Nyo-nyoimi 24
24
'A Bileam 'ai demo-demo ma soi ro'ange
1:9
1Sababu nange-ne 'a Bileam 'o waro mode-mode'e na'o sibarakati ngowa'a Israel enanga gena-ge 'i rousu ra Ma JOU 'ai momina, unanga ro disa didina'o riwara ma tero sa'olo nyangu moju. Siḏibo ḏi'i, mada'a unanga 'o sitalaḏi 'ai biono toma daeraha baulaco. 2Wakutu 'a Bileam 'o tatamo toma biono, unanga 'o oḏi'i ngowa'a Israel 'aḏi side'oso manga suyu'u mete'e manga suku rimoi re rimoi. Ḏua Ma Jou'ongu Madutu 'ai Roh 'i ḏegoro ra Bileam, 3re unanga 'o singadolo 'ai demo-demo so'o ne:
<<Ngoi, 'a Bileam, 'a Beor 'ai ngowa'a nau'u, ngoi 'ari demo-demo,
demo-demo nena-ne ra ngoi ino, ngoi ga'a 'ari la'o 'i welanga;
4ngoi 'ari demo-demo nena-ne, ngoi ga'a 'isene Ma Jou'ongu Madutu 'ai demo-demo,
ngoi ga'a sanga tingoḏi'i ra Ma Jou'ongu Madutu ino, Unanga gena-ge ga'a 'Ai kuasa ma pari cua
singadolo ngoi to ruba mada'a 'ari la'o 'i welanga:
5Hei Yakub 'ai ju'uda, lai rousu madutu 'ani suyu-suyu'u,
hei Israel lai rousu ḏi'i 'ani ngi'i-ngi'i tegoro!
6Mo-moini ma tero picaru ga'a loasa
ma tero guḏa toma ngalara ma 'uḏu;
ma tero ate gaharu ga'a Ma JOU 'a so'ana;
ma tero ate aras toma ḇanyo ma 'uḏu.
7Ḇanyo 'i 'uisi tamanga sisiala tala,
re manga gisisi 'i sanga ḇanyo lai repe.
Israel manga 'olana gena-ge 'ai kuasa lebe lamo'o reo 'Olana Agag,
re manga 'olana gena-ge 'ai pareta ḏuanga i'a 'i dadi mulia.
8Ma Jou'ongu Madutu ga'a gasa ananga 'aḏi supu toma Mesir,
Unanga gena-ge lao te'e ma tero sapi nga-ngabala ma nau'u ma tadu'u.
Bangsa-bangsa ga'a dadi ananga manga lawana, Unanga gena-ge ḏuanga i'a ya'u simoini,
re ananga manga obo-obongo, ḏuanga i'a sanga siwejere
re sanga i'ara reo coimi ma doto lapa-lapasa.
9Ngowa'a Israel gena-ge 'aḏi mapagara re 'aḏi mangomasa ma tero singa ma nau'u,
re ma tero singa ma were'a; matengo i'a mai ua ga'a nau'u 'a simomi'i!
Sibarakati ngowa'a ga'a 'aḏi sibarakati ngowa'a Israel,
re sikutuki ngowa'a ga'a 'aḏi sikutuki ngowa'a Israel!>>
10Ḏua 'a Balak 'ai duruta 'i leja-lejanga ra Bileam singadolo 'a ḇululu 'ai dutu'u kara unanga 'o kanau ra Bileam: <<Ngoi to 'aro'o ngana di'a sikutuki 'ari lawan-lawana, mada'a ma nyonyata ngana no sibarakati ananga singadolo soi ro'ange. 11Sababu gena-ge, nange-ne no sisoi'i tala 'ane re no maḏibo tai ngi'i! Ngoi reto kanau, <Ngoi ḏuanga i'a to pula'a mode-mode'e ngogele ra ngana>. Mada'a Ma JOU ro dola'aku ngana singadolo no sanga ngogele ua!>> 12Mada'a 'a Bileam 'o kanau ra Balak: <<Ngoi reto kanau tani so-soma'a mo-moini ga'a na'u 'utusu ra ngoi: 13<Kalaha Balak 'o pula'a guraci re salaka mo-moini tari kadato ra ngoi, ngoi to oḏu'u 'a'a 'ori i'a rimoi, ga'a 'i ma'u rapu ra Ma JOU 'ai demo: bae ngoi to 'a'a la-la bolo cira mete'e 'ari fikirana masiretene. 'Oru ga'a Ma JOU ro kanau, enanga gena-ge ngoi ḏuanga i'a balasu ta siajele.> 14Re nange-ne, ngoi mau to tagi tari bangsa masiretene. Ino, ngoi mau to siajele ra ngana 'oru ga'a bangsa Israel gena-ge ḏuanga i'a ya si'a'a tani bangsa toma biono i'a.>>
'A Bileam 'ai demo-demo ma ḏo-ḏogumu
15-24
15Gena ḏua 'a Bileam 'a sikanau 'ai demo-demo so'o ne,
<<Ngoi, 'a Bileam, 'a Beor 'ai ngowa'a nau'u, ngoi 'ari demo-demo,
demo-demo gena-ge ra ngoi ino, ngoi ga'a 'ari la'o 'i welanga;
16ngoi 'ari demo-demo nena-ne, ngoi ga'a 'isene Ma Jou'ongu Madutu 'ai demo-demo,
re waro mangale wo-waro ra Ma Jou'ongu Madutu ino ga'a toma Gau'u Madutu,
ngoi ga'a sanga tingoḏi'i ra Ma Jou'ongu Madutu ino ga'a 'Ai kuasa ma pari cua,
singadolo ngoi to ruba re 'ari la'o 'i welanga:
17Tari tingoḏi'i ma dara, unanga ga'a ngoi tu oḏi'i, unanga ga'a 'o waiti ua nange-ne;
unanga ngoi tu tatamo, mada'a toma jori ua;
ma 'olana ḏuanga i'a 'o waiti ra Yakub 'ai ju'uda tala ma tero sa'olo mumuḏungu 'i baolo,
unanga ga'a 'o gu'u pareta ma didiki toma bangsa Israel ino,
re 'o siwejere ngowa'a Moab manga sae'e,
re singi-ngiranga bangsa-bangsa ra Set 'ai ju'uda tala.
18Dadi daeraha Edom ḏuanga i'a 'i dadi bangsa Israel manga warisi
re ḏi'i daeraha Seir, #24:18 daeraha Seir gena-ge balangu ma kie-kie toma daeraha Edom ma dara enanga ḏuanga i'a 'i dadi di'a bangsa Israel manga warisi, ananga gena-ge ngowa'a Seir manga lawa-lawana.
Mada'a ngowa'a Israel ḏuanga i'a 'aḏi 'utungu tau-taunu,
19ngowa'a matengo i'a ḏuanga i'a 'o baolo ra Yakub 'ai ju'uda tala; unanga gena-ge ga'a rai kuasa,
unanga gena-ge ḏuanga i'a 'o singi-ngiranga ngowa-ngowa'a ga'a 'aḏi wiḏi sisoi'i tala limau!>>
20Ḏua tai tingoḏi'i ma dara, unanga 'o oḏi'i ngowa'a Amalek, kara unanga 'a singadolo 'ai demo-demo so'o ne:
<<Bangsa Amalek, bangsa gena-ge ma mulaingi toma bangsa-bangsa manga sigolona ga'a 'aḏi malawana bangsa Israel,#Sup. 17:8-16
mada'a ma ḏo-ḏogumu tala, enanga ḏuanga i'a sanga singi-ngiranga di'a kasingado-ngadolo i'a.>>
21Ḏua tai tingoḏi'i, unanga 'o oḏi'i ngowa'a Keni, unanga 'a singadolo 'ai demo-demo so'o ne:
<<Ninga ngi'i 'i ogoro,
gena-ge ma tero sa'olo namo diwanga ma ngi'i, enanga gena-ge 'i ogoro ga'a i tegoro toma sau maḏi ma re'u,
22mada'a ngowa'a Keni ḏuanga i'a sanga singi-ngiranga;
wakutu ngini ḏuanga i'a ni dadi ngowa'a Asyur manga dawana.>>
23'A Bileam 'o singadolo ḏi'i 'ai demo-demo so'o ne:
<<Bahala! Matengo i'a mai ua 'o 'ahu moju,
toma 'orasa Ma Jou'ongu Madutu 'o si'a'a hali gena-ge!
24Mada'a kapala-kapala ḏuanga i'a 'i sapolo toma ngowa'a Kitim manga ngoloto ma 'uḏu ino,
ananga ḏuanga i'a 'aḏi sito'u-to'u ngowa'a Asyur re ngowa'a Heber,
mada'a ḏi'i ananga gena-ge ma ḏo-ḏogumu sanga singi-ngiranga kasingado-ngadolo i'a.>>
25Gena ḏua, 'a Bileam ro madodahe kara madibo tai ngi'i; re 'a Balak mai 'o tagi sisoi'i tala ḏi'i.
2025 Indonesian Bible Society (LAI)