Nyo-nyoimi 19
19
Ḇanyo di'a sigofi diri
19:1-22
1Ma JOU 'o kanau ra Musa rea Harun rema betongo so'o ne: 2<<Nena-ne hukumu ma 'atoranga ga'a Ma JOU 'o parenta re 'o kanau: <Siajele toma ngowa'a Israel, la ananga balasu 'aḏi gasa sapi ma ngowa ma were'a kolili rimoi ga'a ma lese 'i lolara, re 'i ḇokeke ceka'a i'a mai ua re sipajeko soi moi i'a mai nyangu. 3Ngini balasu ni pula'a ma sapi gena-ge ra 'imam Eleazar kara ngowa'a balasu ya gasa sisupu toma suyu'u ma daeraha ma ḏuḏunu. Gena ḏua na tola'a toma 'imam 'ai biono. 4Gena ḏua, 'imam Eleazar balasu 'o 'oro sapi gena-ge ma ngaunu ceka'a ua rai giama ma rarag̱a, kara 'a siji-jiri soi tumudingi toma Suyu'u Lo-lomu papolo toma biono. 5Gena ḏua, ma sapi ma were'a gena-ge 'i sitau'u simoini toma 'imam 'ai biono: ma eno'o, ma la'eme re ma ngaunu balasu sitau'u simoini, sirimoi rema kio'o. 6Re 'imam balasu 'oro ate aras, hisop re ḇa'a kolili madutu re siupa'a mo-moini gena-ge toma u'u ma golona ga'a 'i sitau'u simoini ma sapi gena-ge. 7Ḏua, 'imam balasu 'o 'uju 'ai baju re ma'ori'i. Gena ḏua, kara osama toma suyu'u ma daeraha ma dara. Mada'a 'imam gena-ge 'o najis singadolo wangere soḏu. 8Ngowa'a matengo i'a ga'a 'o tau'u simoini ma sapi gena-ge, ḏi'i balasu 'o 'uju 'ai baju kara unanga 'o ma'ori'i, re unanga 'o najis singadolo wangere soḏu. 9Dadi ngowa'a matengo ma lelegu ga'a 'ofi ra Ma JOU 'ai momina, unanga balasu 'o lomu sapi ma korou'u gena-ge re sigare toma ngi'i 'ofi rimoi ra Ma JOU 'ai momina ga'a toma suyu'u ma daeraha ma ḏuḏunu. Mo-moini gena-ge 'i sigogono di'a ngowa'a Israel ma toropo kara sicapuru reo ḇanyo di'a sigofi diri. Sapi gena-ge jou-jou di'a sigofi ngowa'a ra Ma JOU 'ai momina. 10Re ngowa'a ga'a lomu sapi ma korou'u gena-ge, unanga balasu 'o 'uju 'ai baju, re unanga 'o dadi najis moju singadolo wangere soḏu. Gena-ge 'i dadi putusanga rimoi kasingado-ngadolo i'a bae ngowa'a Israel bolo ngowa'a tagi-tagi ino ga'a 'aḏi tegoro taninga sigolona.
11'A guna ḇato ga'a cigi mayeti, unanga 'o dadi najis moju ma di'ara wangere tumudingi. 12Unanga balasu 'o sigofi 'ai diri reo ḇanyo sicapuru rema sapi ma korou'u gena-ge toma wangere ma soi ro'ange, re toma wangere ma soi tumudingi kara unanga ro dadi 'ofi. Mada'a na'o toma wangere ma soi ro'ange re wangere ma soi tumudingi, unanga 'o sigofi ua 'ai diri re unanga 'o dadi 'ofi ua. 13'A guna ḇato ga'a cigi mayeti, gena-ge 'a guna ḇato ga'a ro sengene 'ai lese re 'o sigofi ua 'ai diri, unanga 'o sinajis Ma JOU 'ai Suyu'u Lo-lomu. Ngowa'a gena-ge balasu 'o sisupu toma ngowa'a Israel manga sigolona. Sababu ḇanyo ga'a 'i sigofi diri 'i siajala ua ra unanga 'ai diri. Dadi unanga 'o najis moju. 'Ai najis gena-ge 'i sitatapu ra unanga moju.
14Nena-ne enanga ma hukumu, na'o matengo i'a 'o sengene toma suyu'u ḏu moi i'a: 'a guna ḇato ga'a osama bolo 'a guna ḇato ga'a 'age toma suyu'u gena-ge ma dara ananga mo-moini 'aḏi dadi najis ma di'ara wangere tumudingi. 15Giu'u rimoi re rimoi ga'a 'i welanga rema damunu mode'e ua, enanga gena-ge 'i dadi najis. 16'A guna ḇato ga'a toma daeraha rurubu ga'a cigi ngowa'a sengene sababu ngowa'a 'u sisengene reo samaranga, bolo ngowa'a sengene kama sababu ua, bolo 'o cigi manusia ma obo-obongo, bolo 'o kubu; ngowa'a gena-ge 'o najis ma di'ara wangere tumudingi. 17Di'a sigofi ngowa'a ga'a najis, ngowa'a ma lelegu balasu 'o 'oro ceka'a ua sapi kolili ma were'a ma korou'u toma jou-jou ino ga'a sitau'u simoini di'a sigofi ngowa'a. Re ngowa'a gena-ge sigare toma giu'u ma dara kara ngowa'a ma lelegu 'a dogo ḇanyo sa'i. 18Gena ḏua, ngowa'a matengo ga'a ro 'ofi ra Ma JOU 'ai momina balasu 'a 'oro ma hisop kara 'a sitono toma ḇanyo sa'i gena-ge re 'a siji-jiri toma suyu'u ma re'u, toma pakakasa mo-moini ma re'u. Rema duhu so'o gena-ge toma ngowa-ngowa'a mo-moini gena-ge ga'a 'age manga re'u, re ra guna ḇato 'ai re'u ga'a 'o cigi obo-obongo, bolo toma ngowa'a 'ai re'u ga'a 'o cigi ngowa-ngowa'a ga'a raḏi sengene sababu ngowa'a ya'u sisengene bolo 'o cigi toma ngowa'a ga'a sengene ma sababu ua, bolo 'o cigi toma kubu. 19ngowa'a ga'a 'ofi ra Ma JOU 'ai momina, unanga gena-ge balasu siji-jiri reo ḇanyo gena-ge toma ngowa'a ga'a najis gena-ge toma wangere ma soi ro'ange re toma wangere ma soi tumudingi ḏi'i. Dadi toma wangere ma soi tumudingi gena-ge, unanga balasu 'o sigofi ngowa'a najis gena-ge re ngowa'a gena-ge balasu 'o 'uju 'ai baju re ma'ori'i, ḏua unanga ḏuanga i'a 'o dadi 'ofi toma 'orasa ma wangere soḏu. 20Mada'a ngowa'a ga'a ro najis, re 'o sigofi ua 'ai diri, ngowa'a gena-ge ngini balasu nu sisupu toma ngowa'a Israel manga toro-toropo. Unanga gena-ge ro sinajis Ma JOU 'ai Suyu'u 'Ofi-'Ofi sababu ḇanyo ga'a sigofi diri 'i siajala ua ra unanga; dadi unanga 'o najis moju. 21Gena-ge balasu 'i dadi 'atoranga di'a ngowa'a Israel kasingado-ngadolo i'a. Ngowa'a matengo i'a ga'a 'o siji-jiri ma ḇanyo ga'a sigofi diri gena-ge, unanga gena-ge balasu 'a 'uju 'ai baju. Re ngowa'a matengo i'a ga'a 'o cigi ma ḇanyo ga'a sigofi diri gena-ge, unanga gena-ge 'o dadi najis singadolo wangere soḏu. 22'Oru ḇato ga'a ngowa'a najis 'a cigi, enanga mo-moini 'i dadi najis re ngowa'a ga'a cigi enanga gena-ge, ananga 'aḏi dadi najis ḏi'i singadolo wangere soḏu.>>
2025 Indonesian Bible Society (LAI)