Nyo-nyoimi 17
17
'A Harun 'ai didiki 'i bunga
1Ma JOU 'o kanau moju ra Musa rema betongo so'o ne: 2<<Siajele toma ngowa'a Israel re soma'a ananga 'aḏi pula'a didiki ra ngana, ngimo-ngimono manga ngitu re ngale ma bi-biri'i rimoi ma didiki ngai moi. Didiki gena-ge ma bi-biri'i balasu ya pula'a ra ngana, ngimo-ngimono manga ngitu re ngale rimoi re rimoi, mo-moini ma repe guḏi moi re ngai ḏiḏi. Ḏua silefo ngimo-ngimono ma ngitu re ngale ma bi-biri'i manga lomanga tamanga didiki. 3Mada'a ra Lewi 'ai didiki balasu 'i silefo 'a Harun 'ai lomanga. Toma ngimo-ngimono manga ngitu re ngale rimoi re rimoi ma bi-biri'i balasu remanga didiki ngai moi. 4Gena ḏua, 'a Musa ngana no sigare mo-moini gena-ge toma Suyu'u Lo-lomu ma dara toma burua jaji ma biono, ngi'i ga'a Ngoi, Ma JOU biasa ma'u sanga ra ngini. 5Re ngowa'a ga'a Ngoi, Ma JOU to cumutu, ngowa'a gena-ge 'ai didiki 'i do'oḏi. Rema duhu so'o gena-ge, Ngoi mau to sitogumu ngowa'a Israel manga kuḏubungu ga'a ya sikanau ra ngana, singadolo Ngoi ta 'isene riwara.>> 6'A Musa 'o kanau toma ngowa'a Israel. Re ngimo-ngimono manga ngitu re ngale rimoi re rimoi ma bi-biri'i, ananga gena-ge 'aḏi pula'a didiki matengo ngai moi ra unanga mete'e manga ngimo-ngimono ma ngitu re ngale, ma didiki mo-moini ma repe guḏi moi re ngai ḏiḏi, re 'a Harun 'ai didiki 'age ra ananga manga didiki ma sigolona gena-ge. 7'A Musa 'o side'oso ma didiki mo-moini gena-ge talaḏi ra Ma JOU, gena-ge toma Suyu'u Lo-lomu ma dara toma burua jaji ma biono. 8Ma ḇiḇini ino wakutu 'a Musa 'o osama toma Suyu'u Lo-lomu gena-ge ma dara, 'o oḏi'i 'a Harun toma suku Lewi 'ai didiki re tooḏi'i, ma do'oḏi ganapu bunga re sela re 'i sisupu badam ma sowo'o. 9Gena ḏua, Musa 'a gasa sisupu didiki simoini talaḏi ra Ma JOU di'a ngowa'a Israel mo-moini; ananga ya oḏi'i ḏua ya 'oro manga didiki matengo re matengo. 10Re Ma JOU 'o kanau ra Musa: <<Siḏibo i'a 'a Harun 'ai didiki toma burua jaji ma biono re gogono sa'olo nana'o di'a ngowa-ngowa'a ma lawana, singadolo ngana na sitogumu ananga manga kuḏubungu ra Ngoi, singadolo Ngoi ta 'isene riwara, la ananga ḏuanga i'a 'aḏi sengene awa.>> 11Re 'a Musa 'a si'a'a so'o gena-ge; ma tero Ma JOU 'o parenta ra unanga, so'o gena-ge unanga 'a si'a'a.
12Mada'a ngowa'a Israel 'aḏi kanau ra Musa: <<Ngomi mode-mode'e ḏuanga i'a mi moini, ngomi ḏuanga i'a mi iranga, ngomi mo-moini ḏuanga i'a mi iranga. 13'A guna ḇato ga'a ma sebanga ra Ma JOU 'ai Suyu'u, unanga ḏuanga i'a 'o sengene. Dadi tantu ḏua ngomi ḏuanga i'a mi iranga moini!>>
2025 Indonesian Bible Society (LAI)