Nyo-nyoimi 22
22
1Gena ḏua, ngowa'a Israel 'aḏi tagi, re side'oso manga suyu'u toma Moab ma tana'a rata, toma ḇanyo Yordan ma kaci moi ma papolo wangere ma la'o, talaḏi Limau Yerikho ga'a toma ḇanyo gena-ge ma kaci moi papolo wangere soḏu.
'A Balak, ngowa'a Moab manga 'olana, unanga gena-ge 'o 'aro'o 'a Bileam
22:2-20
2Ngowa'a Moab manga 'olana, gena-ge 'a Balak, 'a Zipor 'ai ngowa'a nau'u, unanga gena-ge 'o 'isene mo-moini ga'a ngowa'a Israel 'aḏi 'a'a toma ngowa'a Amori. 3Dadi ngowa'a Moab 'aḏi mojongo madutu sababu ngowa'a Israel gena-ge laḏi repe. Ya, ananga gena-ge 'aḏi mojongo singadolo terewete sababu ngowa'a Israel gena-ge. 4Ḏua ngowa'a Moab 'aḏi kanau toma ngowa'a Midian manga bi-biri'i: <<Tantu ḏua ngowa'a Israel manga sordado ma repe, ananga gena-ge 'aḏi singi-ngiranga 'oru ḇato ga'a 'age 'i sigoloḏi ngene, ma tero sapi 'i simoini rurubu toma daeraha rurubu.>> Toma 'orasa gena-ge 'a Balak , 'a Zipor 'ai ngowa'a nau'u, unanga gena-ge 'o dadi ngowa'a Moab manga 'olana. 5Dadi unanga gena-ge 'o utusu so-soma'a muḏuo i'a 'aḏi tagi sapolo ra Bileam, unanga 'a Beor 'ai ngowa'a nau'u, ga'a 'o tegoro toma limau Petor toma ḇanyo Efrat ma 'uḏu, tai ioronongoḏu manga bangsa rimoi #22:5 ngowa'a Amau manga daeraha. Ananga gena-ge balasu 'aḏi 'aro'o 'a Bileam re 'aḏi singadolo ma bererongo so'o ne: <<Ngoi, 'a Balak mau ngana no waro, 'age rema bangsa rimoi 'aḏi supu toma Mesir. Ananga gena-ge manga repe masala, singadolo ma tero sa'olo 'aḏi romanga toma tana'a ma re'u sitabi donga, re ananga gena-ge raḏi cori madutu ra ngoi ma tero sa'olo ananga 'aḏi tegoro tari ngalana ma biono! 6Sababu gena-ge, nange-ne pahala no sapolo ino re sikutuki bangsa gena-ge, sababu ananga lebe te'e reo ngoi. Ḏa ngoi nyengara ta'u sita'aloko re dusu'u supu toma daeraha nena-ne. Ya, ngoi reto waro: 'a guna ga'a ngana nu sibarakati, unanga ḏuanga i'a 'o sanga barakati, re 'a guna ga'a ngana nu sikutuki, unanga ḏuanga i'a 'o sanga kutuki.>>
7Gena ḏua, ngowa'a Moab manga bi-biri'i mamete'e reo ngowa'a Midian manga bi-biri'i, ananga gena-ge 'aḏi tagi re gasa ngogele di'a tukanga mamaisi, gena-ge 'a Bileam. Wakutu ananga gena-ge 'aḏi ngadolo ra Bileam kara singadolo 'a Balak 'ai bererongo. 8Ḏua 'a Bileam 'o kanau ra ananga: <<Utu nange-ne ni otu 'ane ḇato. Da-daini i'a, ngoi ḏuanga i'a to pula'a ma sa-sangoro ra ngini, gena-ge 'oru Ma JOU ḏuanga i'a 'A siajele ra ngoi.>> Dadi ngowa'a Moab manga bi-biri'i 'aḏi tegoro ra Bileam 'ai ngi'i. 9Gena ḏua, Ma Jou'ongu Madutu 'o sapolo ra Bileam re 'O kanau:<<'A guna ga'a 'age ra ngana?>> 10Re 'a Bileam 'o sangoro ra Ma Jou'ongu Madutu so'o ne:<< 'A Balak, 'olana Moab, 'a Zipor 'ai ngowa'a nau'u, unanga gena-ge 'o 'utusu ngowa'a gena-ge 'aḏi sapolo ra ngoi rema bererongo so'o ne: 11<Ngoi, a Balak, mau ngana no waro, 'age bangsa ga'a supu toma Mesir ino, re 'aḏi siromanga i'a toma tana'a ma re'u sitabi donga. Sababu gena-ge, no sapolo ino di'a no sikutuki ananga. Ḏa ngoi nyengara ta'u parangi singadolo to dusu'u ananga 'aḏi supu.> >> 12Mada'a Ma Jou'ongu Madutu 'o kanau ra Bileam so'o ne:<<Awa no tagi mamete'e ra ananga. Awa no sikutuki bangsa gena-ge, sababu bangsa gena-ge Ngoi ta'u sibarakati ḏua.>> 13Dadi, 'a Bileam 'o momi'i 'orasa ma daini i'a kara 'o kanau ra Balak 'ai so-soma'a: <<Maḏibo taninga daeraha, sababu Ma JOU 'o pula'a loasa ua ngoi to tagi mamete'e ra ngini.>> 14Ḏua ngowa'a Moab manga bi-biri'i gena-ge 'aḏi tagi ḏibo re talaḏi ra Balak, kara 'aḏi kanau:<<'A Bileam 'o oḏu'u sapolo mamete'e ra ngomi.>>
15Mada'a 'olana Balak 'o 'utusu moju manga bi-biri'i lebe repe ga'a lebe la-lamo'o reo bi-biri'i ma mulaingi. 16Wakutu ananga gena-ge 'aḏi ngadolo ra Bileam, ananga 'aḏi kanau ra unanga:<<'A Balak, 'a Zipor 'ai ngowa'a nau'u, unanga gena-ge 'o kanau so'o ne: <Awa simaha 'ani diri sanga dola'aku di'a no sapolo ra ngoi, 17sababu ngoi ḏuanga i'a to pula'a 'ani ngogele lebe repe, re 'oru ḇato ga'a ngana no golo'o ra ngoi, ngoi ḏuanga i'a ta siḏagi. Pa'i no sapolo ḇato re no sikutuki bangsa gena-ge di'a ngoi.> >> 18Mada'a Bileam 'a sangoro ra Balak 'ai pagawe-pagawe: <<Kalaha Balak 'o pula'a guraci re salaka mo-moini tari kadato ra ngoi, ngoi to 'a'a oḏu'u 'ori i'a rimoi, ga'a 'i ma'u rapu ra Ma JOU 'ai parenta, Unanga gena-ge Ma Jou'ongu Madutu ga'a ngoi to silamo'o re siḏubuso. 19Mada'a, pahala ngini ḏi'i ma tero sa'olo so-soma'a ma mulaingi, ngini ni tegoro 'ane toma utu nange-ne, la ngoi to waro, Ma JOU mau 'o kanau ma tero bolo ma lelegu ra ngoi.>> 20Toma lobi'i gena-ge, Ma Jou'ongu Madutu 'o sapolo ra Bileam re 'O kanau ra unanga:<<Sababu ngowa-ngowa'a gena-ge raḏi sapolo di'a 'aro'o ngana, jau-jau no tagi mamete'e ra ananga. Mada'a 'oru ḇato ga'a Ngoi ta siajele ra ngana, pa'i gena-ge ḇato ngana balasu na si'a'a.>> 21Ḏua 'a Bileam 'o momi'i da-daini i'a, re 'a palene ma kaladai ma were'a ma ḏe-ḏegoro, kara 'o tagi mamete'e ngowa'a Moab manga bi-biri'i.
'A Bileam 'ai kaladai ma were'a re Ma JOU 'ai mala'ekata
22:22-40
22Mada'a toma 'orasa Bileam 'o tagi mamete'e ngowa'a Moab manga bi-biri'i, Ma Jou'ongu Madutu 'ai duruta ga'a ma tero sa'olo u'u, enanga 'i leja-lejanga, re Ma JOU 'ai mala'ekata 'o made-de'oso toma ngo'omo ma dara di'a 'o lawana ananga. Toma 'orasa gena-ge, 'a Bileam 'o palene tai kaladai ma were'a mamete'e rai falalomu nau'u nga muḏiḏi ga'a 'aḏi tagi rou. 23Wakutu kaladai gena-ge 'i oḏi'i Ma JOU 'ai mala'ekata 'o made-de'oso toma ngo'omo rema samaranga toma giama, kaladai gena-ge 'i malalo'o mete'e ngo'omo lelegu singadolo 'i osama toma guḏa. Re Bileam 'a ca'olo kaladai gena-ge rai didiki, la 'i ḏibo i'a toma ngo'omo. 24Gena ḏua, Ma JOU 'ai mala'ekata 'i tagi 'i made-de'oso toma ngo'omo ga'a 'i peletoro toma guḏa-guḏa 'anggur 'age rema ge-gelo maḏi kau'u kuwiḏa re kuḇali. 25Wakutu kaladai ma were'a gena-ge 'i oḏi'i Ma JOU 'ai mala'ekata gena-ge, enanga 'i sibitungu i'a toma ge-gelo maḏi singadolo 'a Bileam 'ai rou 'i kalapatu toma ge-gelo maḏi. Dadi unanga dadunu 'o ca'olo ma kaladai gena-ge. 26Ḏua Ma JOU 'ai mala'ekata 'i tagi siboloto re 'i made-de'oso toma ngi'i rimoi ga'a peletoro singadolo ngo'omo la-lalo'o 'i cua bae toma kuwiḏa bae toma kuḇali. 27Wakutu kaladai gena-ge 'i oḏi'i Ma JOU 'ai mala'ekata, enanga 'i mapagara, re 'a Bileam toma kaladai ma ḏuḏunu. Dadi 'a Bileam 'o ruta, ḏua 'a ca'olo ma kaladai gena-ge rai didiki. 28Ḏua Ma JOU 'o 'a'a kaladai ma were'a nga'unu 'i kanau. Re enanga gena-ge 'i kanau ra Bileam: <<Ngoi to 'a'a sala rimoi i'a mai ua ra ngana! Mada'a ngana no ca'olo ngoi soi ro'ange!>> 29'A Bileam 'o sangoro i'a toma kaladai gena-ge: <<Sababu ngana no 'a'a ngoi ma tero sa'olo ngowa'a haga. Na'o tari giama rema samaranga, tantu ḏua nange-ne ngoi tini sengene.>> 30Mada'a kaladai gena-ge 'i sano ra Bileam: <<Ngoi nena-ne ngana 'ani kaladai ga'a no palene nga'ene moju singadolo nange-ne! Soi muḏuo ḏua ngoi to 'a'a so'o nena-ne ra ngana?>> Bileam 'a sangoro: <<Ua.>>
31Gena ḏua, Ma JOU 'o 'a'a Bileam nga'unu 'o oḏi'i Ma JOU 'ai mala'ekata ga'a 'o made-de'oso toma ngo'omo rema samaranga tai giama. Ḏua 'a Bileam 'o mapagara singadolo 'ai biono ngadolo toma tana'a. 32Ma JOU 'ai mala'ekata 'o kanau ra unanga: <<Ngana no sala mode-mode'e sababu ngana no ca'olo kaladai ma were'a gena-ge singadolo soi ro'ange! Coba no oḏi'i, Ngoi nena-ne ga'a To sapolo di'a dadi 'ani lawana, sababu ngo'omo nena-ne enanga 'i gasa toma bahala. 33Wakutu kaladai gena-ge 'i oḏi'i Ngoi, enanga 'i malalo'o soi ro'ange ḏua. Na'o enanga 'i malalo'o ua Tari biono, tantu ḏua ngana masiretene Ngoi tini sengene toma 'orasa gena-ge ḏua, re ma kaladai Ngoi to sibebasa enanga 'i 'ahu.>> 34Ḏua Bileam 'o kanau ra Ma JOU 'ai mala'ekata:<<Ngoi reto 'a'a ḏosa, sababu ngoi to waro ua, mangale Ngana nena-ne no made-de'oso toma ngo'omo di'a lawana ngoi. Dadi nange-ne, na'o 'ari ḏo-ḏagi gena-ge 'i sala Tani momina, ngoi ḏuanga i'a to maḏibo.>> 35Mada'a Ma JOU 'ai mala'ekata 'o kanau ra Bileam: <<Dadunu tagi moju mamete'e reo ngowa-ngowa'a gena-ge, mada'a pa'i 'Ari demo ḇato ga'a Ngoi ḏuanga i'a Ta siajele ra ngana, ngana balasu na sikanau.>> Dadi 'a Bileam dadunu 'o tagi moju mamete'e rea Balak 'ai so-soma'a; gena-ge ngowa'a Moab manga bi-biri'i.
'A Balak 'o golo'o 'a Bileam 'o sikutuki Israel
22:36-23:3
36Wakutu 'a Balak 'o 'isene, mangale 'a Bileam 'o sapolo, unanga 'o supu totoma 'a Bileam singadolo toma limau Moab ma'u bati reo Ḇanyo Arnon, toma tana'a gena-ge ma bati ma dere. 37Re 'a Balak 'o kanau ra Bileam so'o ne:<<Ngoi reto 'utusu ngowa'a Moab manga bi-biri'i 'aḏi tagi 'aro'o ngana! Wakutu ngoi to 'aro'o ngana ma mulaingi, i'a sa'olo ngana no sapolo ua ra ngoi? No fikiri ngoi nena-ne nga'unu ua pula'a 'ani ngogele pai-pai'i!>> 38Ḏua Bileam 'o kanau ra Balak: <<Oḏi'i, nange-ne ngoi reto sapolo ra ngana. Mada'a 'ari kuasa cua di'a to siajele 'oru ḇato ra ngana? Demo ga'a Ma Jou'ongu Madutu ḏuanga i'a 'a sigare tari madanga ma dara, pa'i gena-ge ḇato ngoi ḏuanga i'a ta sikanau ra ngana.>> 39Gena ḏua, Bileam 'o tagi mamete'e rea Balak re ananga nga muḏiḏi 'aḏi ngadolo toma limau Kiryat-Huzot. 40Toma ngi'i gena-ge, 'a Balak 'o sidoa'a 'ai sapi ma nau'u muḏuo i'a reo 'abingi re doba toma duo-duo sa'olo manga jou kara unanga gena-ge 'o siḏingoto ma la-la'eme balangu moi-balangu moi ra Bileam re tai ngowa'a Moab manga bi-biri'i ga'a mamete'e ra unanga.
41Ma ḇiḇini ino, 'a Balak 'o sidola'a Bileam re 'o gasa unanga 'aḏi pere Sau Baal.#22:41 Bamot-Baal ma ngale Sau Baal Toma ngi'i gena-ge 'a Bileam 'o oḏi'i pa'i bangsa Israel ma suyu'u ma daeraha ma dere madutu ḇato.
2025 Indonesian Bible Society (LAI)