25:1 Picaru Sitim ma ngale <picaru ma ate 'akasia, ma papolo wangere ma la'o toma Picaru Yordan, co-cori limau Yeriko. ananga mulai 'aḏi mete'e ua Ma JOU sababu 'aḏi otu ma lomu reo we-were'a Moab. 2We-were'a—we-were'a nena-ne 'aḏi baja ngowa'a Israel sapolo di'a sidoa'a ananga manga jou-jou tola'a toma jou'ongu ma somoara, kara ngowa'a Israel gena-ge 'aḏi oromo ananga manga jou-jou re 'aḏi silamo'o re siḏubuso ngowa'a gena-ge manga jou'ongu ma somoara. 3Wakutu ngowa'a Israel 'aḏi marimoi reo jou'ongu ma somoara Baal toma Peor, Ma JOU 'Ai duruta ga'a ma tero sa'olo u'u, enanga 'i leja-lejanga toma ngowa'a Israel. 4Re Ma JOU 'o kanau ra Musa rema betongo so'o ne; <<Cako'o re sisengene bangsa gena-ge manga bi-biri'i ga'a silamo'o re siḏubuso Baal gena-ge re kole ananga manga mayeti toma ngasu'u #Dad. 21:22 talaḏi ngowa'a Israel mo-moini, la Ma JOU 'ai duruta ga'a 'i leja-lejanga gena-ge 'i sora toma ngowa'a Israel.>> 5Ḏua 'a Musa 'o kanau toma ngowa'a Israel manga juruhakimi mo-moini: <<Ngini matengo re matengo na'u sisengene ninga ngowa-ngowa'a na-nau'u ga'a 'aḏi silamo'o re siḏubuso Baal toma Peor.>>
6Toma 'orasa gena-ge ngowa'a Israel matengo 'o gasa we-were'a Midian matengo tai rera ma ngitu re ngale , ra Musa 'ai momina re ngowa'a Israel manga toro-toropo ma momina wakutu ananga gena-ge 'aḏi ma'u gaḏi toma Suyu'u Lo-lomu ma ngalana ma da-daku ma biono sababu ngowa'a Israel manga ḏosa gena-ge. 7Wakutu 'a Pinehas, 'a Eleazar 'ai ngowa'a nau'u re 'imam Harun 'ai danongo, unanga 'o oḏi'i hali gena-ge, unanga 'o sisoi'i ngowa'a Israel manga toropo gena-ge re 'oro kalawi rimoi, 8unanga 'o kunu'i ngowa'a Israel matengo gena-ge ngadolo tai kamara, re 'o siruju ma kalawi ra ananga nga muḏiḏi, ngowa'a Israel re we-were'a gena-ge 'ami po'olo. Ḏua ma bahala ga'a 'i nga'unu ngowa'a Israel enanga 'i togumu 9Ngowa'a Israel ga'a sengene sababu sanga bahala gena-ge, ananga mo-moini nga cala nyagi romo ḏiḏi re rata (24.000).
10Ma JOU 'o kanau ra Musa so'o ne: 11<<'A Pinehas, unanga 'a Eleazar 'ai ngowa'a nau'u re 'imam Harun 'ai danongo. Unanga gena-ge 'o sijumu duruta ma tero Ngoi 'ari duruta ga'a 'adili toma ngowa'a Israel manga sigolona. Dadi unanga ro sisora 'Ari duruta toma ngowa'a Israel singadolo Ngoi To singi-ngiranga ua ananga gena-ge mo-moini. 12Sababu gena-ge ngana, 'a Musa no siajele so'o ne: <Tantu ḏua, Ngoi to si'a'a 'Ari jaji di'a pula'a dame ra Pinehas. 13Jaji gena-ge 'i sitatapu unanga re 'ai ju'uda sa'olo 'imam di'a kasingado-ngadolo i'a, sababu unanga 'o sijumu 'ai duruta di'a silamo'o Ngoi sa'olo Ma Jou'ongu Madutu ga'a unanga 'o silamo'o re siḏubuso. Dadi 'a Pinehas 'o si'a'a ngowa'a Israel dadunu 'aḏi marimoi moju ra Ngoi, Ma Jou'ongu Madutu.> >> 14Ngowa'a Israel ga'a sanga sengene mamete'e reo we-were'a Midian, unanga 'ai lomanga gena-ge 'a Zimri, 'a Salu 'ai ngowa'a nau'u, unanga 'o dadi ngimo-ngimono ma ngitu re ngale rimoi ma bi-biri'i toma suku Simeon ma sigolona. 15Re we-were'a Midian matengo ga'a sanga sengene, munanga 'ami lomanga ngo Kozbi, munanga 'a Zur 'ai ngowa'a were'a, 'a Zur unanga 'o dadi ete re dotumu manga rera ma bi-biri'i toma bangsa Midian.
16Gena ḏua, Ma JOU 'o kanau ra Musa rema betongo so'o ne: 17<<Parangi ngowa'a Midian gena-ge, re ni sisengene ananga, 18sababu ananga raḏi parangi ngini remanga haga. Ananga gena-ge 'aḏi sihaga ngowa'a Israel, la ananga 'aḏi silamo'o re siḏubuso jou'ongu ma somoara toma Peor re ḏi'i ngo Kozbi 'ami ga'a. Munanga gena-ge bangsa Midian manga bi-biri'i matengo 'ai ngowa'a were'a re ngowa'a Midian manga ioronongoḏu. Ngo Kozbi mo sengene toma 'orasa ma bahala 'i dadi ma sababu ngowa'a Israel 'aḏi silamo'o re siḏubuso jou'ongu ma somoara toma Peor.
2025 Indonesian Bible Society (LAI)