Nyo-nyoimi 20
20
Ngo Miryam mo sengene
20:1
1Gena ḏua, toma ngara ma mulaingi, toma musungu ma soi nyagi rata, ngowa'a Israel manga toropo mo-moini, ananga gena-ge ngowa'a Israel raḏi ngadolo toma daeraha baulaco Zin kara ananga 'aḏi side'oso manga suyu'u toma Kadesh. Toma ngi'i gena-ge ngo Miryam mo sengene 'ane kara sipalihara ḏi'i 'ane.#20:1 'A Harun 'o sengene toma musungu ma tero (33:38), ḏa ti'ara ua ngo Miryam mo sengene ḏua (20:28).
'A Musa re Harun manga ḏosa
20:2-13
2Toma daeraha gena-ge ma ḇanyo 'i cua di'a ngowa'a Israel manga toropo. Dadi ananga 'aḏi malomu sigoloḏi 'a Musa re Harun, 3kara 'aḏi rubutu ra Musa, ananga 'aḏi kanau ra unanga rema betongo so'o ne: <<Na'o ngomi mi sengene, jobilaha ngomi sengene mamete'e minga ioronongoḏu ga'a 'aḏi iranga ra Ma JOU 'ai momina! 4Mada'a ngini nga muḏiḏi ni sigasa Ma JOU 'ai 'umata toma daeraha baulaco nena-ne, la nange-ne bae ngomi bae minga haiwani piara, ḏuanga i'a mo-moini sengene toma ngi'i nena-ne! 5Sidogo ḏi'i, ngini nena-ne ni sisupu ngomi toma Mesir, re gasa ngomi toma ngi'i ma cira nena-ne! Ngi'i nena-ne ga'a ma so'ana ga'a 'ori i'a mai ua 'i konyo yoḏu'u singadolo ma gandum mai cua, ma ate ara mai cua, ma ate 'anggur re delima mai cua, re ḏi'i ḇanyo di'a ka'e mai cua!>> 6Dadi Musa re Harun 'aḏi sisoi'i toropo gena-ge re 'aḏi tagi toma Suyu'u 'Ofi-'Ofi ma ngalana ma da-daku, re 'aḏi maḏipolono manga biono ngadolo toma tana'a. Gena ḏua Ma JOU 'ai mulia 'i waiti ra ananga, 7re Ma JOU 'o kanau ra Musa rema betongo so'o ne: 8<<'Oro 'a Harun 'ai didiki ga'a toma burua jaji ma biono #Nyo. 17:10 kara ngana rani ioro 'a Harun, ngini balasu ni soma'a ngowa'a Israel manga toropo gena-ge 'aḏi malomu. Ḏua ngini nga muḏiḏi ni siajele toma sau maḏi gena-ge ga'a 'i sitalaḏi manga biono, la ma ḇanyo 'i 'usisi. Dadi rema duhu so'o gena-ge ngana no si'uisi ḇanyo toma sau maḏi gena-ge, la ananga nyengara ya ka'e re sika'e ḏi'i manga haiwani piara.>> 9'A Musa 'o 'oro 'ai didiki gena-ge toma burua jaji ma biono ra Ma JOU 'ai Suyu'u ma dara, ma tero sa'olo Unanga 'o parenta ra unanga.
'a Musa 'o ca'olo sau maḏi
10Wakutu 'a Musa re Harun, ananga nga muḏiḏi raḏi lomu ngowa'a Israel gena-ge toma sau maḏi ma biono, 'a Musa 'o kanau ra ananga so'o ne: <<Hei ngowa'a tukanga lawana, ngini ni 'isene ngoi: Toma sau maḏi nena-ne, ngomi ḏuanga i'a mi si'uisi ḇanyo di'a ngini!>> 11Gena ḏua, 'a Musa 'o tede 'a Harun 'ai di-diki ga'a tai giama, re 'o ca'olo sau maḏi gena-ge soi ḏiḏi rai didiki. Dadi ma ḇanyo 'i 'uisi lai lamo'o, singadolo ngowa'a Israel manga toropo re ananga manga haiwani piara sanga ka'e mo-moini. 12Mada'a Ma JOU 'o kanau ra Musa re Harun rema betongo so'o ne: <<Ngini ni sigare ua ninga ngo-ngaku ti-tiai ra Ngoi singadolo ni sijumu ua mangale 'Ari kuasa ma pari cua toma ngowa'a Israel manga momina. Dadi ma sababu gena-ge, ngini ni gasa ua ngowa'a Israel manga toropo nena-ne 'aḏi osama toma daeraha ga'a Ngoi ḏuanga i'a Reto pula'a ra ananga.>> 13Enanga gena-ge ḇanyo ma la'o ma lomanga Meriba,#20:13 Meriba ma ngale <<rubutu>>. ngi'i gena-ge ga'a ngowa'a Israel 'aḏi kuḏubungu ra Ma JOU, re ḏi'i toma ngi'i gena-ge Unanga 'o sijumu 'Ai diri masiretene sa'olo 'ofi-'ofi.
Ngowa'a Edom 'aḏi oḏu'u ngowa'a Israel tola'a i'a manga daeraha
20:14-21
14Gena ḏua, wakutu ngowa'a Israel manga toropo tegoro moju toma Kadesh, 'a Musa 'o 'utusu so-soma'a nga muḏuo i'a ananga gena-ge 'aḏi tagi toma ngowa'a Edom manga 'olana. Ra unanga gena-ge ananga 'u singadolo bererongo-bererongo so'o ne: <<Ngomi nena-ne ngowa'a Israel, ninga ioronongoḏu: Ngini waro ngomi minga susa re sangisara mo-moini ga'a ngomi ma basono. 15Ngomi minga ngimo-ngimono, ananga gena-ge 'aḏi tagi toma Mesir, re ma di'ara ngomi mi tegoro toma Mesir. Re ngowa'a Mesir 'aḏi 'a'a cira, bae ngomi bae minga ete re dotumu; 16singadolo ngomi mi maḏigaro'o ra Ma JOU, re Unanga 'a 'isene minga iḏingi kara Unanga 'o 'utusu mala'ekata matengo di'a sinyanyasele ngomi mi supu toma Mesir. Nange-ne ngomi remi ngadolo toma Kadesh, limau rimoi ga'a ma'u bati taninga daeraha. 17Pahala tuanga no sipula'a loasa ra ngomi, la mi tagi tola'a i'a ninga daeraha. Ngomi mi tola'a i'a ua ninga guḏa-guḏa bolo ninga guḏa-guḏa 'anggur re ngomi ka'e ua ninga ḇanyo taninga sumu. Ngomi mi tagi pa'i mete'e ngo'omo lamo'o ḇato re mi rerongo toma kuwiḏa bolo kuḇali mai ua, singadolo ngomi mi palisi'i ninga daeraha ma bati.>> 18Mada'a ngowa'a Edom 'aḏi kanau ra ananga so'o ne: << Ngini tola'a i'a yoḏu'u ngomi minga daeraha, awa singadolo ngomi mi tagi parangi ngini!>> 19Ḏua ngowa'a Israel manga so-soma'a 'aḏi kanau ra unanga so'o ne: <<Ngomi ḏuanga i'a mi tagi mete'e pa'i ngo'omo ma lamo'o ḇato, re na'o ngomi bolo minga haiwani piara ka'e ninga ḇanyo, ngomi ḏuanga i'a mi fangu. Pa'i minga go-golo'o so'o ne: pula'a loasa ra ngomi la mi tola'a i'a tagi rou.>>
20Mada'a ngowa'a Edom gena-ge 'aḏi sangoro so'o ne: <<Ngini ni tola'a i'a yoḏu'u!>>Dadi ananga 'aḏi supu manga sordado ma repe ga'a laḏi te'e talaḏi ngowa'a Israel. 21Rema duhu gena-ge ngowa'a Edom 'aḏi simaha ua ngowa'a Israel 'aḏi tola'a i'a manga daeraha. Dadi ngowa'a Israel 'aḏi mete'e ngo'omo lelegu.
'A Harun 'o sengene
20:22-29
22Ngowa'a Israel manga toropo mo-moini, ananga gena-ge ngowa'a Israel 'aḏi tagi sisoi'i tala Kadesh kara 'aḏi ngadolo toma Kie Hor. 23Re toma kie gena-ge Hor, co-cori toma Edom ma bati, Ma JOU 'o kanau ra Musa re Harun rema betongo so'o ne: 24<<'A Harun ḏuanga i'a 'o siotomo ma tero sa'olo 'ai ngimo-ngimono ga'a raḏi sengene siḏa. Unanga gena-ge ḏuanga i'a 'o osama ua toma daeraha ga'a Ma JOU ro pula'a toma ngowa'a Israel, sababu ngini nga muḏiḏi reni lawana singadolo mete'e ua 'Ari parenta toma ḇanyo Meriba ma la'o. 25'A Musa ngana balasu no gasa 'a Harun rai ngowa'a nau'u 'a Eleazar, re 'aḏi pere ie toma kie Hor. 26Re toma kie gena-ge ma tubu, Musa ngana no woi'i 'a Harun 'ai baju re sipake tai ngowa'a nau'u 'a Eleazar kara Harun 'o sengene ma tero sa'olo 'ai ngimo-ngimono ga'a 'aḏi sengene siḏa.>> 27Gena ḏua, 'a Musa 'o 'a'a mete'e ma tero Ma JOU ro parenta ra unanga. Ananga nga ḏu'ange 'aḏi pere toma kie Hor. Re ngowa'a Israel manga toropo mo-moini 'aḏi tatamo ananga gena-ge 'aḏi pere toma kie gena-ge. 28'A Musa 'o woi'i 'a Harun 'ai baju re 'a sipake ra Eleazar, 'a Harun 'ai ngowa'a nau'u. Ḏua 'a Harun 'o sengene toma kie gena-ge ma tubu. Gena ḏua, 'a Musa re Eleazar 'aḏi 'uci da'u kie tala. 29Wakutu ngowa'a Israel manga toropo mo-moini 'aḏi oḏi'i 'a Eleazar 'o pake 'a Harun 'ai baju, ananga raḏi waro 'a Harun ro sengene. Ḏua ngowa'a Israel gena-ge mo-moini 'aḏi rerese ma gaḏi, ma di'ara wangere nyagi ro'ange.
2025 Indonesian Bible Society (LAI)