Nyo-nyoimi 16
16
Korah, Datan re Abiram ananga 'aḏi lawana 'a Musa re 'a Harun
16:1-50
1Toma 'orasa rimoi 'a Korah, unanga gena-ge 'a Yizhar 'ai ngowa'a nau'u, re ḏi'i 'a Kehat 'ai danongo toma suku Lewi ino, re 'a Datan re Abiram ananga nga muḏiḏi 'a Eliab 'ai ngowa-ngowa'a nau'u, re 'a On, unanga gena-ge 'a Pelet 'ai ngowa'a, ananga nga ḏu'ange toma suku Ruben ino, ananga 'aḏi sigaro'o ngowa-ngowa'a 2la ngowa'a gena-ge nga ḏuata 'aḏi malawana Musa, re sidogo ḏi'i ngowa'a nga latu ḏiḏi re nga nyagi romotoa, ananga gena-ge ngowa'a Israel manga bi-biri'i, ngowa-ngowa'a ga'a remanga lomanga re sanga cumutu toma ngowa'a Israel manga toro-toropo ino. 3Dadi ananga 'aḏi malomu sigoloḏi 'a Musa re 'a Harun, re 'aḏi kanau ra ananga nga muḏiḏi rema betongo so'o ne:<<Wangere nange-ne gena ḏua. Sababu ngowa'a Israel manga toropo mo-moini 'i siwola i'a di'a Ma JOU, re Ma JOU 'age tamanga sigolona. Dadi, ma sababu 'oru ngini mahie-hie ninga diri ra Ma JOU 'ai ngowa-ngowa'a manga toropo ma sigolona?>>
4Wakutu 'a Musa 'a 'isene hali gena-ge, unanga 'o mapagara 'ai biono ngadolo toma tana'a. 5Re unanga 'o kanau ra Korah re 'ai me-mete'e gena-ge toma ngowa'a Israel ma toropo mo-moini ino:<<Da-daini i'a Ma JOU ḏuanga i'a 'o siajele mangale 'a guna ga'a ta Ma JOU, re 'a guna ga'a siwola i'a di'a Ma JOU, re Unanga gena-ge ḏuanga i'a 'o simaha ngowa'a gena-ge masebanga i'a ra Unanga. Ngowa'a ga'a ḏuanga i'a Unanga 'u cumutu ga'a nyengara masebanga i'a ra Unanga. 6Balasu si'a'a so'o ne: hei Korah, ngana re 'ai me-mete'e, ni 'oro u'u ma ngi'i, 7hei ngowa-ngowa'a Lewi manga na-nau'u wangere nange-ne, gena ḏua! Sigare u'u ma ngaboso toma u'u ma ngi'i ma dara re ma dupa toma re'u, talaḏi ra Ma JOU. Da-daini i'a, ngowa'a ga'a Ma JOU ḏuanga i'a 'U cumutu, unanga gena-ge ga'a siwola i'a di'a Unanga.>> 8Dadi 'a Musa 'o kanau ra Korah: <<Hei ngowa-ngowa'a Lewi ninga na-nau'u, coba ni 'isene! 9Sanga ua, ngini ni ḏugala nyangu, sababu mangale Ma Jou'ongu Madutu ga'a ngowa'a Israel 'aḏi silamo'o re siḏubuso, Unanga gena-ge 'o siwola i'a ngini toma ngowa'a Israel ma toropo manga sigolona ino la ngini nyengara masebanga i'a ra Unanga masiretene di'a ngini nyengara ni siḏagi munara ra Ma JOU 'ai Suyu'u 'Ofi-'Ofi re ngini ni de-de'oso Israel ma toropo mo-moini, 10re mangale ngini sanga loasa ra Unanga ino mamete'e suku Lewi manga na-nau'u di'a sebanga i'a Unanga? Mada'a nange-ne ngini mau disa moju ḏe-ḏegoro sa'olo 'imam ḏi'i! 11Sababu gena-ge, kalaha ngini ni kuḏubungu ra Harun gena-ge, mada'a mode-mode'e ngini nena-ne re ninga mete'e, ngini mo-moini ni marimoi mau ni lawana Ma JOU!>>
12'A Musa ro soma'a ngowa'a tagi 'aro'o 'a Datan re Abiram, ananga gena-ge 'a Eliab 'ai ngowa-ngowa'a nau'u, mada'a ananga 'aḏi sangoro: <<Ngomi sapolo mi oḏu'u. 13Sanga ua, Ngana no ḏugala nyangu moju sababu ngana no sigasa ngomi sisupu toma tana'a lai rousu ga'a ri romanga reo haiwani piara re tana'a ma hasili lai repe di'a no sieanga ngomi mi sengene toma daeraha baulaco, mada'a nange-ne ngana no mahie 'ani diri moju sa'olo tuanga ra ngomi! 14Sidogo ḏi'i, ngana no sigasa ngomi ua toma tana'a lai rousu ga'a ri romanga reo haiwani piara re tana'a ma hasili lai repe, bolo no pula'a ua tana-tana'a re guḏa-guḏa 'anggur sa'olo minga warisi. Mada'a nange-ne ngana tai'i no sihaga ngowa-ngowa'a nena-ne! Ngomi sapolo mi oḏu'u!>> 15Dadi 'a Musa 'o ruta lai siḏi re 'o kanau ra Ma JOU: <<Awa no dawongo ananga manga jou-jou. Soi moi i'a mai nyangu to 'oro manga keledai rimoi i'a, re soi moi i'a nyangu to 'a'a cira matengo i'a tamanga sigolona.>>
16Dadi 'a Musa 'o kanau ra Korah:<<Ngana nena-ne re ngini ninga me-mete'e moi balasu ni talaḏi ra Ma JOU toma wangere da-daini, ngana re ananga re 'a Harun. 17Re ngini matengo re matengo balasu ni gasa ninga u'u ma ngi'i sigare ma dupa toma re'u, kara ngini matengo re matengo ni gasa ninga u'u ma ngi'i talaḏi ra Ma JOU, enanga ma repe, latu ḏiḏi re nyagi romotoa, re ḏi'i ngana, Musa nena-ne rea Harun, ngini mo-moini matengo re matengo ni gasa ninga u'u ma ngi'i.>> 18Dadi ananga matengo re matengo 'aḏi oro manga u'u ma ngi'i re sigare u'u ma ngaboso toma dara re ma dupa toma re'u, kara ananga 'aḏi made-de'oso toma Suyu'u 'Ofi-'Ofi ma ngalana ma da-daku ma biono, 'age 'a Musa rea Harun ḏi'i. 19Wakutu 'a Korah 'o lomu ngowa'a Israel ma toropo mo-moini ga'a 'aḏi lawana ananga nga muḏiḏi toma Suyu'u 'Ofi-'Ofi ma ngalana ma da-daku ma biono, kara Ma JOU 'o sijumu 'ai mulia toma ngowa'a Israel ma toropo mo-moini gena-ge. 20Ma JOU 'o kanau ra Musa rea Harun: 21<<Ngini ni mawola i'a ninga diri ra ananga nena-ne manga toropo, la Ngoi jau-jau ta'u singi-ngiranga ananga.>> 22Mada'a ananga nga muḏiḏi 'aḏi mapagara manga biono ngadolo toma tana'a re 'aḏi kanau; <<Ya Ma Jou'ongu Madutu, ga'a No sipula'a 'ahu toma mo-moini ga'a 'ahu! Sanga ua Ma JOU no ruta toma ngowa'a toropo mo-moini nena-ne sababu pa'i matengo ḇato 'o baraḏosa!>> 23Dadi Ma JOU 'o kanau moju ra Musa rema betongo so'o ne: 24<<Siajele toma ngowa'a toropo gena-ge: Tagi ma ki-kiḏanga ra Korah, Datan re Abiram manga suyu'u.>>
25Gena ḏua, 'a Musa 'o tagi ra Datan re Abiram, re ngowa'a Israel manga bi-biri'i 'aḏi mete'e unanga ḏi'i. 26'A Musa 'o kanau ra ananga manga toropo gena-ge; <<Ni maki-kiḏanga toma ngowa'a kajahatana nena-ne manga suyu'u re awa ngini ni cigi manga 'ori i'a rimoi i'a, la awa ngini ni sengene ḏi'i sababu ananga manga ḏosa.>> 27Dadi ananga 'aḏi maki-kiḏanga ra Korah, Datan re Abiram manga suyu'u. Ḏua 'a Datan re Abiram, ananga gena-ge 'aḏi supu re 'aḏi made-de'oso tamanga suyu'u ma ngalana ma da-daku ma biono simete'e remanga were'a, remanga ngowa-ngowa'a remanga ngowa'a ma je-jeka'a. 28Gena ḏua 'a Musa 'o kanau: <<Reo hali nena-ne, ngini ḏuanga i'a na waro, mangale ngoi nena-ne Ma JOU ri 'utusu di'a to si'a'a mo-moini nena-ne, re nena-ne ma 'asala tari 'akala masiretene ua: 29Na'o ngowa-ngowa'a nena-ne ḏuanga i'a 'aḏi sengene ma tero manusia biasa 'aḏi sengene, re ananga ḏuanga i'a ya basono ma tero manusia ma lelegu, dadi ngoi Ma JOU ri 'utusu ua. 30Mada'a, na'o Ma JOU 'o sidadi 'ori i'a rimoi ga'a ma di'ara ne 'i dadi nyangu, re tana'a 'i welanga ma madanga re 'i nyamolo ananga sirimoi reo manga 'ori i'a rana, singadolo ananga 'aḏi 'ahu-'ahu osama toma tana'a ma dara, dadi ngini ḏuanga i'a na waro, mangale ngowa-ngowa'a nena-ne 'aḏi si'u'ua Ma JOU.>> 31Unanga aro kanau demo mo-moini gena-ge togumu i'a, dadi ma tana'a 'i suka ra ananga manga 'aḏu, 32re ma tana'a 'i welanga ma madanga re 'i nyamolo ananga remanga ngitu re ngale mo-moini re 'a Korah 'ai me-mete'e mo-moini re manga 'ori i'a rana mo-moini. 33Dadi enanga 'i dadi ra ananga so'o gena-ge re ngowa'a mo-moini ga'a 'age ra ananga mai 'aḏi osama 'ahu-'ahu toma ngowa'a senge-sengene manga ngi'i; re ananga tana'a ya'u, singadolo ananga 'aḏi iranga toma ngowa'a Israel ma toropo gena-ge manga sigolona. 34Re ngowaa Israel mo-moini ga'a 'age ma'u sebanga ra ananga, matai wiḏi wakutu 'aḏi 'isene ananga 'aḏi poa'a ga'a 'aḏi eta'a toma tana'a ma dara. Ngowa'a ga'a 'aḏi wiḏi re 'aḏi kanau: <<Awa-awa tana'a 'i nyamolo ngene ḏi'i!>> 35Re Ma JOU 'ai u'u 'i supu singadolo siro'u simoini ngowa'a bi-biri'i nga latu ḏiḏi re nga nyagi romotoa (250) ga'a 'aḏi sidoa'a dupa gena-ge.
36Ma JOU 'o kanau moju ra Musa rema betongo so'o ne: 37<<Siajele ra Eleazar, 'imam Harun 'ai ngowa'a nau'u, la unanga 'a 'oro u'u ma ngi'i toma u'u ma sigolona gena-ge. Gena ḏua, unanga balasu 'o siare ma u'u ma ngaboso gena-ge 'i ki-kiḏanga toma suyu'u ma daeraha ma ḏuḏunu, sababu mo-moini gena-ge 'i siwola i'a di'a Ngoi, Ma JOU. 38U'u ma ngi'i gena-ge toma ngowa-ngowa'a baraḏosa singadolo sifangu manga nyawa, soma'a ngowa'a 'aḏi tutu'u singinara enanga gena-ge, la ya silape toma jou-jou tau'u ma ngi'i, sababu ananga gena-ge ya sidoa'a ḏua Tari jou-jou ma ngi'i. Dadi mo-moini gena-ge 'i dadi siwola i'a di'a Ngoi, Ma JOU. Rema duhu gena-ge enanga 'i dadi nana'o rimoi di'a si'elingi ngowa'a Israel.>> 39Dadi 'imam Eleazar 'o 'oro u'u-u'u ma ngi'i gena-ge 'i si'a'a reo tamḇaga ga'a ngowa'a bi-biri'i raḏi ro'u gena-ge 'aḏi gasa, kara ya tutu'u di'a silape toma jou-jou tau'u ma ngi'i, 40Gena-ge 'i dadi nana'o di'a si'elingi ngowa'a Israel, la awa ngowa'a lelegu ra Harun 'ai ju'uda ua, ananga nyengara 'aḏi sebanga i'a di'a tau'u dupa talaḏi ra Ma JOU, re awa unanga 'o dadi ma tero sa'olo 'a Korah re 'ai toropo, ma tero sa'olo Ma JOU ro kanau ra Eleazar ga'a Musa 'a singadolo.
41Mada'a toma wangere da-daini ngowa'a Israel ma toropo mo-moini 'aḏi kuḏubungu ra Musa re Harun, ananga 'aḏi kanau: <<Ngini reni sisengene Ma JOU 'ai 'umata.>> 42Wakutu toropo mo-moini 'aḏi ma lomu di'a 'aḏi lawana 'a Musa re Harun, kara ananga 'aḏi macelolo talaḏi Suyu'u 'Ofi-'Ofi re ma kakamo 'i sidamunu gena-ge kara Ma JOU 'ai mulia 'i waiti. 43Gena ḏua 'a Musa re Harun 'aḏi tagi toma Suyu'u lo-lomu ma biono, 44re Ma JOU 'o kanau ra Musa rema betongo so'o ne; 45<<Ngini ni supu toma ngowa'a repe manga sigolona, la tado la'o ua, Ngoi nyengara to singi-ngiranga ananga.>> Ḏua ananga nga muḏiḏi 'aḏi mapagara manga biono ngadolo toma tana'a. 46'A Musa 'o kanau ra Harun: <<'Oro 'ani u'u ma ngi'i, sigare ma u'u toma dara toma jou-jou tau'u ma re'u, re sigare ma dupa toma u'u ma ngi'i gena-ge ma re'u, re no caiti tagi toma ngowa'a repe gena-ge re si'a'a ananga dadunu 'aḏi dadi marimoi moju ra Ma JOU, sababu Ma JOU 'ai duruta lai siḏi singadolo bahala mulai ri sapolo.>> 47Dadi 'a Harun 'o 'oro 'ani u'u ma ngi'i, ma tero sa'olo 'a Musa 'o siajele, kara 'o lalara i'a toma ngowa'a Israel ma toropo manga sigolona gena-ge, re 'oḏi'i ma bahala ri sapolo toma bangsa gena-ge re sigare dupa toma u'u ma ngi'i ma re'u di'a si'a'a ngowa'a gena-ge mo-moini dadunu 'aḏi dadi marimoi moju ra Ma JOU. 48Re unanga 'o made-de'oso toma ngowa-ngowa'a senge-sengene re ngowa-ngowa'a 'ahu-'ahu ma golona, kara ma bahala gena-ge 'i togumu. 49Re ananga ga'a sengene sababu ma bahala ya'u nga'unu, mo-moini ma repe nga cala nyagi moi re rata re nga latu tumudingi (14.700), siroimi nyangu ngowa-ngowa'a ga'a sengene ma sababu 'a Korah 'ai ga'a. 50Wakutu ma bahala gena-ge ri togumu, 'a Harun 'o maḏibo i'a ra Musa toma Suyu'u Lo-lomu ma ngalana ma da-daku ma biono.
2025 Indonesian Bible Society (LAI)