Nyo-nyoimi 15
15
Jou-jou ma 'atoranga
15:1-21
1Ma JOU 'o kanau moju ra Musa rema betongo so'o ne: 2<<Kanau toma ngowa'a Israel re siajele ra ananga so'o ne: Wakutu ngini osama toma daeraha ga'a ḏuanga i'a Ngoi to sipula'a di'a ngini na ḏegoro, 3re ngini mau ni sidoa'a ninga jou-jou di'a Ma JOU, gena-ge: sapi ma duo-duono, 'abingi re doba ma duo-duono, sa'olo jou-jou ga'a tau'u simoini bolo jou-jou 'oru ḇato bae jou-jou ga'a sitotomo ninga jaji bae jou-jou sababu ninga 'akala re sinyingara ma sanangi, bolo jou-jou toma 'agama ma wangere lamo'o ga'a ma 'orasa Ngoi ta sitantukanga ḏua. Rema duhu so'o gena-ge jou-jou ma bounu 'i sisanangi Ma JOU 'ai 'akala re sinyingara. 4Wakutu ngini ni gasa jou-jou gena-ge ra Ma JOU, ngini balasu ni gasa ḏi'i jou-jou gandum: gena-ge gulupungu ma rousu i'a kilo moi, sicapuru reo goroho zaitun litere rimoi. 5Gena ḏua, simete'e jou-jou ga'a tau'u simoini bolo jou-jou 'oru ḇato, di'a doba rimoi re rimoi ngini balasu ni gasa jou-jou 'anggur ma ḇanyo ma lamo'o litere rimoi. 6Mada'a na'o ninga jou-jou gena-ge 'o doba ma nau'u rimoi, dadi ngini balasu ni gasa jou-jou gandum gena-ge gulupungu ma rousu i'a ma lamo'o kilo ḏiḏi sicapuru reo goroho zaitun litere rimoi re ma jule. 7Re sa'olo jou-jou 'anggur ma ḇanyo ngini balasu na gasa litere rimoi re ma jule. Jou-jou gena-ge enanga ma bounu 'i sisanangi Ma JOU 'ai 'akala re sinyingara. 8Re na'o ngini ni gasa ninga jou-jou sapi ma ngowa ma nau'u sa'olo jou-jou ga'a tau'u simoini, bolo jou-jou 'oru ḇato bae di'a sitotomo ninga jaji bolo jou-jou sababu dadunu marimoi moju ra Ma JOU. 9Ḏua simete'e sapi ma ngowa ma nau'u gena-ge re jou-jou ma lelegu, sa'olo jou-jou gandum gena-ge gulupungu ma rousu i'a kilo ro'ange sicapuru reo goroho zaitun litere romoḏiḏi. 10Re sa'olo jou-jou 'anggur ma ḇanyo, ngini balasu ni pula'a litere romoḏiḏi. Toma 'orasa jou-jou gena-ge sitau'u, enanga ma bounu 'i sisanangi Ma JOU 'ai 'akala re sinyingara.
11<<Dadi ngini ni si'a'a so'o gena-ge bae toma sapi bolo toma doba re 'abingi rimoi re rimoi. 12Haiwani ma repe muḏuo ḇato ga'a ngini na sipula'a, ngini balasu ni si'a'a so'o gena-ge ḏi'i di'a rimoi re rimoi mete'e enanga ma repe. 13Ngowa'a Israel madutu matengo re matengo balasu si'a'a rema duhu so'o gena-ge, wakutu unanga 'o pula'a 'ai jou-jou tau'u ga'a ma bounu 'i sisanangi Ma JOU 'ai 'akala re sinyingara. 14Re na'o ngowa'a tagi-tagi ino ro tegoro taninga sigolona, bolo ngowa'a lelegu matengo i'a 'a guna ḇato toma nani ma biono i'a, ga'a 'o tegoro taninga sigolona, na'o unanga mau 'o pula'a 'ai jou-jou tau'u ga'a ma bounu 'i sisanangi Ma JOU 'ai 'akala re sinyingara, unanga ḏi'i 'a si'a'a ma tero ngini na si'a'a ḏua. 15Dadi mangale toropo ga'a ma lomu di'a silamo'o re siḏubuso Ma JOU, balasu rema 'atoranga rimoi: bae di'a ngini bolo di'a ngowa'a tagi-tagi ino taninga sigolona. Gena-ge 'i dadi 'atoranga di'a ngini re ninga ju'uda tala kasingado-ngadolo i'a. Bae ngini bolo ngowa'a tagi-tagi ino ma tero ḇato ra Ma JOU 'ai momina. 16Hukumu re 'atoranga ga'a ma tero di'a ngini re ngowa'a tagi-tagi ino.>> 17Ma JOU 'o kanau moju ra Musa: 18<<Siajele toma ngowa'a Israel re kanau ra ananga so'o ne: Na'o ngini rini osama toma daeraha ga'a Ma JOU ḏuanga i'a 'A sigasa ngini, 19dadi na'o ngini ni oromo ngo-ngoromo ga'a daeraha ma hasili, ngini balasu ni gasa ma hasili ma balangu sa'olo ninga jou-jou ga'a siwola i'a di'a Ma JOU. 20Gulupungu toma jelai ma hasili ma mulaingi, ngini balasu na si'a'a sa'olo roti ḇululu rimoi ga'a siwola i'a sa'olo ninga jou-jou di'a Ma JOU. Gena-ge ma tero ninga jou-jou jelai ga'a na ruju siwo-wola ma miri re ma raoso, gena-ge ni sidoa'a sa'olo jou-jou. 21Toma gulupungu jelai ma hasili ma mulaingi, ngini balasu na sipula'a ma balangu sa'olo ninga jou-jou ga'a siwola i'a ra Ma JOU, taninga ju'uda tala nena re si'a.>>
Ḏosa sangaja ua
15:22-31
22<<Na'o kama sangaja, ngini ni mete'e ua parenta rimoi toma parenta mo-moini gena-ge ga'a Ma JOU ro singadolo ra Musa, 23gena-ge ga'a Ma JOU ro parenta mo-moini ga'a sipula'a ra Musa di'a ngini, mulaingi toma wangere Ma JOU 'o pula'a 'ai parenta re kama togumu ua taninga ju'uda tala, 24Si'ade-'ade ngini ni si'a'a ua parenta gena-ge rimoi kama sangaja ua, re ngowa'a Israel ma toro-toropo 'aḏi waro ua, dadi Israel ma toropo mo-moini 'aḏi sidoa'a sapi ma ngowa ma nau'u rimoi toma duo-duono ino sa'olo jou-jou ga'a tau'u simoini re ma bounu gena-ge 'i sisanangi Ma JOU 'ai 'akala re sinyingara, simete'e jou-jou ngo-ngoromo re jou-jou 'anggur ma ḇanyo, mete'e enanga ma 'atoranga; re ḏi'i 'abingi ma nau'u rimoi sa'olo jou-jou di'a sigofi ngowa'a ra Ma JOU 'ai momina. 25Dadi 'imam balasu 'o 'a'a ngowa'a Israel ma toropo mo-moini dadunu marimoi moju ra Ma JOU kara Ma Jou'ongu Madutu 'o singi-ngiranga manga ḏosa, sababu sala gena-ge 'i dadi kama sangaja ua, re ananga raḏi sidoa'a manga jou-jou: gena-ge jou-jou ngo-ngoromo re jou-jou ga'a tau'u simoini di'a sigofi ananga ra Ma JOU 'ai momina di'a sala gena-ge ga'a ananga ya si'a'a kama sangaja ua. 26Re Ma JOU ḏuanga i'a 'O singi-ngiranga ngowa'a Israel mo-moini toma ngowa'a Israel ma toropo ananga gena-ge manga ḏosa re ḏi'i ngowa'a tagi-tagi ino ga'a raḏi tegoro taninga sigolona, sababu ananga mo-moini raḏi 'a'a ḏosa kama sangaja ua. 27Si'ade-'ade ngowa'a matengo 'a'a ḏosa kama sangaja ua, bae na-nau'u bolo we-were'a, ananga gena-ge balasu 'aḏi sidoa'a jou-jou 'abingi ma were'a rimoi ma 'umuru musungu rimoi sa'olo jou-jou di'a sigofi ngowa'a ra Ma JOU 'ai momina; 28re 'imam balasu 'o si'a'a ngowa'a gena-ge dadunu 'o dadi marimoi moju ra Ma JOU di'a ngowa'a gena-ge ga'a 'a'a ḏosa kama sangaja ua. Rema duhu so'o gena-ge ngowa'a gena-ge dadunu 'o dadi marimoi moju ra Ma JOU re Ma JOU ḏuanga i'a 'O singi-ngiranga ngowa'a gena-ge 'ai ḏosa. 29Hukumu rimoi i'a ma tero di'a ngowa'a mo-moini ga'a 'a'a ḏosa kama sangaja ua: bae ngowa'a Israel madutu bolo ngowa'a tagi-tagi ino ga'a tegoro taninga sigolona. 30Mada'a ngowa'a ga'a 'a'a sala rimoi i'a rema sangaja, bae ngowa'a Israel madutu, bae ngowa'a tagi-tagi ino, ngowa'a gena-ge 'o si'u'ua Ma JOU re unanga gena-ge balasu sisupu tai ngowa-ngowa'a manga sigolona. 31Ma sababu unanga ro si'u'ua Ma JOU 'ai 'Idini re 'o mete'e riwara 'Ai parenta; tantu ḏua unanga gena-ge balasu sisupu tai ngowa-ngowa'a manga sigolona, re 'ai ga'a ma rapu, unanga masiretene balasu 'a doiti.>>
Ngowa'a matengo i'a ga'a mete'e riwara Sabata ma wangere ma 'atoranga
32Wakutu ngowa'a Israel toma daeraha baulaco, ananga 'aḏi sanga ngowa'a matengo ga'a 'oro ate tau'u toma Sabata ma wangere. 33Dadi ngowa-ngowa'a ga'a sanga unanga gena-ge ga'a 'oro ate tau'u, unanga ananga 'u sitalaḏi ra Musa re Harun toma ngowa'a Israel manga toropo mo-moini. 34Ngowa'a Israel 'aḏi siosama ngowa'a gena-ge toma bui sababu waro madutu nyangu 'oru unanga 'ai hukumana. 35Ma JOU 'o kanau moju ra Musa:<<Ngowa'a gena-ge balasu 'o sihukumu sengene. Ngowa'a Israel mo-moini balasu poini unanga reo maḏi toma suyu'u ma daeraha ma ḏuḏunu.>> 36Dadi ngowa'a Israel manga toropo mo-moini, ananga gena-ge 'aḏi gasa unanga supu toma suyu'u ma daeraha ma ḏuḏunu, kara 'aḏi poini unanga reo maḏi singadolo 'o sengene, ma tero sa'olo Ma JOU ro parenta ra Musa.
Si'elingi juba ma 'uḏu ma renge-renge
37Ma JOU 'o kanau moju ra Musa: 38<<Siajele toma ngowa'a Israel re kanau ra ananga mangale renge-renge rema betongo so'o ne: <Ngini balasu ni 'a'a renge-renge taninga baju ma dere-dere ḇuḇuku rata, re sidogo lawe balao madutu toma renge-renge gena-ge. 39Dadi ma renge gena-ge 'i dadi si'elingi ngini. Na'o na oḏi'i, ni 'elingi Ma JOU 'ai parenta mo-moini singadolo ngini na siḏagi re ni mete'e riwara ninga 'akala re sinyingara ma mau bolo ninga la'o masiretene ma mau, gena-ge ma tero sa'olo were'a ga'a 'a'a tinikai riwara. 40'Ari maksudu, la ngini ni 'elingi re siḏagi tau-taunu 'Ari parenta mo-moini re ni siwola i'a ra Ma Jou'ongu Madutu ga'a ngini ni silamo'o re siḏubuso. 41Ngoi nena-ne Ma JOU Ma Jou'ongu Madutu ga'a ngini ni silamo'o re siḏubuso, ga'a Reto gasa ngini supu toma tana'a Mesir, la Ngoi to dadi Ma Jou'ongu Madutu ga'a ni silamo'o re siḏubuso; Ngoi nena-ne Ma JOU, Ma Jou'ongu Madutu ga'a ngini ni silamo'o re siḏubuso.
2025 Indonesian Bible Society (LAI)