Nyo-nyoimi 23
23
'A Bileam 'ai demo-demo ma mulaingi
1Ḏua 'a Bileam 'o kanau ra Balak rema betongo so'o ne: <<Side'oso 'ane jou-jou tau'u ma ngi'i tumudingi di'a ngoi, re sidodahe ḏi'i sapi ma ngowa ma nau'u tumudingi re doba ma nau'u tumudingi di'a ngoi.>> 2'A Balak 'a siḏagi ma tero sa'olo 'a Bileam 'o soma'a. Gena ḏua 'a Balak re Bileam, ananga nga muḏiḏi 'aḏi sidoa'a manga jou-jou sapi ma ngowa ma nau'u rimoi re doba ma nau'u rimoi toma jou-jou tau'u ma ngi'i tumudingi gena-ge, rimoi re rimoi ma re'u. 3Gena ḏua, 'a Bileam 'o kanau ra Balak: <<No made-de'oso 'ane-ne sebanga i'a tani jou-jou tau'u, mada'a ngoi masiretene mau to tagi. Ḏa Ma JOU ḏuanga i'a 'o sapolo di'a ma'u sanga ra ngoi, kara 'oru ḇato Unanga 'a kanau ra ngoi, ḏuanga i'a to siajele ra ngana.>> Gena ḏua, 'a Bileam 'o pere ie toma sau rimoi ma re'u ga'a ma ate 'i konyo yoḏu'u.
'A Bileam 'o sibarakati Israel
23:4-24:9
4Ḏua Ma Jou'ongu Madutu 'o ma'u sanga ra Bileam, kara 'a Bileam 'o kanau ra Unanga so'o ne: <<Jou-jou tau'u ma ngi'i tumudingi gena-ge ngoi reta 'aturu, re to sidoa'a jou-jou sapi ma ngowa ma nau'u rimoi re doba ma nau'u rimoi toma jou-jou tau'u ma ngi'i, rimoi re rimoi.>> 5Palisi'i i'a Ma JOU 'o pula'a bererongo ra Bileam ga'a unanga balasu 'a siajele ra Balak, Ma JOU 'o kanau ra unanga so'o ne: <<Maḏibo i'a ra Balak re siajele 'Ari putusanga ra unanga gena-ge.>> 6Wakutu unanga 'o maḏibo i'a re oḏi'i 'a Balak mamete'e reo ngowa'a Moab manga bi-biri'i mo-moini, ananga gena-ge 'aḏi made-de'oso moju sebanga i'a tamanga jou-jou tau'u ma gagoro. 7Ḏua 'a Bileam 'a singadolo 'ai demo-demo so'o ne:
<<Da'a Aram#23:7 Aram gena-ge Siria ino, 'a Balak 'o soma'a ngoi to sapolo,
toma kie-kie papolo wangere ma lao ino ngowa'a Moab manga 'olana:
unanga 'o kanau, <Sapolo ino. sikutuki Yakub 'ai ju'uda di'a ngoi,
re no sapolo ino, golo'o duruta da'u tala toma ngowa-ngowa'a Israel.>
8Ma faeda cua, ngoi to golo'o bahala ra ananga na'o Ma Jou'ongu Madutu 'o oḏu'u sisapolo bahala ra ananga!
Ma faeda cua, ngoi to golo'o duruta da'u tala ra ananga na'o Ma JOU 'o oḏu'u pula'a duruta ra ananga!
9Mode-mode'e toma kie-kie maḏi ma tubu ngoi to oḏi'i ananga,
toma sau-sau ngoi to tatamo ananga.
Oḏi'i, bangsa rimoi ga'a tegoro mawola i'a
re 'aḏi oḏu'u siroimi toma bangsa-bangsa lelegu ma sigolona.
10'A Yakub 'ai ju'uda, matengo i'a mai ua ya'u roimi yoḏu'u sababu ma tero sa'olo korou'u.
Ngowa'a Israel manga toropo balangu rimoi toma balangu rata, matengo i'a mai ua ya'u roimi ḏi'i!
Ngoi mau to sengene ma tero ngowa'a ga'a 'ahu boloto, ananga gena-ge 'aḏi sengene
re 'ari 'ahu ma ḏo-ḏogumu ma tero ananga manga 'ahu ma ḏo-ḏogumu!>>
11Ḏua 'a Balak 'o ḇangata Bileam rema betongo so'o ne: <<Ngana 'ani maksudu 'oru singadolo ngana no 'a'a so'o gena-ge? Ngoi to gasa ngana 'ane pa'i di'a sikutuki 'ari lawa-lawana ḇato! Mada'a siḏibo ḏi'i, ngana no sibarakati ananga!>> 12Mada'a Bileam 'o sangoro: <<Ngoi balasu to madodato! Ngoi to kanau pa'i 'oru ḇato ga'a Ma JOU 'a sigare tari madanga!>>
'A Bileam 'ai demo-demo ma soi ḏiḏi
13Gena ḏua, 'a Balak 'o kanau ra Bileam:<< Pahala tagi mamete'e ra ngoi toma ngi'i lelegu, re toma ngi'i gena-ge ngana nyengara no oḏi'i bangsa gena-ge. Ngana ḏuanga i'a no oḏi'i pa'i ma balangu toma dere madutu, mada'a ngana na oḏi'i mo-moini ua, kara sikutuki ananga gena-ge di'a ngoi.>> 14Ḏua 'a Balak 'o gasa unanga toma daeraha tamo-tamolo,#23:14 gena-ge si'aro'o Zofim. toma Kie Pisga ma tubu. 'A Balak 'o side'oso jou-jou tau'u ma ngi'i tumudingi re 'o sidoa'a 'ai jou-jou sapi ma ngowa ma nau'u re doba ma nau'u rimoi toma jou-jou tau'u ma ngi'i tumudingi gena-ge ma re'u, rimoi re rimoi. 15Re unanga 'o kanau ra Balak rema betongo so'o ne: << No made-de'oso 'ane-ne sebanga i'a tani jou-jou tau'u, mada'a ngoi mau to ma'u sanga ra Ma JOU da'a.>> 16Ḏua Ma JOU 'o ma'u sanga ra Bileam re 'O pula'a bererongo ra Bileam ga'a unanga balasu 'a siajele ra Balak, kara Ma JOU 'o kanau ra unanga rema betongo so'o ne: <<Maḏibo i'a ra Balak re siajele 'Ari putusanga ra unanga gena-ge.>> 17Wakutu 'a Bileam 'o ngadolo ra Balak, unanga 'o made-de'oso moju sebanga i'a tai jou-jou tau'u mamete'e reo Moab manga bi-biri'i. Re 'a Balak 'o sano ra unanga: <<Ma JOU 'o kanau 'oru?>> 18Ḏua 'a Bileam 'a singadolo 'ai demo-demo so'o ne:
<<Hei 'a Balak momi'i, re 'isene la-la;
ya Zipor 'ai ngowa'a nau'u, silenge ino 'ani ngau'u re no 'isene ngoi.
19Ma Jou'ongu Madutu, unanga 'o manusia ua, dadi Unanga 'o sa-sakala ua.
Unanga gena-ge manusia ma ngowa'a nau'u ua, dadi Unanga 'o ngali ua 'Ai putusanga.
Na'o Unanga 'o kanau, tantu ḏua Unanga 'a si'a'a;
Na'o Unanga 'o 'a'a jaji, tantu ḏua Unanga 'a sitotomo.
20'Isene, ngoi Ma JOU Tu parenta di'a sibarakati ngowa'a Israel.
Na'o Unanga mau 'o sibarakati ananga gena-ge, ngoi to oḏu'u ananga sanga kutuki.
21Sanga ua Yakub 'ai ju'uda 'aḏi sanga bahala,
re sanga ua ngowa'a Israel 'aḏi basono susa re sangisara.
Ma JOU, Ma Jou'ongu Madutu ga'a ananga 'aḏi silamo'o re siḏubuso, Unanga gena-ge 'o mamete'e ra ananga;
re 'aḏi maulili rema roanga sababu Ma JOU, manga 'Olana 'age ra ananga manga sigolona.
22Ma Jou'ongu Madutu ga'a Ro gasa ananga supu toma tana'a Mesir,
Unanga 'ai de-de'e ma tero sapi nga-ngabala ma tadu'u,
23Mode-mode'e ra Yakub 'ai ju'uda tala tukanga sarati 'ai kuasa 'i cua ra Yakub 'ai ju'uda,
bolo tukanga mamaisi 'ai kuasa 'i cua toma ngowa'a Israel.
Ti'ara ua, ngowa'a ḏuanga i'a 'aḏi kanau ra Yakub 'ai ju'uda, ananga gena-ge ngowa'a Israel,
<Oḏi'i didina'o heranga ga'a Ma Jou'ongu Madutu 'a si'a'a di'a ananga gena-ge!>:
24Oḏi'i, bangsa rimoi ga'a momi'i ma tero sa'olo singa ma were'a,
re made-de'oso tala ma tero sa'olo singa ma nau'u,
ga'a kama mangomasa ua na'o 'i oromo nyangu haiwani ma la'eme ga'a enanga 'a 'acingi
re 'i ka'e ngaunu nyangu toma haiwani ga'a enanga ya sisengene.>>
25Ḏua Balak 'o kanau ra Bileam: <<Na'o soi moi i'a mai ua ngana no sikutuki ananga, awa soi moi i'a no sibarakati ananga.>> 26Mada'a Bileam 'o sangoro ra Balak: <<Ngoi reto siajele ra ngana: <'oru ḇato ga'a Ma JOU ro kanau, gena-ge ga'a ngoi ḏuanga i'a ta si'a'a.> >> 27Gena ḏua, Balak 'o kanau moju ra Bileam rema betongo so'o ne: << Ino 'ane, ngoi ḏuanga i'a tini gasa toma ngi'i lelegu. Ḏa Ma Jou'ongu Madutu 'o sanangi di'a simaha ngana no sikutuki ananga di'a ngoi toma ngi'i gena-ge.>> 28Ḏua Balak 'o gasa Bileam toma kie Peor ma tubu, ga'a talaḏi daeraha Yesimon. 29'A Bileam 'o kanau ra Balak so'o ne:<<Side'oso 'ane jou-jou tau'u ma ngi'i tumudingi di'a ngoi, re sidodahe ḏi'i sapi ma ngowa ma nau'u tumudingi re doba ma nau'u tumudingi di'a ngoi.>> 30Re 'a Balak 'a siḏagi ma tero sa'olo 'a Bileam 'o soma'a. Gena ḏua, 'a Balak 'o sidoa'a manga jou-jou sapi ma ngowa ma nau'u rimoi re doba ma nau'u rimoi toma jou-jou tau'u ma ngi'i tumudingi gena-ge ma re'u, rimoi re rimoi.
2025 Indonesian Bible Society (LAI)