Nyo-nyoimi 18
18
'Imam re ngowa'a Lewi manga munara re manga hasili
18:1-32
1Dadi Ma JOU 'o kanau ra Harun rema betongo so'o ne: <<Ngana nena-ne re 'ani ngowa-ngowa'a nau'u re 'a Kehat 'ai ete re dotumu ma ngitu re ngale, ngini mo-moini ḏuanga i'a ni doiti ninga ga'a ma rapu masiretene ga'a mete'e reo Suyu'u 'Ofi-'Ofi. Mada'a pa'i ngana rani ngowa-ngowa'a nau'u ḇato, ngini gena-ge balasu ni doiti ninga ga'a ma rapu ga'a mete'e 'imam ma ḏe-ḏegoro. 2Soma'a ḏi'i 'ani ioro re nongoḏu toma suku Lewi, gena-ge 'ani ete re dotumu ma suku, la 'aḏi mamete'e rea ngana di'a ananga 'aḏi riono ngana, toma 'orasa ngana re 'ani ngowa-ngowa'a nau'u 'aḏi siḏagi manga munara toma Suyu'u Lo-lomu ma biono. 3Ananga balasu ya siḏagi manga munara ra ngana, re ananga manga munara toma suyu'u mo-moini; pa'i ma pakakasa toma Kamara 'Ofi-'Ofi re toma jou-jou tau'u ma ngi'i ḇato ananga 'aḏi masebanga yoḏu'u, awa singadolo 'aḏi sengene, bae ananga bae ngana. 4Ananga balasu 'aḏi marimoi ra ngana re siḏagi manga munara di'a Suyu'u Lo-lomu mete'e enanga gena-ge ma munara rimoi re rimoi. Mada'a ngowa'a ma lelegu mai ua awa ananga gena-ge 'aḏi masebanga ra ngana. 5Re ngini nena-ne ḏi'i balasu siḏagi ninga munara toma Kamara 'Ofi-'Ofi re ninga munara toma jou-jou tau'u ma ngi'i. Rema duhu so'o gena-ge, soi rimoi i'a mai ua ngowa'a Israel sanga Ngoi 'ari duruta re Ta'u sihukumu. 6Mode-mode'e Ngoi Reto 'oro 'ani ioro re nongoḏu, gena-ge ngowa'a Lewi ma na-nau'u toma ngowa'a Israel manga sigolona sa'olo bu-bula'a di'a ngana. Ngowa-ngowa'a gena-ge ga'a siwola i'a di'a Ngoi, Ma JOU, di'a siḏagi munara toma Suyu'u Lo-lomu. 7Mada'a ngana nena-ne rani ngowa-ngowa'a nau'u balasu ni siḏagi munara mo-moini sa'olo 'imam di'a jou-jou tau'u ma ngi'i re di'a Kamara lai 'Ofi-'Ofi, munara gena-ge ta ngini ḇato. Ngoi, Ma JOU ro pula'a ninga 'imam ma ḏe-ḏegoro sa'olo 'Ari bu-bula'a ra Ngoi ino, Ma JOU. Dadi na'o matengo i'a ma lelegu mai ua masebanga pakakasa ma 'ofi-'ofi, ngowa'a gena-ge balasu sihukumu sengene.>>
8Ma JOU 'o kanau moju ra Harun rema betongo so'o ne: <<Mode-mode'e Ngoi nena-ne Reto siwatasa ra ngana di'a jou-jou ga'a siwola i'a di'a Ngoi. Ngowa'a Israel manga jou-jou mo-moini ga'a siwola i'a di'a Ngoi, enanga gena-ge Ta sipula'a ra ngana re tani ngowa-ngowa'a nau'u sa'olo ninga balangu. Re gena-ge 'i dadi 'atoranga rimoi kasingado-ngadolo i'a. 9Nena-ne 'ani balangu toma jou-jou mo-moini ga'a lai 'ofi-'ofi, gena-ge toma balangu ga'a tau'u ua: ananga manga jou-jou mo-moini jou-jou ngo-ngoromo mo-moini, jou-jou mo-moini ga'a sigofi ngowa'a ra Ma JOU 'ai momina, jou-jou ngali rugi mo-moini. Mo-moini gena-ge ga'a ngowa'a Israel 'aḏi sidoa'a ra Ngoi, re enanga gena-ge ma balangu lai 'ofi-'ofi madutu 'i dadi 'ani balangu re 'ani ngowa-ngowa'a nau'u manga balangu. 10Toma ngi'i lai 'ofi-'ofi ma dara, ngini balasu 'o oromo jou-jou gena-ge. Na-nau'u mo-moini nyengara ya oromo, sababu enanga gena-ge 'i dadi balangu 'ofi-'ofi di'a ngana. 11Re nena-ne ḏi'i ngini ninga balangu: jou-jou ga'a siwola i'a ra ananga ino manga bu-bula'a ma lelegu, siroimi ḏi'i jou-jou mo-moini ga'a ngowa'a Israel ya tede ie. Mo-moini gena-ge Ngoi ta pula'a ra ngana re di'a 'ani ngowa-ngowa'a nau'u re ngowa-ngowa'a were'a mamete'e ra ngana. Gena-ge 'o 'atoranga rimoi ga'a sitatapu ḏua di'a kasingado-ngadolo i'a. Ngowa'a mo-moini tani ngitu re ngale ga'a 'ofi mete'e 'agama ma 'atoranga, ananga nyengara ya oromo. 12Goroho zaitun ga'a ma la-la madutu mo-moini re 'anggur ma ḇanyo ma la-la madutu mo-moini re gandum ma la-la madutu mo-moini, enanga mo-moini ma hasili ma mulaingi, ananga ya gasa sa'olo manga jou-jou ra Ngoi, Ma JOU, Ngoi ta pula'a ra ngana. 13Tana'a ma hasili ma mulaingi mo-moini ga'a ananga ya gasa sa'olo jou-jou ra Ma JOU, enanga gena-ge ḏi'i 'i dadi 'ani balangu. Ngowa'a mo-moini tani ngitu re ngale ga'a 'ofi mete'e 'agama ma 'atoranga, ananga nyengara ya oromo. 14Mo-moini ga'a siwola i'a di'a Ma JOU toma ngowa'a Israel manga sigolona, enanga gena-ge 'i dadi 'ani balangu. 15Mo-moini ga'a 'i siḏe-ḏegoro i'a ma mulaingi: bae manusia bolo haiwani ga'a ananga ya gasa sa'olo jou-jou ra Ma JOU, enanga gena-ge 'i dadi 'ani balangu. Kalaha so'o gena, manusia ma ngowa'a nau'u ma jomolo, ngini balasu na tuusu re ḏi'i haiwani ma ngowa ma nau'u ma jomolo ga'a najis, ngini balasu na tuusu. 16Mangale pipisi du-duusu, mulaingi ma 'umuru ngara moi, ngana balasu na tuusu mete'e enanga ijana, gena-ge syikal salaka ngai romotoa mete'e syikal salaka ga'a 'i sipake toma Suyu'u 'Ofi-'Ofi; syikal nena-ne ma ḏubuso gera nyagi romoḏiḏi #18:16 Gera nyagi romoḏiḏi ma ḏubuso ma tero gram nyagi romotoa re tumudingi. 17Mada'a sapi ma ngowa ma nau'u ma jomolo, doba bolo 'abingi ma ngowa ma nau'u ma jomolo ngana na tuusu; gena-ge mo-moini 'i siwo-wola i'a di'a Ngoi, Ma JOU. Sababu ma ngaunu ngana na siji-jiri toma jou-jou tau'u ma ngi'i re ma gaji na sitau'u sa'olo jou-jou ngo-ngoromo rema bounu 'i sisanangi Ma JOU 'ai 'akala re sinyingara. 18Mada'a ma la-la'eme gena-ge ngana 'ani balangu ma tero sa'olo ma katere re ma busuu'u kuwiḏa, jou-jou gena-ge ga'a na tede ie ra Ngoi, Ma JOU. 19Jou-jou ga'a siwola i'a mo-moini, gena-ge jou-jou 'ofi-'ofi ga'a ngowa'a Israel ya gasa ra Ma JOU, Ngoi ta pula'a ra ngana re tani ngowa-ngowa'a nau'u re ngowa-ngowa'a were'a mamete'e ra ngana sa'olo 'atoranga rimoi di'a kasingado-ngadolo i'a. Enanga gena-ge 'o jaji ga'a 'i ngali ua di'a kasingado-ngadolo i'a talaḏi ra Ma JOU di'a ngana re 'ani ju'uda.>> 20Re Ma JOU 'o kanau moju ra Harun rema betongo so'o ne; <<Ngana no sanga warisi ua re no sanga balangu ua tamanga sigolona tamanga daeraha. Ngoi nena-ne ngana 'ani balangu re 'ani warisi toma ngowa'a Israel manga sigolona.
21Mangale suku Lewi, Ngoi reto pula'a sa'olo ananga manga jou-jou ma balangu moi toma balangu nyagi moi ma dara, toma ngowa'a Israel ino, enanga gena-ge ma tero sa'olo ananga manga warisi, di'a sibalasa manga munara toma Suyu'u 'Ofi-'Ofi. 22Dadi awa ngowa'a Israel 'aḏi masebanga toma Suyu'u 'Ofi-'Ofi, singadolo awa 'aḏi eta'a toma ḏosa singadolo 'aḏi sengene; 23mada'a ngowa'a Lewi, pa'i ananga ḇato ga'a balasu siḏagi manga munara toma Suyu'u 'Ofi-'Ofi re ananga balasu ya doiti manga ga'a ma rapu ma hukumana. Re ananga 'aḏi sanga ua manga warisi toma ngowa'a Israel manga sigolona, gena-ge 'atoranga rimoi ga'a sitatapu ḏua di'a kasingado-ngadolo i'a di'a ngana re 'ani ju'uda tala, 24sababu jou-jou ma balangu moi toma balangu nyagi moi ma dara ga'a ngowa'a Israel ya sidoa'a sa'olo jou-jou siwola di'a Ngoi Ma JOU, Ngoi ta pula'a di'a ngowa'a Lewi sa'olo manga warisi. Sababu gena-ge Ngoi reto kanau mangale ananga: Ananga 'aḏi sanga ua manga warisi toma ngowa'a Israel manga sigolona.>>
25Ma JOU 'o kanau ra Musa ma betongo so'o ne: 26<Re ḏi'i ngana balasu siajele toma ngowa'a Lewi re kanau ra ananga: <Na'o ngini ni sanga bu-bula'a toma ngowa'a Israel jou-jou ma balangu rimoi toma balangu nyagi moi ma dara ga'a Ngoi to pula'a ra ngana 'i dadi 'ani warisi gena-ge ra ananga ino, kara ngini balasu ni sipula'a ma balangu rimoi sa'olo ninga jou-jou ga'a 'i siwola i'a ra Ma JOU. Gena-ge, ma balangu moi toma balangu nyagi moi ma dara taninga warisi mo-moini. 27re Lewi manga jou-jou ma balangu gena-ge ḏuanga i'a 'i siroimi sa'olo ninga jou-jou ga'a siwola i'a di'a Ngoi, Ma JOU ma tero sa'olo ma gandum toma ngi'i taro-taro'o re ma tero sa'olo ma 'anggur ma ḇanyo ma hasili mo-moini toma 'anggur ma sowo'o ma jo-jo'o ma ngi'i. 28So'o gena ḏi'i, ngini balasu ni pula'a sa'olo jou-jou ga'a siwola i'a ra Ma JOU toma jou-jou mo-moini ma balangu moi toma balangu nyagi moi ma dara ga'a ngini sanga toma ngowa'a Israel. Re enanga 'i sipula'a sa'olo jou-jou ga'a siwola i'a di'a Ma JOU ngini balasu sipula'a ra 'imam Harun. 29Toma jou-jou mo-moini ino ga'a 'i sipula'a ra ngana, ngana balasu no pula'a mo-moini ga'a 'ori i'a ma rousu i'a ra Ma JOU, enanga gena-ge 'i dadi sa'olo 'ori i'a 'ofi-'ofi. 30Re ḏi'i ngana balasu ni kanau toma ngowa'a Lewi: <Na'o ngini reni siwola i'a 'ori i'a ma rousu i'a di'a Ngoi, Ma JOU, ma jingianga 'i dadi di'a ngini ngowa'a Lewi re ngini balasu ni siroimi enanga gena-ge sa'olo gandum ma hasili toma ngi'i taro-taro'o re 'anggur ma hasili toma 'anggur ma sowo'o ma jo-jo'o ma ngi'i. 31Re ngini nyengara ni oromo ma jingianga gena-ge toma ngi'i le'a ḇato, ngini re ninga wala ma dara mo-moini. Sababu gena-ge ninga ngogele di'a sibalasa ninga munara toma Suyu'u Lo-lomu. 32Re na'o ngini ni siwola i'a 'ori i'a ma rousu i'a di'a Ngoi, Ma JOU ngini ni doiti ḏosa ua. Mada'a ngini ni sinajis awa ngowa'a Israel manga jou-jou, awa singadolo ngini ḏuanga i'a ni sengene ua.> >>
2025 Indonesian Bible Society (LAI)